മറ്‌ക്കോസ് 15
15
പീലത്തോസ് ഏസുണ കേ്ള്‌വി കേ്ക്കാ്
1ബെ്ഡ്യാകാല ജാമാത്തിലി എഗുദ പൂസാരി തലെവല സട്ടന പോയി എഗുദ മൂപ്പലണാമ് ബേദ ബാത്ത്യലണാമ് എഗുദ ഗോഡ്‌ദിക്കാറാര്‌ണാമ് കണ്ടാര്. അക്കുളെ അവാര് ഒന്റായി എ്ണേന്ത് ഏസുണ എന്ത സെയ്‌ല എന്ത് സട്ടകെ്ട്ടിനാര്. അദ്‌ക്ക് പ്‌റ ഏസുണ പ്‌ഡിത്ത് കെ്ട്ടി എ്ഡ്‌ത്ത് പോയി ണാഡ് അദിഗാരി ആന പീലത്തോസ് കയ്യിക്കെ ഒപ്പഡിത്താര്.
2പീലത്തോസ് ഏസുണ കേ്ട്ടാ്: <<ണീ എഗുദാര്‌ദ് റാജാവ?>>
അക്കുളെ ഏസു: <<സെരിത്തെ, ണീ സൊല്ലുറ പാസെത്തെ>> എന്ത് സൊന്നാ്.
3എഗുദ പൂസാരി തലെവല ഏസുണ പറ്റി എത്തിന്യൊ കുറ്റഗ സൊന്നാര്. 4പീലത്തോസ് പിന്നേമ് കേ്ട്ടാ്: <<ണിനാക്ക് ഒന്റുമ് സൊല്ല്യ ഇല്ലേഗ? ഈങ്ക് ണോഡു, ഇവാര് ണിനാണ എത്തിനി കുറ്റഗ സൊല്ലുറാര്!>>
5ഇച്ചെ സൊല്ലിറ്റ്‌മ് ഏസു ഒന്റുമ് സൊല്ലാത്താദ്‌ണാലെ പീലത്തോസ് അന്തബ്‌ട്ടെക്കിനാ്.
ഏസുണ കൊല്ല്യ ബിദിക്കാര്
6എല്ല പെസഗെ ണോമ്പി ണാള്‌മ് ജെയില്‌ക്ക് ഇക്കിര്‌ക്ക ആള്‌ഗാദിലി ആള്‌ഗ ബ്‌ഡ്യ സൊല്ലുറ ഒരുത്താന പീലത്തോസ് ഇ്റാക്കി ബ്‌ട്ടിര്‌ന്താ്. 7അയ്യി ഗള്യേലി ബറവാസ് എങ്ക ഒരുത്താ് മല്ല്‌സണ്ടെ കെ്ട്ടി കൊലെ സെയ്‌ദവാര്‌ദ് ഒപ്പ ജെയിലിലിര്‌ന്താ്. 8അച്ചെ ആള്‌ഗ പീലത്തോസ്‌ദ് പട്ട്‌ക്ക് പോയി എപ്പ്‌മ് സെയ്‌ര പാസെ എമാക്ക് ഒരു ആള്‌ണ ബ്‌ട്ട് തരുഡൊ എന്ത് സൊന്നാര്.
9പീലത്തോസ് ആള്‌ഗാക്കെ: <<ണാന് ണിമാക്ക് ആര്‌ണ ഇ്റാക്കി ബ്‌ട്ട് തരുഡൊ എന്ത് ണെനേക്കേര്, എഗുദാര്‌ദ് റാജാവുണാഗ?>> എന്ത് കേ്ട്ടാ്. 10എഗുദ പൂസാരി തലെവലാക്ക് ഏസോഡെ ഇര്‌ക്ക എര്‌സാക്ക്‌ത്തെ ഏസുണ തന്ന് കയ്യിക്കെ തന്താദ് എന്ത് പീലത്തോസ്‌ക്ക് തെരിന്ത്‌ദ്. 11ആന എഗുദ പൂസാരി തലെവല ആള്‌ഗാക്കെ ബറവാസ്‌ണ ഇ്റാക്കി ബ്‌ട്ട് തരുഡൊ എന്ത് ആലാത്ത് സൊല്ല്യ ബെത്താര്.
