प्रेरित 1
1
परमेस्वरले प्रतिग्या अर्या पबित्तर आत्मा
1माननिय थियोफिलस, इसुले काम अद्द सुरु अर्याबटहइ उन स्वर्ग नगयासम्म उनुले अर्या काम रे सिकाया सप्पइ कुराका बिसयमि मेरा #१:१ पइलो किताब भुन्या लुकाको किताब हो। पइला किताबमि लेख्या छु।
2इसु स्वर्ग जानु भुन्ना पइलि आफुले छान्या प्रेरितनलाइ पबित्तर आत्माका सक्तिबटहइ आग्या दियापाछा उन स्वर्गमि उचालिबर लइया दिनसम्म सप्पइ कुरा तसइ किताबमि लेखिया छन्। 3आफुले दुःख भोग्यापाछा भउत किसमका पक्का प्रमाणबटहइ सिस्यानका आगाडि उनुले आफुइलाइ जिउनो भया धेकायो। चालिस दिनसम्मइ उन तिनुनका वा धेका पण्या रे परमेस्वरको राज्यका बिसयमि तिनुनलाइ बतायो। 4एकबर इसु सिस्यानसित भोजमि बसन्ज्या उनुले तिनुनलाइ इसेरि आग्या दियो, “मेरा पिताले पबित्तर आत्मा दिनउ भुणि अर्या प्रतिग्या पुरा नहुन्ज्यासम्म तमु यरुसलेम छाडिबर काँइ जनजा, रे यइ बिसयमि मुइले तमुलाइ अगाडिबटहइ भुणिसक्या छु। 5क्यालाइकि युहन्नाले त पानिले बप्तिस्मा दियो, तर आबका केइ दिनपाछा तमुले पबित्तर आत्माको बप्तिस्मा पाउन्या छउ।”
इसु स्वर्ग उठाइ लइया
6एक दिन प्रेरितन इसुसित भेला हुन्ज्या तिनुनले उनलाइ सोध्यो, “हे प्रभु, कि तमले हामरा इज्राएल राज्यलाइ अगाडिकोइ जसो बनाउन्या छउ?”
7उनुले तिनुनलाइ भुन्यो, “यो समय त पिता आफुइले तोक्याछन्, यो जान्न्या काम तमरो हइन्। 8तर पबित्तर आत्मा तमुमि आयापाछा तमुले सक्ति पाउन्याछउ, रे तमु यरुसलेममि, सारा यहुदियामि, सामरियामि रे धर्तिका सप्पइ ठउँरमि मेरा साछि हुन्या छउ।” 9इति भुणिसक्यापाछा तिनुनले हेद्दाहेद्दाइ इसु स्वर्गमि उचालि लइया। बादलले उनलाइ ढाक्यो तइपाछा तिनुनले उनलाइ धेकेन।
10जबइ तिनुन अग्गासतिर एकोहोरिबर हेद्दा थ्या, #१:१० तिन दुइ जना सेता लत्ता लाया मान्सन स्वर्गदुत थ्या। तबइ अचानक चम्किला लत्ता लाया दुइ जना मान्स तिनुनका नजिक कलिया धेकिया। 11तिनुनले भुन्यो, “ए गालिलका मान्सन हो, तमु क्याकि अग्गास तिर हेरिबर कल्लिरइछउ? तिनइ इसु, जो अइल तमुबटहइ स्वर्गमि उचालि लय्या, जसेरिकि तमुले उनलाइ स्वर्गमि गया धेक्या, तसेरि उन अज आउन्या छन्।”
यहुदा इइस्करियोतका ठउँर मतियासको निउक्ति
