Xhun 19
19
1Echetz tiqʼol vet eluʼl Jesuuse taʼn Pilaato, tul ibʼekʼ vet Pilaato itzʼuʼmal Jesuus. 2Yaʼne ibʼit vet inqʼa sol val u kokos uvaʼ chʼiʼxunyichxhtuʼ, eche koroona tetz mam iqʼesal. Tul taqʼaq vet jaʼ tiviʼ Jesuus. Tul toksaaq vet val u oksaʼm tiʼ Jesuus uvaʼ kaqko ikaʼyeʼ tetz mam iqʼesal tiʼ imaxubʼel Jesuus.
3Tul ech nikich motx tal te Jesuus s-eche: —¡Saqivaq! ¡Okoq aqʼij, axh u mam iqʼesal inqʼa tij imam Israeel! —chichichaqe. Tul poqox Jesuus s-qʼabʼ taʼn.
4Yaʼne eluʼl Pilaato inpaqte xoʼl inqʼa xaol, inqʼa tij imam Israeel. Tul ech tal Pilaato te inqʼa iqʼesal tij imam Israeel s-eche: —¡Abʼitaq! Toq viqʼo eluʼl naq u vinaq sevatz. Tul laʼ bʼen sete uvaʼ yeʼl invaʼq ipaʼv naq nik itxhej sinvatz uvaʼ laʼ tel qukʼaxbʼisa naq s-tiʼ, —xeʼt Pilaato.
5Yaʼne el vet ul Jesuus. Tul atich vet jaʼ u kokos chʼiʼx tiviʼ Jesuus. Atz atichat vet ok u oksaʼm uvaʼ kaqkoich ikaʼyeʼ tiʼ Jesuus. Yaʼne ech tal Pilaato s-eche: —Saqivaq naq u vinaq tza, —xeʼt Pilaato.
6Ilixetz vet Jesuus taʼn inqʼa iqʼesal oksan yol vatz Tiuxh, atz taʼn inqʼa pol, tul motx sichʼini. Tul echaq motx tal s-eche: —¡Jaʼoq Jesuus vatz kurus! ¡Jaʼoq Jesuus vatz kurus! —chichichaq isichʼineʼ.
Yaʼne ech tal Pilaato s-eche: —Ape. Iqʼovaq naq, tul bʼenoq etaqʼ jaʼ naq vatz kurus. Pet aloq yeʼl invaʼq ipaʼv naq nik itxhej sinvatz, —xeʼt Pilaato.
7Tul ech tal inqʼa iqʼesal tuqʼeʼybʼal inqʼa tij imam Israeel s-eche: —At vaʼl u qubʼekʼbʼal tzʼibʼamal ka. Tul aʼ nik tal u qubʼekʼbʼal uvaʼ laʼ kameʼl naq, tan tiʼ uvaʼ nik tal tibʼ naq sikʼaol quBʼaal Tiuxh, —xeʼtaqe.#Leviitiko 24.16
8Tabʼietz vet Pilaato u yol uvaʼe, tul aʼl tel ixoʼv Pilaato. 9Tul bʼen vet ok Pilaato tu tatibʼal tetz nimla iqʼesal. Tul tiqʼo ok Pilaato Jesuus s-tiʼ. Tul ech tal Pilaato te Jesuus s-eche: —¿Poro taletzxh tzajnaʼql axh? —xeʼt Pilaato. Tul yeʼl Jesuus tzaqʼbʼi.
10Yaʼne ech tal Pilaato te Jesuus s-eche: —¿Kam s-tiʼil yeʼ nik atzaqʼbʼe in? ¿Maqetz yeʼ ootzaqle uvaʼ at t-inqʼabʼ oq laʼ jaʼ axh vatz kurus, atz atat t-inqʼabʼ oq laʼ intxhaqpu el axh? —xeʼt Pilaato.
