Muuduko 19
19
A'mwo Soodoomda'ai tooravuro kirovanyuvanyu sajupo tovinokwono
1Lukomgu sulato toga ensel tooral wolno sumaleyokwe wagwolago Soodoom toru kwolai'movolorakono. Toro wolai'mo'mdole toga Lootol wagwolago su tovi kuullo'mo noullo toru mwalodowodo tool kwonokarakono. Toro wonyuno sumaiyokwe Lootol ensel toorallu wuuru'mallo'moneyokwe uuwo'no kwako tovi kwolomuulo'narokaikono. 2Toro wolomuulo'na'no sumaiyokwe kuudokaikono. “Mi a'mworaloo, kemoro womdokwe tekwonyugono. Toro te kevu sa wollo'mo tov moro ago tovi nokwo bubullunorakikono. Toro toorakul kemi suvlo ton nokwo yal'mo'no'bullu surakuuto akallugwoji sa wo'bullunorakikono. Toro toorakul lomwo iru'mago toga dukavo'bullu nokwo pla'bullunorakikono.” Lootol toro kuudokaikono. Toro kuudoka kuvi kuruv aro kuudolorakono. “Awiyo. Gumoro ago tovi mworosunonakono. Navu wagwolago tovi kuulowosi ago tovuro agwapto toru worosunonakono.” Kuudolorakono. 3Toro kuudolo kworallu kuruv Lootol guureji aduuwiyokaikono. Toro duuwino sumaiyokwe Lootol a'mwo tooralluda'ai gamoro ago tovino mokabino sumaiyokwe aulaporogano. Toro kuulno sumaveyokwe Lootol kemi nonyo'mo wosamujuko bwotonyago ton sovrowosokaikono. Toro te Lootol bret tov nomunyo'moneyokwe yis nonaguto tokwe ailokaikono. Toro kilno sumaiyokwe wosamujuko ton anomwaloporogano.
4Toro nyuno sumaleyokwe sa yere mwo'dole toga wagwolago Soodoomda'ai a'mwo tooro Lootolluro ago toru'no aboporogano. Yiuwi'nokai muugunyo toorogai'aro a'mwono toorogai'aro yiuwi'nokai wagwolago su tovida'ai a'mwo tooro lokabo'mno Lootolluro ago toru aiyowomno abilomwodovomaroporogano. 5Toro bilomwodovoma'no sumaveyokwe toga Lootollu deko guureji aulodomaroporogano. Toro tooro mebweyogalo aro aduuwiyoporogano. “A'mwo amokamodo tooral gadomuu domwakulo? Nevu a'mwo su to kworallu nogalamuulano'moneyokwe guu julomovomjopiyabono!” Aduuwiyoporogano. 6Toro aduuwiyopo tovi Lootol gami ago tovida'ai bolokwino sumaiyokwe toga kudo'aiko tov amallukurokaikono. 7Toro tool a'mwo toorai aro ajugonokarogano. “Nuugeravoo, kirovanyuvanyu toro mipinono. 8Toro kuvi kuruv kevu duu'nyulo. Moro sujuraiyo puruval nomwakulo. Toro toval a'mwo pworogai sumwonyo miyodubulovakono. Toro tovallu ikumokalobo'mi kevu kemi kuudo tovida'ai nokwo galamuulpinovakono. Toro kworekul kuruv nuuge amwakulo a'mwo akaralluno'gwowi kaiya'no mwipinorakono.” Lootol toro ajugonokarogano.
9Lootol toro ajugonoka kworo kuruv muu'nyubusuko ino sumaveyokwe kuudoporogano. “Lukojo, guu wagwolago akaruda'ai kuunodekumaiyo. Pumuuda'ai bomwallo tooku nemi kooti yogalo danekullo'mo mimo'nubinekugono. Toro te a'mwo toorallu kaiyako wiyowa'ji kuvi kuruv gumino'gwowi kaiyako bwotonyo kuunodo gujanekugono.” Kuudoporogano. Toro wuujuno sumaveyokwe Lootollu modumotowapiyo'mno kudo'aiko tovi pwo'dolomokaullo'moneyokwe wobo toru aboporogano.
10Toro bodopure toga Lootolluro ago tovida'ai a'mwo aulomwallajulo tooral kudo'aiko tov kuusuno sumaleyokwe Lootollu yere me'nolopuuromokaulalno kudo'aiko tov amallukurolorakono. 11Toro ino sumaleyokwe yiuwi'nokai a'mwo kwa'mgu tomuuda'ai adaiyajupo toorai sumnowojokwe kuubweyolorakono. Toro kuubweyolo toga yiuwi'nokai muugunyo toorogai'aro a'mwono toorogai'aro tooro sumnowojokwe sumo'noporogano. Toro tooro ago tovuro noullo tovino a'mgono sopo kworo kuruv yiuno buko buko yo'mno miyo'mgonomaroporogano.