12तइपाछा सिस्यान जइतुन डाँणाबटहइ यरुसलेमतिर फर्किया, यरुसलेमबटहइ यो पाहाड लगभग एक किलोमिटर जति दुरमि पडन्थ्यो। 13यरुसलेममि पुग्यापाछा तिनुन आफु बस्या घरका मल्ला तलाका कोठामि उकल्या। तिनुन पत्रुस, याकुब, अन्द्रियास, फिलिप, थोमा, बारथोलोमाइ, मत्ति, अल्फयसको चेलो याकुब, देसभक्त दलको सिमोन रे याकुबको चेलो यहुदा थ्या। 14कति जनि स्वानिन रे इसुकि इजा मरियम रे उनरा भाइनसित यिनुन सप्पइ एकइ मनका होइबर निरन्तर प्रार्थना अरन्थ्या। 15केइ दिनपाछा ताँ लगभग एक सय बिस जना प्रभु इसुमि बिस्वास अद्द्या मान्सन जम्मा होइरइथ्या, पत्रुसले कल्लिबर तिनुनका बिचमि बोल्ल लाग्या, 16“दाइभाइन हो, इसुलाइ पक्राउ अद्द्या मान्सनको अगुवा यहुदाका बारेमि दाउद राजाले पबित्तर आत्माबटहइ धर्म- सास्त्तरमि भउत पइलि भुण्या थ्यो। यो कुरा पुरा हुनइपड्डया थ्यो। 17क्यालाइकि त्यो हाम मध्येकोइ थ्यो, रे इसइ सेबामि प्रभुको काम अद्दाइलाइ चुनिया थ्यो।”
18यहुदाले फुचेरा कामबटहइ कमाया पइसाले एक जग्गा किन्याथ्यो। तसइ खेतमि उ उन्या मुन्टो होइबर झण्यो, रे तइको पेट फुटिबर आनणाभुणि बाइर आइ मर्यो। 19यो कुरडि यरुसलेमका बासिन्दा सप्पइलाइ था भयो। तइ जग्गाको नाउँ तिनुनले आफना भासामि आखेल्दामि राख्यो, जइको अर्थ हो “रगतको खेत।”
20पत्रुसले अज भुन्यो, “क्यालाइकि भजनका किताबमि यसो लेखिया छ,
#
भजनसंग्रह ६९:२५; १०९:८ ‘तइको बासस्थान उजाड हउ,
रे ताँ बास अद्द्या कोइ लइ जन हउ।’
‘तइले अद्द्या कामको जिम्मा अर्खाइले लेउ भनिबर लेखिया छ।’
21-22“तबइलाइ इसु अज जिउना भया कुराको साछि हुनाइलाइ आब हामरा बिचबटहइ एक मान्सलाइ चुन्नुपणन्छ। त्यो मान्सभन्या यसो हुनपणन्छ, जो युहन्नाले बप्तिस्मा दिया समयबटहइ प्रभु इसु स्वर्गमि उठाइ लइया दिनसम्म इसु हामसङइ हिड्डुल अरन्ज्या त्यो मान्स हामसङइ भया हुन्पणन्छ।”
23यो कुरा सुण्यापाछा ताँ जम्मा भया मान्सनले दुइ जनालाइ अगाडि लेया। एक जनो योसेफ थ्यो, जइलाइ बारसाबास या युस्तस लइ भनिन्थ्यो, रे अर्खो मान्स मतियास थ्यो। 24तबइ प्रेरितनले इसेरि प्रार्थना अर्यो, “हे प्रभु, तमले सप्पइ मान्सका ह्रिदयाका कुरा जाणन्छउ। यिन दुइ जनामध्ये तमले कइलाइ चुन्या छउ त्यो हामुलाइ धेकाइदिय, 25यिन दुइ मध्ये प्रेरित होइबर सेबा अद्द सकउ, जइ सेबाबटहइ यहुदा भट्किबर आफनाइ निजि ठउँर गइबर मर्यो।” 26तइपाछा तिनुनले तन दुइ जनाका नाउँमि चिट्टा हाल्यो, रे मतियासका नाउँमि चिट्टा पण्यो, इसेरि एघारइ प्रेरितनसित तनरो गन्ति भयो।#हितोपदेस १६:३३
Actualmente seleccionado:
प्रेरित 1: DOTY
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 2024 (Active), Mother Tongue Translators Society and Wycliffe Bible Translators, Inc. All rights reserved.
