Yokana 3
3
Yesu Oyamo kede Nikodemu
1Oudo bin tie icuo moro kame nyinge Nikodemu, kame oudo obedo ngat acel kikom Iparisayon, en oudo ngapug me Iyudayan. 2Icuo noni bin obino but Yesu iwor di eko waco ne be, “Rabi, wan ongeo be in ngapwony kame owok kibut Rubanga, pien likame tie dano moro kame twero timo gianena kame in itimo gi, kwanyo kame di Rubanga tie kede en.”
3Yesu oko dwoko ne be, “Ateteni, ateteni ango awaco ni be, likame tie ngat kame twero neno Ajakanut ka Rubanga, kwanyo ka konywale tien me are.”
4Nikodemu oko penye be, “Ka dano otieko doko dwong, kotwero nywale bobo benyo? Etwero bobo donyo i yi toto mere tien me are di oko nywale benyo?”
5Yesu oko dwoko be, “Ateteni, ateteni awaco ni be, likame tie ngat kame twero donyo i Ajakanut ka Rubanga kwanyo di konywale nywal me pii kede me Tipo Kacil. 6Gikame kom nywalo udo en kom, doko gikame Tipo nywalo udo en tipo. 7Kur ibed kede ur be pien ango awaco ni be, kopoore nywali tien me are. 8Yamo buko kakame en emito; in itwero winyo buko mere, do likame ingeo kakame ewok kiye, akadi kakame etie ot iye; etie kamanono da kede dano acelacel kame konywalo nywal me Tipo Kacil.”
9Nikodemu oko penye be, “Man karuno timere benyo?”
10Yesu oko dwoko ne be, “In kom ibedo ngapwony me Isirael do di likame iniang gini? 11Ateteni, ateteni awaco ni be, wan oyamo kop i kom gikame ongeo, kede gikame oneno; do in idagi yei ijura kame wan omio. 12Ka awaco ni kop i kom gi me piny di iko dagi yei, ikaruno do yei benyo ka ayamo ni kop i kom jame me malo? 13Likame tie ngatamoro kotieko ot malo, kwanyo kenekene ngat koyai ki malo bino piny, en Wot ka dano.
14 #
Wel 21.9
“Bala kite kame bin Musa okiarao kede twol i tim, kobino kiarao Wot ka dano da malo kamanono, 15tetekeny ngat kame yei en ud kuo kame bedo nakanaka. 16Pien Rubanga bin omaro piny, omio eko cwano iye Wode acel kenekene, tetekeny ngat kame yei en kur toi, do eud kuo kame bedo nakanaka. 17Pien Rubanga likame ocwao wode i piny pi ngolo ne piny kop, do en ecwae tetekeny piny ud alako pi en.
18“Ngat kame yei en likame kobino ngolo kop loe; do ngat kalikame yei en kotieko ngolo kop oloe cuto, pien likame eyei nying Wot ka Rubanga acel kenekene. 19Ngolo kop en ine be, lero otieko bino i piny, do jo oko maro colo akaka lero, pien tice gi oudo reco. 20Pien ngat acelacel kame timo gikarac dagi lero, doko likame ebino i lero, tetekeny tice mege kur ngere. 21Do ngat kame timo gi me ateni bino i lero, tetekeny enyutere kakaler be tice mege obedo tice me woro Rubanga.”
Yokana Owaco Kop i kom Yesu
22Ingei man, Yesu kede josiao mege oko ot i piny me Yudea, di en eko dong kede gi kuno di ebatiso jo. 23Yokana da oudo tie batiso jo i adul me Aenon, i nget Salim, pien oudo pii tie tot kuno. Oudo bin jo bino kuno di oko batiso gi, 24#Matayo 14.3; Marako 6.17; Luka 3.19-20pien oudo pwodi likame koketo Yokana i otkol.
25Piem oko gere i dierediere me josiao ka Yokana kede Ngayudaya acel i kom kop kame mako lonyere. 26Gin kiko bino but Yokana di kiko waco ne be, “Apwony, ngat kame oudo in itie kede loka tetuca me Yorodan, kame in bin imio ijura i kome nono, en ine etie batiso jo; doko jo dedede tie ot bute.”
27Yokana oko dwoko ne gi be, “Likame tie dano kame twero udo gimoro kwanyo di komie ki malo. 28#Yokana 1.20Wuda kikomu ijuraunu ango be awaco be, ango likame Kirisito, do kocwao ango pi telo ne en yongayo. 29Icuo eteran en kame won ateran; do adieru me eteran, kame cungo i ngete di ewinyo yamo mere lelo twatwal pi winyo dwan eteran. Pi mano, ango nan atie kede yomcuny adwong. 30En miero emeede, do ango miero adok piny.”
Ngat kame Obino ki Malo
31“Ngat kame obino ki malo kalamo jo dedede. Ngat kame tie i piny udo en me piny, doko da eyamo kope kame mako jamini me piny; ngat kame obino ki malo kalamo jo dedede. 32En ejurao gikame eneno kede kame ewinyo, do likame tie ngatamoro kame yei ijura kame en emio. 33Ngat kame yei kop me ijura mere, udo ngat nono otieko moko be Rubanga en ateni. 34Pien ngat kame Rubanga ocwao, en eyamo kop ka Rubanga, pien likame Rubanga mio Tipo Kacil di epimo apima; 35#Matayo 11.27; Luka 10.22Papa maro Wod, doko etieko mino jame dedede i cinge. 36Ngat kame yei Wod tie kede kuo kame bedo nakanaka; ngat kalikame yei Wod likame ebino udo kuo, do lilo ka Rubanga bino poto i kome.”
اکنون انتخاب شده:
Yokana 3: BILK13
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Baibuli I Leb Kumam © Bible Society of Uganda, 2013.