लुका 6
6
बिस्राम दिनका बारेमि
(मत्ति १२:१-८; मर्कुस २:२३-२८)
1इसु बिस्राम दिनमि गउँका खेतबटहइ भइबर जान्नाथ्या। उनरा सिस्यान गउँका बाला टिपिबर हातले माणिबर खानलाग्या।#६:१ ब्यबस्थाअन्सार (ब्यबस्था २३:२५), यहुदिन खेतबटहइ भइबर जान्ज्या हातले अन्न उखेलिबर खानसक्थ्या रे त्यो चोरि माणिन्थेन। रे गउँका बाला हातले माण्या हुनाले फरिसिनले सिस्यानलाइ दोस लाउन्नाथ्या क्यालाइकि त्यो उनुनका अन्सार बिस्राम दिनमि काम अर्या मानिन्थ्यो। 2त्यो धेकिबर कसइ कसइ फरिसिनले सिस्यानलाइ भुन्यो, “बिस्राम दिनमि परमेस्वरका निएमले नअद्या भन्या काम तमु क्याकि अरन्छउ?”
3इसुले तिनुनलाइ भुन्यो कि, “दाउद राजा रे उन सङभयालाइ भोक लाग्या बेलामि दाउद राजाले कि अर्यो? क्या तमुले पड्या छइनउ ब? 4उनुले त परमेस्वरका मन्धिरभित्र जाइबर परमेस्वरलाइ चडाया रोटो आफुसङ भयासित मिलिबर खायो। जबकि परमेस्वरका निएम अन्सार पुजारिन बाहेक अउर कसइले त्यो रोटो खान्थेइन्।” 5रे इसुले कुरा सक्दा सक्दाइ भुन्यो, “मु मान्सको चेलो त बिस्राम दिनको प्रभु हुँ।”
झाड्डु पड्या मान्सको हात निको भयो
(मत्ति १२:९-१४; मर्कुस ३:१-६)
6अर्खा एक बिस्राम दिनमि इसु सभाघरमि गइबर परमेस्वरका बारेमि सिछ्या दिन लाग्या। ताँ दाइन हातमि झाड्डु पड्या मान्स लइ थ्यो। 7धर्म-गुरु रे फरिसिनले इसुलाइ दोस लाउन खोज्जाथ्या, तसो भया हुनतक तिनुनले इसुले काँइ तइ मान्सको हात बिस्राम दिनमि निको पाड्डाहान् कि भनिबर हेरिरइथ्या। 8तिनरा मनकि कुरडि जानिबर इसुले हात झाड्डु पण्या मान्सलाइ भुन्यो, “तु उठिबर याँ आइ रे खडा हो” झट्ट त्यो मान्स उठ्यो रे खडा भयो। 9रे इसुले तिनुनखि भुन्यो, “आब भुण हामरा ब्यबस्थाले बिस्राम दिनमि क्या अद्दु निको छ भनि सिकाया छ? निको अद्दु कि फुचेरो अद्दु? बचाउनु कि माद्दु?” 10रे इसुले तिनुनलाइ हेरिबर तइ मान्सखि भुन्यो, “तेरो हात तान” उइले हात तान्यो रे उनज्याइ निको भयो।
11यो धेकिबर फरिसिन रिसले चुर भया इसुलाइ कि अद्दु पड्या हो। भनिबर एक अर्खामि सर-सल्लाहा अद्द लाग्या।
इसुले बार जना छान्यो
(मत्ति १०:१-४; मर्कुस ३:१३-१९)
12एक दिन इसु डाँणामि जाइबर रातभरि परमेस्वरसित प्रार्थना अद्लाग्या। 13ब्याहान भया पाछा उनुले आफना सिस्यानलाइ बोलायो रे तिनुन मध्येममिका बार जनालाइ छान्यो रे तिनुनलाइ प्रेरित भन्या नाउँ दियो। 14इसेरि छान्या बार जना इनइ हुन सिमोन, जइको नाउँ इसुले पत्रुस राख्यो, सिमोनका भाइ अन्द्रियास, याकुब, युहन्ना, फिलिप, बारथोलोमाइ, 15मत्ति, थोमा, अल्फयसको चेलो याकुब, देसभक्त दलको सिमोन 16रे याकुबको चेलो यहुदा रे यहुदा इस्करियोत जइले इसुलाइ पकडाइदियो।
इसुले भउतनलाइ निको पाड्यो
17इसु सिस्यानसित डाँणाबटहइ उन आया, उनुन ताँ एक पाजुला ठउँरखि पुग्या। ताँ भउत सिस्या रे अउर मान्सनको भिड लाग्रइथ्यो। तिनुन यरुसलेम सहर लगायत सारा यहुदियाबटहइ, समुन्दरका नजिकइ भया टुरोस रे सिदोन छेत्रबटहइ समेत आइरथ्या। 18तिनुन इसुले सिकाया बचन सुन्नाइलाइ बिमारिबटहइ निको हुनालाइ आइरइथ्या, भुत लाग्या मान्स लइ निको भया। 19सप्पइ मान्सनले उनलाइ छुन खोज्जाथ्या क्यालाइकि इसुबटहइ निकल्या सक्तिले सप्पइ जना निका हुन्नाथ्या।
इसुले दिया अर्ति
(मत्ति ५:१-१२)
20तइपाछा इसुले आफना सिस्यानलाइ हेरिबर भुन्यो,
“हे गरिब हो, तमु कति धन्यका हउ।
क्यालाइकि परमेस्वरको राज्य तमरोइ हो!
