Lukas 10
10
Yeso tûm shi dzûmə tə wi nghəm n səghəmghə n ghii tə təbəghə
1Abə ghəə ghən tsəghə tsu nə̀, Mûkəbii n say shi bə tədzûmə nghəm nsəghəmbəghə ghi ghə abəghə, tûm shi ndow ghə abəghə, abəghə isə n naʼa tən tədzəm n luʼu tey tə â khə ni nam ndow fu. 2Nghee tə dza i tûm shi ndow ghə, tə n dza tə ghə nə̀, “Fəzəə u ngii loʼ nə usum, ghə̂ a kəfwaʼ ghə a basə way ni dumə fən. Sey gɔŋŋə ndòw na tə̀ Mûkəbii, tə loʼ nə mû usum tə̀ tə tûm kpiʼi bə ghə̂ a kəfwaʼ n sûm u wi.”
3Ndòw na, N tûm shiə ndòw ghaa tə̀ a loʼ waa a tənjì n fəŋŋə kə ubəghə. 4Kə̂ ghaa nə neynə mbəghə fə ukhəə fə, nkee kəmbəghə, mɔ təgow ni tsɔʼ kweyyə. Kə̂ ghaa nə tɔŋŋəzownə wù n jii. 5Nə̀ ghaa nyi kə n ndaw i ghaa zə, dza tsu na tə̀ ghə̂ ghey fu nə̀, “buulə zə i loʼ i ghaa fa ndaw.” 6Abə a lòʼ nə wù dzuŋu lòʼnu fu tii n ndaw, buulə i ghaa zə i doʼo ghi wi, nə a way sey, zə i bə dzəŋŋə tə̀ ghaa. 7Dòʼotsu kə na n ndaw imɔʼ, kə̂ ghaa nə̀ bweynə ndaw tə̀ ndaw, ghaa i zəə, məə fə key ghə i funə fu tə ghaa, n təŋkey wù kəfwaʼ khə ni keeli kənaamə n fwaʼ kə wi. 8Abə ghaa nyinə n naʼ i loʼ zə ghə kpii neynə ghaa fu, nə̀ ghə fu kə kee tə̀ ghaa, ghaa n zə soʼo. 9Baŋŋə na ghə̂ a dzaŋa ghə, ghaa i naʼa ndòw tə̀ ghə̂ ghə nə̀ fɔɔ u Kəzə̀ wə n shɔd. 10Abə ghaa nyi ndòwnə nə inaʼ nə ghə ka ghaa kpii ney, shi ndòw na n zeeli kə inaʼ, ghaa dza tsunə, 11“Kasə̀ bvə kə naʼ i ghaa, kə i doʼo way n fuu i ghey, a sa buʼu maʼanu. Seykə keeli tsu na nə fɔɔ u Kəzə̀ wə n shɔd. 12N kûm dza bə tə̀ ghaa nə̀, N tsuʼ fey Zə̀ kə i saʼanə mbi tii, buulə zə i buʼ lòʼ kow Sodom tsəghəshi naʼ i tii zə.”
Ngoʼ tə̀ naʼa tey tə ka bəghəm tə̀ Yeso
(Mat 11.20-24)
13“Ngoʼ i lòʼ tə ghə̂ a Korazən nsə ghə̂ a Besayda ghə bòʼ ghəə a faalə ghə mən ghə fwaʼnə n naʼa tə ghaa, bə ghə a fwaʼnə n naʼa tə Tayra ghi Sidɔn, tə̀ ghə a kweyyə fə̀ŋ tə ghə, ghə doʼo bə n ndzə tə ivə tə nə udzə̀m. 14Sey kə, n tsuʼ fey Zə̀ kə i saʼanə mbi tii, buulə zə i buʼ lòʼ n kow Tayra ghi Sidɔn tsəghəshi n kow ghaa. 15Abə ghaa ghə̂ a Kapenum ghaa nya moʼlə kə nə Zə̀ kə i kɔʼlə naŋa kɔʼɔnu ghaa idəŋ. À way dzə sey. Ghaa i nyiə nə uvəllə. 16Wù wey tə zownə tə ghaa, sey zow soʼo tə mə, tə wey tə tuu maʼanə ghaa, sey tuu maʼa soʼo mə. Wù wey tə tuu maʼanə mə, sey tuu maʼa soʼo wù wey tə tûmnə mə.”