Lootol wagwolago Soodoomda'ai lukado avlavoka tovinokwono
12Toruda'ai a'mwo tooral Lootollu kuudolorakono. “Guuge avalo pun wagwolago akavi dukomwakovo? Gumi junyalumorodeyo oo gumoro muugunyorodeyo oo gumoro taiyodeyo tonyuda'ai momworaro'bi wagwolago akavida'ai bomokalokwono. Toro tov aro tovinokwono. 13Wagwolago akavida'ai a'mwo tooravuro kirovanyuvanyu pasudo mujeroungovla'mdupudo ton deko to'busuko ilodopiyodopure tonyu Gooti Yawel wuu'nodowodekono. Toro tool wagwolago akavi kaiyako mollounapiyo'mo nami amanakwopiyamokanakono.” Kuudolorakono.
14Toro kuudolo tovi Lootol wuu'no'no gamoro sujuraiyo tovalluro a'mwo ajudoubwengiko toorallu wuujo'mo tool bolokwo'no aro abiluudokaikono. “Gooti Yawel wagwolago akavi kaiyako nomollounapiyono'mo togakono. Kevu yere numjuno'bullu lukado avlawano.” Lootol toro kuudoka kworal kuruv aro sajunolorakono. “Oo nami ipa'nyo anakudadopiyo,” dolno kaduko mwiyolorakono.
15Toruda'ai lomwo iru'mago toga ensel tooral Lootollu guureji aro aduuwiyolorakono. “Navu wagwolago akavi kaiyako mollounapiyodowosure toga guuge amwakopo tonumdotekul kaiyako nomapiyokweyo'mo tov gumi abolo tokwe'aro gumi taiyo tovake'aro tonumdotekul lukado yere dovlaiyulo!” Aduuwiyolorakono. 16#2Pt. 2:7Toro aduuwiyolo kuvi kuruv Lootol yere mavlavokaikono. Toro yoduke toga ensel tooral Looteke'aro gamoro abolo tokwe'aro gamoro taiyo tovake'aro tonumdotai wagwolago tovi kwa'mgu tomuuno kemi ato tovi'aro abomogaibworomokalokwolorakono. Gooti Yawel Looteke tonumdotaino kalo wino'no toro kwiyo'mwojokaikono. 17Wagwolago tovida'ai bomogaibworomokalokwino sumaleyokwe aro amadolorakono. “Kevu nobolpiyokweyo'mo tov lukado neya dovlaiyulo. Toro plavopi toga aikomgu gunyubwosumdo mipinono. Aki kwako worato su toru mamwalpinono. Toro kugaikul kuruv yiuno muumuudo tooraiyomno kano kano juloulo.” Amadolorakono.
18Toro amadolo kuvi kuruv Lootol ensel su tooralluro pwollu aro kuudokaikono. “Mi agutoloo, nuu kumuuno milamekwonyugono. 19Guu mino kalo bwotonyo gujunodowo nobolo'jokweyo'mo anyo'mwojumadekugono. Toro tekwonyu gumoro womdokwe pwolbusuko agujumo'numono. Toro kwonyu kuruv muumuudo tooraiyomno ku'nono milamekwonyugono. Guu kaiyako mollounapiyodo'bure toga nuu muumuudo tooraiyomno avla'mi tov tabunyu su tov nuu kwonyuda'ai numarowo'ji nobolmiyo. 20Toro tovino tov guu wagwolago kula'nyo akaijuvi doonono. Nuu nobolmiyokweyo'mo tov wagwolago kula'nyo su tovi nokwo kuulamonyudukono?” Lootol toro kuudoganokaikono.
21Toro kuudoganoka tovi ensel tool kuudokaikono. “Yowa'nogano. Nuu wagwolago anyudumado su tovino'gwowi kaiyako migolmonyugono. Toro tovino tov nokwo kuulabinekugono. 22Toro te wagwolago su tomuuno lukado yere duuwilo. Nuu sogwollo kuuno aikinmwakono. Toro te kevu wagwolago akaijuvi me'no ai'movapi toga'no nuu kaiyako mollounapimonyugono.” Kuudokaikono. Aki wagwolago su tovino yovo tov Soowar dodupudorukono. Su tov Lootolluro yogalo, “wagwolago kula'nyokwono” me'no ajungiko tovino tov Soowar dodupudorukono.
Gooti Yawel wagwolago Soodoomke Goomoorake tovallu kaiyako amollounapiyoka tovinokwono
23Looteke tonumdoto plaino sumaveyokwe kuujo tool ilopiyaboduke toga wagwolago Soowar toru ai'movoponumdotogano. 24#Mt. 10:15, 11:23,24; Lk. 10:12, 17:29; 2Pt. 2:6; Jt. 1:7Toro toga Gooti Yawel dukworokakwe salfa sulo bwotonyago ton wagwolago Soodoomke Goomoorake tovallu kwolomoropiyabokaikono. Toro ton muunyu kai'muuda'ai buuruko to'busuko avodavopogano. 25Gooti Yawel toro wolopiyabino sumaiyokwe wagwolago su tovake'aro yiuwi'nokai kwako wora'maluko towaike'aro tonyu kaiyako amollounapiyokaikono. Aki yiuwi'nokai wagwolago tovallu kuulomwalodupudo kunyu kuruv yiunokuudo aromiyebuuropiyokaikono. Aki noonyumwonyu iko gwo'gwoptodeyo kwako tovida'ai bila'dupudo tonyu duko aluvirowapiyokaikono. 26#Lk. 17:32Toro mollounapiyoduke toga Lootolluro abolo tov aikomgu gunyubwosumdo sokakwono. Toro soka kuga'gwo kuuno Lootolluro abolo tov talo imo'no'no suwasulo pwolbusuko adavokakwono. Lootolluro abolo tov su toro sumo'nokakwono.