21हे भोकाउन्या हो, तमु कति धन्य हउ।
क्यालाइकि तमु अगाउन्याछउ!
हे रुन्यान हो, तमु कति धन्य हउ।
क्यालाइकि तमु हास्या छउ!
22“मु मान्सका चेलामि तमुले बिस्वास अर्या हुनाले मान्सनले तमुलाइ हेला अर्याले, समाजबटहइ निकाल्दियाले, खिसिकाट्याले, तमरो बदनाम अर्याले, तमु धन्य हउ। 23तइबेला खुसि हो रे नाँच क्यालाइकि हेर, तमरि निउति स्वर्गमि ठुलो इनाम राखिया छ। उइबेलाका तिनरा पुर्खानले लइ अगमक्तालाइ तसेरि सतायाथ्यो।
24“रे धिक्कार, अइले धनि हुन्या हो!
क्यालाइकि तमुले सुखचइन पाइसक्या छउ।
25धिक्कार अइले अगाउन्यान हो!
क्यालाइकि तमु भोकाउन्या छउ।
धिक्कार अइले हास्या खेल्या हो!
क्यालाइकि तमुले दुःख पाउन्याछउ रे रुन्या छउ, सोक अद्या छन्।
26“धिक्कार अइले मान्सबटहइ इज्जत पउन्या हो। क्यालाइकि यसो इजत त तिन मान्सनका पुर्खानले झुटा अगमबक्तानलाइ दियाथ्यो।
सत्तुरलाइ निको माण
(मत्ति ५:३८-४८; ७:१२)
27“तर मुइले सिछ्या दिया सुन्या जति तमुलाइ मु भुन्नउ सत्तुरलाइ पिरिम अर रे आफुलाइ पिरिम नअद्द्यालाइ पिरिम अर। 28तमुलाइ सराप दिन्यालाइ आसिस दिय कसइले तमुलाइ ननिको अरन्छ भुन्या उइका भलाइकि निउति प्रार्थना अरिदिय। 29कसइले तमुलाइ एक गालामि हाणन्छ भुन्या अर्खा गालामि लइ हान्नदिय रे तमरो कोट खोस्यालाइ कमिजलइ लइजानदिय। 30माग्द्या जति सप्पइलाइ दिय तमरो चिजबिज लइजान्यासित फिर्ता जनमाग। 31अउरनले तमुलाइ जि अरिदिया चाहान्छउ, तमुले लइ अउरनलाइ तसोइ अर।
32“पिरिम अद्यालाइ मात्तरइ पिरिम अरन्छउ भन्या तमुलाइ कि लाभ भयो ब? पापिनले लइ आफुलाइ पिरिम अद्द्यानलाइ पिरिम अद्दहान्। 33आफुलाइ भलाइ अद्यालाइ मात्तरइ भलाइ अरन्छउ भुन्या तमलाइ कि लाभ भयो ब? पापिनले लइ तसोइ अद्दाहान्। 34रे तिद्द सक्द्यालाइ मात्तरइ रिण दिन्छउ भुन्या तमुलाइ कि ठुलो कुरा भयो ब? पापिनले लइ त तिद्द सक्द्यालाइ रिण दिनाहान। 35तसो हइन सत्तुरलाइ पिरिम अर, तिनुनको भलाइ अर। रे रिण माग्द्यालाइ फिर्ता नआउन्या आसा अरिबर रिण दिय, तसो अर्याले तमरो इनाम ठुलो हुन्या छ, रे तमु माहान परमेस्वरका चेला-चेलि हुन्याछउ, क्यालाइकि परमेस्वर त बइगुनि रे स्वार्थिलाइ लइ दया अद्दाहान्। 36परमेस्वर जसा दयालु छन्, तमु लइ तसाइ दयालु हउ।
अउरलाइ दोस जनलगा
(मत्ति ७:१-५)
