Mateo 26
26
Pai juhuvishare pota juka jyre Jesús
1Jesús opa ijeta kova mbairerã, heishu mboireare: 2Pee rãnga pikuaa, mokue ara paskua arete verãpe. Hãrã kuareta Tay me'ẽãpo kurusure mbysavavaha verã. 3Pai juhuvishare, Moisés mbypara vekua pyrỹmboi'iheare, hareka kuakuavare opa jaty pai Caifas hoo vasupe. 4Hãrã haipe ijeta ñynoĩ marãrapo japu rupii Jesús pysyka reta hareka jukaka verã. 5Tẽvã hei reta: Avypo aretepe jajapokui, mãhẽ kuaretare poshy hareka ñanderã pũã ñandyrehekui.
Pente taupe mbipishe Jesús mbai pisheka kavipy
6Jesús ĩme'ẽ Betaniape, Simón he'iashuva kuru porãmba'i vekua hentape, 7vãhẽ ou hai ẽvãpe pente taupe, mbai pisheka kavi hareka hepyva ryheva verurã ñohẽ Jesús ñakare, karu'ẽrã; 8hãrã mboireare hokava hesha hareka poshy jyrerã hei jyre: Marã'ĩrãra jyvarereihe? 9Hokava mbai pisheka kavi haikavitẽpo hepyre mẽ'ẽharã, hepykue pavetevare mẽ'ẽhashu. 10Jesús hendu hokavarã heishu reta: Marã'ĩrãra kyrãĩ pijetahe ko taupe? Kova mbai japo shyreheva rãnga, haikavi. 11Pavetevare ĩmeñoĩpo pynymbyteipi, tẽvã she ha'ẽã ãĩmeñoĩ verã pyndyvache. 12Kova taupe japova ñohe shyretere mbai pisheka kavi, shiñono kavi shõtỹharã verã. 13Ãñete hai pee, mãĩpi mbe'uhavaipi ko Ñee Kaviva ryheva yvy'ĩãrẽ; mbe'uhapo jyve ko taupe japova, mãndu'ahahe verã.
Judas ityshu Jesús
14Hãrã penteva 12 mboireare, Judas Iscariote he'iashuva, oho pai juhuvishare ẽvãpe, 15haipe heishu: Mbovyrapo pymbyhepyshekui Jesús ameẽperã? Hãrã haire meẽshu 30 nikere kyrypoti. 16Haivi Judas hekama marãrapo hareka mbai orapera meẽposhu reta Jesús.
Cena Jesús japova mãndu'ahahe verã
17Ara õñepyrõhea arete pãhã jylevaduramba ryheva, Jesús mboireare ou hai ẽvãperã pyrãndushu: Mãpera ripota mỹhẽvãha ndekui rykaru verã Pascuape? 18Jesús heishu reta: Pekua tenta kyty pente kuimbai hentape pereshu: Pyrỹmboi'ia he'ika nde; shy'ara vãhẽmapo, hãrã nyrẽntape amboi'areare hãndi pota amby'arete paskua. 19Mboireare japo Jesús heiva rãĩmi hareka myhẽvãshu reta paskuape ocena verãre. 20Haipe pyntumãrã, Jesús vapy mesape 12 mboireare hãndi. 21Hãrã ocena ñynõĩrã Jesús heishu reta: Ãñete hai pee, pente peeva shymeẽpokui. 22Hãrã haire mbyvy'ãã retarã, õñepyrõ pepenteĩ pyrãndushu: Sheja, sheẽãrapokui? 23Hãrã Jesús heishu reta: Pãhã mãkỹ shendieva hareka mbypy'ẽvã peratupy, hai kova shymeẽ verã. 24Kuareta Tay iko ñoĩpohe kuatia mbyparahahea rãĩmi, tẽvã tengapokui kuimbai Kuareta Tay meẽva! Haikavivetẽshu verãmba ko kuimbai o'ãrã. 25Haipe Judas, Jesús meẽ verã pyrãndu jyveshu: Pyrỹmboi'ia, sheẽãrapokui? Jesús heishu: Nde rãnga. 26Karumapo ñynoĩ retarã, Jesús heky pãhã, haivi ohovasa; pysẽãmarã meẽshu mboireare hãrã heishu: Peu, kova hai shyrete. 27Haivi mỹnyhẽjy pente vaso vino, haivi ñymboi'ĩãrẽ, mbyhasashu mboireare hãrã hei: Jyvache pimbyupy kova vino. 28Kova hai shuruvy my'ãñeteva ñee me'ẽãva py'ahuva ryheva, ñohẽhava opava pevarãre, mbai porãmba japo vekua hejahareishi verã. 29Hãrã she haijy pee, koivive hauveamapo uva tyy, haujy verã arapeve penendie py'ahuva, Sheru mburuvisha vasurã. 30Opa pyrahe pente mbyraherã, ohojy reta Olivore yvuturusukyty.
