Lukas 9
9
Yeso tûm shi ngəd tə wi tey ighəm nsə ghii tə təbəghə
(Mat 10.5-15; Mak 6.7-13)
1Ambə n tsuʼ fə lòʼ fə, Yeso n tɔŋɔ naŋa bə tsətəndəghə tə wi tey ighəm n ghii tə təbəghə, fu tsu ghə n daʼa kə ni dzùm shi zay u bwu wə nsə ni baŋə tədzaŋa. 2Sey, tə n tûm shi ndòw ghə nə ghə ndòw naʼa ghə i fɔɔ u Kəzə̀ nsə ni baŋə ghəə a dzaŋa ghə 3Tə n dza tə̀ ghə nə̀, “Kə̂ ghaa nə neynə fə kə lòʼ kə n bwey i zən, tə a loʼ mbaŋ, mɔ kəmbəghə, mɔ ufəzəə, nkee ukhəə, kàsə ndzə tə tsɔʼɔ kweyyə tə. 4Nə a loʼ kə n ndaw i ghaa zə ghaa nyi nə̀, doʼo na fu ni ndòw kùm tsuʼ fey ghaa i nuulənə tii. 5Abə ghaa nyi ndòwnə n naʼ i lòʼ zə nə̀ ghə ka ghaa bəghəm naŋa fu, nghee ghaa shiə ndownə, ghaa n buʼ maʼa tsu bvə key n fuu i ghaa ni dii tsu nə̀, ghə ka ghaa bəghəm naŋa fu.” 6Sey, ghə n nuu shi ndòw, bwey naʼa tə naʼa, naʼlə ndow tûm Kəzə̀, baŋə ghə a dzaŋa ghə.
Tow kə fwɔdlɔ Helɔd bòʼ Yeso
(Mat 14.1-12; Mak 6.14-29)
7Ambə Helɔd wən ghə â tɔŋŋə soʼonə nə̀ à loʼ Antipas, tə â saʼanə mboʼo Galili zow tsunə ghəə ghey Yeso â fwaʼanə, tow kə n fwɔdlɔ wi n təŋkey ghə̂ a loʼ ghə â dza nə̀ a loʼ Jɔn wù fuu mmuu mə tə zhəm dzəŋŋə bənə nə ivə, 8a loʼ ghə n dza à lòʼ Tûm Kəzə̀ Elayja tə bənə, a lòʼ ghə n kee dzanə à lòʼ Tûm Kəzə̀ u wey wə tə bə dzəŋŋə nə. 9Helɔd n dza, “N mâ gboo tow kə Jɔn kə, a wən kəm lòʼ ndee ghə dzanə ghəə ghən bòʼ wi ə?” Tə n kəŋə jii ni kòʼ wi.
Yeso chi nɔɔ kə aghə̂ nə ghə tsəghəshi təkam tətaa
(Mat 14.13-21; Mak 6.30-44; Jɔn 6.1-14)
10Ambə ngəd tə Yeso tə dzəŋŋə bənə tə̀ Yeso â tûm shinə ghə, nə̀ ghə ndòw naʼa tûm Kəzə̀. Ghə n bə dza bə tə̀ wi nghee tə ghə fwaʼ kuumnə. Yeso n ney ndow ghə n luʼu k-a-nyi n naʼ i Bedsayda. 11Nghee tə̀ ghə̂ a keeli tsunə luʼu key tə loʼnə tii, ghə n dzûmə ndòw wi. Tə n kpii ney kɔʼ ghə, ghɔɔmə tə̀ ghə bòʼ fɔɔ u Kəzə̀, baŋŋə a ghey ghə â loʼ nə̀ ghə khə tədzaŋa. 12Ambə nyi i nəmə tsu ndownə, tsətəndəghə tə wi tey ighəm n ghə̂ ghə abəghə n bə dza tə̀ wi nə̀, “Zəghə ndòw ghə̂ ghey, ghə ndòw nə tə naʼa, nsə nə tə mbvə̀nə̀ n mboʼ zən tə̀ ghə lòʼ ni keeli fə kə zəə kə nsə luʼu kə bweeli kə kûm nə saa fa loʼ n mbvə̀nə̀ ntsaŋ.” 13Yeso n beeli dza ndòw tə ghə nə̀, “Fu na ghə n fəzəə wə.” Ghə n beeli ndòw wi nə̀, “ghey fa khə kə nbàa ntâ nsə tsəghə tə təbəghə, à may kə nə̀ a ndòw kəŋ zuu bə ufəzəə tə̀ ndəmə ghə̂ ghən.” 14(Ghə̂ ghə â loʼnu fu tə â loʼ tə kam tə tâ) Yeso n dza ndòw tə̀ tsətəndəghə tə wi tə nə̀, “Ghəŋŋə na nə̀ ghə doʼo tsu nə ntuʼu nghəm ntaa, ntaa.” 15Ambə ghə ghəŋə tsunə sey, 16Yeso n ney kɔʼ baa wey utaa n tsəghə tey təbəghə, laalə kɔʼ ndòw kədəŋ, fu ndòw zɔŋŋə K-a-zə̀ n fəzəə u tii wə, ney boʼlə i tsu, fu ndòw tə̀ tsətəndəghə tə wi tə nə ghə dzawwə fu ndòw tə̀ ghə̂ ghey. 17Ghə̂ ghey n zə kow tsu n tə̀ŋ kə ghə, boʼlə mə n səə doʼo tsu, wə n shi kɔʼ ukhəə ighəm n ghii wə ubəghə.
