LUKU 20

Yesu gbɛkana a ikooi

(Mat 21:23-27; Maa 11:27-33)

1Zĩkea Yesu tɛn yã da gbɛ̃nɔnɛ Luda ɔnn, àtɛn baaru nna kpáńnɛ, akũ sa'orikinɔ kũ ludayãdannɛrinɔ kũ gbɛ̃ zɔ̃kɔ̃nɔ sù 2ò pìnɛ: Ǹ owɛrɛ, iko kpaten ntɛn yã dínɔ kɛoo? Dí mɛ́ à n gba iko dí pìi? 3Akũ à wèḿma à pì: Makũ se mani yã gbɛkaáwa. À omɛnɛ, 4Yahaya gbɛ̃nɔ da'itɛkɛnaa bò Luda kĩnaan yáa, ke bisãsiri kĩnaamɛ? 5Akũ ò yã gɔ̃̀gɔ̃ ò pì: Tó o pì Luda kĩnaamɛ, ani ó la, bɔ́yãin ódi Yahaya yã síroo? 6Tó o pì bisãsiri kĩnaamɛ sɔ̃, gbɛ̃ sĩnda pínki ni ó pápa kũ gbɛ̀ɛo ò ó dɛdɛ, zaakũ ò Yahaya annabikɛ sì. 7Akũ ò wèa ò pì: Ó dɔ̃ gu kũ à bònlo. 8Akũ Yesu pìńnɛ: Makũ se mani iko kũ matɛn yã dínɔ kɛo oárɛro.

Geepi líkpɛ arukɛrinɔ

(Mat 21:33-46; Maa 12:1-12)

9Akũ Yesu ɛ̀ra à yã lɛ̀kɔ̃ańnɛ à pì: Gbɛ̃ke mɛ́ à geepi líkpɛ bà, akũ à nà arukɛrinɔnɛ ń ɔĩ à fùtɛ kũ táo à gɔrɔ pla kɛ̀ gwe. 10Kũ geepizɔ̃gɔrɔ kà, akũ à a zĩ̀ri ke zĩ̀ arukɛrii pìnɔa, de ò a geepi nɛ́ pì kpáa, akũ arukɛrii pìnɔ a gbɛ̃̀, ò à gbàrɛ ɔkori. 11Akũ à ɛ̀ra à zĩ̀ri pãnde zĩ̀ dɔ, akũ ò a gbɛ̃̀ ò wé'i dàa ò a gbàrɛ ɔkori. 12Akũ à ɛ̀ra a gbɛ̃ aakɔ̃de zĩ̀ dɔ, akũ ò a kĩ̀nna ò pɛ̀a. 13Akũ burade pìi pì: Mani kɛ deramɛ sàa? Mani ma nɛ́gɔ̃gbɛ̃ mɛ̀n do yenyĩde zĩḿma. Ke oni a yã da gwɛɛ? 14Kũ arukɛrii pìnɔ a è, ò pìkɔ̃nɛ: Túbiblerin dí, ò a dɛ, a túbi ni gɔ̃wɛrɛ. 15Akũ ò bò kãao bura gũn, ò a dɛ̀.

Tɔ̀! Bɔ́n burade pì ni kɛ kũńwoo? 16Ani su à arukɛrii pìnɔ dɛdɛ à bura pì na gbɛ̃ pãndenɔnɛ ń ɔĩ. Kũ gbɛ̃nɔ yã pìi mà ò pì: Òsun ero! 17Akũ Yesu ń gwá tíii à pì: Yã kũ ò kɛ̃̀ Luda yãn díkĩna de deraa?

Gbɛ̀ kũ kpɛ́borinɔ pã kpài

mɛ́ à gɔ̃̀ kpɛ́ kusuru gbɛ̀ mìde ũ.

18Gbɛ̃ kũ à lɛ̀tɛ gbɛ̀ɛ pìia ni wíwimɛ.

Tó gbɛ̀ɛ pìi lɛ̀tɛ à sì gbɛ̃a sɔ̃, ani a ú lɔ́mɛ.

Bɛ'ɔgɔkpana Sizaa yã

(Mat 22:15-22; Maa 12:13-17)

19Ludayãdannɛrinɔ kũ sa'orikinɔ dɔ̃̀ kũ ń yãin à yãlɛkɔ̃anaa pìi ò, akũ ò zɛ́ wɛ̀tɛ ò a kũ gɔ̃̀nɔ, ama ò vĩna kɛ̀ gbɛ̃nɔnɛ. 20Òtɛni a kpákpa, akũ ò zãmbade kũ òtɛni ń zĩda ditɛ gbɛ̃ mana ũnɔ zĩ̀a, de ò le ò a kũ a yã'onaa gũn, ò a kpá ń bùsu gbãnadea à gbãna mɔnɛ. 21Akũ zãmbade pìnɔ a là ò pì: Dannɛri, ó dɔ̃ kũ ndì yã o ǹ yã dańnɛ a zɛ́a, ndì gbɛ̃ wɛ́ gwao, ndì Luda zɛ́ dańnɛ kũ yãpurao. 22À zɛ́ vĩ ò bɛ'ɔgɔ kpá Sizaa yá ke òsun kpáaro? 23Yesu ń manafikikɛ dɔ̃̀ḿma, akũ à pìńnɛ: 24À ɔgɔ pì do mɔmɛnɛ mà gwa. Dí mì wãnzãn dí kũ a tɔ́oo? Ò wèa ò pì: Siza pɔ́mɛ. 25Akũ à pìńnɛ: Tɔ̀, à pɔ́ kũ à de Siza pɔ́ ũ kpá Sizaa, à pɔ́ kũ à de Luda pɔ́ ũ kpá Ludaa. 26Akũ ò fùa ò a kũ a yã'onaa gũn gbɛ̃nɔ wára. A yãwemmanaa bò ń sarɛ, akũ ò ń lɛ́ nàkɔ̃a.

