Zɔ̂ŋ 11
11
Tãi Lâzara e sàa lai
1Nalôŋ tɔnɔ è wɔlɔ kɛ̀ kɔ́lɛ̂i. Ǹáa ƃe kɛ̀ a Lâzara. Nalôŋ ŋí séɛɛ è kɛ̀ Bɛtɛni taai su. Mere da ǹêɣe Maatɛ díkɛ daai ŋí su máŋ. 2Mere da Maatɛ díkɛ a ǹalôŋ ŋí zaaƃɔlɔ-ni. Mere ŋí ƃe wɔ́lɔ ŋúrɔ-kúŋ nɛ̃ɛi pú Kunuu-namui kɔ́ɔ mâ é m̀aa kɔ̀ɔ a ŋ̀uŋ-leɣa. 3Nya ƃe ŋɔsaaƃɔlɔ-ŋai dí núu tɛ̀ɛ Zîsɛ pɔ́naa, dîyɛɛ ma, “Kúnuu-namui, ǹúui nyii í ŋ̀wɛ̂li níi, gáa kɔ́lɛ̂i.” 4Kɛ́lɛ, tãi Zîsɛ è mɛ̀ni lai, è mò, ǹyɛɛi, “Gɔlɔ-felai ŋí fé zaa mɛni ma. Gáa Ɣâla ŋɔfólo-laai mɛni ma, a gɛɛ Ɣâla Ǹóŋ ŋɔfólo-laai é tɛ́ zarâi.”
5È kɛ̀ tí, Zîsɛ è kɛ̀ a Maatɛ wɛ́liɛɛ da ǹîa Mere, da Lâzara. 6Nya ƃe tãi è m̀ɛni la a gɛɛ Lâzara è kɛ̀ kɔ́lɛ̂i, è gɛ̀ a ɣele-kuu feerɛ ƃɛ́i è kɛ̀ naai. 7Nyiŋi pôlu ma è mò ŋɔpôlu-ƃelai dîa, ǹyɛɛi, “Kwaa li ŋɔ́nɔ Zuda.” 8Ŋɔpôlu-ƃelai dí mò mà, dîyɛɛi, “Kaamɔ̂ɔ, Zûu-ŋai dí kɛ̀ íkɔ̂rii a gɛɛ dí ísɔɔ, nya ƃe ŋɔ́nɔ íkaa liî naai?” 9Zîsɛ è zu tòo, nyɛɛi, “Kɛrɛ̂e, aƃa puu kao feerɛ ƃe gáa ɣele tɔnɔ sui? A kɛ̀ núu da à sìa a voloi, ve pâi gɔ́ɔ tuâi. Kpɛ́ni fêi, a ǹɔii ŋi ŋɔkwaa-ponoɔi kâai. 10Kɛ́lɛ, à kɛ̀ núu da à sìa a gbínii, a gɔ́ɔ tùa. Kpɛ́ni fêi, gwaa-ponoɔi fe gbonôi.” 11E mò ti, naa pôlu ma e mò dîa, ǹyɛɛi, “Kúwɛli-nuui Lâzara a nyiî. Kɛ́lɛ, ŋa liî a gɛɛ ŋa ŋ̀ɛi la ƃo.” 12Ŋɔpôlu-ƃelai dí mò ma, dîyɛɛi, “Kúnuu-namui, à kɛ̀ gáa nyiî, a pâi ƃálôi.” 13Ǹyaŋ Zîsɛ e kɛ̀ lônoi é pîlaŋ ŋɔsaa mɛni ma. Kɛ́lɛ, dí kɛ̀ gáâi yɛ̂ɛ a lônoi é pîlaŋ nyii kpîŋ ma. 14Nya ƃe Zîsɛ e mò dîa a zu-ponoɔ, ǹyɛɛi, “Lâzara aâ saa. 15Kámaa-mɛni ma, ńii nɛɛ̂i a gɛɛ fe kɛ́ ni naa, a gɛɛ ká láa la. Kɛ́lɛ, kwaa li bɔ naa.” 16Tama, nyii da kɛ̂ ma Ǹyuâi, e mò m̀arâa polu-ƃelai dîa, ǹyɛɛi, “Kúa máŋ kwaa lí a gɛɛ kwa dîa-ni ku sáa.”
