O Kandɔɔ 22
22
Abraham bɛɛndian le Isaak po ndɔ sálàá solio
1O sɔɔn mun kɔɔli, mí Hala tɔɔndan Abraham, mó veelu ndu aa: «Abraham.» Mí Abraham cɛl aa: «Yòó!» 2Mí Hala dimul ndu aa: «Cuá po nɔmndo, po nɔm pilɛ n kaola kon taw-taw-vo, Isaak pɛɛn, mà kɔɛ a ndu o lɛŋnde Moria len nin. La tiiya pɛ lon, a soli ndu sálà loamaa le ya o pembii ya cɔmnin nɔm-nde coo.»
3Diimandɔɔ, mí Abraham pena cɔnɔn idiiyo púŋ, mó bɛɛndiaa ɲɛ-calaa o sofɛlɛ ndɔɔ coo, mó cua buɛyaa ndɔa nda ŋiɔn a Isaak po ndɔ, mó tɛɛndiaa yɔmnde le sálà loamaa kɔlan solio. Má bii nɛiyo le kɔlan o fonda Hala cɔm ndu-o. 4Paale yàándɔlen, mí Abraham heelu hɔlla, mó ca fonda Hala cɔm ndu kon-ndo lándán. 5Mó dimul buɛyaa ndɔa aa: «La koma cum naa nanu a sofɛlɔɔ, n co lakɔ naa po nuu, mì n kɔ biilu Hala. N cii pɛ, n muungu nanu.»
6Mó siiluu po ndɔɔ yɔmnde le kɔlan sálà loamaa solio, mí ndu pila bii yinnden a mɔɛi o ba. Má can kɔlan nda ŋiɔn. 7Mí Isaak veelu Abraham fuɲa ndɔ aa: «Pua sei.» Mí Abraham cɛl aa: «Yoo, po nuu.» Mí Isaak ɲuna ndu aa: «I ce yinnden a yɔmnde. Kɛ ɔ́ɔ̀ saa téndé naa n co lakɔ sálàá soli-o?» 8Mí Abraham mulul ndu aa: «Po nuu, Hala pila nuwviaanin saa téndóó le sálà loamaa kon solio.» Má kɔa nɛɛ nda va kɔlan-nda nda ŋiɔn kpow. 9Mɛɛ nda tiiya o fonda Hala cɔm-ndo, mí Abraham cɔaw fonda-loamaa-lasálàá, mó ciŋa kilion lecoo. Mó bii Isaak po ndɔ, mó yii ndu peŋ, mó yambu ndu o kilin va o fonda-loamaa-lasálàá coo-on coo. 10Mó siɛndi baa, mó cua mɔɛi le po ndɔɔ bololan kiolɔɔ. 11O kon mí mɛlɛkanɔ Hala-o veelu ndu coocoo aa: «Abraham sei. Abraham sei.» Mí Abraham cɛl aa «Yòó!» 12Mí mɛlɛkanɔɔ dimul ndu aa: «Hol poombɔɔ baa le. Yɔŋ ndu ɲɛ-ɲɛ vɔɔn te. I sina nihau válán maa a nɔ siòòŋii Hala-e, kani a túŋ ya pole nɔmnde pilɛlen nden te.»
13Mɛɛ Abraham heelu hɔlla, mó ca saa kóndóó. Leela ndɔlan la va lakayakayanndan o bɔɔ nin. Mó bii ndu, mó solul Hala ndu sálà loamaa o fonda Isaak po ndɔ-o. 14Mí Abraham ke fonda kon diolan aa Adonai-Yiire (kon co dimio ni aa «Maalii nuwviaanin»). Lelan vannda co vɔ dimio háá hau a pembii ken o kɔɔ ni aa: «O pembii Mɛlɛka-e coo, Mɛlɛka pila nuwviaanin.»
15O kon kɔɔli, mí mɛlɛkanɔ Hala-o lo vɛlɛ coocoo, mó veelu Abraham veelu diinndɔɔ, 16mó dimul ndu aa: «I mɛnan o diola nilan, ya Mɛlɛka co sɔɛi ni, kani á tuŋ ya po nɔm pilɔɔ le. Le tùú n tosa kon-ndo, 17i co nɔm duaa dɔvɔɔ taw-taw. I kuinin cuavaa nɔmaa imamaa, mà va kunda maa loeon o halataala a sióónndon o mɛmma ihɛllan kɔngɔ. Cuavaa nɔmaa imamaa kɛsinnin yaamɔaa ndaa o labɛngunin. 18Vanaa-mangalaa-isɔɔa súúlan kpow o ceendo coo a sɔlanin duaa cuavaa nɔmnda o ba bɛngu. Kani nɔm Abraham, a bii sɔɛi nii.» 19Sɔɛi ken cuvɔɔ, mí Abraham muungu nɛɛ buɛyaa ndɔa va-a, má bii nɛiyo le muungoo Bɛɛr-Seba, mó kɔ cal lon.
Polale Nahɔr len
20Mɛɛ sɔɔn mun hiow, má dimul Abraham maa Milka bɛɛ vilul Nahɔr pɔmbɔ ndɔ cuavaa piaandua. 21Poaa kan yɔŋnun haa ni: po tasoo diolan Ut, o diinndɔɔ Bus, a à celen: Kemuɛl fuɲaa Aram, 22Kesɛd, Haso, Pildas, Yidlaf a Betuɛl. 23Betuɛl kon yɔŋnun fuɲaa Rebeka ni. Poaa ŋɔmaa Milka vilul Nahɔr, pɔmbɔɔ Abraham-nda yɔŋnun kan ni. 24Mí Reuma sámá ndɔ bɛɛ vilul ndu cuawva. Cuavaa kan yɔŋnun haa ni: Teba, Kaham, Tahas a Maaka.
اکنون انتخاب شده:
O Kandɔɔ 22: BKG
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Alliance Biblique en Guinée