Matius 7
7
Jang nilai orang laeng
7:1-5
(Lukas 6:37-38, 41-42)
1Yesus bilang lai kata, “Jang nilai orang laeng, biar kamong jua seng dapa nilai lai. 2Barang, sama deng kamong nilai orang laeng, Allah nanti nilai kamong macang bagitu lai. Deng ukurang yang kamong pake par ukur orang laeng, Allah jua nanti pake akang par ukur kamong lai.#Markus 4:24
3Mangapa kong kamong lia ampas kayo dalang kamong pung sudara pung mata, mar seng taru kira balak dalang kamong pung mata sandiri? 4Bagemana kong kamong bisa bilang par kamong pung sudara kata, ‘Sudara e! Mari beta kasi kaluar ampas kayo tu dari ale pung mata’, mar ada balak dalang kamong sandiri pung mata lai? 5He orang munafik! Kasi kaluar balak dari kamong pung mata tu do, biar kamong bisa lia bae-bae par kasi kaluar ampas kayo dari kamong pung sudara pung mata.”
Jang kasi Allah pung ajarang par orang yang hina akang
7:6
6Yesus bilang lai kata, “Jang kasi Allah pung ajarang par orang yang hina akang. Itu sama sa deng kamong kasi apa yang kudus par anjing, tarus akang bale gigi kamong. Itu sama lai deng kamong buang mutiara par babi, tarus akang bale inja-inja mutiara tu.”
Allah kasi apa yang bae par orang yang minta dari Antua
7:7-11
(Lukas 11:9-13)
7Yesus bilang lai kata, “Minta, la kamong nanti dapa kasi. Cari, la kamong nanti dapa. Toki pintu, la akang nanti dapa buka par kamong. 8Barang, sapa sa yang minta nanti dapa kasi. Sapa sa yang cari nanti dapa. La sapa sa yang toki pintu, nanti akang dapa buka par dia.
9Coba pikir bae-bae! Sapa dari kamong yang kasi batu par dia pung ana kalo dia minta roti? 10Ka kasi ular kalo dia minta ikang? 11Jadi, kalo kamong manusia yang jahat sa tau kasi apa yang bae par kamong pung anana, apalai kamong pung Bapa di sorga! Antua nanti kasi apa yang bae par orang-orang yang minta dari Antua.”
Atorang dasar
7:12
12Yesus bilang lai kata, “Apa sa yang kamong mau orang biking par kamong, biking akang jua par dong. Itu tu dasar dari Kitab Torat deng Allah pung juru-juru bicara pung tulisang.”#Lukas 6:31
Jalang yang kacil deng basar
7:13-14
(Lukas 13:24)
13Yesus bilang lai, “Maso lewat pintu yang kacil. Barang, pintu yang basar deng jalang yang lebar tu bawa orang par binasa, deng banya orang yang maso lewat akang. 14Mar, pintu yang bawa orang par hidop tarus-tarus tu kacil deng akang pung jalang jua kacil, deng cuma sadiki orang sa yang maso lewat akang.”
Ati-ati deng juru-juru bicara parlente
7:15-20
(Lukas 6:43-44)
15Yesus bilang lai kata, “Basudara e, ati-ati deng juru-juru bicara parlente yang datang par kamong. Dari luar, dong lia bae macang deng domba. Mar di dalang, dong jahat macang deng anjing utang. 16Dari apa yang dong biking, kamong bisa tau dong tu sapa. Itu macang deng dari bua katong bisa tau akang pung pohong. Masa orang pete bua anggor dari rumpu baduri ka bua ara dari rumpu karanjang? 17Pohong yang bae pasti kasi bua yang bae, mar pohong yang seng bae pasti kasi bua yang seng bae. 18Pohong yang bae seng kasi bua yang seng bae deng pohong yang seng bae seng kasi bua yang bae. 19La pohong mana sa yang seng kasi bua yang bae nanti dapa rubu la dapa buang dalang api.#Matius 3:10; Lukas 3:9 20Jadi dari apa yang dong biking, kamong bisa tau dong tu sapa.”#Matius 12:33
Seng samua orang jadi Allah pung orang-orang yang Antua parenta macang deng Raja
7:21-23
(Lukas 13:25-27)
21Yesus bilang lai kata, “Seng samua orang yang panggel Beta, ‘Tuhan, Tuhan!’ yang nanti jadi Allah pung orang-orang yang Antua parenta macang deng Raja, cuma orang-orang yang iko Beta pung Bapa di sorga pung mau sa. 22Nanti waktu hari kiamat, banya orang bilang par Beta bagini, ‘Tuhan, Tuhan! Deng Tuhan pung kuasa katong kasi tau pasáng yang katong dapa dari Tuhan, deng Tuhan pung kuasa katong user setang-setang, la deng Tuhan pung kuasa jua katong biking tanda-tanda herang.’ 23Mar waktu itu, Beta nanti bilang tarang-tarang par dong kata, ‘Beta seng kanal kamorang. Kamorang tu tukang biking kajahatang! Pi dari Beta pung dalang muka!’ ”#Lagu-Lagu 6:9
Dua macang dasar
7:24-27
(Lukas 6:47-49)
24Yesus bilang lai kata, “Sapa sa yang dengar Beta pung ajarang deng iko akang, dia tu sama deng orang yang pung pikirang tajang, yang biking dia pung ruma di atas batu. 25Waktu ujang basar turung, hener datang, la anging ribut datang hantam ruma tu, akang seng rubu tagal akang tadudu di atas batu. 26Mar, sapa sa yang dengar Beta pung kata-kata deng seng iko akang, dia sama deng orang bodo yang biking dia pung ruma di atas paser. 27Waktu ujang turung, hener datang, la anging ribut datang hantam ruma tu, akang rubu rata deng tana.”
Orang-orang taherang-herang dengar Yesus pung ajarang
7:28-29
28Waktu Yesus abis kasi balajar orang banya tu, dong taherang-herang dengar Antua pung ajarang. 29Barang, Antua kasi balajar dong deng kuasa, seng sama deng dong pung guru-guru Torat.
Actualmente seleccionado:
Matius 7: ABMA
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 2022, Sinode Gereja Protestan Maluku