Pita dzanə Yeso loʼ Klisto
(Mat 16.13-19; Mak 8.27-29)
18Ambə n tsuʼ fə lo fə, Yeso n gɔŋŋə n nəŋə wi, tsətəndəghə tə wi tə n loʼ fu, Yeso n bəb ndòw tə ghə nə̀, “Ghə̂ à baa dzanə n loʼ ndee?” 19Ghə n beeli ndòw wi nə̀, “Ghə̂ a loʼ a dzanə wə loʼ Jɔn wù fuu n mmuu n Kəzə̀ mə. À loʼ ghə a dzanə wə loʼ Elayja, a loʼ ghə a kəm dzanə wə loʼ tûm Kəzə̀ u wey wə tə zhəm dzəŋŋə bənə nə ivə.” 20Yeso n bəb tə̀ ghə nə̀, “Abə ghaa, ghaa dza nə̀ N loʼ ndee?” Pita n beeli ndòw wi dza, “Wə loʼ Klisto Waa Kəzə̀.”
21Yeso n kii ghə, nə kə ghə nə dzanə tə̀ wù loʼ. 22Tə n kəm dza tə̀ ghə nə̀, “Waa Weynum i teeli fəʼlənu, n ndəmə tə aghə̂, tə̀ ngəd, ghə fɔɔngili a nii ghə, n ghə̂ a dii ghə ulaŋ ghə i tuu maʼa tsu wi, ghə i wey wi, tə i kəm zhəm dzəŋŋə bə nə ntsuʼ ntəghə.”
Jìi ni dzûmə Yeso
23Yeso n dza tə ghə adzəm nə̀, “Abə wù ləghənə ni dzûmə mə, tə khə ni tuu maʼa tsu wû u wi, tə boʼo kɔʼ zat kə fəkaʼ kə wi, tə dzûmə mə ntsuʼu ndzəm. 24Təŋkey, wù wey tə ləghənə ni bəghəshi wû u wi, tə i fədlə guŋŋənu, abə wù wey tə guŋunə muu i wə zə bòʼ mə i fəd keeli ibəghəshi. 25Wù î zəə kee abə tə keeli tsunə fə u mbi wə udzəm kee guŋə kɔʼ tow kə wi ə? 26Wù wey tə i dədlə n tow kə bòʼ mə nsə ghɔɔmə zuŋ zə, Waa wù sɔŋtsuʼ nə dədlə soʼo n tow kə tə wù tii abə tə nə bənə n kɔʼlə n wi mə, nsə kɔʼlə n Bày mə nsə tsətəndəghə tə Kəzə̀ tə zow tə. 27N dza bə isəŋə tə ghaa, nghee saa teynə fa, ghə̂ a loʼ a loʼnu ghə i koʼonə fɔɔ u Kəzə̀ wə nə ghə ka kpu.”