Jesús mbeu Pedro ñomi verã
31Hãrã Jesús heishu reta: Opaite pee shyrejareiipokui ko pỹntu. Shara Tũpa ĩñeepe hei: Ajukapo avishare ñyngareko'ihea haivi avisha opapo ñymomohẽ. 32Tẽvã akuerajymarã ahapokui pynonderã Galilea kyty. 33Pedro heishu: Ajemaĩpo opa ndyreja reta tẽvã she aryrejããpokui. 34Jesús heishu: Ãñete hai nde, ko pỹntu ndeiteri uru ñeerã, mbahapyjypo rerekui shykuambaa. 35Pedro heishu: Ajemaĩpo ãmano jyve nendiekui, ãrĩñomiãpokui. Hãrã opaiteva mboireare kyrãpavẽi heijyre.
Jesús ñymboi Getsemanipe
36Haivi Jesús oho hãndi mboireare Getsemani he'iashuape. Hãrã heishu reta: Kopẽĩ pimekui, kutymipo aha airureshu Tũpa. 37Hãrã raha Pedro hareka mokue Sebedeo tayre. Haivi õñepyrõ ñãndu'ijehe vyamba. 38Heishu reta: Shyrykovepe ãĩñymbasy, ãñandu ãmano verã rãĩmi. Kopẽĩ pime hareka avy peche shyhevikui. 39Hãrã Jesús ohoposhy tynonderã, ĩñesu hova mbojapeve yvyre, hareka jurureshu Tũpa: Sheru, katuãra rỹmbyhasa shyhevi ko ñymbasykue. Tẽvã avy tiko she aipotava, koñeĩ tiko nde ripota. 40Haivi oujy mboireare'õpe hesha opa oche reta hãrã heishu Pedro: Katu'ãĩteira pysarekotẽ pẽĩve, pente ora? 41Pysareko rãngapo avy peche hareka pirure, mahẽ peakui mbai porãmbape. Aikuaa pynykyrẽytẽ mbai haikaviva pijaporã, tẽvã pyndyroo kãngy. 42Hãrã hykuãĩ mokueheare kyrãĩ oho jururejy: Sheru, katũã rymbyhasa shyhevi ko jepy'apyrã, japo nde ripotava rãĩmi. 43Haivi oujyrã, hykũãi hesha mboireare opa ochejy reta hypehyiterã. 44Haipema hejashu reta hãrã ohojy mbahapyhearema jurure verã, hykuaĩ hei vekua rãĩmi heijy. 45Haivi Jesús oujy mboireare'õperã heishu reta: Ã'ẽ katuma peche hareka puputu'u. Vãhẽma ora, kuareta Tay mẽ'ẽhã verã mbai porãmba japo'iare ipope. 46Pupũ'ã, jahajyvy, shara ouma shymeẽ verã.
Jesús pysyharã vekua
47Jesús ijetateri ẽvã, vãhẽ ou Judas 12 mboireare penteva, heta ou hãndi kuaretare jykyse puku'iare hareka yvyra ryheve. Pai juhuvisha hareka kuakuavare israelpe'õre mondoshuare. 48Judas, pyrypysykava mbeuvãĩshu reta pente hã'ãngavape japo verã: Hovape apytevapo haikui, pypysykui. 49Hãrã ñymboja Jesús ẽvãperã heishu: Pyrỹmboi'ia, nypỹntumara! Haipe hovape pyteshu. 50Jesús heishu: Shi'ĩrũ, mbaivara reru? Haipe kuaretare ou pysy Jesús, hãrã raha mbypereso. 51Haipe Jesús ñi'ĩrũ penteva, jykyse pukuva hekyrã jasyjashi pai ruvisha jokuereirea nambi hyvaisho. 52Jesús heishu: Ñonojy ndykyse pukuva hyrupe. Opaite kyse puku poryva, kyse pukupẽĩpo jukahajy. 53Rikuãra katuĩ airure jyveshu Sheru, aipotarã hai katupo mbou 12 õ ñymbatyva jokuevare? 54Akuarã, mãrãrapo opa iko Tũpa ĩñeepe heiva, kyrã ñõĩte iko verã? 55Hãrã Jesús heishu kuaretare: Marã'ĩrãra kyse puku hareka yvyra ryheve pei shypysy verã, manarõ'ia rãĩmi. Opa ara rãnga avapy pynymbyteipi tũpaope apyrỹmboirã, tẽvã mbairãmba shymby peresopiva. 56Tẽvã opava kova iko'ẽ hekope, Tũpa ĩñee mbeu'iare hei vekua Tũpa ĩñeepe. Haivi mboireare opa hejashu Jesús hã'ẽĩ.