27To'no'gwowi Eburaiyamol lomwo iru'mago su tollugwoji Gooti Yaweke ajuda'nolo aiko toru'no kwolokaikono. 28Toro tool wolno sumaiyokwe wagwolago Soodoomke Goomoorake tovake yiuwi'nokai kwako wora'maluko toruke tomuu kwoloonyopiyokaikono. Toro woloonyopino sumaiyokwe yiuwi'nokai kwako su tovi juto tov aiyowomno biloduke kwonokaikono. Juto kwonoka su tov duko bwotonyo bonugelodowo'jure tovida'ai bilodawodo to'busuko kubalno kwonokaikono. 29Toro te Gooti Yawel wagwolago kwako wora'maluko wo'dupudo tonyu toro amollounapiyokaikono. Aki Gooti Yawel Lootolluro amwallajuko towai kaiyako amollounapiyoka toga Lootolluro ganumamwolo Eburaiyamolluno kuudo saurokaikono. Toro yau'no sumaiyokwe Lootol kwako su towai nobolo'jokweyo'mo pumuuno amorapiyokaikono.
Moowap iko tovake Amoon iko tovake tooralluro muudu'no sumo'nolo tovinokwono
30Toruda'ai Lootol wagwolago Soowar towai mwallo'mo luko yo'no gami taiyo tovake'aro momworaro'no lukado avlavoponumdotogano. Toro ton muumuudo toorai tomuu ilno sumaveyokwe sumago pwollu tomuu aulomwalopogano. 31Lukomgu iruko pullugwoji taiyo sumdomguda'ai tov gami ganabwiyago tovi aro kuudokakwono. “Nami nallunumiyago tool yago imo'nono'mekono. Aki yiuwi'nokai abolo kwako akavi mwalodupudo ton kwolo uuma'nodupudogano. Toro kuvi kuruv akawai nami nakumallo'mo to'gwowi a'mwo pworo nonagutomuugono. 32Toro tovino tov nevu yiuwi'nokai tonumdotonol nobolopiya'jokweyo'mo tov navu aro yesunokwono. Nami nallunumiyago toollu wain wonyo bwotonyago tov wino wino yowosi amomo yonekono. Toro yodowo'jure toga navu kweke sumwonyo yesuno'makono. Toro sosi toga nami nallunumiyago toolluro kwoloraiyo ton nokwo mulomworarosunokwono.” 33Toro wuujuno sumaiyokwe surakuuto toga taiyo toval kemi kuunumiyago toollu wain wonyo tov wiyolno amomo sokaikono. Toro yoduke toga taiyo sumdomguda'ai tov kuula'no kweke sumwonyo solokwono. Ganumiyago tool wain wonyo no'no amomo soka tovino tov gami taiyo tokwe sumwonyo solo tovino kuudo miyaurokaikono.
34Toruda'ai iruko aikomguda'ai tollugwoji taiyo sumdomguda'ai tov gami ganabwiyago tovi kuudokakwono. “Nuu kweke sumwonyo me'no suguwolo'migono. Toro te aga aki aiko te wain wonyo bwotonyago ton wiyowosi amomo yodowo'jure toga guu kweke sumwonyo ibullunokwono. Toro subi tovi yiuwi'nokai tonodonal nami nallunumiyago toolluro kwolaiyo pworal neya mulomworarosuno'makono.” 35Toro wuujuno sumaiyokwe surakuuto toga kemi kuunumiyago toollu wain wonyo ton aki aiko te wiyolno amomo sokaikono. Toro yoduke toga taiyo lukomguda'ai tov kuula'no kweke sumwonyo solokwono. Toro te aki aiko te ganumiyago tool wain wonyo no'no amomo soka tovino tov gami taiyo lukomguda'ai tokwe sumwonyo solo tovino kuudo miyaurokaikono.
36Toro te Lootolluro yiuwi'nokai taiyo tonodal kemi kuunumiyago toolluro sumwoluko sumo'nolovakono. 37Toro imo'nyuno sumaleyokwe taiyo sumdomguda'ai tov kwolaiyo pwol yomaro'no Moowapolo amullowarokakwono. Toro tool aga kuga Moowapda'ai amwakopo toorai kwikweyagekono. 38Aki taiyo lukomguda'ai tov kwolaiyo pwol yomaro'no Benamiyolo amullowarokakwono. Toro tool aga kuga Amoonda'ai amwakopo toorai kwikweyagekono.
Actualmente seleccionado:
Muuduko 19: SMB
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2022: Ethnos360 Sanford, Florida