Matius 6
6
Soal kasi apapa par orang kasiang
6:1-4
1Yesus bilang lai kata, “Basudara e, inga bae-bae! Jang biking apa yang batul di muka orang deng maksud biar dong lia kamong. Kalo kamong biking bagitu, jang harap kamong pung Bapa di sorga nanti balas apa yang kamong su biking tu.#Matius 23:5 2Jadi, kalo kamong mau kasi apapa par orang kasiang, jang bilang-bilang akang lai, macang deng orang munafik biasa biking dalang tampa-tampa sombayang deng di jalang-jalang biar orang puji dong. Dengar bae-bae tagal apa yang Beta bilang ni batul! Orang yang biking macang bagitu su dapa dong pung bagiang. 3Mar, kalo kamong kasi apapa par orang kasiang, jang orang tau. Akang macang deng apa yang tangang kanang kasi, tangang kiri seng tau. 4Kasi akang tado-tado. La kamong pung Bapa yang lia apa yang kamong biking yang orang laeng seng lia tu, Antua nanti balas akang par kamong.”
Yesus kasi balajar Antua pung murid-murid par sombayang
6:5-15
(Lukas 11:2-4)
5Yesus bilang lai kata, “Kalo kamong sombayang, jang macang deng orang munafik. Dong suka badiri sombayang di tampa-tampa sombayang deng di jiku-jiku jalang biar orang lia la puji dong. Dengar bae-bae tagal apa yang Beta bilang ni batul! Orang yang biking macang bagitu su dapa dong pung bagiang. 6Mar kalo kamong sombayang, maso dalang kamar, tutu pintu, la sombayang par kamong pung Bapa yang kamong seng bisa lia tu. La kamong pung Bapa yang lia apa yang kamong biking yang orang seng lia tu, Antua nanti balas akang par kamong.
7Jadi kalo kamong sombayang, jang sombayang ulang-paleu macang deng orang-orang yang seng kanal Allah. Barang dong pikir, deng dong pung kata-kata yang banya-banya tu, dong nanti dapa apa yang dong minta. 8Jang macang deng dong! Tagal kamong pung Bapa su tau apa yang kamong parlu, biar kata kamong balong minta akang dari Antua lai. 9Jadi kalo kamong sombayang, sombayang bagini:
Sio katong pung Bapa di sorga. Katong minta biar samua orang taru hormat par Bapa.
10Katong minta biar Bapa pegang parenta jadi Raja par samua orang
deng biar Bapa pung mau jadi di dunya ni, sama deng yang jadi di sorga.
11Katong minta biar Bapa kasi makanang yang katong parlu hari ini.
12Sio Bapa e! Tolong kasi ampong katong pung dosa-dosa jua,
sama deng katong jua kasi ampong orang-orang yang biking sala par katong.
13La jang kasi tinggal katong dapa coba par biking dosa.
Mar, kasi salamat katong jua dari Setang pung Raja pung kuasa.
[Tagal Bapa tu Raja, deng yang pung kuasa par samua-samua, deng yang pantas par dapa puji tarus-tarus. Amin.]
14Kalo kamong kasi ampong orang yang biking sala par kamong, kamong pung Bapa di sorga jua kasi ampong kamong pung dosa-dosa lai.#Markus 11:25-26 15Mar, kalo kamong seng kasi ampong orang yang biking sala par kamong, kamong pung Bapa jua seng kasi ampong kamong pung dosa-dosa lai.”
Soal puasa
6:16-18
16Yesus bilang lai kata, “Kalo kamong puasa, jang biking muka kasiang macang deng orang munafik biasa biking biar orang tau kalo dong ada puasa. Dengar bae-bae tagal apa yang Beta bilang ni batul! Orang yang biking macang bagitu su dapa dong pung bagiang. 17Mar kalo kamong puasa, kamong musti basu muka barsi-barsi deng kalesang kamong pung rambu, 18biar orang seng tau kalo kamong ada puasa. Cuma kamong pung Bapa yang kamong seng bisa lia tu yang tau. La kamong pung Bapa yang lia apa yang kamong biking yang orang seng lia tu, Antua nanti balas akang par kamong.”
Soal kumpul harta
6:19-24
19Yesus bilang lai kata, “Jang kumpul harta par kamong di dunya ni, tagal nanti mai-mai deng karat biking rusak akang deng pancuri datang pancuri akang.#Yakobis 5:2-3 20Mar yang batul tu, kumpul harta par kamong di sorga, tagal mai-mai deng karat seng bisa biking rusak akang, deng pancuri jua seng bisa datang pancuri akang. 21Barang, kalo kamong pung harta ada di mana, kamong pung hati ada di situ lai.
22Kamong pung mata tu yang jadi palita par kamong pung diri. Kalo kamong pung mata tu tarang, kamong pung diri samua tarang lai. 23Mar kalo kamong pung mata galap, kamong pung diri samua galap lai. Jadi kalo tarang yang ada di kamong pung diri tu galap, galap yang ada di kamong tu paleng galap!
24Seng ada satu orang lai yang bisa karja par dua bos, tagal dia nanti binci satu la sayang yang laeng ka dengar-dengarang satu la seng dengar-dengarang yang laeng. Bagitu lai deng kamong. Kamong seng bisa hidop par Allah deng jua hidop par harta dunya!”#Lukas 16:13
Jang balisa soal eso lusa
6:25-34
(Lukas 12:22-31)
25Yesus bilang lai kata, “Tagal itu, dengar Beta bilang par kamong! Jang balisa soal kamong pung hidop, soal apa yang nanti kamong makang ka minong. Ka, jang balisa soal kamong pung badang, soal apa yang nanti kamong pake. Masa kamong seng tau kalo hidop tu labe panting dari makanang deng badang tu labe panting dari pakiang? 26Coba lia burung-burung di langit. Akang seng bakabong, seng ambe hasil, deng seng simpang makanang dalang gudang, mar kamong pung Bapa di sorga kasi makang akang. Masa kamong seng tau kalo par Antua kamong labe panting dari burung-burung tu? 27Sapa dari kamong yang tagal dia pung hati balisa bisa kasi panjang dia pung umur biar cuma satu jam sa?
28Mangapa kong sampe kamong susa soal pakiang? Coba lia bunga-bunga yang batumbu liar tu. Akang seng karja deng seng biking banang par pakiang. 29Mar, dengar Beta bilang par kamong: Mala Raja Salomo yang paleng kaya tu jua seng bapake bagus macang deng satu dari bunga-bunga tu.#1 Raja-Raja 10:4-7; 2 Orang Israel pung Sejara 9:3-6 30Jadi, kalo rumpu liar yang hari ini ada mar eso su dapa bakar tu sa Allah kalesang akang, apalai kamong? Antua pasti kalesang kamong labe dari rumpu liar tu, hoe orang-orang yang kurang parcaya e!
31Tagal itu, jang balisa la bilang, ‘Sio e! Katong nanti makang deng minong apa? Katong nanti pake apa?’ 32Barang, orang-orang yang seng kanal Allah cari-cari samua tu, mar kamong pung Bapa di sorga tau kalo kamong parlu samua tu. 33Mar yang paleng panting tu, usaha biar Allah pegang parenta jadi Raja dalang kamong pung hidop deng biar kamong iko Antua pung mau, la Antua nanti kasi samua yang kamong parlu tu jua par kamong. 34Jadi jang balisa soal eso, tagal eso tu akang pung susa sandiri lai. Susa sahari cukup par sahari sa.”
Actualmente seleccionado:
Matius 6: ABMA
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 2022, Sinode Gereja Protestan Maluku