11Tul ech tal Jesuus s-eche: —Il axh at aviqleʼm qʼaoq s-viibʼa, pet tiʼ kuxhte uvaʼ, aʼ u quBʼaal Tiuxh qat aqʼon vaviqleʼm. Pet palnaʼq vipaʼv naq u qʼesal oksan yol vatz Tiuxh uvaʼ qat oksan in taqʼabʼ viʼ vapaʼv, —xeʼt Jesuus.
12Taʼnetz kuxh tabʼi vet Pilaato viyol Jesuus, tul aʼl ibʼant vet Pilaato yaʼl tiʼ itxhokox txumbʼal tiʼ itxhaqpeʼl Jesuus. Poro aalxh nikich motx isichʼin inqʼa iqʼesal tuqʼeʼybʼal inqʼa tij imam Israeel. Tul echaq nikich motx tal s-eche: —Oqetz toq atxhaqpu el naq u vinaq uvaʼe, tul axhetzebʼ palsan iyol Seesar. Tan naqe uvaʼe nik tal tibʼ s-mam iqʼesal, tul naqetz vete nik eesan iqʼij Seesar tuchʼ viyoloneʼ, —chichichaqe.
13Tabʼietz vet Pilaato u yol uvaʼe, tul tiqʼo vet eluʼl Pilaato Jesuus inpaqte. Tul kʼuqeʼv vet Pilaato tu tabʼibʼal uvaʼ nik taqʼvat kuʼ yol tinuqul, u tabʼibʼal Pilaato uvaʼ bʼitich sivaniche. Tul Gaavataich ibʼij u atibʼal tu yolbʼal arameeo, viyolbʼal inqʼa tij imam Israeel.
14Aʼxhetz itxhaqʼaan qʼij, uvaʼ ech qalich vet inima inqʼa tij imam Israeel u nimla qʼij Ipal Aanxel, tul ech tal Pilaato te inqʼa iqʼesal tijaq imam Israeel s-eche: —¡Il naq, u mam eqʼesal, ila! —xeʼt Pilaato.
15Tul aalxh isichʼin inqʼa iqʼesal inqʼa tij imam Israeel. Tul ech motx tal s-eche: —¡Paloq el naq! ¡Paloq el naq! ¡Aqʼ jaʼ naq vatz kurus! —chichichaqe.
Tul ech tal Pilaato s-eche: —¿Toqetz kol vaqʼ jaʼ naq, u mam eqʼesal, vatz kurus nik etaleʼ? —xeʼt Pilaato.
Tul ech tal inqʼa iqʼesal oksan yol vatz Tiuxh s-eche: —Yeʼl invaʼtoʼq mam quqʼesal ati. Pet taʼnxh Seesar, —xeʼtaqe.
16Echetz toksat vet Pilaato Jesuuse tiqʼabʼ inqʼa sol, atz tiqʼabʼ inqʼa tij imam Israeel tiʼ taqʼax jaʼ Jesuus vatz kurus. Tul iqʼol vet Jesuus taʼn inqʼa sol.
Uvaʼs ikam vet quBʼaal Jesuus vatz kurus
Tio 27.32-50; Kuxh 15.21-37; Luk 23.26-49
17Yaʼne aqʼax vet tiqa Jesuus val u kurus. Tul yekich vet Jesuus t-val u atibʼal uvaʼ ‹Bʼaqil Viʼ,› chich eʼli. ‹Goolgota,› chich telaʼp u yol Bʼaqil Viʼ tiyolbʼal inqʼa tij imam Israeel. 18Tul tzitzi ex aqʼlik jaʼ Jesuus vatz kurus. Tul aqʼaxat jaʼ kaʼvaʼl vinaq vatz kurus kʼatz Jesuus. Vaʼl u vinaq jaʼ tisebʼal Jesuus; atz vaʼt u vinaq jaʼ timax Jesuus. Tul aʼ Jesuus jaʼ tinikʼa.