12പീലത്തോസ് പിന്നേമ് ആള്‌ഗണ കേ്ട്ടാ്: <<എഗുദാര്‌ദ് റാജാവു എന്ത് ണിമ്മ ഒളേക്ക ഇയാള്‌ണ ണാന് എന്ത സെയ്യ?>>
13<<അയാള്‌ണ കുരുസ്‌ക്കെ സേത്തി ആണി അഡിത്ത് കൊല്ലുഡൊ!>> എന്ത് ആള്‌ഗ ആലാത്ത് ആലാത്ത് സൊന്നാര്.
14അക്കുളെ പീലത്തോസ്: <<എന്ത്‌ക്ക്? ഇയാള് എന്ത കുറ്റ സെയ്‌ദാ്?>> എന്ത് കേ്ട്ടാ്.
എന്ത്‌ട്ട്‌മ് ആള്‌ഗ: <<അയാള്‌ണ കുരുസ്‌ക്കെ സേത്തി ആണി അഡിത്ത് കൊല്ലുഡൊ!>> എന്ത് ആലാത്ത് ആലാത്ത് സൊന്നാര്.
15ആള്‌ഗണ പിര്യപഡ്‌സ്യ ബേ്ണ്ടി പീലത്തോസ് ബറവാസ്‌ണ അവാര്‌ക്ക് ഇ്റാക്കി ബ്‌ട്ട് കൊഡുത്താ്. ഏസുണ സാട്ടെബാറ്‌ക്കെ അഡിസിന പ്‌റ കുരുസ്‌ക്കെ സേത്തി ആണി അഡിത്ത് കൊല്ല്യ തന്ന് പഡെയാളിഗാക്കെ കൊഡുത്താ്.
പഡെയാളിഗ ഏസുണ ണാണഗെ്ഡ്‌സ്‌റാര്
16പഡെയാളിഗ ഏസുണ ണാഡ് അദിഗാരിദ് കോട്ടെക്കുള്ളുക്കെ എ്ഡ്‌ത്ത് പോനാര്. പ്‌റ അവാര് അദിലിര്‌ക്ക പഡെയാളിഗണ ഒട്ടുക്ക് ബര്‌സിനാര്. 17അദ്‌ക്ക് പ്‌റ സോരെ ണ്‌റാമ് ണീല ണ്‌റാമ് കലാന്തിര്‌ക്ക ജൊഗേന ഏസുക്കെ ഇക്കിസിനാര്. പ്‌റ അവാര് മുള്ളു കൊഡിലി ഒരു ഗിര്യാഡ പെ്ണേന്ത് ഏസുദ് തലേക്കെ സൂഡ്‌സിനാര്. 18പ്‌റ അവാര് അയാള്‌ണ: <<എഗുദാര്‌ദ് റാജാവെ, ണീ സോക്ക്യൂരി പെ്ളെ>> എന്ത് സൊല്ലി കയ്യെ്ഡ്‌ത്ത് കുമ്മുഡി ണാണഗെ്ഡ്‌സിനാര്. 19അവാര് അവാന്‌ദ് തലേന കുവാല് പുല്ലു തട്ടെക്കെ അഡിത്ത് മൂഞ്ചിക്കെ തുപ്പിനാര്; അദ്‌ക്ക് പ്‌റ അവാന്‌ദ് കാല്‌ക്ക് ബ്‌ന്ത് കുമ്മുഡിനാര്. 20ഇച്ചെ അയാള്‌ണ ണാണഗെ്ഡ്‌സിന പ്‌റ പഡെയാളിഗ അയാള്‌ക്ക് ഇക്കിസിര്‌ന്ത സോരെ ണ്‌റാമ് ണീല ണ്‌റാമ് കലാന്തിര്‌ക്ക ജൊഗേന കളാത്തി അയാള്‌ദ് ഉഡുപ്പുണ താനെ ഇക്കിസിനാര്. അദ്‌ക്ക് പ്‌റ അവാര് അയാള്‌ണ കുരുസ്‌ക്കെ സേത്തി ആണി അഡിത്ത് കൊല്ല്യ ബേ്ണ്ടി എ്ഡ്‌ത്ത് പോനാര്.
