Micha 3
3
1Un ekj säd: Horcht emol häa,
jie Leidasch von Jakob sien Volkj,
un jie aunjestalde en Israel.
Jie sullen dee sennen,
waut wisten woo to rechten. #Jer 5,5
2Oba jie veachten waut goot es,
un freien junt aun schlajchtet.
Daut es aus wan jie mien Volkj de Hut auf schalden,
un an daut Fleesch von de Knoakes reeten
3un daut oppfreeten.
Wan jie dee aufjeladat haben,
bräakj jie de Knoakes von mien Volkj;
jie schnieden daut Fleesch fien
aus toom enne Paun,
ooda aus Stekja toom em Gropen. #Psa 14,4
4Wan jie soo läwen,
woat doa eene Tiet komen,
daut wan jie uk däm Harn aunbäden,
woat hee junt kjeene Auntwuat jäwen.
Hee woat sien Jesecht dan ver junt vestäakjen,
un junt krakjt daut jäwen,
waut june Sinden vedeent haben. #Spr 1,28; Hes 8,18
5To de Profeeten, dee mien Volkj veleiden,
un sajen aules es goot, soo lang aus see to äten kjrieen,
un sajen daut woat Kjrich jäwen, wan an nuscht jejäft woat:
to dee sajcht de Har:
6Dee woat enne Nacht nuscht kloa woaren;
un woaren onen Openboarungen em diestren bliewen.
De Sonn woat äwa de Profeeten unjagonen,
un de Dach woat äwa an diesta sennen.
7Dee waut enne Tookunft nenkjikjten,
woaren beschromt sennen,
un dee waut säden, woo Dinja utfaulen wudden,
woaren sikj schämen.
Beschämt woaren see sikj de Haunt äwa daut Mul hoolen,
wiels see nich een Wuat von Gott haben. #Amos 8,12
8Oba ekj, ekj sie stoakj,
un hab däm Harn sien Jeist.
Ekj weet woo to rechten,
un weet woo ekj daut doonen kaun;
ekj woa Jakob sien Volkj wiesen
wua see too wiet jegonen sent,
un Israel wiesen, woo see jesindicht haben. #Jes 58,1
9Nu horcht no dit,
jie Leidasch von Jakob sien Volkj,
un jie aunjestalde en Israel.
Jie rechten nich soo aus jie sullen,
un vedreien aules waut sest kloa wia;
10Jie brucken Jewault om Zion opptobuen,
un meenen daut met orrajcht doonen,
woa jie Jerusalem stoakj moaken. #Hab 2,12
11June aunjestalde loten sikj bekjeepen,
de Priestasch nämen betolt fa daut rajcht utlajen,
un de Profeeten nämen Jelt fa daut waut see profezeien.
Un to de selwje Tiet
beroop jie junt opp däm Harn un sajen:
“Es de Har nich mank ons?
Dan kaun kjeen Schoden opp ons komen.” #Jer 7,4
12Nu saj ekj mau, daut es wäajen junt,
daut Zion jeplieecht woaren woat aus een Flekj,
Jerusalem woat een Steenahupen sennen,
un de Tempel Boajch woat een Humpel
met Struck bewossen sennen. #Psa 79,1; Jer 9,10; 26,18
De Har jeft Fräd
Actualmente seleccionado:
Micha 3: PB
Destacar
Copiar
Comparar
Compartir
¿Quieres guardar tus resaltados en todos tus dispositivos? Regístrate o Inicia sesión
Plautdietsch Bible © 2003 Kindred Productions and United Bible Societies Association, Inc.