प्रेरित 2
2
पेन्तिकोसका दिनमि पबित्तर आत्मा आया
1पेन्तिकोस भनिन्या यहुदि चाडका दिनमि, प्रभु इसुमि बिस्वास अद्द्यान जम्माइ एकइ ठउँर भेला होइरइथ्या। 2तइबेला स्वर्गबटहइ अचानक ठुलो बतासको झोकाजसो एक आबाज आयो, रे तइ आबाजले तिनुन बस्या पुराइ घर भरिदियो। 3रे आगाका जिब्रणाजसा तिनुनका वाँ धेकिया, रे भाग-भाग होइबर तिनुनमि बस्या। 4रे तिनुन सप्पइ जना पबित्तर आत्माले भरिया, रे तिनुनले पबित्तर आत्माबटहइ बोल्या सक्ति पाइबर अउर भासानमि बोल्ल लाग्या।
5तइ बेला सन्सारका भउत ठउँरबटहइ इस्वरभक्त यहुदि यरुसलेममि आइबर बसिरइथ्या। 6त्यो आबाज सुनिबर भिड जम्मा भयो, रे तिनुन अचम्ममि पण्या। तिन भउत ठउँरबटहइ आया यहुदिनले आफना आफना भासामि बोल्लारया सुन्यो। 7तिनुन सप्पइ अचम्म पणिबर भुन्न लाग्या, “क्या यिन बोल्लारया गालिलका मान्सन हइनन् ब? 8तबइ कसेरि तिनुन हरेकले हामरा आफनाइ भासामि बोल्लारया हाम सुन्ना छु? 9हाम याँ पार्थिन, मादिन, एलामिन, मेसोपोटामियाका, यहुदियाका, कापाडोकियाका, पोन्टस रे एसियाका बासिन्दान छउँ। 10रे फ्रिगिया, पामफिलिया, मिस्र रे कुरेनिमि पड्डया लिबियाका कतिबइ छेत्रनबटहइ, 11रोम सहरबटहइ आया यहुदिन रे यहुदि धर्म मान्यान दुएइ छउँ, क्रेट टापु रे अरब देसबटहइ आया मान्सन छउँ, रे हाम आफना आफना भासामि परमेस्वरका माहान कामको चर्चा तिनुनले अद्दारया सुन्ना छु!” 12तिनुन सप्पइ अचम्मि पण्या रे एक अर्खामि यसो भुन्न लाग्या, “यइको अर्थ कि हो?”
13रे कति जनान्ले तिनुनको खिसि काट्टाइ भुन्न लाग्या, “यिनुन त नयाँ दाखमध्य खाइबर मात्तिया छन्!”
भिडलाइ पत्रुसले प्रचार अर्यो
14तबइ पत्रुसले एघारइ प्रेरितनसित कल्लिबर ठुला सोरले तिनुनलाइ भुन्यो, “यहुदियाका मान्सन रे यरुसलेमका जम्माइ बासिन्दान हो, यो कि भया हो भणि मु तमुलाइ भुन्नउ रे मेरा कुरा ध्यान दिबर सुण। 15क्यालाइकि तमुले सोच्या जसेरि यिनुन मात्तिया हइनन्, रे अइल त ब्याहानको नउ मात्तरइ बज्या छ। 16रे यो कुरा हुन्या छ भुनिबर योएल अगमबक्ताले धर्म- सास्त्तरमि इसेरि लेख्या थ्यो।
17“परमेस्वर भुन्नाहान, ‘अन्त्यका दिनमि मेरो आत्मा
मु सप्पइ मान्सनमि खणेइ दिन्या छु,
रे तमरा चेला-चेलिन अगमबाणि बोल्या छन्,
तमरा ज्वान मान्सनले दर्सन धेक्द्या छन्,
रे तमरा बुणापाकान सुइना धेक्द्या छन्।
18तन दिनमि मु आफना दास-दासिनमि मेरो आत्मा खणेइदिन्या छु
रे तिनुनले अगमबाणि बोल्या छन्।
19मल्तिर अग्गासमि मु अचम्मका चिन्ह धेकाउन्या छु,
