Joel 4
4
Gott sien Jerecht oppe Velkja
1Un de Har säd: Horcht emol. Aun dän Dach un to dee Tiet,
wan ekj Juda un Jerusalem wada woa häastalen, #Hos 7,1
2dan woa ekj aule Velkja no daut Joschafat Tol brinjen,
un woa an doa ver Jerecht brinjen,
wiels see daut Volkj Israel, daut mient es,
mank de Velkja vestreit haben,
un wiels see sikj mien Launt enjedeelt haben. #Joel 4,12.14
3See haben daut Loss jetrocken äwa mien Volkj;
un haben miene Junges em tusch jejäft fa eene Hua,
un Mejales vekoft, daut see Wien toom drinkjen kjrieejen.
4Un aul jie von Tierus un Sidon, un von de gaunze Filista Jäajent, waut proow jie mie auntodoonen? Well jie mie wäajen waut trigjtolen? Wan jie daut woaren, dan woa ekj junt plazlich un bosich äwa junen Kopp trigjtolen. 5Jie haben mien Selwa un mien Golt jenomen, un miene wieetvolle Sachen en june Tempels jedroacht. 6Jie haben de Lied von Juda un Jerusalem aun de Griechen vekoft, daut see wiet von äa Launt kjeemen. 7Ekj woa an komen loten von doa wua jie an vekoft haben, un woa junt trigjtolen fa daut, waut jie an jedonen haben. 8Un horcht, jie von Tierus un Sidon, un von de gaunze Filista Jäajent: Ekj woa june Säns un Dajchta en de Macht jäwen von de Lied von Juda, un see woaren dee aun de Lied von Saba, een Launt daut wiet auf es, vekjeepen. Dit sajcht de Har.
Gott sien Säajen opp de sienje
9Sajcht to de Velkja:
Moakt reed fa eenen Kjrich,
Roopt june stoakjste Mana,
un lot aule Soldoten komen
un sikj reed moaken.
10Moakt Schwieed von june Pluachschoaren,
un moakt Spiessen von june Säakjel.
Lot dee waut nuscht jewant sent,
sikj hanstalen aus Soldoten. #Jes 2,4
11Lot aule Velkja von runtom komen;
un lot see sikj doa vesaumlen.
Un Har, brinj diene baste Kjrieja rauf.
12Lot de Velkja sikj reed moaken;
lot see no daut Joschafat Tol komen.
Doa woa ekj setten un rechten,
äwa aul de Velkja runtom.
13Schniet nenn met de Sans, wiels daut Flekj es riep.
Klunjt opp de Wiendruwen, wiels de Pras es voll.
See sent soo schlajcht jewast, daut an daut äwarant. #Jes 63,3.6; Opb 14,15.18
14Doa woaren Häaden un Häaden von Menschen sennen,
wan hee sien Wuat äwa an jeft.
Däm Harn sien Dach es meist hia;
dan woat hee sien Wuat äwa an jäwen. #Joel 4,2
15De Sonn un de Mon schienen nich mea,
un de Stierns hoolen sikj trigj. #Joel 2,10; 3,4
16De Har woat opp Zion schrieen,
un sikj von Jerusalem hieren loten,
soo daut de Himmel un de Ieed schedren woaren.
Oba sien Volkj woat de Har een Schutz sennen;
hee woat fa de Israeliten eene sechre Städ sennen. #Amos 1,2
17Un jie woaren daut enwoaren,
daut ekj de Har jun Gott,
en Zion opp mienen heiljen Boajch won.
Dan woat Jerusalem heilich sennen,
un kjeen Fient woat an waut doonen kjennen. #Hes 34,30
18Wan dee Tiet kjemt,
woat scheena Wien von de Eewasch raufkjwalen,
un von de Boaj woat de Malkj ranen.
De Riefasch en Juda woaren aula schälen,
un eene Kjwal woat von em Harn sien Hus komen
un daut Schittim Tol bewesren. #Hes 47,1; Amos 9,13
19Oba en Ägipten woat kjeena wonen,
un Edom woat eene onbewonde Wiltnis sennen,
wäajen de Jewault dee see
äwa de Lied en Juda jebrukt haben,
un wäajen de oschuldje Läwes,
dee see en äa Launt ombrochten. #Oba 1,10
20Oba Juda woat opp emma bewont bliewen,
un Jerusalem woat nich utstoawen.
21Un ekj woa an trigjtolen fa daut Läwen daut see neemen,
un woa dee waut schuldich sent nich frie loten,
wiels de Har en Zion wont. #5Mo 32,43; Hes 48,35
Actualmente seleccionado:
Joel 4: PB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Plautdietsch Bible © 2003 Kindred Productions and United Bible Societies Association, Inc.