LUKI 17
17
Faa yowũ
1Ziizɛ ɣɛni ná kala dopoitiɛ ma, “Tɛ‐gaitiɛ ta wo ga nu é ziɣi pele va ta va ƃɔɔ ti. Kɛ̀ kpalo velivɛ nui nii ma yá va ga tiɛ! 2Ɔ́ ɣɛ ga faa vagɔ manui ʋaa ma ga ani ɔ́ kwɔti vii‐vii sɛlɛ na wɔgi va é vili yuwu wu é leve kɛɛ va ga zaƃu ga lopaa woloi niitiɛ te ɣila ge ziɣi pele va. 3A ƃɔɔ maazu vɛtɛ. Ani è wɔi ta ɣa faa yowũ ɣɛɛ na, yii ɣaa wãla ma. Tɔwɔ a wulu ɣaa ʋe na faa yowũi va, su ʋaa yɛ. 4Ani yá faa yowũ ɣɛɛ na ga yìɛ folo ɣila zee wu ná zei‐zu ɣɛ lɔfela, tɔwɔ é vaala ɣɛ è wɔ vɛ lɔfela yíɛ ɣɛ è ma, ‘È veevɛ, gɛ̀ lɛ sa ta ɣɛɛ,’ kɛni yà su ʋaa yɛ.”
Zee‐la‐ma
5De maliɣii na keelaitiɛ te ɣɛni ma, “Gá yee‐la‐mai zu wɔɔlɔ ma!” 6De maliɣii ɣɛ te ma, “È ɣɛ zee‐la‐ma ɔ́ wɔɔlɔ na wo ya é ɣɛ ƃalaa ga “mɔsita” mawului maɣai liigo, wɔ yɛ kpodogi ta ma, ‘Lɔɔ wulo è li è zei yuwu wu.’ Tɔwɔ é goo‐mɛni kulo wo ya.”
Tii‐ɣɛɛ nui wutii
7Ziizɛ ɣɛni tea,“? Tii‐ɣɛɛ nu ɣa ɣɛ na wo ta nɛpɛ zeea yíɛ tulu tɛ ɔɔ yíɛ baala maazu vɛtɛ é ziɣi kpalagi zu é va, manui ɣa ɣɛ tii‐ɣɛɛ nui ƃɔɔ ma, ‘Va de laa mi’? 8Kɛ̀bɛ to mu towaa ɣɛ manui ma, ‘Ɣavele ƃɛtɛ na è nà kpɔkɔ wɔ̃nɔgi ɣili. Na ɣa ɣɛɛ na è zaama ɣili yìɛ nà daa‐mii ŋɛni ʋe zèea é yɛsu gè laa mi gè dɔɔ ƃoale. Na ɣa wulo na ba, yà sa yà laa mi yìɛ dɔɔ ƃoale.’ Kɛ̀bɛ towaa na wo má, kɛlɛi? 9?Towaa tii‐ɣɛɛ nui mama toku ge zei ga zɔitiɛ é te leʋea é te la zéea, nà te ɣɛɛni? 10Vele nɔ na é la ga wiɛ. Niitiɛ ɣaazɔ te leʋeai te la wo ya, wa te ɣɛɛ na, a ɣɛ tea, ‘Gá ga tii‐ɣɛɛ veai niitiɛ tɛ lɛ kuloni bu. Nii nɔ é yɛga ga gé vaa ʋaa towaa gé kɛɛ. Gɛ́ lɛ ta vɛɛni na va.’ ”
Ziizɛ gee vea puugɔ valoni
11Ziizɛ ɣɛi ma pele ma yíɛ li Yɛlusulɛɛ, é leveni ga Geealali ƃɔga Sameelia te yɔɔzuvɛ vele. 12Tei é ɣɛni lɛɛzu taa ta zu, ta gee vea puugɔ te wũini niitiɛ te zu wuloai ɣɛ ba te loni. 13Te woo lɛɛni ƃɔɔ gee zu te ɣɛ ma, “Ziizɛ, gá nu keea nui, gé ɣaazu‐maa‐wõi ɣa.” 14Tei é te vɛtɛni é ɣɛni te ma, “A li wo ƃɔɔ lɛ ga laa‐ʋaalegitiɛ.” Tei sa te ɣɛni liizu, gee ƃeani te ma te maa ziɣi. 15Tei sa te gila ge wɛlɛni na va ga balovɛ, é galeni ma wulu yíɛ Gala daa maa lɛ ga woo wala. 16É looni sa Ziizɛ wɔwɔ wu yíɛ mama fe bɛ́. Tɔwɔ é ɣɛni ga Sameelia nu. 17Ziizɛ ɣɛɛ vele ɣa na tea,“? Nu puugɔ lei ɔ́ baloi wo te maa ɔ́ ziɣi? Taawuoitiɛ wɔ mu? 18?Te ta nɛpɛ gɛ lɛ zooni ɔ́ gale ma ɔ́ Gala daa maa lɛ é wulo wɛ̃i nii wulu?” 19Ziizɛ ɣɛ sa ma, “Wu ziɣi è ya lii wo. Yà yee‐la‐mai é è valoa.”
