SAN MATEO 9
9
An Jesús k'uch'ulh pumatam yu ixlakalhtukulunta lapanak
(Mr. 2:1-12; Lc. 5:17-26)
1Wa chuncha tajulhcha laka barco an Jesús, tapiktutamcha alh, la ixla'acha'ancha cha'alh. 2Ancha tach'ixlicha'anilh la ixputamat pumatam yu ixlakalhtukulunta. Chi jala'ts'incha li tajakiklaka'inin, pus juniy an yu lakalhtukulunta:
―Oximaj'ayi k'a'unt'i, kints'alh, amintala'alhin ikmala'mixini'oyan.
3Wa chuncha ali'in xamaestrojnin lhamap'a'sin yu ancha ixtayanalh ixjapula'chiwinkancha, ixtanajun: “Ani wa aya juniya Dios.” 4Walh an Jesús yucha ixjak'atsaaniycha tanischa ixtapast'ak'a, pus jajuniy:
―¿Tasu li wa aya jat'ap'ast'aknanatcha? 5¿Tampiyuchacha yu palay wa las aknawlh: “Ikmala'mixini'ojoncha mintala'alhin”, u aknawlh: “Kat'aycha, k'ap'inchicha”? 6Para li k'ak'ats'at'iti li an isTs'alh Lapanak layi kamala'mixiya tala'alhin ani lakaat'un (junilhcha an yu ixlakalhtukulunta): K'a'ost'aycha, k'asakt'icha amimputamat, k'ap'inch'o'ochicha mincha'a'.
7Wa chuncha ostayalhcha an yu ixlakalhtukulunta, alhcha la ixcha'a'. 8Pus an lapanakni sawalhcha ixtalaktalhanajlhi'a'niy, ixtalaknajuncha li an Dios ay sawalh, chi li yucha jaxta'niya an lapanakni ix'alhp'asninti para li lay kata'ilhtulh tu'u'.
Akxni t'asanikalh an Mateo
(Mr. 2:13-17; Lc. 5:27-32)
9Tan ixla'pust'ajun an Jesús la'ts'ilh pumatam lapanak ixjunkan Mateo, sa' ixwilh tan ixjach'inin ixlakata yu lakmapalhlhi'ankan tanlhun, juniy:
―Ak'int'ap'it'icha.
Pus yucha tayalh, t'a'alhcha.
10An Jesús ali an ixt'alhtanan jat'alakwaylhi la ixcha'a an Mateo, chi ixluwk'an an yu wachu ixtalaklhach'inin tanlhun wachu ani ixtama'wilanalh, chi ali'incha ma'lhta'alhinin. 11Walh an lapanakni yu ixjajunkan fariseojnin akxni tala'ts'ilhi an Jesús, tat'alajuniy an ixt'alhtanan:
―¿Tasu li amimaestrojk'an jat'alakwajini an yu tajach'inin chi an la'ma'lhta'alhinini?
12An Jesús asmatlhi, pus jajuniy:
―Yu oxi tat'ajun jantu tama'lhtask'iniya jak'uch'unu', pero an yu tata'an'ay, chun. 13K'ap'inchi'it laninini tuchini nawputuncha an tan najunta: “Lamapayniti iklakask'in, jantu ixma'nika jatapakxat.” Mu k'it'in jantu ikminta jat'asanini an yu oxi tat'ajun. K'it'in ikminta jat'asanini an yu ta'ilhtuy ixtala'alhink'an, para li jantucha ali kata'ilhtulh.
¿Tasu li a'tamin kalhitask'ajakalh wayti?
(Mr. 2:18-22; Lc. 5:33-39)
14An ixt'alhtanan an Juan tala'cha'alh an Jesús, tajuniy:
―¿Tasu li kitnan chi an fariseojnin a'lhuwi iklhitask'ajayaw kiwaytk'an chi amint'alhtanan jantu chuni ta'ilhtuyi?
15Yucha jajuniy:
―Jantu layi katitala'ta'oxila'alhilhcha li yu tat'ajun tan tama'xto'kan chi li ancha jat'a'aklat'ajun an yu tama'xt'o'a. Pero kamina wilhchan kajama'osunikana an yu tama'xto'lhi, pus akxni chun wachucha katalhitask'ajaya ixwaytk'an an yu jat'awaykan chaway.
16’Jantu xamati lhila'ts'ap'an sast'i la'ch'it yu at'ilhcha la'ch'it, mu an yu sast'ika la'ch'it tala'atumiy, pus palay ta'exa an yu at'ilhcha. 17Chi wachu jantu pumukani yu laj'at'ilhcha jaxt'a'an yu sast'ika xaxkan uva, mu an jaxt'a'an tatan'exa chi pu'an'ojoy. Chi an jaxt'a'an ts'an'aycha. Yu sast'ika xaxkan uva laka sast'i jaxt'a'ani mujukan, chuncha wa tamcha talhitayaniy.