ഏസുണ കുരുസ്‌ക്കെ സേത്തി ആണി അഡിക്കാര്
21അച്ചെ പോയി കൊണ്ടിര്‌ക്കാട്ടി കുറേനെക്കാറാ് സീമോന് എന്ത് സൊല്ലുറ ഒരുത്താ് ഗദ്ദേലിര്‌ന്ത് പട്ടണാക്ക് പോരാദ്‌ണ അവാര് കണ്ടാര്. പഡെയാളിഗ ഏസുദ് കുരുസ്‌ണ സുമാക്ക്യ അയാള്‌ണ ണത്തിനാര്. (ഈ സീമോന്‌ദ് മഗനാര്‌ത്തെ അലക്ക്‌സന്താറ്‌മ് റൂപോസ്‌മ്) 22ഏസുണ അവാര് ഗൊല്‌ഗോത്ത എന്ത് സൊല്ലുറ എ്ഡേക്ക് എ്ഡ്‌ത്ത് പോനാര്. ഗൊല്‌ഗോത്ത എന്ത് സൊല്ലുറാദ്‌ദ് അര്‌ത്ത തലെ ഓഡ് എങ്ക എ്ഡെ എന്ത്‌ത്തെ. 23അദിലി അവാര് ബിജ കമ്മി ആക്ക്‌റ മൂര് എങ്ക മര്‌ന്ത്‌ണ ഊറിന മുന്തിരി സാരാക്ക് സേത്തി ഏസുക്ക് കുഡിക്ക്യ കൊഡുത്താര്. ആന ഏസു അദ്‌ണ കുഡിക്കാലെ. 24പിന്നെ പഡെയാളിഗ ഏസുണ കുരുസ്‌ക്കെ സേത്തി ആണി അഡിത്താര്. അദ്‌ക്ക് പ്‌റ അയാള്‌ദ് ഉഡുപ്പുണ പഡെയാളിഗ പങ്കി, ഇന്നന്നാദ് ആരാര്‌ക്ക് കെ്ഡേക്കുഡൊ എന്ത് ണറ്‌ക്ക് ബീ്ത്തി ണോഡിനാര്.
25ബെ്ഡ്യാലെ ഒമ്പാദ് മണി ഗള്യേലി അവാര് ഏസുണ കുരുസ്‌ക്കെ സേത്തി ആണി അഡിത്താര്. 26ഏസു സെയ്‌ദ കുറ്റ എന്തായെന്റ് കാട്ട്യ <<എഗുദാര്‌ദ് റാജാവു>> എന്ത് എ്ള്‌ദിര്‌ക്ക ഒരു എ്ള്‌ത്ത് കുരുസ്‌ക്ക് മേല് ബെത്തിര്‌ന്താര്. 27അവാര് റണ്ട് ത്‌റ്‌ട്ടാര്‌ണ, ഒരുത്താന ഏസുദ് ബല സാരിമ് ഒരുത്താന ഇ്ഡ സാരിമ് ബെത്ത് കുരുസ്‌ക്കെ സേത്തി ആണി അഡിത്താര്. 28അച്ചെ <<പാവ സെയ്‌ദവാര്‌ദ് കൂട്ടാത്തിലി അവാനാമ് എജേക്കുവാര്>>#എസയ്യാ് 53:12 എന്ത് സാമി ബുക്കിലി എ്ള്‌ദിര്‌ക്കാദ് അദേപാസെ ണഡാന്ത്‌ദ്#15:28മുദ എ്ള്‌ദി ബെത്തിര്‌ന്താദ്‌ണ ണോഡി എ്ള്‌ദിന പഗ്‌ദി കായിദാത്തിലി <<അച്ചെ പാവ സെയ്‌ദവാര് കൂട്ടാത്തിലി അവാനാമ് എജേക്കുവാര് സാമി സൊല്ലുസുലാക്കാത്തിലി എ്ള്‌ദിര്‌ക്കാദ് അദേപാസെ ണഡാന്ത്‌ദ്>> എങ്ക സുലാക്കെ ഇല്ലെ.. 29അയ്യി ബയ്യെ ബന്ത് പോനവാര് തമ്മ് തലേന ആട്ടി കൊണ്ട് ഏസുണ: <<എഹേ, ണീ സാമികൂരേന പിദാരിന്ത് മൂണ് ണാള്‌ക്കുള്ളുക്ക് അദ്‌ണ കെ്ട്ടി മുഡിക്കുവെ എന്ത് സൊന്നവാനല്ല, 30അച്ചെ ആനാക്കി ണീ കുരുസിലിര്‌ന്ത് ഇ്റാങ്കി ബന്ത് ണിനാണ താനെ കാപാറ്റ്!>> എന്ത് സൊല്ലി ണാണഗെ്ഡ്‌സിനാര്.
