LUK 17
17
Sumsokni kók
(Mat 18.6-7; Mar 9.42)
1Jisu bini sagrirokno hai hwnwi sa kha, “Bororok sumsogo khiklaijakna bagwi be se belokjaknai; tamo khe a beloknai borok bo bwswk se hamya sitrano! 2A borok o chwrai basrarokni bisingo khoroksa swkno sumsogo khiklai khe bono totra-o holongdap kotorma khaui twijlango khiklai rwma se ham kugo. 3Hus khe tong di!”
Sumsok nakarmani kók
(Mat 18.21-22)
“Nini takhuk sumsok khlai khe bono khorai di, phiya bo sumsok yakar khe bono nakar di.#Mat 18.15. 4Nini thani bo salo uáisni sumsok khlai khe, phiya sumsok khlai brúm brúm’-no ‘Ang sumsok yakar kha,’ hwnwi sa phai khe nwng bono ma nakar thai klai-o.”
Poitoni kók
5Chonghorrok Subraino hai hwnwi sa kha, “Chini poitono rak rw di.”
6Subrai hai hwnwi sa kha, “Horua bwchlwi swk phano norokni poito tong khe o letok buphangno ‘Phuichajagwi twijlango káijagwi di!’ hwn khe bo norokni kók ma khnanai.”
Selengni samung
7“Rom di, norokni khoroksani seleng khoroksa tongo. Bo al chuai baiwi eba musuk mwrwk baiwi nogo hap phai kheno a nokphang ‘Hi’n, phai di, mai chá phai gra di,’ hwnwi bono sa da sano? 8I’nhi, sanai kha dla! Bo hai hwnwi se sa anw, ‘Ang chánani se sóng gra di; ang chá bai ya sak chango rítuku khaui mai-mui bok di. Aboni ulo nwng chá di.’ 9A seleng kók khnamasing bai nokphang bono hambai da rw no? 10Norokni bagwibo abo tẃi’-no, norokno khlai di hwnmani abo khlai baiwi’-bo norok hai hwnwi sa di, ‘Chwng seleng ja se, chini khlaithai simi chwng khlai kha.’ ”
Jisu biyadi chájak khorokchino ham rwmani
11Jerusalemo tháng phuru Jisu Samaria bai Galili amchoini kwchar tẃi tháng kha. 12Kami khungsa-o sók phai phuru biyadi chájak khorokchi bini phaising phai kha. Bórok hakchalo bachaui 13hai hwnwi chirikhók kha, “Hodasa Jisu, chwngno khairok jaba di!”
14Jisu bórokno nugwi hai hwnwi sa kha, “Tháng di, ochairokno thángwi phunugui di.”
Hakhe tháng twtwi bórok ham kha.#Leb 14.1-32. 15Bórokni bisingo khoroksa sakno hamma nuk kheno Kaitorno sotonwi lob twtwi kiphilwi phai kha. 16Bo Jisuni yakung yaphango pwtapsa klaiwi bono hambai rw phai kha. Bo Samariani borok. 17Jisu hai hwnwi sacha kha. “Khorokchino ham rw kha bla tei khorokchuku biyang? 18O phatarsa simi se Kaitorno lob phai si-o, tei kwrwi kha da?” 19Hakhe Jisu bono hai hwnwi sa kha, “Bacha di, tháng si di; nini poito nono ham rw kha.”
Kaitorni ha phaina hwnmani
(Mat 24.23-28,37-41)
20“Kaitorni ha bu phuru phainai?” hwnwi khoroknwi khoroktham Pharisairok Jisuno sẃng khe bo hai hwnwi sa kha, “Kaitorni ha pháng-pháng nukjagwi phainai ya. 21Aboni bagwino khoroksa phano hai hwnwi sa glak, ‘Iko, nahar di, Kaitorni ha oro se!’ eba khe ‘Uro se!’ Tamni hwn khe Kaitorni ha norokni bisingo se.”
22Aphuru Jisu bini sagrirokno hai hwnwi sa kha, “Omo tẃi sal phai anw norok Borokni Sajlani mol naina muchungwibo salsa phano nuk glak. 23Aphuru ‘Uko uro se!’ eba khe ‘Iko, oro se!’ hwnwi bororok norokno sa anw. Hai phano naina hwnwi ta tháng di. 24Nokha philik phuru yaphang buchuk jiliksama hai Borokni Sajlabo bini salo abo hai’-no jiliksanai. 25Tamo khe bo aboni swkang panjalwi’-no sátokjakna nangnai, tabukni bororok bai norjakna nangnai. 26Noani phuru wngma hai’-no Borokni Sajlani phurubo wngnai.#Yap 6.5-8. 27Noa rungtoro kasa ya sini, phiya twi torwi bebak’-no sokomor ya sini bororok chá lai-o nung lai-o, káijak lai-o kái lai-o.#Yap 7.6-24. 28Lotni phuru hai’-no aphurubo wngnai. Jotono chá lai-o nung lai-o, pai lai-o phal lai-o, mai-khul sar lai-o, nok huk tang lai-o. 29Lot Sodomni ongkhorwi phaima salo nokhani hór bai gwndwkni uatwi uaui bebak’-no sokomor bai kha.#Yap 18.20—19.25. 30Borokni Sajla nukjak phai phurubo abo hai’-no wngnai.
31“A salo nuka-o#17.31. nuka-o: Kók yaphango ‘núkhúng’. tongnai borok bo noksingo bini manwirok nauina hwnwi ta hap si thung; abo hai’-no kheto-o tongnai borok bo nogo kiphilwi ta phai si thung.#Mat 24.17-18; Mar 13.15-16. 32Lotni bihikni kókno muitu khe nai di.#Yap 19.26. 33Kwthang tongna muchungnai borok bo thwinai; phiya thwinai borok bo thangnai.#Mat 10.39; 16.25; Mar 8.35; Luk 9.24; Joh 12.25. 34Ang norokno o kók sa-o, a horo borok khoroknwi chuki khungsa-o thu-ui tong khe khoroksa tlangjak anw, tei khoroksa klangjak anw. 35Bwrwi khoroknwi mai súk lai tong khe khoroksa tlangjak anw, tei khoroksa klangjak anw. 36[Kheto borok khoroknwi tong khe khoroksa tlangjak anw, tei khoroksa klangjak anw.”]
37“Omorok buro wngnai, Subrai?” hwnwi sagrirok bono sẃng khe bo hai hwnwi sa kha, “Kwthwi tong thani’-no sikruk kuthum anw.”
اکنون انتخاب شده:
LUK 17: KOKBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.