LUK 6
6
Amuni dünkheak Keokhikhi
(Mt 12.1-8; Mk 2.23-28)
1Amuni api thulubo hode ayüchoki, api jingyanrübonü manji khürü rüta arü khah chingnü muzhua tsüh. 2Tüshe Pharisirü khürünü tha, “Tümü thsükhi Amuni rhimopü yakzan mülakhi nünü rhimocho?” 3Jisunü alo, “David tüsho api lung berübonü arü khümde alachoki tümü rhimokheanü nüsanü mükhe de: 4künangde apinü Thrünpuh yam ching yüzahkhea, tüsho amükeamrübo kheak hode püpürünü atsühpü yakzan mülakhi amüsüh yikhap lua tsühkhea, tüsho api lung berü she akipkhea? ” 5Tüsho apinü arü ki tha, “Mihtsürü Tsührü ju Amuni yo Atungpuh ah.”
Khah Thripshekhi Mihtsürü
(Mt 12.9-14; Mk 3.1-6)
6Amuni püpü ching, küyimki api sinagog ching yüzahbah thsangyukhea, ju ching mihtsürü khülang akhah tsülim shekhia lakheah. 7Tüsho yakzan thsangyurü le Pharisirübonü api azhihde amüdampü thsüde, apinü Amuni thsünguba shi yungnü api kheak kheahde la. 8Tüshe apinü arü lümkhibo mükheah, tüsho khah shekhia labuh mihtsürü ki tha, “Arang tüsho ha ching zhipang.” Tüsho apinü wusubah ju ching zhip. 9Tüsho Jisunü arü ki tha, “Inü nüsa ki keokhichoh, Amuni atsü thsüpü yungsho athsümünim rhimopü, rhangdung khümkhitpü yungsho ju thsümünimpü yakzan la shi?” 10Apinü arü alala mükamde kheah, tüsho api ki tha, “Nü khah chungang.” Apinü jude thsü, tüsho anihbuh khah tsüabah. 11Tüshe arübo mulong zhipzhipbe kam tüsho arünü Jisu kheak tümü rhimobeanü khülangnü khülang ki atsangachih.
Jingyanrü Thürükheak Mahne Mokhitkhi
(Mt 10.1-4; Mk 3.13-19)
12Ju kim ching apinü tamkhüntamnüpü awung ching yü; tüsho tsüngreroro apinü mutuklode Thrünpuh ki tamkhüntamnü. 13Tüsho küyimki ayinkhikhea, apinü ajingyanrübo ji tüsho arü bolungnü arü thürükheak mahne mokhit, apinü arübo ki amüsüh-thsangyurü de ji; 14apinü Peter de ajikhi Simon, tüsho aniurü Andria, Jakob tüsho Johan, Philip, Bartholoma, 15Mathi, Thoma, Alphia tsührü Jakob, Zealot de ajikhi Simon, 16Jakob tsührü Juda, tüsho yinatsühbuh Juda Iskariot.
Jisunü Thsangyukhi tüsho Thsüngukhi
(Mt 4.23-25)
17Tüsho apinü arü lung akibah, api jingyanrü boto tüsho Judea le Jirusalem tüsho Tair keyean le Sidon chingnü api yu anipü tüsho arü tukthsübo thsüngupü arükhi mihtsürü yimto ato bebah adükhün kheak zhip; 18tüsho sherübo amünean mebonü küpkhukde alakheanü thsüngu. 19Boto alalanü api qiupü yim, tümüde api kheaknü wu arübah arü alala thsüngu.
Asühpü tüsho Mulong Rozhak
(Mt 5.1-12)
20Tüsho apinü ajingyanrübo kilim zünga kheahbah tha,
“Nüsa zhochihrü asühpü,
tümüde Thrünpuh kiulongthsü nüsa yo.
21Nüsa kheakü khümde alarübo asühpü,
tümüde nüsa bukthsübah.
Nüsa kheakü tripde alarübo asühpü,
tümüde nüsa amünebah.
22 #
1 Pet 4.14
“Mihtsürü Tsührü dünkheaknü küyimki mihtsürübonü nüsa thraneanba, küyimki nüsa mükhemükimde khekhita bahba tüsho amütsü thade nüsa mung bahyukbanü nüsa asühpü! 23#Yunir 7.52Ju nimung asühachihang tüsho asühde jukang, tümütüsho kheahang, yinmi ching nüsa thsambah tode lah; tümüde arü bebuhrünü wukihrübo ki jude rhimodo.
24“Tüshe nüsa alarübo are, tümüde nüsanü nüsa mulong sühakhim ngüdo.
25“Nüsa kheakü suhdahde alarübo are, tümüde nüsa akhümbah.
“Nüsa kheakü münede alarübo are, tümüde nüsa atüzhobah tüsho atripbah.
26“Mihtsürü alalanü nüsa tsakamkhi dünkheak asukchoki nüsa are, tümüde arü bebuhrünü arükchih wukihrübo ki jude athsükheah.