रे तलतिर धर्तिमि अचम्मका काम अद्द्या छु,
ताँ रगत, आगो, रे धुकाको मुस्लो धेकिन्या छ।
20परमप्रभुको माहान रे अचम्म लाग्द्या दिन आउनु भन्ना अगाडि,
सुर्य अन्यारो हुन्या छ, रे जुन रगत जसो रातो हुन्या छ।
21तर जइले परमप्रभुको नाउँ पुकारा अद्द्या छ, तइको उद्दार हुन्या छ।’”#योएल २:२८-३२
22“इज्राएलका मान्सन हो, मेरा कुरा सुण! नासरतका इसुका जिबनबटहइ परमेस्वरले तमरा बिचमि सक्तिसालि काम अर्यो रे भउत अचम्मका चिन्ह धेकायो। त्यो त तमुलाइ थाइ छ, परमेस्वरले इसुलाइ आफुले पठाया हुँ भनिबर तिनइ कामबटहइ धेकायो। 23परमेस्वरले अर्या पक्का योजना रे पइलिबटहइ थाँ भयाअन्सार इसुलाइ तमरा हातमि सउपिदियो रे तमुले अधर्मि मान्सनका हातमि सउपिबर क्रुसमि टाङि माद्द लाया। 24तर इसुलाइ परमेस्वरले मिरत्युका पिडाबटहइ छुट्कारा दिबर जिउनो पाण्यो, क्यालाइकि मिरत्युले इसुलाइ रोकिराख्द सकेन। 25क्यालाइकि दाउद राजा लइ उनरा बिसयमि यसो भन्नाहान्,
“‘मुइले प्रभुलाइ सदाइँलाइ मेरा अगाडि धेक्या,
मु हरेस जनखाउ, क्यालाइकि उन मेरा दाइन हाततिर छन्।
26तबइलाइ मेरो ह्रिदय आनन्दित छ
रे मु खुसिको गित गाउनउ!
मरिबर जानु पण्या लइ मु आसामि बाँचिबर जिउन्या छु।
27क्यालाइकि तमले मेरो परान मर्या मान्सन बस्या ठउँर छाड्डया आथिनउ,
न त तमले आफना पबित्तर जनको सरिल च्याहानमि कुन दिन्या छउ।
28तमले मुलाइ जिबनको बाटो बताया,
रे मु तमरा अगाडि हुन्ज्या तमले मेरो ह्रिदय आनन्नले भरिपुर अद्द्या छउ।’”#भजनसंग्रह १६:८-११
29“हे मेरा दाइभाइन हो, हामरा पुर्खा दाउदका बिसयमि मु तमलाइ साँच्चि भुन्न सक्दउ, कि उन मर्या रे गाडिया तर आजका दिनसम्म उनरो च्याहान छनइछ। 30तर दाउद अगमबक्ता थ्या रे उनराइ सन्तानमि एक जनो उनरा सिहासनमि बस्याछ भन्न्या कुरा उनलाइ थाँ थ्यो। परमेस्वरले उनसित यो प्रतिग्या अर्या थ्यो।#२ समुएल ७:१२-१६; १ इतिहास १७:११-१४; भजनसंग्रह १३२:११ 31परमेस्वरले अद्द्या काम दाउदले अगाडिबटहइ धेक्या थ्यो। तबइलाइ मुक्ति दिन्या राजा ख्रिस्ट मर्याबटहइ जिउना हुन्या छन् उनुले इसेरि भुन्यो,
“‘परमेस्वरले उनलाइ मर्या मान्सन बस्या ठउँर छाडेनन्,
उनरो सरिललाइ कुन दिएन।’”
32इनइ इसुलाइ परमेस्वरले जिउना पाड्यो, यइ कुराका हाम सप्पइ साछि छउ। 33#२:३३ परमेस्वरले इसुलाइ दाइन हाततिर राख्दु भन्या आफनो अधिकार दिया रे माहान बनाया भन्न्या बुज्जसकिन्छ। परमेस्वरले इसुलाइ उच्च पाणिबर आफना दाइन हाततिर राख्यो रे आफना प्रतिग्या अन्सार उनलाइ पबित्तर आत्मा दियो। तेइ पबित्तर आत्मा प्रभु इसुले अइल हाम्मि खणेया हो, जो कुरा तमले अइल धेक्दा छउ रे सुन्ना छउ। 34-35क्यालाइकि दाउद स्वर्गमि चडेनन्, तर उन आफुइ भुन्नाहान्,
