Luka 9
9
Yesu Aloma Domi-na-Babae a Blomu
1Yesu abolea bacingami bande domi-na-babae. Abapa ngulu na kpaci a bodumba miembo mibe, na a boheleja bato a bego. 2Abaloma a botɔndɔ mwako moBokumu boNjambe, na a bosengoa babego. 3Abala na bu bo, T’otombeni oko leka a mojɔ momɔngɔ monu; pɛpɛ nongo pango, isa litɔngi, isa molɛmbɛ, isa likonja, na pɛ botombani kasaka jibae. 4Okakweani a ekina ndako, yeyoani a ndako emina oko a ehole enu ebodonga. 5Bato bamiti sɔ no bopele a ekina ngando, okadongani a ngando emina, toma hakoani dutu libibota bmu, o eleho ai bo. 6Oko boa bakɛ bakatɔndɔe Mwako Mopele a ngando na ngando, na basengoa babego a bisika bisusu.
7Yana aka kumu Elode mwako mongando jisusu jikɔkɔ Yesu, adaka na mokakwano. Mojɔ bo bakina babalaka bo Yoane adaka koko mɔ. 8Batongo babalaka bo Elia ahula; na batongo koko babalaka bo okina motɔndɔi oehelehele angɔ a bogwa. 9Elode abala bo, Mbi natɛndɔ Yoane molo; ngando ko jikaka mbi a mojɔ momoto omina,—iyo ndani? Oko boa adaka na posa bo amonɛe.
Yesu Ayakeja Bato Koto Jitano
10Yana ahula babwɛnji, batɔndɔ Yesu ngando jima bo kɔ. Iyo ababea bo bakɛe na nde a esika ebowi a dɔngɔ dingando, kombe Betesaida. 11Bato ko, aka bo mojɔ momina, bamokimana oho. Iyoaba’sɔ bopele, abala na bu a mojɔ moBokumu boNjambe, na aheleja bato baya badaka na bego. 12Abenga busa bodipa, bacingami domi-na-babae badoa, babala na nde bo, Yaneja bato edɛye bo bakɛe a ngando jia jibati na su, na a ngando jibato bagbie, a mojɔ mobohwɛ, na a boduka leka loboyaka; mojɔ bo esika ye edi so edi oko ngasa. 13Iyo abala na bu bo, Bapani leka Ioboyaka no bɛnɛ. Ibo basɔmbeja bo, Iso bodi oko na milɛmbɛ mitano pɛ, na swi babae,—bomiti kɛ a bosomba mia a mojɔ mobato ba basusu. 14Mojɔ bo bato badaka koto jitano na dea. Yesu abala na bacingami bande bo, Dejani bato nase mongbanga-mongbanga, bato domi-itano domi-itano. 15Ibo bakɔ boa, na badeja bato basusu nase. 16Yesu atomba milɛmbɛ mitano na swi babae; akahoa miso diko, ajongoa milɛmbɛ na swi, amibuka, na amipa ai bacingami bo bamikabe na bato. 17Ibo bayaka kanga basusu, ligola mɛnɛ. Bandoa koko bikenge bia bidika, sanga domi-na-jibae botɔ.
Mojimo moPɛtɛlo
18Yana adaka Yesu a bonga yo buki, bacingami badaka na nde hulelu. Iyo abahɔjɔ bo, Bato babalaka bo mbi nadi nda? 19Bamo-sɔmbeja bo, Yoane Mobatisi; bakina batongo ko babalaka bo odi Elia, na bakina batongo koko babalaka bo okina motɔndɔi oehelehele ahuli. 20Ahahɔjɔ koko ho, Ino bɛnɛ ko obalakani bo mbi nadi nda? Pɛtɛlo amosɔmbeja bo, Masiya oNjambe. 21Iyo ko abaleha na bopipo, na abalemba bo batatɔndɔ nongo moto mojɔ momina. 22Abala bo, Mwana ’Moto adi bodingoa bou mɛnɛ. Basuku, na basuku banganga, na basɔni, badi bomodumba na bâmowa, na ângɔ koko a busa bomasato.
Mojɔ Mobosusa Yesu
23Abala na bu basusu bo, Isa okina moto apalaka bosusa mbi, yɛ apete salona yo mɛnɛ, atombe mole-mobokea monde tu busa bo asuse mbi. 24Mojɔ bo, moto na moto yona opalaka bobanea mohelo monde, âmonameja oko bonameja. Moto ko yona onamejaka mohelo monde a mojɔ mombi, âmoheleja. 25Mojɔ bo, moto akakonja ngondo esusu mɛnɛ, na akanameja mohelo monde, isa akasabungeja, adi bobɔngɔ na ye? 26Isa moto a’kaka sɔni a mojɔ mombi na bibaeli bimbi, Mwana ’Moto âmokea sɔni yana âdoa yo a ekumu ende na ekumu eSango na babwɛnji basɛnɔke. 27Mbi natɔndɔkɔ no na soti bo bakina badi ya mema baya bata’nɛ bogwa oko banɛkini Bokumu boNjambe.