19Yaʼne ibʼekʼ Pilaato taqʼax jaʼ val u tzʼibʼ tiviʼ u kurus uvaʼ nikich alon vipaʼv Jesuus. Tul ech nikich tal s-eche: —aʼ jesuuse, u aj nasareet, u mam iqʼesal inqʼa tij imam israeel, —chichich u tzʼibʼ. 20Tul mamala inqʼa tij imam Israeel motx sikʼlen u tzʼibʼ uvaʼ atich jaʼ tiviʼ u kurus, tan naqlich kuxh atil u atibʼal uvaʼ jaʼk Jesuus vatz kurus kʼatz u tenam Jerusaleen. Tul tzʼibʼamich u yol t-yolbʼal evreeo, atz tu yolbʼal grieego, atz tu yolbʼal latiin.
21Yaʼne ech tal inqʼa iqʼesal oksan yol vatz Tiuxh te Pilaato s-eche: —Yeʼ koq qat atzʼibʼa kuʼe u yol uvaʼ: «Aʼ naqe u mam iqʼesal inqʼa tij imam Israeel,» chiche. Pet aʼ koq qat atzʼibʼa uvaʼ: «Ech tal naq s-eche: –Aʼ ine u mam iqʼesal inqʼa tij imam Israeel, –xeʼt naq,» chich koq atzʼibʼataʼ, —xeʼtaq te Pilaato.
22Tul ech tal Pilaato s-eche: —Kam uvaʼ qat inbʼekʼ itzʼibʼaleʼ, tul yeʼl paqul laʼ utxh vet ijalpeʼ, —xeʼt Pilaato.
23Aqʼax vet jaʼ Jesuus vatz kurus taʼn inqʼa sol. Maʼtichetz taqʼax vet jaʼ Jesuus vatz kurus, yaʼne tiqʼo vet inqʼa sol u toksaʼm Jesuus. Tul kajvaʼl el s-vatz motx ibʼana. Yaʼne tiqʼo vet tzaan inqʼa sol vaʼt viqinkin chemich txhas toksaʼm Jesuus, val uvaʼ yeʼl bʼeeq tzʼisbʼal atich s-tiʼ. Pet tiraich kuxh vaʼl qinkin chemich bʼuʼq; nik ixeʼt tiviʼ tetxhal ikoʼp tixeʼ. 24Tul ech motx tal s-vatzaqil tiʼ u chelkin bʼuʼq s-eche: —Yeʼ laʼ qulitxʼ u toksaʼm naq uvaʼe. Pet aʼl saatxhoq oʼ tiʼ ikʼonil jaʼ vaʼq kam tiʼ tilixeʼ jaʼl oʼ laʼ txʼakon oʼ. Tul aʼ, oʼ laʼ iqʼon, —xeʼtaqe. Echetz telaʼpune u yol uvaʼ tzʼibʼamal ka t-viyolbʼal quBʼaal Tiuxh uvaʼ ech nik tal s-eche:
—Motx ijatx u voksaʼm
s-vatzaq.
Tul motx ibʼan vaʼl saatxh
tiʼ ikʼonil jaʼ vaʼl kam
tiʼ tilixeʼ jaʼl laʼich txʼakon
tiʼ u voksaʼm,
—chich u yol.
Tul echxh uvaʼe motx ibʼan inqʼa sol.#Saalmo 22.18
25Atich vitxutx Jesuus tal uvaʼ aqʼaxik jaʼ Jesuus vatz u kurus, tul atichat vitxhʼoj txutx Jesuus. Atz atich Mal, u tixqel Kleoofas. Atz atich Mal, u aj tenam Magdaala. 26Tiletz vet Jesuus vitxutx, atz til vet Jesuus uvaʼ atich in tzitzi, tul ech tal Jesuus te vitxutx s-eche: —Intxutx, aʼ vet naq aval uvaʼe toq ibʼaneʼ, —xeʼt Jesuus s-viʼ, in, uvaʼ nikich intxhus vibʼ s-kʼatza, atz in, uvaʼ atichxh taanima Jesuus s-viʼ.