Gala na masadai vaa ʋai
20Tei Favilesiitiɛ te Ziizɛ ɣaa zaɣa kɛɛni siɛgi ma Gala na masadai vaazu la, é te woi ɣaa woteni é ɣɛ te ma, “Gala na masadai lɛ vaazu ga é ɣɛ ga ŋɛnii nu ɣa ɣaazu la ma. 21Ɛ́ lɛ kɔnɔ ga tiɛ bo wiɛ ga ‘Towaa!’ ɔɔ ‘Tɔ nu!’ Toku ge zei ga Gala na masadai ɣa wo yii zu.” 22Ziizɛ ɣɛni ná kala dopoitiɛ ma, “Siɛgi ɣa vaazu ga wiɛ wõi ɣɛ ga wo wɛlɛ nu ƃuse lui na yɛminigi zu ʋoloi ɣila ba. Tɔwɔ wɛ lɛ pɛtɛga. 23Na ɣa ɣɛɛ na ta ɣɛ wo ma, ‘A wɛlɛ! Tɔ nu!’ ɔɔ ‘A wɛlɛ! Towaa!’ Ta na wo na, a mɛ lɛ li na ɔɔ a mɛ lɛ vile te wulu. 24Su‐wulo‐zu ɣa ga è ɣɛ velei nɔ mea‐meai ɣa kulo la gee wɔlɔgi ma é maa wodo é ziɣi ƃɔɔ mazɛvɛ ɣila ma é loo zɔi ma, vele nɔ na nu ƃuse lui maʋai ɣa ɣɛɛ la ná kui ma. 25Kɛ̀ mamaa wũgi pa kɛni é laa nɔwɔ wo faa lamaa zu, ʋala‐wonɛɛgi niitiɛ te ɣɛlɛ ba. 26È ɣɛ velei nɔ é ɣɛɛni la Nowa na yɛmini su, vele nɔ na yá ɣɛɛ la nu ƃuse na yɛminigi zu. 27Na maziɛ su te ɣɛni laa miizu tiɛ dɔɔ ƃoale tiɛ ŋaza wulo, ŋazaa tiɛ zei zini bɛ, é yɛsu foloi na ziiti nii Nowa vilini ma ziɛ‐ɣaa ŋeegi zu. Ziɛ‐ʋegi va sa é te pɛ te zu ŋala‐ŋala. 28Vele nɔ na é ɣɛɛni la Laati na yɛmini su. Te ɣɛni laa miizu tiɛ dɔɔ ƃoale, tiɛ ŋɛni ɣeea tiɛ ŋɛni zɔ̃wɔ wulo, tiɛ sii‐zii ŋɛni zii tiɛ to‐to ŋɛnia lo. 29Kɛ̀ ʋoloi Laati wuloni la Saadɔ̃ lai va, ŋabu vɛɛ fukɛ va te wuloni gee wɔlɔgi zu te yii è ɣɛ tine ɣa ɣɛ puuzu te te zu ŋala‐ŋala. 30Vele nɔ na a ɣɛɛ la ga ʋoloi nu ƃuse lui maʋaa ɣa wulo la kɛnɛ ma. 31Nà maʋoloi nui nii yá ɣɛ pɛlɛ wɔma, ná sɔɔlaitiɛ te pɛlɛi wu, pagɛ é mɛ lɛ vile ɔ́ te ziɣi. Pele zii ɣilagi nɔ zu nui nii yá ɣɛ kpalagi zu, pagɛ é mɛ lɛ gale ma wulu. 32A ɣi zɛ Laati ŋazai maʋaa zu. 33Nui nɛpɛ yá ɣɛ pele ɣaa ziɛzu ga zɛʋui yɛ zéea, towaa yɛʋui vili. Kɛ̀ nui nɛpɛ yá yɛʋui vili towaa yɛ zéea. 34Gè bo wiɛ, na maƃidii nu felegɔ ɣa ɣɛ bete ɣila ga, gila ge wulo su gilagi yɛ su. 35Ŋaza felgɔ ta ɣɛ mɔlɔ ziɣezu ŋada ɣila, gila ge wulo su gilagi yɛ su.[ 36Zinaa felegɔ ta ɣɛ kpalagi zu gila ge wulo sú, gilagi yɛ sú]” 37Te ɣɛni sa Ziizɛ ma, “Minɛ ɣa ɣɛ le, gé maliɣii?” Tɔwɔ é ɣɛ te ma, “Vɛ suo woma na, ná ya kooɣɛitiɛ ta ɣaa kpo na.”
اکنون انتخاب شده:
LUKI 17: DN1971
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Loma New Testament © British and Foreign Bible Society, 1971.