Tûm usə̂ u Yeso u nyiəllə fəmmənu
(Mat 17.1-8; Mak 9.2-8)
28Tsuʼu mə n tsəghə tsu tə̀ a loʼ ifam nghee Yeso khəə tsunə ghəə ghən tə̀ dzûmə tə wi tə. Tə n ney kɔʼ Pita, Jɔn ghi Jems kɔʼ ndòw ghi ghə nə ukaʼ ni ndòw gɔŋŋə. 29Nghee tə gɔŋŋənə, tûm usə u wi wə n kweyyə i kɔʼ, ndzə tə wi tə n nyiəllə fəmmə tə a loʼ ghow i mwallə zə. 30Ghə̂ a loʼ ghə abəghə n maŋ fòw shi kɔʼ fu tɔŋŋə Elayja ghi Mushi, ghɔɔmə ghi Yeso. 31Ghə â bən shi kɔʼ n ghaʼ i Kəzə̀, ghən ghɔɔmə i Yeso nghee tə̀ tə i kpuunə n Yerosalem, ni luulə laŋ kə bày. 32Pita, nsə ghə̂ a wi a loʼ ghey n kee kùm tə bweeli. Nghee ghə zhim kɔʼnə ghə n koʼ ndòw ghaʼ i Yeso ghi ghə̂ ghey abəghə ghə â teynə ghi wi. 33Nghee ghə̂ ghey zəghə tsu nə Yeso nuulə ndòw, Pita n dza ndòw tə̀ wi nə̀, “mûkəbii, i dzɔbənu nghee tə̀ a loʼnə fa, a loʼ ni bəghə kɔʼ nfəə ntəghə, fəmɔʼ tə wɔ, fəmɔʼ tə Mushi, fəmɔʼ tə Elayja.” (Tə â maŋa dza soʼo sey, khə way ghəə ghey tə dzanə). 34Nghee tə̀ tə nam ghɔɔmənə, mbàʼ i loʼ zə n bə tsət bɔmi bə ghə, ngəd tə Yeso tey n zey ni tsəŋ. 35Dzə n shi bə fuu n mbaʼ dza, “À wən loʼ waa wùŋ u tsuʼu wə n sày kɔʼnə, i zow na tə wi!” 36Nghee tə̀ dzə zən ghɔɔmə may tsunə, ghə n kəm koʼ ndòw Yeso n nəŋə wi. Tsətəndəghə tə wi tey n fuŋ doʼo ndòwkə mɔŋ n ghə i tii zə, ghə n ka ngəmmə dza shi ghəə ghey ghə â koʼnə n nəŋə i tii zə tə wù loʼ.
Yeso baŋə Waa wù sɔŋtsuʼ u loʼ wə tə khənə zay kə bwu kə
(Mat 17.14-18; Mak 9.14-27)
37Tsətsə wey, Yeso ghi tsətəndəghə tə wi tey n dzəŋi shi tsu bə nə ukaʼ. Nɔɔ kə aghə̂ kə n kwɔɔlə bə wi. 38Wù loʼ n buʼ shi kɔʼ kəbɔ̂ŋ n fəŋ ə nɔɔ key; dza, “Wù dii! N buʼu kəwɔɔ, gaamə waa wùŋ, kuum nə̀, a loʼ kə wi n khənə. 39Zay kə bwu kə kwɔɔ tsu wi, tə n buʼ shi kɔʼ kəbɔ̂ŋ, bwùkə n kwu daŋŋə bə wi, tsəbə tə n kaʼ ni shi n dzuu i wi, kə n ndzəmə kəghəmətsu wi, kə zaŋə zəghə way wi. 40N mâ buʼ wɔɔ kə tə̀ tsətəndəghə tə tə̀ nə̀ ghə gaamə shi wi, ghə n dəm kii tsu.” 41Yeso n dza, “Ghaa ghən n num tən maŋ loʼ ghə̂ a laʼa bəghəm i fə̀ŋ zə, ghaa khə kə ghəə a bəbə ghə, mə i boʼo mûulə tənum tə siʼi ghi ghaa ni koʼo zeeli ghəə ghən ə? Mbwɔ, ney bə waa wə fa.” 42Nghee waa wey kəŋə ndòw nə n səə Yeso, zay kə bwu key n ney maʼa bə wi aghəd nə kəbù, Yeso n kii ndòw Zay kə bwû key, baŋŋə tsu waa tii, waa wey n daŋŋə taw i kɔʼ, tə n ney fu dzəŋŋə ndòw wi tə̀ bày wi. 43Dzuu zə n ngii zum aghə̂ ndzoʼo daʼa kə faalə key Zə̀ kə khənə. Tə n dza ndòw tə̀ tsətəndəghə tə wi tə nə̀, 44“Kə ghaa nə neyzəənə ghəə zən n ndza n dza bə tə̀ ghaa nya, ghə nə ney tsəʼlə ndòw Waa wù sɔŋtsuʼ n wɔɔ kə ghə̂ a bwû ghə.” 45Tsətəndəghə tə wi tə n ka zowkeeli dzə, n təŋkey ghəə a tii ghə â nyi doʼonu n jìi zey ghə â way ni zowkeeli. Ghə n tsəŋ ghaʼ soʼo ni bəb tɔʼlətsu ghə i tii zə n wɔ Yeso.
