Lukas 18
18
Zaaj Lug Pevtxwv Has Txug Tug Pujntsuag Hab Tug Txavtxim
1Tes Yexus txawm has ib zaaj lug pevtxwv ua kev cobqha rua Nwg cov thwjtim noog, kuas puab yuavtsum najnub thov Vaajtswv hab tsi xob qaugzug. 2Yexus has tas, “Nyob huv ib lub nroog, muaj ib tug txavtxim kws yeej tsi paub ntshai Vaajtswv hab tsi fwm leejtwg le. 3Nyob huv lub nroog ntawd muaj ib tug pujntsuag kws najnub tuaj thov tug txavtxim ntawd has tas, ‘Thov koj pub kev ncaajnceeg rua kuv kuas kuv dlim ntawm kuv tug yeebncuab!’ 4Tau ntev loo kws tug txavtxim nuav tsi kaam has le, tabsis thaus kawg nwg kuj xaav tau has tas, ‘Txawm yog kuv yeej tsi ntshai Vaajtswv hab tsi fwm leejtwg le los, 5tug pujntsuag nuav pheej tuaj txob kuv, yogle, kuv yuav tau muab kev ncaajnceeg rua nwg, sub nwg txhajle tsi najnub tuaj txob ua rua kuv ntxhuvsab!’ ”
6Tug Tswv has ntxiv tas, “Mej tub nov tug txavtxim kws sab tsi ncaaj ntawd tej lug lawm. 7Vaajtswv yuav tsi muab kev ncaajnceeg rua Nwg tsaav tuabneeg kws najnub najmo thov Nwg nua lov? Nwg txawm yuav muab ncua ntev hab tsi paab puab le nua lov? 8Kuv qha rua mej has tas, Vaajtswv yeej yuav muab kev ncaajnceeg rua puab sai-sai. Tabsis thaus Tuabneeg Leejtub lug, Nwg puas yuav nrhav tau kev ntseeg nyob rua huv lub nplajteb nuav lawm?”
Zaaj Lug Pevtxwv Has Txug Tug Falixais Hab Tug Sau Se
9Yexus tau has zaaj lug pevtxwv nuav rua ibtxha tuabneeg kws xaav tas puab yog tuabneeg ncaajnceeg hab cale saib tsi taug lwmleej lwmtug. 10“Muaj ob tug txivneej nce moog thov Vaajtswv peg lub Tuamtsev, ib tug yog tug Falixais hab ib tug yog tug sau se. 11Tug Falixais txawm sawvntsug hab thov rua nwg tugkheej has tas, ‘Vaajtswv, kuv ua Koj tsaug kws kuv zoo tsi thooj le lwmleej lwmtug, kuv tsi nyag leejtwg tug, kuv coj ncaaj, kuv tsi ua nkauj ua nraug lossis kuv tsi zoole tug sau se ntawd. 12Ib lub limtam twg kuv ua kevcai yoo mov ob zag, hab taagnrho tej nyaj kws kuv khwv tau lug, kuv muab ib feem kaum rua koj.’
13“Tabsis tug sau se sawv nrug dleb mivntsiv, nwg tub tsi tsaa qhovmuag saib sau ntuj le, tabsis nwg ntaus nwg lub hauvsab hab has tas, ‘Vaajtswv, kuv yog tuabneeg txhum, thov koj taabncuab kuv!’ ” 14Yexus has tas, “Kuv qha rua mej has tas, thaus tug sau se rov moog tsev lawm, nwg yog tug kws Vaajtswv txaussab rua, tsi yog tug Falixais. Ruaqhov txhua tug kws tsaa nwg lub fwjchim, yuav raug muab txu kuas qeg, hab tug kws txu nwg lub fwjchim, yuav raug muab tsaa kuas sab.” #Math 23:12; Lukas 14:11
Yexus Foom Koobmoov Rua Cov Mivnyuas Yau
(Mathais 19:13-15; Malakaus 10:13-16)
15Muaj tuabneeg coj puab tej mivnyuas yau tuaj cuag Yexus hab thov kuas Nwg cev teg plhw cov mivnyuas. Thaus cov thwjtim pum le ntawd, puab txawm tshev cov tuabneeg ntawd. 16Tabsis Yexus hu cov mivnyuas yau lug cuag Nwg hab has tas, “Ca cov mivnyuas yau lug cuag Kuv, tsi xob taav puab, ruaqhov Vaajtswv lub Tebchaws yog cov kws zoole cov mivnyuas yau nuav tug. 17Kuv qha rua mej has tas, yog leejtwg tsi txais yuav Vaajtswv lub Tebchaws zoo ib yaam le cov mivnyuas yau nuav, tes tug ntawd yuav nkaag moog tsi tau rua huv hlo le.”
Tug Txivneej Npluanuj
(Mathais 19:16-30; Malakaus 10:17-31)
18Cov Yudais ib tug thawjcoj nug Yexus has tas, “Xwbfwb tug kws zoo, kuv yuav ua lecaag es kuv txhaj tau txujsa ntev dlhawv moog ibtxhis?”