31അദേപാസെ എഗുദ പൂസാരി തലെവലാമ്, ബേദ ബാത്ത്യലാമ് ഏസുണ ണാണഗെ്ഡ്‌സികൊണ്ട്, അവാര് തമ്മ തമ്മ സൊന്നാര്: <<അവാ് ആള്‌ഗണെല്ല കാപാറ്റിനാ്, ആന തനാണ കാപാറ്റ്യ മുഡിരാദില്ലെ. 32ഇവാ് ക്‌റ്‌സ്‌ത്ത് എങ്ക ഇസ്‌റേല്‌ക്കാറാര്‌ദ് റാജാവു ആനാക്കന ഇപ്പ് താനെ കുരുസിലിര്‌ന്ത് ഇ്റാങ്കി ബരുഡൊ; അപ്പ് ണമ്മ ണമ്പില.>> അച്ചെ ഏസുദ് ഒപ്പ കുരുസ്‌ക്കെ സേത്തി ആണി അഡിത്തവാര്‌മ് അയാള്‌ണ ണാണഗെ്ഡ്‌സിനാര്.
ഏസു സാരാ്
33ഉച്ചി ആഗാട്ട്യെല്ല ണാഡൊട്ടുക്ക് ഇ്റ്‌ട്ട്‌കെ്ട്ടിറ്റ്. പ്‌റ മൂണ് മണിമാട്ട് ഇ്റ്‌ട്ട്‌കെ്ട്ടിര്‌ന്ത്‌ദ്. 34മൂണ് മണി ഗള്യെ ആഗാട്ടി ഏസു: <<ഏലോയീ, ഏലോയീ, ലമ്മ സബത്താനി>> എന്ത് സൊല്ലി ബെല്ല്യാദ്‌ക്ക് അഗാറിനാ്. <<എന്ന് സാമി, എന്ന് സാമി ണീ എനാണ തള്ള്യെക്കിനാദ് എന്ത്‌ക്ക്?>>#സാമി പാട്ട് ബുക്ക് 22:1 എന്ത്‌ത്തെ ഇദ്‌ദ് അര്‌ത്ത.
35ഇദ്‌ണ അര്‌ഗെ ണിന്റ് ഇര്‌ന്തവാരിലി പഗ്‌ദി ആള്‌ഗ കേ്ട്ട്, <<അദാ അവാ് ഏല്യാവുണ ഒളേക്കാ്>> എന്ത് സൊന്നാര്.
36ഒരുത്താ് ഓഡി പോയി ഒരു പഞ്ചിന എ്ഡ്‌ത്ത് പുളിര്‌ക്ക മുന്തിരി സാരാക്കെ മുക്കിനാ്. പ്‌റ ഒരു ഓഡെ ജല്ലേക്കെ കെ്ട്ടി അദ്‌ണ ഉജാത്തി ഏസുക്ക് കുഡിക്ക്യ കൊഡുത്താ്. എന്ത്‌ട്ട് അയാള് സൊന്നാ്: <<ണില്ലക്കന, ഏല്യാവു അവാന കുരുസിലിര്‌ന്ത് ഇ്റാക്ക്യ ബരുവാനൊ എന്ത് ണമ്മ ണോഡില.>>
37ഏസു ബെല്ല്യാദ്‌ക്ക് അഗാറി ഉജുറുണ ബ്‌ട്ടാ്.
38അക്കുളെ സാമികൂരേദ് അരാങ്ക കുച്ചുണ അലാക്ക പ്‌റ്‌ത്ത് ബെത്തിര്‌ക്ക തെരെസീലെ മേലിര്‌ന്ത് അഡിമാട്ട് റണ്ടായി കീ്റി എക്കിറ്റ്. 39ണൂറ് പഡെയാളിഗാദ് തലെവാ് ആയിര്‌ന്തവാ് ഏസുദ് മുന്തുക്ക് ണിന്റിര്‌ന്താ്. ഇച്ചെ ഏസു ഉജുറു ബ്‌ട്ടാദ്‌ണ#15:39ഏസു ഉജുറു ബ്‌ട്ടാദ്‌ണ മുദ എ്ള്‌ദി ബെത്തിര്‌ന്താദ്‌ണ ണോഡി എ്ള്‌ദിന പഗ്‌ദി കായിദാത്തിലി <<ഇച്ചെ ഏസു അഗാറി ഉജുറുണ ബ്‌ട്ടാദ്>> എന്ത്‌ത്തെ ഇര്‌ക്ക്‌ദ്. അയാള് കണ്ട്: <<ണേര്‌മായിമ് ഇയാള് സാമിദ് മഗാ് ആയിര്‌ന്താ്>> എന്ത് സൊന്നാ്.