Wù nii loʼ ndee?
(Mat 18.1-5; Mak 9.33-37)
46Ngəd tə Yeso tə n kaʼ ni baŋŋə təfəghəm n wû i ghə ni keeli wù wey tə loʼ nə wù nii n fəŋŋə kə ghə. 47Yeso n khə moʼlə tey ghə khənə n fə̀ŋ tə ghə, tə n ney bə winətəghə, teyyi naŋa bə n səə wi, 48dza ndòw tə̀ ghə nə̀, “Wù wey tə kpii neynə waa wən n zəd zuŋ, sey kpii ney mə. Wù wey tə kpii neynə mə sey kpii ney soʼo wù wey tə tûmnə mə. Wù wey tə loʼ nə wù kənunu n fəŋŋə kə ghaa, a loʼ wi tə loʼ nə wù nii.”
Wù wey tə tsayyə way ghaa sey loʼ ghi ghaa
(Mak 9.38-40)
49Jɔn n ghɔɔmə shi kɔʼ dza, “Bày, ghey n koʼ wù loʼ tə dzùm shiənə vəətsəə ghə n zəd zə, a u dəm tsunə ni kii naŋa ndòw wi təŋkey tə way dzə ghi saa.” 50Yeso n dza ndòw tə̀ Jɔn nsə tsətəndəghə tə wi tə loʼ tey nə̀, “Kə ghaa nə kii naŋanə wi təŋkey wù wey tə tsayyə way wɔ sey loʼ ghi wɔ.” 51Ambə nəŋə i kpii bənə tə̀ Yeso ni kɔʼ idəŋ, moʼlə i wi zə n loʼ tən kə ni ndòw n Yerosalem. 52Tə n tûm ndòw tsətəndəghə tə wi tə loʼ tə isə, n naʼ i loʼ zə n Samaria nə̀ ghə ndòw bayyə naŋa tsu aghəə tə wi. 53Ghə̂ ghey fu n ka kpii ney dzə wi təŋkey tə â ndòw n Yerosalem. 54Ambə ngəd tə Yeso tɔŋŋə Jems ghi Jɔn koʼ tsunə sey, ghə n bəb ndòw tə̀ wi nə̀, “Mûkəbii, wə̀ ləghənu nə̀ a tɔŋɔ tsu bə uvələ n bikighow u bə mayyə ghə ə?” 55Yeso n khə̀mmə kii ndòw ghə. 56Sey ghə n nuu ndòw muu ndow n naʼ i nuu zə.
Wù wey tə kpiinə ni doʼo dzûmə ə Yeso
(Mat 8.19-22)
57Nghee tə̀ ghə ndòwnə n jii, wù loʼ n dza tə̀ Yeso nə̀, “Mə i dzûmə wɔ abə wə ndòw kə ghee.” 58Yeso n dza tə̀ wi nə̀, “Səŋŋə n mû nə ubuʼ, nnən mə idəŋ mə a khə ndaw tə, Waa wù sɔŋtsuʼ kee khə way luʼu kə loʼ kə ni gaʼ tow kə wi kə tii.” 59Tə n dza ndòw tə̀ u loʼ wə nə̀, “Dzûmə bə mə.” Wù tii n fəd dza ndòw tə wi nə̀, “mûkəbii, ndza ndow tsəllə bə dzə bày wùŋ” 60Yeso n dza ndòw tə̀ wi nə̀, “naŋa tsu tə̀ ghə̂ a kpuu a tsəllə ndòw ghə̂ a kpuu ghə, abə wɔ, ndòw naʼa ndòw ghəə a fɔɔ u Kəzə̀.” 61Wù loʼ n dza ndòw soʼo tə̀ wi nə̀, “mûkəbii, N dzûmənu wɔ, n dza n ndòw tɔŋŋə zow tsu dzə ghə̂ ghuŋ n ndaw.” 62Yeso n dza ndòw tə̀ wi nə̀, “Wù wey tə gaʼ dzə wɔɔ kə n fù ni vəllə, kəm laalə ndòw ibam, ka kɔʼ kpii dzə ni doʼo n fɔɔ u Kəzə̀.”
Actualmente seleccionado:
Lukas 9: WEH
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2022 CABTAL