Amos 2
2
1De Har sajcht:
Dree Dinja haft Moab veschulcht,
nä, vea, un ekj woa de Strof nich trigjhoolen.
See haben däm Kjennich von Edom
siene Knoakes to fiene Ausch vebrent. #(1-3) Jes 15,1-9; Jer 48,1-47
2Ekj woa een Fia opp Moab brinjen
un de vesechade Städen en Kerijot vebrennen;
äare Menschen woaren em Wirwoa omkomen,
wan de Fient schrieen un blosen woat.
3Ekj woa äaren Leida raufsaten,
un äare aunjestalde ombrinjen.
Dit lot junt vom Harn jesajcht sennen. #4Mo 24,17
4De Har sajcht:
Dree Dinja haft Juda veschulcht,
nä, vea, un ekj woa de Strof nich trigjhoolen.
See haben däm Harn siene Lia veacht,
un de Jesazen nich jehoolen;
see haben sikj veleiden loten met de selwje Läajes,
dee äare Vodasch aul nojinjen.
5Ekj woa een Fia opp Juda aunstekjen,
un de Paulausten en Jerusalem vebrennen. #Hos 8,14
6De Har sajcht:
Dree Dinja haft Israel veschulcht,
nä, vea, un ekj woa de Strof nich trigjhoolen.
See vekjeepen dee, dee daut rajchte doonen, fa Jelt;
un de oame fa waut eefache Footich. #Amos 8,6
7See veklunjen däm oamen sien Kopp enne Ieed;
un schuwen dee, dee Help fält, ut däm Stich.
De Voda un sien Sän gonen no de selwje Mejal,
un beschämen mienen heiljen Nomen doaderch.
8Opp Dakjen, dee see aus Birj jenomen haben,
lajen see sikj bie jieda Aultoa dol.
See drinkjen en Gott sien Hus Wien,
waut see met aundre äa Schultjelt jekoft haben. #2Mo 22,25
9Ekj haud doch de Amorita ver an utjerot,
dee soo groot aus Zeeda,
un stoakj aus Ieekjen wieren.
Ekj ast an ieescht ut
un rod uk noch de Wartlen ut. #4Mo 21,21-28
10Ekj brocht junt ut Ägipten rut,
un leid junt 40 Joa enne Wiltnis,
soo daut jie de Amorita äa Launt kjrieejen.
11Ekj hab von june Säns Profeeten jemoakt;
un von june Junges soone waut Nazara worden.
Saj ekj too väl, jie Israeliten?
Dit lot junt vom Harn jesajcht sennen. #4Mo 6,2-13
12Oba jie jeewen dee Wien to drinkjen,
waut sikj Gott jeweit hauden.
Jie vebooden de Profeeten,
daut see nuscht sajen kunnen. #Jer 11,21; Amos 7,13.16
13Nu kjikjt
Ekj woa junt schwäakjen moaken,
soo aus een Woagen schwäakjt,
dee voll Goawen es,
14soo daut de bosje nich ut däm Stich komen,
un de stoakje sikj nich wäaren kjennen.
Soo daut de stoakje Soldoten nich met daut Läwen doavon komen.
15Dee, dee goot met däm Boagen scheeten kjennen,
woaren äare Städ oppjäwen;
dee waut sea ranen kjennen
woaren nich wajchkomen;
un dee, dee opp Pieed sent,
woaren omkomen.
16De brofste un stoakjste
woaren haulf noaktich wajchranen.
Dit lot junt vom Harn jesajcht sennen.
Actualmente seleccionado:
Amos 2: PB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Plautdietsch Bible © 2003 Kindred Productions and United Bible Societies Association, Inc.