Thiriri Muzhopü
(Mt 5.38-48; 7.12)
27“Tüshe I ki anide alarü nüsabo ki inü thachoh, nüsa riribo muzhoang, nüsa thraneanrü ki atsü rhimoang, 28nüsa athrurü müngühjang, nüsa kheahmüchihrü thsungkheak tamkhüntamnüjang. 29Shepünü nü müchip kheak damchonü, püpü thrip she leangjang; tüsho khürünü nü pangkhümpüniuniu lusho, nü pangkhümpü she lushang. 30Nü ki kheangrü aban kilim jihang; tüsho shepünü nü kukruk lude tsochonü jurü dükheanglo. 31#Mt 7.12Mihtsürübonü nü ki rhimoshihpü nünü alümkhi nangde arü ki she rhimoang.
32“Nü muzhorü ki nünü muzhosho, nü tümü alü la? Tümütüsho aneakrünü she arü muzhorü ki muzhochoh. 33Tüsho nü ki atsü rhimorü ki nünü atsü rhimosho, nü tümü alü la? Tümüde aneakrünü she ju ruk rhimochoh. 34Tüsho nünü mükkin-thsürü kilim nipjihsho, nü tümü alü la? Aneakrübonü she ahihdo alü thsülopü aneakrü kilim nipjihchoh. 35Tüshe nü riribo muzhoang, atsü rhimoang, tüsho angülopü mükkin dülade nipjang; tüsho nü thsambah ato labah, tüsho nüsa ju Khide Achang tsührübo thsübah; tümüde apinü makshe-müjihrü tüsho mihbukmuyuk ki muzholah. 36Nü Buhnü amüthsüm lakhi nangde amüthsüm laang.
Mührü Yukhapkhi
(Mt 7.1-5)
37“Thiyudükhap, tüsho nü yumükhap; dübahyuk, tüsho nü mübahyukde alabah, neak bahjang, tüsho nü neak bahjihbah; 38jihang, tüsho ju nü kilim jihbah; tsüde adünde, nimde, niukarihde, müleamkhiukde nü khah ching jihbah. Tümütüsho nünü adüna jihkhi chingnü nü adünloa angübah.”
39 #
Mt 15.14
Apinü arü ki shihdanglimyu khülang she tha: “Müktukrü mihtsürü khülangnü müktukrü limbekhukba de? Ane chido shingkung ching keamyukpü yung de? 40#Mt 10.24,25; Jhn 13.16; 15.20Jingyanrü khülang ju api thsangyurü kumung yung, tüshe mihbüm abannü küyimki apinü tsüde mükheahkhit-a lubanü anihbuh thsangyurü nangde alabah. 41Tümü thsükhi nü mük ching lakhi aneak mükheahde nü keoniorü mük ching aneak kheahcho le? 42Yungsho nü mük ching lakhi aneak nünü müngüde nü keoniorü ki nü mük ching lakhi aneak inü yihkhitjihanü de küde thsah athakhukba? Nüsa yiuhkhaprü, akhuhde nü mük ching lakhi aneak yihkhita bahang, jushu lang nü keoniorü mük ching lakhi aneak nünü mütsande angübah.
Sangdung tüsho ju Sangaso
(Mt 7.16-20; 12.33-35)
43“Tümütüsho sangdung atsünü sangaso amütsü masochoh, yungsho sangdung amütsünü sangaso atsü masochoh; 44#Mt 12.33tümüde sangdung aban asonü mükheahchoh. Tümütüsho ayangrungbo chingnü khubaso murhochoh, yungsho dütrüngyang chingnü kurungaso murhochoh. 45#Mt 12.34Mihtsürü atsünü api mulong ching atsü lakhi chingnü atsü akhiukchoh, tüsho mihtsürü amütsünü nihbuh amütsü lakhi chingnü amütsü akhiukshihchoh; tümütüsho mulong ching mide alakhinü amünnü asukchoh.
Thüyam Thsürü Mahne
(Mt 7.24-27)
46“Tümüde nüsanü I ki Atungpuh, Atungpuh de jichoh, tüshe inü nüsa ki thakhi mürhimocho? 47Mihbüm aban sherü I ki arübah I yubo anicho tüsho jurü rhimochonü api künangde lanü inü nüsa ki huhbah: 48api ju sükde kiubah lungmi kheak khimtanbah thüyam thsükhi mihtsürü kiphahlah; küyimki düchi arübah ju yam kheak zünkheanü ju majan, tümütüsho ju düküngde thsüa lakheah. 49Tüshe shepünü sobah jurü mürhimonü khimtan mülade alo kheak thüyam thsükhi mihtsürü kiphahlah; ju kheak düchinü zün, tüsho zukleangnü keam, tüsho ju yam thsümünimkhi mihtrebe lakheah.”
اکنون انتخاب شده:
LUK 6: YIMCBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.