Yesu Akindoa Elimo Etongo
28Bikenge bimina bisia, na yana anɔ masu bomwambe, Yesu abea Pɛtɛlo na Yoane na Yakobo, na akɛ na bu a mono a mojɔ mobo’nga. 29Yana angaka yo, boso bonde bokindoa elimo etongo; bisenja binde bipua bopɛɛ mɛnɛ, na bidaka na bolailai. 30Bato bami babae, oko Mose na Elia, badoa bundumo na basola na nde. 31Ibo bamana a eyembi eekumu, na babala a mojɔ mobogwa bonde bokɛkɛ yo agwɛ a Yelusalema. 32Pɛtɛlo ko na bacingami batongo baya badaka na nde, bangbɔngɔkɔ na hiɔ; endele ko, badika misu. Oko boa banɛ ekumu ende, na bami babae baya badaka na nde. 33Yana abɔtɔnɔkɔ bato bamina na Yesu, Pɛtɛlo abala na nde bo, Moswa’su, modi mojɔ mopele bo so bodae ya. Kina bopike maako masato, dikina a mojɔ mowɛ, ditongo a mojɔ moMose, na ditongo koko a mojɔ moElia,—cina bo aijeba mojɔ mobobala. 34Abalaka yo boa, eyembi etita na ebahua. Ibo badaka na bɔ yana akwea bo a eyembi. 35Na kɔpi emana a eyembi bo, Iyo adi Mwana’mbi. Mbi namobɔ; mohokeani. 36Yana abalaka kɔpi emina, Yesu adika yo buki pɛ. Bacingami babomba mojɔ momina. Baitɔndɔ nongo moto a masu mamina mojɔ monɛ bo.
Yesu Aheleja Mwana-Momi
37Batita a mono yana ahoa busa, na bato banɛnɛ badoa a bosongana na nde. 38Okina momi adaka a tei eemumu ebato, na yo abekoa bo, Mokoja, mbi nangɔɔnɔkɔ wɛ bo onje mwana’mbi momi; mwana’mbi omɔci oko yo. 39Mokina mwembo momopeaka, na agamaka bokpa. Mwembo momodumbaka gbu, na mapuli mamanaka a monɔkɔ monde; monaka na nde na bopipo mɛnɛ, na mokamana ai yo momokinaka na pola jinɛnɛ. 40Nangɔɔnɔki bacingami bawɛ bo bamejae mwembo, bo ko pɛ bohɔnɔ. 41Yesu asɔmbeja bo, Elulu epɛndɔ na libwano! enina ôda mbi na nu? nâhɔnɔ mijɔ minu ekoka o bo? Doa na mwana ’wɛ jɔno. 42Yana adoaka yo, mwembo mobe momodumba na momolulumeja. Yesu ko alemoa na mwembo mobe, aheleja mwa’momi na amosɔmbeja ai sangwa’nde. 43Bato basusu bakamoa a mojɔ mongulu enɛnɛ eNjambe.
Mojɔ Mobogwa na Bongɔ boYesu a Bogwa
Adaka bo basusu na bokamoa a mojɔ mongando jisusu jikɔkɔ Yesu, yo abala na bacingami bande bo, 44Hokeani bopele bikenge bimina, mojɔ bo Mwana ’Moto adi bokabama a mɔmɔ mabato. 45Bacingami ko baicingea ekenge emina; cina emina ebombama ai ’bo, bo batacingea; na baimohɔjɔ cina emina a mojɔ mobɔ.
46Bacingami babanga bobomana kitɛ a mojɔ momoto yona odaka na bosuku a tei ebu. 47Yana anɛ Yesu cina emojɔ mobomaka na bu kitɛ a milema mibu, atomba mwana mokɛkɛlɛkɛ, amodeja a dɔngɔ dinde, 48na abala na bu bo, Yona osɔkɔ mwana yoyo mokɛkɛlɛkɛ a kombe embi, asɔkɔ mbi mɛnɛ; na yona osɔkɔ mbi asɔkɔ yona olomani. Mojɔ bo yona odi ngɔngɔ jinu basusu, odi ng bosuku oko yo.
49Yoane amosɔmbeja bo, Moswa ’su, iso boni okina moto akadumbe miembo mibe a kombe ewɛ, na bomolembi, mojɔ bo atacingamaka na su. 50Yesu abala na nde bo, T’omolembeni oko; mojɔ bo isa moto aditi na su soki adi a dɔngɔ disu.
Njea eYelusalema
51Yana abatama ehole ende ebodonga a ngondo, Yesu anda ngapa bo akɛe a Yelusalema, na asueja bato boso na bwɛnji. 52Ibo bakɛ, na bamea a ekina ngando eBaSamalia bo basɛlingoe esika a mojɔ monde. 53Bato ko baipala bo bamo’sɛ, mojɔ bo boso bonde bonjaka oko njea eYelusalema. 54Yana anɛ bacingami bande Yakobo na Yoane mojɔ momina, babala bo, Kumu, opalaka bo bobee mosa mohule Diko a botumba bato bamina? 55Iyo ko ahekoa na alemoa na bu. 56Oko boa bakɛ a ekina ngando etongo.
57Amaka bo dala a njea, okina momi ami bala oko na nde bo, Mbi nadi bosusa wɛ a bisika bisusu hikɛkɛ wɛ. 58Yesu amosɔmbeja bo, Kpia badi na mikpo; mbulu badiko badi na mobo; Mwana ’Moto ko apeliti esika a bosuka molo monde. 59Abala na moto otongo bo, Gingama na mbi. Iyo ko asɔmbeja bo, Kumu, kinani napete kɛ a bopusea sangwa’mbi. 60Yesu abala na nde bo, Kina bagwake bapusee bagwake babu bɛnɛ. Wɛ ko, kɛ ananganejae mwako moBokumu boNjambe. 61Okina otongo koko abala na Yesu bo, Kumu, mbi nadi bosusa wɛ; kinani ko napete kɛ a ndako embi bo naseane na bato bambi. 62Yesu abala na nde bo, Moto yona obanga bolia gbie akangwa, atabɔngɔ na Bokumu boNjambe.
اکنون انتخاب شده:
Luka 9: NTNG61
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Alliance Biblique de la R. D. Congo