Dzûmə tey nghəm nsəghəmbəghə n ghii tə təbəghə fən nyi dzəŋŋənu
17Ambə dzûmə tə wi tey nghəm səghəmbəghə n ghə̂ ghə abəghə dzəŋŋə bənə n duʼlə zə, ghə n dza ndòw tə̀ wi nə̀, “Mûkəbii, zay u bwu u mə məŋə zow bə soʼo tə ghey abə ghey tɔŋŋə tsunə zəd zə zə̀.” 18Tə n dza ndòw tə̀ ghə nə̀, “Mə koʼ Satan tə bwù tsu bənə tə̀ a loʼ ighow i mwallə zə n bikighow. 19Zəllə na, mə n fu ghaa n daʼa kə tə̀ ghaa lòʼ ni bwey nə təzuu, n kow nàŋ tə, nsə ni təm zə̂ daʼa u ghə̂ a təngəmə, fə kə lòʼ kə nə way ni mɔm bəəbə ghaa. 20À kee loʼ nə̀, i kə ghaa nə duʼlənə nə̀ zay u bəbə u zow tə ghaa, ghaa khə ni fədlə duʼlə n təŋkey zəd a ghaa a tɔ̀ɔ doʼo idəŋ.”
Yeso duʼlənu
(Mat 11.25-27; 13.16-17)
21N nəŋə i tii zə, Zay kə Zow kə n ghəŋə nə̀ Yeso ngii keeli iduʼlə. Kə n ghəŋə nə̀ Yeso dza tsu nə̀, “N fuu kəzɔŋŋə tə wɔ a Bày, wə loʼ Mûkəbii idəŋ nsə n ghəlikətsə, wə nyi naŋa ghəə ghən tə̀ ghə̂ a tɔbə ghə nsə ghə̂ ghə umaʼlə ghə, kee dii fu tsu tə̀ ghinətəghə ghə. Â sey loʼ nghee wə a ləghənə nə̀ ghəə ghə a doʼo tii, a Bày.” 22“Bày wùŋ n fu may fə wə udzəm tə̀ mə, wù lo khə way Waa tsəghəshiə way Bày, ighələ tə̀ wù way tə khənə Bày tsəghəshiə way Waa, nsə ghə̂ ghey Waa say kɔʼnə ni dii fu wi tə̀ ghə.” 23Tə n khəəmə ndòw uwû, tsɔŋ dza tsu tə dzûmə tə wi tə nə̀, “Buulə i loʼ tə̀ ghə̂ ghey ghə koʼo soʼonə ghəə ghey ghaa koʼnə! 24N dza bə tə̀ ghaa nə̀, ndəmə tûm tə Kəzə̀ nsə də̀ŋ wə â ləghə ni koʼ ghəə ghey ghaa koʼnə, ghə n ka koʼ nsə ni zow ghəə ghey ghaa zownə, ghə n ka zow.”