40ഏസു ഉജുറു ബ്‌ഡ്‌റാദ്‌ണ ലേസ പെ്ണ്ണ്‌മക്കഗ ദൂരാത്തിലിര്‌ന്ത് ണോഡികൊണ്ട് ഇര്‌ന്താര്. അദിലി മദ്ദള പട്ടണക്കാറിസി മറിയാമ്, സലോമിമ്, സിന്ന ആക്കോവുദ്‌മ് ജോസേദ്‌മ് അവ്വാസി മറിയാമ് ഇര്‌ന്തിര്‌ന്താര്. 41ഏസു ഗെലീലേലി ഇര്‌ക്കാട്ടി അയാള് പിന്ന്‌ക്ക് ണഡാന്തിര്‌ന്തവാര്‌മ് അയാള്‌ണ ണോഡിര്‌ന്തവാര്‌മ്‌ത്തെ ഇവാര്‌ഗ. അദിലി ഏസുദ് ഒപ്പ എര്‌സലേമ്‌ക്ക് ബന്ത ബേ്റെ പെ്ണ്ണ്‌മക്കഗാമ് ഇര്‌ന്തിര്‌ന്താര്.
ഏസു സാവുണ പൊദേക്കാര്
42-43അയ്യി ണാള് ഒരുക്ക ണാള് (ഒയിവു ണാള്‌ദ് മുദ ണാള്) ആയിര്‌ന്ത്‌ദ്. ജാമ ആഗാട്ടി അരിമദ്ദ്യെക്കാറാ് ഓസേപ് എങ്ക ഒരുത്താ് അഞ്ചാദെ പീലത്തോസ് പട്ട്‌ക്കെ പോയി ഏസു സാവുണ എ്ഡ്‌ത്ത് പോയ ബ്‌ഡുഡൊ എന്ത് കേ്ട്ടാ്. അയാള് എഗുദ ഗോഡ്‌ദില്യ ബെല്ല്യവാന്‌മ് സാമി ആള്‌റാദ്‌ണ കാത്തിര്‌ന്തവാന്‌മ് ആയിര്‌ന്താ്. 44ഏസു സട്ടന സത്താക്ക് പീലത്തോസ് അദിസ്യപട്ടെക്കിനാ്. അയാള് ഏസു പട്ടിലി കാവാക്ക് ബെത്ത ണൂറ് പഡെയാളിഗാദ് തലെവന ഒളേത്ത് ഏസു സത്ത് ണല്ല ഗള്യെ ആറ്റ എന്ത് കേ്ട്ടാ്. 45അയ്യി പഡെതലെവാ് സത്താ് എന്ത് സൊന്നാ്. പ്‌റ അയ്യി സാവുണ എ്ഡ്‌ത്ത് പോയ പീലത്തോസ് ഓസേപ്‌ക്ക് സൊന്നാ്. 46ഓസേപ് സാവുക്ക് ഇക്ക്യ ബെ്ഡിപ്പുള്ള സീലെ ഏറ്റ് ബന്താ്. ഓസേപ് സാവുണ കുരുസിലിര്‌ന്ത് ഇ്റാക്കി അയ്യി സീലേക്കെ സുറുട്ടിനാ്. അദ്‌ക്ക് പ്‌റ കല്ലിലി താനെ കൊദേന്ത് ഉണ്ടാക്കിസി ബെത്തിര്‌ന്ത അളേക്കെ അയ്യി സാവുണ എ്ഡ്‌ത്ത് പോയി ഇക്കിനാ്. പ്‌റ ബെല്ല്യൊരു കല്ല്‌ണ ഉറുട്ടി എ്ഡ്‌ത്ത് ബന്ത് കല്ലളെ ബാസാക്കെ ബെത്താ്. 47മദ്ദള പട്ടണക്കാറിസി മറിയാമ് ജോസേദ് അവ്വെ മറിയാമ് സാവു ബെത്ത പട്ട്‌ണ കണ്ടിര്‌ന്താര്.
Actualmente seleccionado:
മറ്‌ക്കോസ് 15: സാമിദ് സേദി
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
New Life Literature