37“अउरको गल्ति जनखोजउ रे परमेस्वरले तमरो गल्तिलइ खोज्या आथिनन्। अउरलाइ दोस जनलगा रे परमेस्वरले लइ तमुलाइ दोस लाउन्या आथिनन्। अउरलाइ छिमा दिय रे परमेस्वरले लइ तमुलाइ छिमा दिन्याछन्। 38अउरलाइ दिय रे परमेस्वरले तमुलाइ लइ दिन्याछन्। परमेस्वरले खादि खादि पोखिनज्या सम्म दिन्याछन्। जइ नापले तमु अउरलाइ दिन्छउ तसइ नापले तमु पाउन्याछउ।”
39इसुले तिनुनलाइ एक उखान भुन्यो, “कि अन्धा मान्सले अन्धा मान्सलाइ डोर्याउन सकन्छ? रे डोर्यायो भन्या लइ तिन दुएइ खाल्डामि पड्डयाछन्। 40कोइ लइ सिस्य आफना गुरुहइ ठुलो हुनइन् रे सिकिसक्या पाछा उ आफना गुरु जसोइ हुन्छ।
41“आफना भाइका आँखाको छेस्को धेक्द्या आफना आँखाको मुणो क्याकि धेक्दानु? 42आफना आँखाको मुणो नधेक्द्याले आफना दाइभाइलाइ कसेरि भुन्न सकन्छउ ‘कि तमरा आँखाको छेस्को निकाल्दिनउ।’ ए कपटिन हो! पल्लि आफना आँखाको मुणो निकाल रे तइपाछा तमु भाइका आँखामि भया छेस्को निकाल्लाइ निकेरि धेक्द्याछउ।
रुख रे तइको फल
(मत्ति ७:१६-२०; १२:३३-३५)
43“निका रुखमि फुचेरो फल फल्लइन् तसेरि फुचेरा रुखमिलइ निको फल फल्ल सक्दइन्। 44रे कोइ लइ रुख तइको फलबटहइ चिनिन्छ। काँडाका झाङबटहइ नेभारा टिप्दाइन रे न त अंगुर बटुलाहान्। 45निका मान्सले आफना मनमि भया निका कुराको भन्डारबटहइ निकाइ कुरा निकालन्छ। फुचेरो मान्सले आफना मनमि भया फुचेरा भन्डार बटहइ फुचेराइ कुरा निकालन्छ। क्यालाइकि जि मनमि छ, तेइ कुरा मान्सले बोलन्छ।
दुइ किसिमका घर
(मत्ति ७:२४-२७)
46“मुइले भन्या कुरा मान्नानु भन्या, तमु क्याकि मुलाइ प्रभु प्रभु भुनन्छउ? 47मेरा वाँ आइबर मेरा कुरा सुन्या रे मुइले भुण्या मान्या मान्स कसा हुनाहान्, मु तमुखि भुन्नउ। 48उ एक घर बनाउन्या मान्सजसो हो, जइले गइलो अरि खणिबर आफनो घरको जग चट्टानमि बसाल्यो। पानिको बाड आउनज्या तइ घरमि ठोकियो पक्का अरिबर बनायाहुनाले बाडले तइ घरलाइ भत्काउन सकेइन्। 49रे मेरा कुरा सुनिबर नमान्या मान्स जमिनमि घरको जग नहालि बनाउन्या जसो हुन्छ। बाड आइबर तइका घरमि ठोकियो, तबइ त्यो घर तन्जेइ ढल्यो रे भत्किबर तइ घरको केइ रएन्।”
Actualmente seleccionado:
लुका 6: DOTY
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 2024 (Active), Mother Tongue Translators Society and Wycliffe Bible Translators, Inc. All rights reserved.