Gɛ̀nɔ vuna yã

(Mat 22:23-33; Maa 12:18-27)

27Akũ Sadusi kũ òdi pi gɛ̀nɔ dì vuronɔ sù Yesu kĩnaa, ò a gbɛ̀ka 28ò pì: Dannɛri, Musa òwɛrɛ a takada gũn à pì: Tó gbɛ̃ gà à a nanɔ tò nɛ́'isari, a dakũna gyaanɔ pì sɛ́ de à le à nɛ́ buri dato a vĩ̀ninɛ. 29Lɛmɛ dedokɔ̃nɔnɔn kun gbɛ̃nɔn suppla. Woru nɔ sɛ̀, akũ à gà nɛ́'isari. 30Akũ Sabi nɔ pìi sɛ̀ dɔ. 31Sabi gbɛra Biɔ sɛ̀ dɔ. Ò kɛ̀ lɛ ń gbɛ̃nɔn suppla ń pínki, ò gàga nɛ́'isari. 32Ń pínki gbɛran nɔ pìi gà se. 33Tɔ̀! Gɛ̀nɔ vuna gɔrɔ zĩ ń dí mɛ́ anigɔ̃ nɔ pì vĩi? Zaakũ ń gbɛ̃nɔn suppla ń pínki ò a dɔ̃̀ nɔ ũmɛ. 34Akũ Yesu wèḿma à pì: Andunia la gbɛ̃nɔ dì nɔ sɛ́ òdi zã kɛ, 35ama gbɛ̃ kũ Luda dìtɛ kũ ò kɔ̃ sìo ò bo gan ò andunia dufu lenɔ ni nɔ sɛ́ro, oni zã kɛro. 36Onigɔ̃ kun lán malaikanɔn kun nàmɛ, oni ga doro. Onigɔ̃ de Luda nɛ́nɔ ũmɛ, gàavunɔ ũ. 37Bee Musa à gɛ̀nɔ vuna yã bìriańnɛ, gu kũ à tariankpã yã òn à pì, Dikirimɛ Ibrahĩ kũ Isaakuo kũ Yakubuo Luda ũ. 38Dikiri dì kɛ gɛ̀nɔ Luda ũro, gbɛ̃ bɛ̃nɛnɔ Ludamɛ, zaakũ gbɛ̃ sĩnda pínki bɛ̃nɛ Ludanɛ. 39Akũ ludayãdannɛri kenɔ fùtɛ ò yã ò ò pì: Dannɛri, n yã mana ò. 40Akũ odi sù ò yãke làa doro.

Arumasihu buri yã

(Mat 22:41-46; Maa 12:35-37)

41Yesu ń lá à pì: À kɛ̀ dera òdi pi Dauda burin Arumasihu ũu? 42Zaakũ Dauda pì Zabura takada gũn:

Dikiri pì ma dikirinɛ à vutɛ a ɔplai

43ari àgɔ̃ a ibɛrɛnɔ kɛnɛ tìntin ũ.

44Kũ Dauda a sìsi Dikiri, à kɛ̀ dera anigɔ̃ de a buri ũ dɔɔ?

Ludayãdannɛrinɔ kũ Farisinɔ manafiki

(Mat 23:1-36; Maa 12:38-40)

45Kũ gbɛ̃ sĩnda pínki tɛni a yã ma, akũ à pì a ìbanɔnɛ: 46À laakari kɛ ludayãdannɛrinɔi. Òdigɔ̃ ye ògɔ̃ kure kũ uta zɔ̃kɔ̃nɔo dana, de ògɔ̃ fɔ kpákpaḿma ɛtɛnɔa. Òdigɔ̃ ye ò vutɛ aduakɛkpɛ vutɛki mananɔn kũ pɔnna pɔ́ble vutɛki mananɔo. 47Òdi adua gbã̀na kɛ de gbɛ̃nɔ ń e yãi, akũ òdi gyaanɔnɔ kpɛ́ síḿma. Ń wɛ́tãmmana nigɔ̃ pãsĩ de gbɛ̃ sĩnda pínki pɔ́la.

Actualmente seleccionado:

LUKU 20: BB2005

Destacar

Copiar

¿Quieres tener guardados todos tus destacados en todos tus dispositivos? Regístrate o inicia sesión

Aprende más sobre Bisã Bible 2005

LUKU 20

Versículos bíblicos populares de
LUKU 20

Escucha a LUKU 20

Biblia:

Busa

Versión: Bisã Bible 2005 - BB2005

LUKU 20

LUKU 20

Versículos bíblicos populares de LUKU 20

Escucha a LUKU 20

Biblia:

Busa

Versión: Bisã Bible 2005 - BB2005

LUKU 20

Versículos bíblicos populares de
LUKU 20