Jesús rahaha Judio juhuvishare hỹnonde
57Hãrã Jesús mbyperesovare rahashu pai vasu Caifas hentape. Moisés mbypara vekua pyrỹmboi'iheare hareka kuakuavare ñymbatyse'õpe. 58Tẽvã Pedro mbyryivi oho haykue pai vasu hoo ipeve, hesha verã mãrãrapo japo reta Jesús. 59Hãrã pai juhuvishare hareka kuakuavare ñymbatyse'õpe, heka ñynõĩ mãrãrapo ñee ãñetemba poryhe reta, ñono vaishu verã Jesús hareka jukaka verã. 60Tẽvã, mba'ẽã heshahe reta hetate'ẽ japupe ou heihevare: 61Kova kuimbai hei vekua, “Mbahapy arape opapo aity Tũpa hoo hãrã mbahapy arape amupũãpojy”. 62Hãrã haipe pai juhuvisha vasu pũãrã heishu Jesús: Mba'ẽã rapo rere? Mbaivara hei ñynõĩ ndyreheva? 63Tẽvã Jesús jasakaĩ'i. Haipe pai juhuvisha hei jyshu: Tũpa hykove'ia heepe mbeu ore, ndera hai Cristo Tũpa tay? 64Hãrã Jesús heishu: Kyrã rãnga, nde rereva rãĩmi. Hãrã haijy pee, pyheshapokui kuareta Tay vapy, Tũpa ñymbaikatuveva jakata kyty hareka ouma vate araivi avãpyntupy. 65Haivi pai juhuvisha vasu myndoro mondevarã hei: Ko kuimbai ijeta porããhe Tũpa, mbai rehera jahekapojy mbeu kavi verã? Pee rãnga pyhenduma heihe vekua Tũpa. 66Mãrãra pere jyve? Hãrã haire hei: Ĩmere mbai porãmba japo vekua, hãrã manopo. 67Hãrã myndyvy jyre hovare hareka nũpa, ĩrũ reta katy hovaipi nũpashu. 68Hei jyreshu: Nde haiva Cristo? Mbeu, mbavara nunũpa'ẽ!
Pedro ñomire kuava Jesús
69Haipe Pedro vapy'ẽ katuape, hãrã pente taupe pai juhuvisha jokuerea oho hyvacherã heishu: Nde rãnga rikori jyve hãndi Jesús, Galileava. 70Tẽvã Pedro ñomire opavare hyvacherã hei: Aikuããny nde rereva. 71Haivi Pedro ohojy õche kytyrã, taupe jokueharea ĩrũ hesharã heishu haipe'õre; ko kuimbai rãnga iko'i jyve hãndi Jesús Nasareno. 72Pedro ñomijy hãrã ĩñee meẽvape hei: Tũpa heepe hai aikuambava ko kuimbai. 73Hãrã haipe'õre ou Pedro hyvacherã heishu: Añetẽĩte, nde hai jyve hai ryhevare, jykuaa ndyrehe niñee ryheve. 74Pedro õñepỹrõ jypejurã hareka meẽ ĩñeerã, hei: Aikuãã rãngashu ko kuimbai. Hãrã haipe uru ñyrãã. 75Haipe Pedro mãnduahe Jesús heishu vekua rãĩmi, “Ndei uru ñyrãrã mbahapyjypo shiñomikui”. Pedro õhẽ katuaperã jaheote'i, shara mbasyiterã.
Actualmente seleccionado:
Mateo 26: TPJ
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
©2023 LETRA Paraguay