Zîsɛ ƃa mu-siɣe saa-yeei da vulu-laai
17Tãi Zîsɛ e pà lai, e gàa Lâzara a nâa gɛ́ molôŋ su a ɣele náaŋ. 18Bɛtɛni e kɛ̀ Zerusâlɛŋ kɔlɛ, yɛ̂ɛ aƃa tɔnɔ sia. 19Zûu-ŋai dámaa dí pà Mere da Maatɛ pɔ a gɛɛ dí díŋa-kpɛ́ dísaaƃɔlɔ mɛni ma. 20Tãi Maatɛ e mɛ̀ni a gɛɛ Zîsɛ a kɛ̀ pâi, e lì duɛ, Mere ǹyaŋ è kɛ̀ seêni bɛ́rɛi mu. 21Maatɛ è mò Zîsɛ ma, ǹyɛɛi, “Kúnuu-namui, eêi kɛ̀ iî kɛ̀ ƃɛ, ńzaaƃɔlɔ fei saa. 22Loníi ma kpîŋ ŋá gɔ́lɔŋ a gɛɛ nyii kélee ya vɛ́li Ɣâla mai, Ɣâla a pâi dɛɛ̂i ípɔ.” 23Zîsɛ e mò mà, ǹyɛɛi, “Ísaaƃɔlɔ a pâi mu siɣêi ŋɔ́nɔ.” 24Maatɛ è mò mà, ǹyɛɛi, “Ŋá gɔ́lɔŋ a gɛɛ a pâi mu siɣêi ŋɔ́nɔ mu-siɣe saa-yeei su a ŋelei gbɛɛ ŋái.” 25Zîsɛ è mò ma, ǹyɛɛi, “Ńyãa ƃa mu-siɣe saa-yeei da vulu-laai. Ǹúui nyii a làa a ńyãai, berei máŋ zaâi lai, kɛ́lɛ, a pâi kɛ̂i a vulu. 26Ǹyaŋ ǹúui nyii kélee gáa ɣele mai, nyii a làa a ńyãai, ve pâi wɔ́lɔ saâi. Ya nyiŋi síɣe a tɔ̃yâ?” 27È mò ma, ǹyɛɛi, “Ooei, Kúnuu-namui. Ǹáai la a gɛɛ yá ƃa Kôrai, Ɣâla Ǹóŋ, nyii gáa pâi ǹɔii sui.”
Zîsɛ è wɔ́lɔ
28Tãi è kpɛ̀ɛ a nyiŋi ƃoɔi, è lì é ǹîa-nɛnii Mere toli. È mò a ŋóo maa yeŋɔɔ, ǹyɛɛi, “Gaamɔ̂ɔi káa ƃɛ, a ítolîi.” 29Tãi è mɛ̀ni è mu sìɣe a maa felaa é lí bɔ. 30Zîsɛ ǹyaŋ fé niî kɛ̀ pá ní daai su. Kɛ́lɛ, è kɛ̀ niî ƃɛi Maatɛ è gàa naai. 31Tãi Zûu-ŋai kɛ̀ Mere kɔlɛ bɛ́rɛi mui, dí kɛ̀ ŋá kpɛ̂i, dí gàa Mere é mu siɣe a maa felaa é lí ŋini ŋái, dí lɛ̀ɛ bôlu. Kpɛ́ni fêi, dí kɛ̀ gáâi a gɛɛ Mere a liî molôŋ la é wɔ́lɔ naa. 32Nya ƃe tãi Mere è pà ƃɛi Zîsɛ è kɛ̀ naai, è gàa é too gɔ́ɔ mu, é m̀o ma, ǹyɛɛi, “Kúnuu-namui, eêi kɛ̀ iî kɛ̀ ƃɛ ńzaaƃɔlɔ fei saa.” 33Tãi Zîsɛ è gàa, gɛ wɔlɔi da Zûu-ŋai nyii lɛ̀ɛ bôlui dí kɛ̀ wɔ́lɔ̂i, malôŋ è tòo ma a ŋ̀ánaa ŋɔmɔ̂leŋ su. 34È m̀o ma, ǹyɛɛi, “Mí ƃe ká ǹaa naai?” Dí mò ma, dîyɛɛi, “Kúnuu-namui, pá í gáa.” 35Zîsɛ è wɔ̀lɔ. 36Nya ƃe Zûu-ŋai dí mò, dîyɛɛi, “Ka gáa berei e ŋ̀wɛli ni lai!” 37Kɛ́lɛ, da-ni dí mò, dîyɛɛi, “Ǹúui nyii a ŋɛi-pu-nuu ŋɛi lá ƃoi, vei pɔ̂ri nalôŋ ŋí kɛ̂i vé saa?”
Lâzara è ŋɔ́nɔ pà pôlu fulu-laa su
38È kɛ̀ tí malôŋ támaa ŋɔ́nɔ tòo Zîsɛ ma é pa molôŋ lá. Molôŋ è kɛ̀ a loa, fɛ̃ɛ-ƃela laa mɛi. 39Zîsɛ è mò dîa, ǹyɛɛi, “Ka vɛ̃ɛ-ƃelai siɣe naa.” Maatɛ nyii gáa a zaa-nuui zaaƃɔlɔi, è mò ma, ǹyɛɛi, “Kúnuu-namui, tãi ŋí su gúŋ káa nâa mà. Kpɛ́ni fêi, zàa a nâa kɛ́ a ɣele-kuu náaŋ.” 40Zîsɛ è mò ma, ǹyɛɛi, “Kɛrɛ̂e, ŋá mò yâ, a gɛɛ yà làa la ya pâi Ɣâla ŋɔfólo-laai kâai?” 41Nya ƃe dí vɛ̃ɛ-ƃelai kùla naa. Zîsɛ è ŋ̀ɛi tɛ̀ ɣelêi, é m̀o, ǹyɛɛi, “Ńâŋ, ŋa ísɛɣɛ̂i fé a gɛɛ ya ŋ́oo mɛ́ni. 42Ŋá gɔ́lɔŋ a gɛɛ ya ŋ́oo mɛ̀ni nɔ a tãi kélee. Kɛ́lɛ, ŋa nyiŋi ƃôi nɔ ǹûai ŋí mɛni ma díkaa tɔɔ ni ŋ́gɔlɛi, a gɛɛ dí láa la a gɛɛ yá ƃe ńdɛ̀ɛ.” 43Tãi è nyiŋi ƃò lai, è làɣi a ŋ̀óo su kɛ́tɛ, ǹyɛɛi, “Lâzara, kula.” 44Zaa-nuui è kùla ǹyée da gɔ́ɔ lá ɣiriɛ a seɣe, ŋ̀uŋ ma ɣiriɛ a seɣe. Zîsɛ è mò dîa, ǹyɛɛi, “Ka vúloŋ, ká ƃó mà é lí.”