T'aku yu ch'apanichalh ixla'ch'it an Jesús, chi istsi tichiyucha lapanak yu ixjunkan Jairo
(Mr. 5:21-43; Lc. 8:40-56)
18Chunchaka ixjajunt'ajun an Jesús, la'cha'alh pumatam xa'ay lapanak chi tatso'ottanilhcha, juniy:
―An kintsi wa nilhka', ak'int'ap'it'i la'ts'ini', k'alakp'ach'ap'aya'a, walh kala'awcho'oya'.
19Pus talaktayalhi an Jesús ali an ixt'alhtanan chi tat'a'alhcha an lapanak. 20Walh pumatam t'aku yu la'akawt'uycha k'ata ixta'an'ay, wa ixmaj'an ixjak'alhni, ch'a'o'ayawlh, la ix'a'lhch'a pupiktuch'apanichalh an ixla'ch'it. 21Mu an t'aku ixpast'ak'a, ixnajun: “Masi wa yucha an ixla'ch'it akch'apanichalh aktak'uch'uya'.”
22Pus an Jesús, tala'asp'itlhi sa'cha la'ts'in, juniy:
―Jant'u k'at'a'oxila'alhit'i, kintsi', amijakiklaka'inti p'ut'ak'uch'ut'icha.
Wa akxni ta'oxilhcha an t'aku'.
23Chi akxni tanuchalhcha an Jesús la ixcha'a an xa'ay lapanak, jala'ts'incha an yu ixtala's'oliy laka s'olh chi an ali'in wa t'ililicha ixtalhilaj'alhuni an jatsi'. 24Pus jajuniy:
―K'ap'inch'o'ochi'itcha, ani jatsi jantu nita, wa lhtatay.
Pero yu'uncha wa ixtalhits'i'in. 25Wa chuncha akxni jatamakxtu'okalhcha an yu ixtatanumanalh pulakni, an Jesús tanulhcha tan ixmalh an jatsi', chi ma'ch'apachalh, ostayalhcha. 26Wanajcha lajk'atsa'okalhi ta ixlijalhi'ay anchunu lakaat'un.
Jak'uch'ukalh ixt'uyunk'an la'la'lhtulu'un lapanakni
27Akxni ixti'ancho'oycha an Jesús, ixt'uyunk'an la'la'lhtulu'un lapanakni tach'a'o'ayawlh, p'ascha tajuniy:
―¡Ists'alh David, lamapaynin, akilalhi'a'tayjuw!
28Tat'acha'alhi tan ixtawlay laka cha'a an Jesús. Pus jajuniy:
―¿K'iklak'a'iyat'iti li layi aklak'uch'uw?
Yu'uncha tajuniy:
―Chuni, Jamach'alhkat Jesús.
29Wa chuncha yucha jalaklakpuch'apalhcha, chi jajuniy:
―T'ach'a yu jak'iklak'a'ininatcha chunchacha kawalh.
30Wakcha tajalakawanalh. Chi an Jesús jajuniy li jantu k'is xamati katajunilh. 31Pero yu'uncha akxni ta'alhcha, tsukulhcha talaknajuni chux an la'acha'anaxni.
An Jesús k'uch'ulh yu jantu lay ixchiwiniy
32Akxni ta'alhcha an yu jantu lay ixtajalakawanan, talhicha'anipalh pumatami an Jesús yu wa ixla'apaxto'ta makxkay'un, jantucha lay ixchiwiniy.
33Pero akxni tamakxtulhcha an Jesús an makxkay'un la ixlakatunaj an lapanak, tsukulhcha chiwiniy. Pus an yu tala'ts'in ixtalhi'a'niycha, ixtalaknajun:
―¡Jantu a'tam chuncha la'ts'inkanta ani xalakaat'un Israel!
34Walh an lapanakni yu ixjajunkan fariseojnin, tanajun:
―Xliyu lay jalhitamakxtuy, mu yucha an xapay makxkay'uni t'atapatsay.
An tapatsat lhuw
35Ixkilajkila'ojoyi an Jesús an laj'ay la'acha'anaxni chi tan wa lakt'ikt'i, ixjamasuniycha an tan ixtala'ta'ayxt'o'a lapanakni an laj'oxi chiwinti yu ixlich'alhkat Dios, chi ixk'uch'uyi wa tuchicha ta'an'at, chi wa tuchicha ixma'alh'ajnatk'an an lapanakni. 36An Jesús ixjala'ts'incha li jantu xamati ixjalhist'ak'a an lapanakni, pus ixjamapayniycha. Wa tacha wa tilhcha ixta'a'pitsinin borregojnini ixtat'ajun, yu jantu xamati jalhist'ak'a. 37Pus jajuniy an ixt'alhtanan:
―An tapatsat wanaj lhuw, walh an yu tatapatsay jantu ixluwk'an. 38K'at'ap'ayninit'iti an yu jamanawin an tapatsat para li kajamakmilh aliy yu katatapatsalh.
اکنون انتخاب شده:
SAN MATEO 9: tpp
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2015, Wycliffe Bible Translators, Inc. All rights reserved.