O Kandɔɔ 28
28
1O kon, mí Isaak veelu Yakɔb, mó dɔaw ndu duaa, mó dimul ndu aa: «Yìl vanalanɔ Kanannɔɔ o nɔ̀u le. 2Bɛɛndian mà kɔɛ Padan-Aram o Betuɛl fuɲa nɔm mama lo, fuɲaa kala nɔm pɛɛn, ma kɔ yil cua Laban bom nɔm-ndo o pilɛ o nɔ̀u. 3Màá Hala Vana-Kpaayaa-Kpow dɔw nɔm duaa, mò nɛŋi nɔm ipulu, mì polale nɔmnden le kui háá mà siŋnun fuɲa-mamaa le vanaa-mangalaa-isɔɔa súúlan taw! 4Màá o tuisi nɔm duaa o dɔw Pua Abraham-ndo coo niaa cuavaa nɔmaa imamaa, haliko mi lɛŋnde n co len icali nin o sumialle len le siŋnun lɛŋnde nɔm! Kani Abraham fuɲa nɔm mama Hala yɔngu len ni.» 5Nuaa Isaak vem Yakɔb po ndɔ Padan-Aram ni. O kon, mí Yakɔb can, mó kɔa o Laban bom ndɔ lo, po Betuɛl Aramiinɔ-o pɛɛn. Laban kon yɔŋnun yemaa Rebeka ni, kalaa Yakɔb nda Esau pɛɛn.
6Mí Esau ca maa Isaak dɔw Yakɔb duaa mó viam ndu Padan-Aram le kɔlan lanɔɔ yilɔɔ. Mó sina vɛlɛ maa telen fuɲa nda va Yakɔb congɔnndo-o, mó kuuna ndu aa o yil vanalanɔ Kanannɔɔ o nɔu le. 7Mí Yakɔb bii sɔɛi fuɲa ndɔ nda kala ndɔ-e, mó kɔa Padan-Aram. 8Mí Esau sina dɔ́ɔ́ maa vanlaandua Kanannda hɛnan fuɲa ndɔ le. 9Le hee, mó kɔa o Ismaɛl lo, po Abraham-ndo pɛɛn, mó kɔ yil Mahalat cua ndɔ, yemaa Nebayɔt o nɔ̀u, mó handu vɛlɛ kon o laandaa celeŋaa ndóò nɔ nin-nda coo.
Yakɔb kei lɔan sɔl nɛi-tɛɛn
10Mí Yakɔb faŋan Bɛɛr-Seba, mó kɔa Haran. 11Mɛɛ paalen le del, mó cua powvo le bollen yambɔɔ lecoo, le lɔan o fonda ɲumndan ma tul ndu kon-ndo. 12Mó sɔl lɔan. O lɔma sɔlaama man nin, mó ca ɲɔɔ maa lakpáákpáá#28.12 lakpáákpáá: Ɲɛ vana toosiaa le helɔɔ coocoo-o kpáákpáálan la co ni. Vanaa pum veelu lan aa sangasangaa. cɔnɔnndo lɛŋ mo kɔ tiiya bollen o halataala di. Mɛlɛkaa Hala-a va helɔɔ a tolɔɔ o kpáákpáála lan. 13Mɛlɛka pila va isisi ndu Yakɔb ikɛi, mó dimul ndu aa: «Ya co Mɛlɛka ni, Hala Abraham fuɲa nɔm mamaa a Hala Isaak-o. Lɛŋnde n co len ihini coo len, i co nɔm len yɔngu niaa cuavaa nɔmaa imamaa. 14Polale nɔmnden le kuinin maa cundoo lɛŋ. Le tiwnin o tàndà oo tàndà nin: a ba paalen le can-ndo, a ba le del-lo, a ba too a á ba luaŋ-ndo. Yungulan o lɛŋnden coo kpow la sɔlanin duaa nɔm a polale nɔmnden o ba bɛngu. 15Tofa vɔ, ya pila co nɔm ikɛi. Fonda oo fonda n kɔɛ pɛ, i mandanin nɔm. I minginin nɔm vɛlɛ o lɛŋnden nden nin. I melnin nɔm te háá mì peelu kpema ya cuel nɔm-ndo.»
16Mɛɛ Yakɔb tendu, mó dimi aa: «Yàá Mɛlɛka co o fondaa ho! Ya i ve ndi sina nuaa le.» 17Mí siòònde bii ndu, mó dimi aa: «Fondaa ho co bɔɔ fonda kaamaa bɛndu. Nanu ndu kɛsɛ-kɛsɛ Cɛi-Hala-o co nanu, dio halataalaa pɛɛn.» 18Diimandɔɔ idiiyo púŋ, mó can, mó cua pow ndóò yambu kon bollen coo-o, mó siinguu ndu pow sálàá, mó baŋ ndu lɛŋ, mó tala cuɛiyan lecoo. 19Mó ke fonda kon diolan aa Betɛl (kon co dimio ni aa «Cɛi-Hala-o»). Paandu, nuaa fonda kon ndóò nɔ diolan ni aa Lus. 20O kon, mó cua ciɛɔ́n o Mɛlɛka lo, mó dimi aa: «Te Hala lo pɛ ya ikɛi, te o kanda ya pɛ o kela ya co hoo-o nin, mò yɔngu ya ɲɛdiaa a ɲɛ cuɛinanndo, 21mì muungu kɛndia fuɲa nuu o ibuŋ, mɛɛ Mɛlɛka siŋnunnin Hala nuu. 22Pow ya baŋ hoo mì siinguu ndu pow sálàá-o, o siŋnunnin Cɛi-Hala-o, mì va ndu o-tɔ́ndɔɔ yɔngoo o ɲɛm o co va ya yɔngoo-on kpow nin.»
اکنون انتخاب شده:
O Kandɔɔ 28: BKG
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Alliance Biblique en Guinée