Dí Zîsɛ maa-kiri tèe
(Maafîu 26:1-5; Mâki 14:1, 2; Lûu 22:1, 2)
45Zûu-ŋai dámaa diai pà da Mere-ni dí mɛnii káa è gɛ̀i, dí láa la. 46Kɛ́lɛ, díta-ni dí lì Faresii-ŋai pɔ. Dí mò dîa mɛnii Zîsɛ a gɛ́i. 47Nya ƃe zâla láa soŋ-ƃela kpaya-kpayai da Faresii-ŋai dí kɔyâŋ tòo dí m̀o, díyɛɛi, “Lé ƃe kwa pɔ̂ri gɛ̂i? Kpɛ́ni fêi, nalôŋ ŋí a ŋɛi-kɛ-maa támaa kɛ̂i. 48A kɛ̀ kwà nɛ̀ɛ naa é lí nɔ́ tí, ǹúui kélee a pâi lâai la, gɛ̀ ní Lomaŋ-ŋai da pâi pâi dí kúkɛ̂i maa waai su kara da kúnûai.” 49Kɛ́lɛ, dítɔnɔ ta, da kɛ̂ ma Kaifa, nyii kɛ̀ a zâla láa soŋ-nuu kɛ́tɛi a maa-koraŋ tíi, è mò dîa, ǹyɛɛi, “Káfe mɛni da kélee kɔlɔŋ. 50Káfe tárêi zu a gɛɛ ǹɛ́lɛɛ̂i kámɛni ma a gɛɛ núu tɔnɔ é sáa ǹûai mɛni ma, a gɛɛ ǹyaŋ ǹɔii kélee ŋuŋ lá fe píli.” 51Ve nyiŋi ƃo ni gbɔɔ̂i-yee ma. Kɛ́lɛ, gɛɛ a zâla láa zoŋ-nuu kɛ́tɛi a maa-goraŋ ti, e mɛnii ƃò nyii pâi kɛ̂i a gɛɛ Zîsɛ a pâi saâi ǹɔii mɛni ma, 52ǹyaŋ ǹɔii mɛni ma tɔnɔ nɔ fêi. Kɛ́lɛ, é Ɣâla ŋɔnîa-pɛlɛɛi kélee ŋá-tɛ́ gîe-ma tɔnɔɔ, diai dí táa-taa. 53É síɣe maa-foloi ti ma dí lì kɔyâŋ su a gɛɛ da pɔ̂ri gɛ́i leŋ dí bàa.
54È kɛ̀ tí, Zîsɛ fé ŋɔ́nɔ sia ni a maa ponoɔ dísama. Kɛ́lɛ, è síɣe naa é líi ǹɔii su vɛ̃ɛ-kpâlaŋ kɔlɛ daai su da kɛ̂ ma Ifiraŋ. Ǹaa ƃe è kɛ̀ naa da ŋɔpôlu-ƃelai.
55Ǹyaŋ Zûu-ŋai Dítɛɛ-mɛi-kuui è kɛ̀ lɛɣɛ̂i. Núu támaa dí kùla ǹɔii su. Dí lí Zerusâlɛŋ Dɛɛ-mɛi-kuui tuɛ a gɛɛ dí díkpîŋ maa waa. 56Dí kɛ̀ Zîsɛ kɔ́rîi díkɛ mo díkîe-ni dîa Ŋ̀âla-pɛrɛ Kɛ́tɛi mu, dîyɛɛi, “Lé ƃe gáa íkili ŋá? A gɛɛ ve pâi pâi gúui su?” 57Ǹyaŋ zâla láa soŋ-ƃela kpaya-kpayai da Faresii-ŋai da nâa díwoo tɛ́ɛ a gɛɛ, à kɛ̀ núu da e ƃɛ́i kɔ́lɔŋ gáa naai, é dílɛɛ naa dí gɔ́lɔŋ a gɛɛ dí zoŋ.
انتخاب شده:
Zɔ̂ŋ 11: KWB
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید