O Kandɔɔ 44
44
Yosɛf tofa bɛndaa ndɔa kɔltan
1Mí Yosɛf dimul vana va cɛi ndɔɔ hɔlten coo-o aa: «Vowlul vannda ha ɲɛdiaa o bɔlɔla ndalan nin mà pei lan cá-cá, mà mingul nda volin ndan vowlul o bɔlɔla ndalan sondoo. 2Mà vow taala kólaa ni cɔwnun a volii humbuei-yo o bɔlɔ pɔmbɔ nda lumndo sondoo a volin ndɔn o hin le baloo piondɔɔ-on.» Mí langbanɔ kon tosa mɛɛ Yosɛf dimul ndu yɛ. 3Mɛɛ paalen le sɛ diimandɔɔ, má mal vanaa kan kɔnndan a sofɛlɛa ndaa. 4Má faŋan ciee, má bii kɔlan. A kue bɛɛ levil te, mí Yosɛf koma dimul vana va cɛi ndɔɔ hɔlten coo-o aa: «Diom vannda ha. A bendal nda pɛ, a ɲuna nda aa: ‹Le yɛɛ niaa mingi yɛ dɛnɛ vɔɔndo le dɛnɛ kɛndɛ nda tosal niaa-o? 5Le yɛɛ niaa ciimbuu yɛ taala kólaa vana ni bɛndoo kol nin-ndo? A taala kólaa kon koni o dimi vɛlɛ sɔɔn yɔŋnunnin laci-on ni. La tosa kɔlvesɛi bɛndu!›»
6Mí langbanɔ kon diam nda, mó kɔ bendal nda, mó ɲuuniaa nda mɛ̀ɛ́-mɛ̀ɛ́ Yosɛf cɔm ndu yɛ. 7Kɛ má mulul ndu aa: «Vana bɛndoo, vɛ ma va sɔɔn vaa nuaa dimio? Yiyan del naa le dɛnɛ kɔlvesɛi vaa lende tosaa le. 8Tuma naa n cɛn Kanaan le muungoo nanu-o, mí n cuu nɔm volin naa n kɔ saalun o bɔlɔla naalan nin-ndon. Yɛɛ viam yɛnin naa vɛlɛ mì n ciimbuu volion, te kon te sianion o vana nɔm bɛndoo lo cɛinin? 9Le hee, vana-vana n saalun pɛ taala kólaa kon o ba, vana kon sɔla piɔ́mndo. Handɔɔ o kon coo, naa vanaa tɔ̀a n siŋnun cɛa nɔmnda.» 10Mí langbanɔ kon muli aa: «Bala tiɔn. I tuei. Vana-vana ya saalun pɛ ndu o ba, ndu siŋnun cɛ nuu, kɛ a tɔ̀a nda nɔnin isɔɔ le.» 11Mí nda kpow a tuisi dɔ́ɔ́ bɔlɔla ndalan lɛŋ a kiltan, mí vana-vana kumbi o ndɔɔ. 12Mí langbanɔ kon yaasiaa bɔlɔla lan, mó kandu a bɔlɔ bɛ nda cuu nda o kɔɔ kpow-vo, mó kɔ mɛɛlu a bɔlɔ pɔmbɔ nda lumndo. O kon, mó saalun taala kólaa o bɔlɔ Bɛnyamɛn-ndo nin. 13Mí bɛndaa ndɔa sɛɛsiaa domala va nda lekɔɔ lan a mɔnɛi, mí vana-vana mingi volɔɔla ndɔlan handɔɔ o sofɛlɛ ndɔɔ coo, má muungu ciee kpow.
14Mí Yuda kɔa nda puapilɛa ndɔa o Yosɛf lo cɛinin. Yosɛf va vɔ lon, má kɔ baŋ vulan ndu o labɛngunin. 15Mí Yosɛf ɲuna nda aa: «Dɛnɛ yɛɛ niaa tosa yɛ ho? La co pá sinaa maa te vanndo va pɛ mɛɛ ya co nuaa yɛ, o bɛnda le sɔɔn viannanndon sinaa?» 16Mí Yuda dimi aa: «Vɛ̀ɛ̀ naa n co yɛ hee muli, vana bɛndoo? Yɛɛ naa n co yɛ dimi? Vɛ̀ɛ̀ naa n nɔla yɛnin cɔmndo maa n del kasi le? Hala cii tɛɛmbuu naa cɔɔmuu. N cuu siŋnɔn cɛa nɔmnda, vana bɛndoo. Kandɔɔ a naa pila, kɔ bii a vana nda saalun taala kólaa o bɔlɔ-o.» 17Kɛ mí Yosɛf dimi aa: «I co tosa lende le. Vana nda saalun taala kólaa o bɔlɔ-o, ndu co va cɛ nuu ni. Kɛ niaa vanaa tɔ̀a, la muungun o fuɲa niaa lo, la nɔ isɔɔ le.»
Yuda pila yɔngun o fonda Bɛnyamɛn-ndo
18O kon mí Yuda sɔɔnguu, mó dimi aa: «A yandi vana bɛndoo. Cɛl-lɔ mì dimul nɔm sɔɛi pum, tuulu kɔl a ya le sɔɛi ya co nɔm dimul-le le, kani kpen-kpen niaa co niaa Faraɔnnɔɔ ni. 19O kandɔɔ tasoo, vana bɛndoo, má ɲuuniaa naa aa: ‹La nɔ pá fuɲaa, te kon te pɔmbɔ celen?› 20Mí n mulul nɔm ɲinkon aa: ‹N nɔ fuɲa naa yuuvɛiyo, n nɔ vɛlɛ pɔmbɔ celen, o fuɲa naa kon velu o yuuvɛi nin-ndo. Pɔmbɔ naa lum kon, bɛ ndɔ nda fula kala pilɔɔ-o vi nin, ndu pilɛ kpé lo nin ni. Nduyɛ, fuɲa naa kaola ndu taw.› 21Má dimul naa aa naa n cuu nɔm ndu mà ce ndu a lehɔl. 22Mí n dimul nɔm aa poombɔ kon nɔla mò faŋan fuɲa naa ikɛi le, o faŋan pɛ tuŋ, fallo koma vu. 23Má dimul naa aa te naa n hin a pɔmbɔ naa lum kon te, aa naa n fúlà lɛ nɔm o hɔl te. 24Mɛɛ naa n muungu o buɛi nɔmndo lo, fuɲa naa pɛɛn, mí n kɔ downun ndu kona mɛɛ n soo yɛ. 25Tuma fuɲa naa kalaa dimul naa aa naa n muungu nanu mì n hun pindu nda baloo-o, 26mí n dimul ndu maa le kɔla naalan nin ndon, fɔ mì n kɔɛ a pɔmbɔ naa o ba. Kani te n kue naa ndaa le, n nɔla lɛ mì n fula langbanɔ kon o hɔl te. 27O kon mí fuɲa naa dimul naa aa: ‹Niaa pila sina maa poaa nda ŋiɔn koni Rasɛl laa ni vilul-la ni. 28Mí o pilɔɔ hialun ya, mí visi biyaa sɔam ndu, i ci lɛ ndu le few. 29Te la cua vɛlɛ pɛ hoo, mì la kɔɛ a ndu ya levil, mì dɛnɛ vɔɔn kɔ tosalan ndu, mɛɛ la yɛɛ ya ciee-piɔ́m a mɔnɛi o yuuvɛi nii nin.› 30Le hee, te i muungu pɛ fuɲa nuu o ibuŋ, mì kue a poombɔ o holnun hoo holnɔn bɛndoo mó kaola ndu taw-vo le, 31te o ci ndu le, o co vunnɔn. O tosan yɛ pɛ lende, mɛɛ naa buɛyaa nɔmnda n yɛɛ ndu ciee-piɔ́m a mɔnɛi o yuuvɛi nin ni. 32Kani ya Yuda, mí cua kpemaa o fuɲa nuu lo le sɔɛi poombɔɔ ho, mí dimul ndu aa: ‹Te i cuu nɔm ndu le, haki kon vanin ya o lebol nɔm o hɔl le fɛɛn a fɛɛn.› 33Lelan, i tɛɛlun nɔm a yandi, cɛl mì ya Yuda siŋnun cɛ nɔmndo o fonda poombɔɔ ho, haliko mo muungu nda bɛndaa ndɔa. 34I bɛnda mì muungu o fuɲa nuu lo le, te o co a poombɔɔ ho le. Kani i yeema mi kɔ cɔ fuɲa nuu mɔnɛi biyɔɔ le.»
اکنون انتخاب شده:
O Kandɔɔ 44: BKG
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Alliance Biblique en Guinée