27Yaʼne ech tal Jesuus s-ve s-eche: —Txa, nik val see, atxutx vet vintxutx toq ibʼaneʼ, —xeʼt Jesuus. Tul yekich viqʼo vet vitxutx Jesuus s-viʼ t-votzotz.
28Taletz kuxh vet Jesuus u yol uvaʼe, tan tootzaqich vet Jesuus uvaʼ maʼtich toleʼv vet Jesuus tiʼ ibʼanax kam uvaʼ txhaqax tzaan s-tiʼ. Echetz talt vet Jesuuse u yol s-eche: —Kamxh in t-tzaqa tziʼil, —xeʼt Jesuus. Tiʼetz kuxh talt Jesuus u yol uvaʼe, tul elaʼpun vet u yol uvaʼ tzʼibʼamich ka s-tiʼ t-viyolbʼal quBʼaal Tiuxh.#Saalmo 69.21
29Atich val u atibʼal uvaʼ nojnaʼqich kuʼ vinaagre s-tuul. Tul ex aqʼaxoq kuʼ val uvaʼ, eche qʼos xeʼ u vinaagre. Tul toksaaq bʼen tijuʼ val u aj tzeʼ. Tul taqʼaq jaʼp titziʼ Jesuus.
30Inatxhetz vet Jesuus u vinaagre, tul ech tal Jesuus s-eche: —Oleʼvyetz vet in s-tiʼ, —xeʼt Jesuus. Tul viqʼel ikuʼ iviʼ Jesuus. Tul toksa vet Jesuus u taanxelal tiqʼabʼ quBʼaal Tiuxh. Tul el vet ikʼuul.
Uvaʼs ichʼetex txala tuul quBʼaal Jesuus
31Aʼetz ikuʼ vet qʼij uvaʼs ixeʼt vet kuʼ inqʼa tij imam Israeel tiʼ inimal u nimla qʼij Ipal Aanxel. Echichetz vet eqal u xeem qʼij saavado; aʼe u bʼaxa qʼij tetz u nimla qʼij Ipal Aanxel. Tul mam yolichaq vinimal u nimla qʼij vatz inqʼa tij imam Israeel. Tul yeʼletz laʼich utxh ikaj vaʼq kamnaʼq vaʼl aqʼbʼal vatz kurus tuulbʼal u xeem qʼij saavado s-vatz. Echetz nal kuxh ibʼen vet inqʼa iqʼesal tuqʼeʼybʼal inqʼa tij imam Israeel, tul ech ex tal te Pilaato s-eche: —Kuy qupaʼv. Tul bʼen itxʼaq inqʼa asol u vatz taqan inqʼa vinaq, inqʼa at jaʼ vatz kurus, —xeʼtaqe. Tan aʼichaq isaʼ nal kuxh laʼich ikamsal el inqʼa vinaq, tul laʼich iqʼolaq kuʼl inqʼa vinaq vatz u kurus taʼn.
32Aqʼbʼetz vet inqʼa sol tal uvaʼ atich jaʼ inqʼa vinaq vatz kurus, tul ex itxʼaq vet inqʼa sol vatz taqan vaʼl u vinaq txala Jesuus. Yaʼne echatxh itxʼaqt tetz invaʼt u vinaqe.
33Aqʼbʼetz vet inqʼa sol tiʼ itxʼaqax vatz taqan Jesuus, tul motx tila uvaʼ maʼtich ikam vet Jesuus. Echetz yeʼl vet vatz taqan Jesuus itxʼaq inqʼa sol. 34Pet chʼetex kuxh vet txala tuul Jesuus s-laansa taʼn val u sol. Tul yekich eluʼl kaq tuchʼ aʼ titxhiʼoʼl Jesuus.