Zəzəə fə fənkəfən bòʼ wù Samaria u dzuŋu wə
25N tsuʼ fə loʼ fə, wù dii u kəlaŋ u loʼ wə n bə ni bə mɔɔmə koʼ Yeso, tə n bəb ndòw tə̀ wi nə̀, “A wù dii wə, n khə ni ji ngee tə̀ mə ni keeli muu zə itsali?” 26Yeso n beeli ndòw wi nə̀, “Ghə tɔ̀ɔ naŋa nə̀ ngee n màʼlə K-a-zə̀ ə? Wə̀ zowkeeli nə̀ ngee?” 27Tə n beeli ndòw wi dza, “wə̀ khə ni ləghə Zə̀ kə, n fə̀ŋ zə idzəm, n zay kə kədzəm, n daʼa kə kədzəm, n moʼlə tə tədzəm, nsə nə wə̀ i ləghə waazùu tə̀ wə̀ ləghənə wû wə wə̀.” 28Yeso n dza tə̀ wi nə̀, “Wə̀ n beeli dzɔb, î ghəŋə ndòw sey, wə̀ i keeli muu zə itsali.” 29Wù tii n ləghə ni dii nə̀ tə â ghəŋŋə way ghəə a bəbə ghə. Sey, tə n bəb ndòw tə̀ Yeso nə̀, “Waa zə̂ wùŋ lòʼ ndee?” 30Yeso n beeli ndòw wi dza, “Wu lòʼ a nuu tsu n Yerosalem tsu ndòw n Jeriko, ghə̂ a tsɔŋɔ ghə n kwu tsu wi, tsɔʼ nuu kɔʼ ndzə tə wi, bwɔd maʼa naŋa tsu wi fu n jii nə̀ tə loʼ n ghəə a kpuughə, nuu ndòw i ghə zə. 31Sey fɔɔngili u lòʼ wə n tsu bə n jii, ambə tə koʼ tsu nə wù wey, tə n bali tsəghə ndòw i wi zə. 32Ngəd u loʼ wə n dzəŋi kə dzûmə tə Klisto n ndòw bə koʼ tsu wù wey, bali tsəghə ndòw soʼo. 33Wù Samaria u loʼ wə tə a bweyyə ndòwnə n ndòw bə soʼo fu tii, ambə tə koʼ tsu nə wù wey, tə n kwɔɔlə isî n kow wi. 34Tə n ndòw sow maʼa tsu fəŋ a wi, tsoʼlə tsu utey tii, bàŋ kɔʼ fəŋ a wi, boʼo gaʼ kɔʼ wi njakala fə wi, ney ndòw wi n ndaw i zayyə zə, laalə tə̀ wi. 35Ambə tsətsə wey, tə n dza i nuulənu, fu naŋa tsu khəə u loʼ wə tə̀ wù kəfwaʼ wey fu, dza, ‘i laalə tə̀ wù wən, fə key wə i bəəbənə n kow wi, mə i bə kuumə abə n dzəŋŋə bənə.’” 36Yeso sey bəb ndownu tə̀ wù wey nə̀, “Wə moʼlə nə̀ n ghə̂ ghən atəghə, waazə ə wù tii loʼ wù ghaa wə?” 37Tə n dza, “Wù wey tə a kwɔɔlə sî zə n kow wi.” Sey Yeso n dza tə̀ wi nə̀, “ndòw, wə i ghəŋə soʼo sey.”
Yeso bweyyə koʼ Mata ghi Maria
38Nghee Yeso nsə dzûmə tə wi tə ndòw nə̀, ghə n nyi ndòw n naʼ i loʼ zə, weyzən u loʼ wə tɔŋŋə Matta, n tɔŋɔ bə wi ndaw wi. 39Tə a khə waazə ə wi ghə â tɔŋŋənə nə̀ a loʼ Maria, Maria wən tə â bə doʼo bə n tə̀nə̀ Yeso, zəllə ghɔɔmə i wi. 40Matta n kee dəmə kaabə n ghəə a khəələ ghə. Sey, tə n ndòw bə n səə Yeso dza, “Mûkəbii, koʼo waazə wùŋ tûmmə naŋa bə kəfwaʼ kədzəm tə̀ mə, dza ndòw tə̀ wi nə̀ tə bə tɔm bə mə.” 41Yeso fəd dza ndòw tə̀ wi nə̀, “Matta! Matta! Wə̀ ngii fəmmə wû wə n ndəmə tə aghəə. 42Nə a loʼ sey ghə i ghəŋə i loʼ kə imɔʼ, sey, Maria n sày ghə zey i kpiilənə, ghə way ni ney nuu dzə fə kə tii kə n wɔ wi.”
Actualmente seleccionado:
Lukas 10: WEH
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2022 CABTAL