“‘परमप्रभुले मेरा प्रभुलाइ इसेरि भुन्यो,
जन्ज्यासम्म मु तमरा सत्तुरनलाइ तमरा खुट्टामणिको बनाउनइन, तम मेरा दाइन हात तिर बस।’#भजनसंग्रह ११०:१
36“तबइलाइ आब इज्राएलका सप्पइ मान्सन यो कुरडि साँच्चि जान्नुपणन्छ कि तमुले क्रुसमि मार्या इसुलाइ परमेस्वरले प्रभु रे मुक्ति दिन्या ख्रिस्ट बनायो।”
37पत्रुसले भुण्या कुरा सुनिबर तिनुनको ह्रिदय भउत काहिल भयो। तिनुनले पत्रुस रे अउर प्रेरितनलाइ सोध्यो, “ए दाइभाइ हो, तसो भयाले आब हामले कि अद्दपड्या हो?”
38“पत्रुसले तिनुनलाइ भन्यो, तमु सप्पइले पाप छिमापाउनाइलाइ पस्याताप अरिबर इसु ख्रिस्टका नाउँमि बप्तिस्मा लिय, रे तमुले पबित्तर आत्माको बर्दान पाउन्या छउ। 39क्यालाइकि यो प्रतिग्या तमरि निउति, तमरा सन्तानकि निउति रे दुर दुरमि रया सप्पइकि निउति हो। प्रत्येक जइलाइ प्रभु हामरा परमेस्वरले बोलाउनाहान्।”
40पत्रुसले अउर भउत कुराबटहइ यसो भुनिबर बिन्ति अर्यो, “यइ दुस्ट पुस्ताबटहइ तमुले आफुइलाइ बचा।” 41तबइलाइ भउतले पत्रुसले दिया सन्देसमि बिस्वास अर्यो रे बप्तिस्मा लियो। तइ दिन लगभग तिन हजार मान्सन तिनुनका संख्यामि थपिया। 42तिनुन प्रेरितनका सिछ्या, संगति, #२:४२ यइले प्रभु-भोज रे सङइ मिलिबर खाना खान्या बिसयमि बुजाइछ।सङसङइ खान्थ्या रे प्रार्थनामि भक्तिसित लागिरन्थ्या।
बिस्वासिनको संगति
43प्रेरितनबटहइ भउत अचम्मका काम रे चिन्ह भया, रे हरेकका ह्रिदयमि डर उत्पन्न भयो। 44बिस्वास अद्द्या जति सप्पइ सङइ बसन्थ्या, रे तिनुनको सप्पइ थोक साजा थ्यो। 45तिनुनले आफना सम्पति रे मालमत्ता बेचिबर जइ जइलाइ जि जि कुराको खाँचो पणन्थ्यो सप्पइलाइ बाणिदिन्थ्या। 46तिनुन एकइ मनका होइबर #२:४६ यो मन्धिर भुन्या यरुसलेमको मन्धिरका हो। मन्धिरमि भेला हुन्थ्या, रे घर घरमि मिलिबर खुसि रे उद्दार मनले खानाइ खान्थ्या। 47उनुन सदाइँ परमेस्वरको प्रसम्सा अरन्थ्या, रे सप्पइ मान्सनले निको माणन्थ्या। उद्दार पाउन्यानको सङ्ख्या प्रभुले तिनुनका समुहमि दिनदिनि थपिदियो।
Actualmente seleccionado:
प्रेरित 2: DOTY
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 2024 (Active), Mother Tongue Translators Society and Wycliffe Bible Translators, Inc. All rights reserved.
