Micha 4
4
1Doa woat eene Tiet komen,
wan de Boajch, wua däm Harn sien Hus steit,
de wichtichsta Boajch sennen woat,
un woat hecha sennen aus aule aundre Boaj.
Un de Velkja woaren doahan streemen. #(1-3) Jes 2,2-4
2Un väle Velkja woaren doahan gonen un sajen:
Komt, well wie opp däm Harn sien Boajch nopp gonen
un doa no daut Hus von Jakob sienen Gott.
Dee woat ons unjarechten, waut wie doonen sellen,
soo daut wie läwen kjennen, soo aus am daut jefelt.
Daut Jesaz kjemt von Zion,
un däm Harn sien Wuat kjemt von Jerusalem. #Luk 24,47
3Hee woat de groote Velkja rechten,
un väle Lenda wiet un breet trajchtstalen.
Von äare Schwieed woaren see Pluach Schoaren moaken,
un von äare Spiessen woaren see Säakjel moaken.
Kjeen Launt woat jäajen daut näakjste daut Schwieet opphäwen,
un see woaren nich jäajen eenaunda Kjrich plonen.
4Oba jieda eena woat bie siene Wienrank setten,
ooda unja sienen Fiejenboom,
un kjeena woat an doa enjsten.
Dit es waut de Har, dee aules rejieet, jesajcht haft. #1Kjen 5,5; Sach 3,10
5Jieda Volkj läft doano aus äa Gott daut haft,
oba wie woaren opp emma soo läwen,
aus ons Har un Gott daut haben well.
6Wan dee Tiet kjemt, sajcht de Har,
dan woa ekj de lome toopbrinjen,
un de vestade oppsaumlen,
met dee toop, dee ekj daut schwoa jemoakt hab. #5Mo 30,4; Jer 31,8
7Dan woa ekj von dee waut äwabliewen,
von de lome un de vestade,
een grootet Volkj moaken.
Un dan woat de Har opp emma
opp däm Zions Boajch äwa an rejieren.
8Un du, ons scheenet Jerusalem,
von wua Gott soo äwa sien Volkj rejieet,
aus een Hoad, dee von sien Torm woakt,
woascht wada soo aus verhäa,
de Kjennichstaut en daut Rikj sennen.
9Un wuarom hielst du nu soo lud?
Es doa kjeen Kjennich mank junt?
Sent june Lierasch aula jestorwen,
daut du die kjremst aus eene Fru,
dee äare Weedoag jekjräajen haft? #Jer 8,19
10Kjremm die doch un stän, du scheene Zion,
aus eene Fru dee de Weedoag jekjräajen haft.
Wiels du motst nu werkjlich ut de Staut rut,
un woascht oppe Stap wonen
un no Babel jenomen woaren.
Oba von doa woascht du wada jerat woaren.
De Har woat die dort von diene Fiend loosmoaken.
11Oba nu woaren väl Velkja sikj jäajen die vesaumlen un sajen:
Lot dee daut sea schlajcht gonen;
well wie kjikjen woo Zion daut gonen woat.
12Oba see weeten nich waut de Har denkjt;
see vestonen nich waut hee väahaft.
Hee haft an toopjebrocht,
aus eena de Hocken nom Draschplauz drajcht.
13Nu sto opp un drasch, du scheene Zion.
Ekj woa die iesane Hieena un bronsne Kleiwen jäwen,
soo daut du väle Velkja woascht enne Grunt brinjen.
Du woascht däm Harn daut weien,
waut see opp ojjerajchte Wäaj jesaumelt haben.
Du woascht daut, waut an rikj jemoakt haft,
däm Harn weien,
dee äwa de gaunze Welt Macht haft.
14Oba nu, schnied die wund un vekrauz die,
wiels däm Fient sien Loaga
woat rom onse Staut komen;
un see woaren däm Leida en Israel
met een Stock oppe Bak schlonen.
Een Leida woat von Betlehem komen
Actualmente seleccionado:
Micha 4: PB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Plautdietsch Bible © 2003 Kindred Productions and United Bible Societies Association, Inc.