19Yexus teb nwg has tas, “Vim lecaag koj hu Kuv has tas yog tug kws zoo? Tsi muaj leejtwg zoo, tsuas yog Vaajtswv tuableeg xwb. 20Koj yeej paub tej kevcai kws has tas, ‘Tsi xob dleev luas quaspuj luas quasyawg; tsi xob tua tuabneeg; tsi xob ua tubsaab; tsi xob ua timkhawv cuav, hab yuavtsum fwm koj nam koj txiv.’ ” #Tsiv 20:14; 2Kev 5:18; Tsiv 20:13; 2Kev 5:17; Tsiv 20:15; 2Kev 5:19; Tsiv 20:16; 2Kev 5:20; Tsiv
21Tug txivneej ntawd teb tas, “Txhua nqai ko, kuv tub coj thaus kuv tseem yau lug lawm.”
22Thaus Yexus nov nwg has le ntawd, Yexus has rua nwg tas, “Tshuav ib qho kws koj tseem tuncua. Cale muab txhua yaam kws koj muaj muag huv tuabsi, hab muab cov nyaj ntawd moog pub rua cov tuabneeg pluag, koj txhaj yuav npluanuj nyob sau ntuj ceebtsheej; tomqaab ntawd koj cale lug nrug Kuv moog.” 23Thaus tug txivneej nov le ntawd, nwg nyuajsab kawg le vim nwg npluanuj heev.
24Thaus Yexus pum nwg nyuajsab heev, Yexus txhaj has tas, “Qhov kws cov tuabneeg npluanuj yuav nkaag tau moog rua Vaajtswv lub Tebchaws mas nyuaj kawg le! 25Ib tug ntxhuav nkaag lub qhov koob tseem yoojyim dlua le ib tug tuabneeg npluanuj nkaag moog rua huv Vaajtswv lub Tebchaws.”
26Cov tuabneeg kws nov Yexus has le ntawd, puab nug has tas, “Yogle ntawd, leejtwg txhaj yuav dlim tau?”
27Yexus teb tas, “Yaam kws tuabneeg ua tsi tau, Vaajtswv ua tau.”
28Tes Petus txawm has rua Yexus tas, “Saib maj, peb tub tso peb tej vaajtse tseg hab nrug Koj moog lawm.”
29Yexus has rua puab tas, “Kuv qha tseeb rua mej has tas, tug kws tso vaaj tso tsev, tso quaspuj, tso kwv tso tij, tso nam tso txiv, hab tso tej mivnyuas tseg, vim Vaajtswv lub Tebchaws, 30tam nuav nwg yuav tau txais ntau npaug, hab lwm tam nwg yuav tau txujsa ntev dlhawv moog ibtxhis.”
Zag Thib Peb Kws Yexus Has Txug Nwg Kev Tuag
(Mathais 20:17-19; Malakaus 10:32-34)
31Yexus coj kaum-ob tug thwjtim moog rua ib qho hab Nwg has rua puab tas, “Ua tuabzoo noog nawb! Peb yuav moog rua sau lub nroog Yeluxalees, mas txhua yaam yuav tav lawvle tej kws cov xwbfwb cev Vaajtswv lug tau sau tseg has txug Tuabneeg Leejtub. 32Yuav muaj tuabneeg nteg Nwg coj moog rua Lwmtsaav Tuabneeg. Puab yuav ua saib tsi taug Nwg, txobthuam Nwg hab ntu quavncaug rua Nwg. 33Puab yuav muab Nwg nplawm hab muab Nwg tua, tabsis nub thib peb Nwg yuav cajsa sawv rov lug.”
34Cov thwjtim tsi totaub txug tej nuav hlo le; lub ntsablug nuav tau muab npug ca tsi pub rua puab paub, puab txhaj tsi paub sov Yexus has txug dlaabtsi.
Yexus Khu Tug Dligmuag Kws Thovkhawv
(Mathais 20:29-34; Malakaus 10:46-52)
35Thaus Yexus moog yuav txug lub nroog Yelikaus, muaj ib tug txivneej dligmuag nyob quastsawg ntawm ntug kev thovkhawv. 36Thaus tug dligmuag nov tuabneeg coob-coob thaam zumzawg taug kev tuaj, nwg nug has tas, “Mej ua dlaabtsi?”
37Puab qha rua nwg has tas, “Yexus kws yog tuabneeg Naxalev taabtom taug kev tuaj.”
38Tug dligmuag ntawd txawm hu nrov-nrov has tas, “Yexus, Daviv tug Tub, thov Koj taabncuab kuv lau!”
39Cov tuabneeg kws nyob tom hauvntej tshev hab has kuas nwg nyob tuabywv. Tabsis nwg yimfuab qw nrov has tas, “Daviv tug Tub, thov Koj taabncuab kuv hab lau!”
40Yexus txawm nreg hab kuas puab coj tug dligmuag lug cuag Nwg. Thaus tug dligmuag lug ze lawm, Yexus nug nwg has tas, 41“Koj xaav kuas Kuv ua dlaabtsi rua koj?”
Tug dligmuag teb tas, “Tug Tswv, kuv xaav rov pumkev.”
42Yexus has rua nwg tas, “Koj cale pumkev! Koj txuj kev ntseeg tub khu koj zoo lawm.”
43Taamsim ntawd nwg txawm pumkev, nwg cale nrug Yexus moog hab ua Vaajtswv tsaug. Thaus cov tuabneeg coob-coob pum le ntawd, puab suavdlawg nyag taug nyag qhuas Vaajtswv.
اکنون انتخاب شده:
Lukas 18: HNJ2022
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2022 United Bible Societies. All rights reserved.