35Tul vilxh kam inqʼa motx utxhi, in Xhun. Tul iletze tira nik vaqʼ etootzaqi. Tul inuquletzxhte uvaʼ nik intzʼibʼa ka sete. Tul tiʼetz uvaʼ tira nik val inuqul sete, tul ant vet ex laʼ niman inqʼa yol tiʼ Jesuus. 36Qatetz ibʼan inqʼa yol inqʼae, tiʼ uvaʼ laʼ elaʼp val u yol uvaʼ tzʼibʼamal ka t-viyolbʼal quBʼaal Tiuxh, uvaʼ ech nik tal s-eche: —Yeʼl ibʼaqil u vinaq laʼ txʼaqaxi, —chich u yol.#Eeksodo 12.46; Nuumeros 9.12; Saalmo 34.20
37Atz ech nik tal vaʼt u yol uvaʼ tzʼibʼamal ka t-viyolbʼal quBʼaal Tiuxh s-eche: —Laʼ saqil u vinaq taʼn inqʼa xaol, inqʼa chʼeʼon u txala tuul, —chich u yol.#Sakariias 12.10; Apokaliipsis 1.7
Uvaʼs imuqux vet quBʼaal Jesuus
Tio 27.57-61; Kuxh 15.42-47; Luk 23.50-56
38Xamtichetz veteʼ tul bʼen vet Xhuʼl, u aj Arimateea, tiʼ tabʼil vitxhiʼoʼl Jesuus te Pilaato. Tan niman tetz Jesuus Xhuʼl. Poro jutx kuxh nikich inimat Xhuʼl Jesuus, tan nikich ixoʼv Xhuʼl te inqʼa iqʼesal tuqʼeʼybʼal inqʼa tij imam Israeel. Ikuyetz vet Pilaato taqʼax vitxhiʼoʼl Jesuus te Xhuʼl, yaʼne ex tiqʼo vet kuʼl Xhuʼl vitxhiʼoʼl Jesuus vatz u kurus.
39Tul antich Nikodeemo, uvaʼ maʼtich tex tiʼ isolil Jesuus s-qʼeqxeʼm, tul iqʼomich oʼkʼalal (100) liivra u txʼumbʼisabʼal taʼn Nikodeemo tiʼ toksal tiʼ vitxhiʼoʼl Jesuus, u txʼumbʼisabʼal uvaʼ miiraiche uvaʼ yuelich tibʼ tuchʼ vaʼt u txʼumbʼisabʼal uvaʼ aaloe ibʼij.#Xhun 3.1-2
40Yaʼne iqʼol vet vitxhiʼoʼl Jesuus taʼn Xhuʼl tuchʼ Nikodeemo. Tul itxʼutaq vet vitxhiʼoʼl Jesuus t-inqʼa jisaqkin bʼuʼq uvaʼ liinoxhtuʼ uvaʼ maʼtich toksal vet txʼumbʼisabʼal s-tiʼ. Tan ech uvaʼe nik ibʼan inqʼa tij imam Israeel tiʼ imuqux invaʼq u kamnaʼq.
41Atichetz val u xhoraal kʼatz uvaʼ jaʼk Jesuus vatz kurus, tul tzitzi kʼotich val u muqbʼal tetz kamnaʼq vatz val u pejoʼn. Tul yeʼxnaqich oksaloq invaʼq kamnaʼq s-tuul. 42Naqlichetz kuxh al u muqbʼal kamnaʼq kʼatz uvaʼ jaʼk Jesuus vatz kurus. Echetz s-tiʼile nal kuxh ex aqʼaxoq vet ka vitxhiʼoʼl Jesuus tzitzi. Naletz kuxh imuqux Jesuus. Tan toqnaʼqich xeʼtoq vet nimaloq u nimla qʼij Ipal Aanxel uvaʼs laʼich iqʼeqxeʼ. Aʼe u xeem qʼij laʼich ibʼana. Tan yek nikichaq ibʼan vet tutxh tibʼ inqʼa tij imam Israeel s-kuʼebʼal qʼij tiʼ inimal u xeem qʼij.
Actualmente seleccionado:
Xhun 19: ixlC
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2016, Wycliffe Bible Translators, Inc. All rights reserved.