ປະຖົມມະການ 13
13
ອັບຣາມແຍກທາງກັບໂລດ
1ອັບຣາມພາເມຍຂອງຕົນພ້ອມກັບສິ່ງຂອງທີ່ຕົນມີຢູ່ ອອກຈາກພາກເໜືອຂອງປະເທດເອຢິບມຸ່ງໜ້າໄປສູ່ເຂດໃຕ້ຂອງການາອານ. ໂລດກໍຕິດຕາມເພິ່ນໄປດ້ວຍ. 2ອັບຣາມເປັນຄົນຮັ່ງມີ; ເພິ່ນມີຝູງແກະ, ຝູງແບ້ ແລະຝູງງົວ ພ້ອມທັງເງິນຄຳຢ່າງຫລວງຫລາຍ. 3ແລ້ວເພິ່ນກໍຍົກຍ້າຍຈາກທີ່ນັ້ນ ເດີນທາງຕໍ່ໄປເລື້ອຍໆສູ່ເມືອງເບັດເອນ ແລະເພິ່ນກໍໄປເຖິງບ່ອນທີ່ຕົນເຄີຍຕັ້ງຄ້າຍພັກພາອາໄສມາກ່ອນ ຢູ່ລະຫວ່າງເມືອງເບັດເອນກັບເມືອງອາອີ 4ບ່ອນທີ່ເພິ່ນເຄີຍໄດ້ສ້າງແທ່ນບູຊາໄວ້ແຕ່ກ່ອນນັ້ນ. ແລ້ວຢູ່ທີ່ນີ້ ເພິ່ນກໍໄດ້ຮ້ອງທູນອອກນາມຊື່ພຣະເຈົ້າຢາເວ.
5ໂລດຜູ້ທີ່ຮ່ວມເດີນທາງໄປກັບອັບຣາມນັ້ນ ກໍມີຝູງແກະ, ຝູງແບ້, ຝູງງົວ ຕະຫລອດທັງຄົນໃນຄອບຄົວ ແລະຄົນຮັບໃຊ້ຈຳນວນຫລວງຫລາຍຄືກັນ. 6ສະນັ້ນ ຈຶ່ງບໍ່ມີທົ່ງຫຍ້າພຽງພໍສຳລັບລ້ຽງສັດ ເພື່ອໃຫ້ພວກເຂົາຢູ່ຮ່ວມກັນໄດ້ ເພາະຕ່າງຝ່າຍຕ່າງກໍມີສັດຫລາຍ. 7ເມື່ອເປັນເຊັ່ນນັ້ນ ຄົນລ້ຽງສັດຂອງອັບຣາມ ແລະໂລດຈຶ່ງຜິດຖຽງກັນ. (ຊາວການາອານ ແລະຊາວເປຣີຊີກໍຍັງຢູ່ໃນດິນແດນນັ້ນ.)
8ແລ້ວອັບຣາມກໍເວົ້າກັບໂລດວ່າ, “ເຮົາທັງສອງເປັນພີ່ນ້ອງກັນ ຂໍຢ່າໃຫ້ຄົນຂອງເຈົ້າ ແລະຄົນຂອງຂ້ອຍຕ້ອງຜິດຖຽງກັນເລີຍ. 9ສະນັ້ນ ໃຫ້ພວກເຮົາແຍກທາງກັນເສຍ. ຈົ່ງເລືອກເອົາທີ່ດິນທີ່ເຈົ້າຕ້ອງການ. ຖ້າເຈົ້າໄປທາງຊ້າຍ ຂ້ອຍກໍຈະໄປທາງຂວາ ຖ້າເຈົ້າໄປທາງຂວາ ຂ້ອຍກໍຈະໄປທາງຊ້າຍ.”
10ໂລດຫລຽວໄປຮອບໆຈຶ່ງເຫັນວ່າ ທົ່ງຮາບພຽງຂອງແມ່ນໍ້າຈໍແດນທັງໝົດ ຈົນເຖິງເມືອງໂຊອາ ມີນໍ້າຫລາຍເໝືອນດັ່ງສວນຂອງພຣະເຈົ້າຢາເວ ຫລືດິນແດນຂອງປະເທດເອຢິບ. (ກ່ອນທີ່ພຣະເຈົ້າຢາເວໄດ້ທຳລາຍເມືອງໂຊໂດມກັບເມືອງໂກໂມຣາ ທົ່ງຮາບພຽງນີ້ອຸດົມສົມບູນຫລາຍ.) 11ດັ່ງນັ້ນ ໂລດຈຶ່ງໄດ້ຕັດສິນໃຈເລືອກເອົາທົ່ງຮາບພຽງຂອງແມ່ນໍ້າຈໍແດນທັງໝົດ ເປັນບ່ອນຢູ່ອາໄສຂອງຕົນ ແລະເພິ່ນໄດ້ເຄື່ອນຂະບວນມຸ່ງໜ້າໄປທາງທິດຕາເວັນອອກ. ໂລດແລະອັບຣາມກໍໄດ້ແຍກທາງກັນໄປ. 12ອັບຣາມອາໄສຢູ່ໃນດິນແດນການາອານ ສ່ວນໂລດນັ້ນຕັ້ງຖິ່ນຖານຢູ່ທ່າມກາງເມືອງຕ່າງໆ ໃນທົ່ງຮາບພຽງໃກ້ກັບເມືອງໂຊໂດມ 13ຊຶ່ງປະຊາຊົນໃນເມືອງນີ້ຊົ່ວຊ້າ ແລະເຮັດຜິດບາບຕໍ່ສູ້ພຣະເຈົ້າຢາເວ.
ອັບຣາມຍ້າຍໄປເຮັບໂຣນ
14ຫລັງຈາກໂລດໄດ້ໜີໄປແລ້ວ ພຣະເຈົ້າຢາເວກໍບອກອັບຣາມວ່າ, “ຕັ້ງແຕ່ບ່ອນທີ່ເຈົ້າຢືນຢູ່ນີ້ ຈົ່ງແນມໄປທົ່ວທຸກທິດໃຫ້ດີ. 15ດິນທຸກບ່ອນທີ່ເຈົ້າແນມເຫັນ ເຮົາຈະໃຫ້ເຈົ້າ ແລະເຊື້ອສາຍຂອງເຈົ້າ ແລະມັນຈະເປັນຂອງພວກເຈົ້າຕະຫລອດໄປເປັນນິດ. 16ເຮົາຈະໃຫ້ເຈົ້າມີເຊື້ອສາຍຫລວງຫລາຍ ເໝືອນດັ່ງຂີ້ຝຸ່ນດິນຈົນນັບບໍ່ຖ້ວນ 17ບັດນີ້ ຈົ່ງອອກເດີນທາງໄປທົ່ວດິນແດນນັ້ນ ເພາະເຮົາຈະມອບດິນທັງໝົດໃຫ້ເຈົ້າ.” 18ດັ່ງນັ້ນ ອັບຣາມຈຶ່ງຍົກຍ້າຍຂະບວນທີ່ພັກໄປຕັ້ງຢູ່ໃກ້ຕົ້ນໄມ້ສັກສິດຂອງມຳເຣທີ່ເຮັບໂຣນ ແລະໃນທີ່ນັ້ນ ເພິ່ນໄດ້ສ້າງແທ່ນບູຊາຖວາຍແກ່ພຣະເຈົ້າຢາເວ.
اکنون انتخاب شده:
ປະຖົມມະການ 13: ພຄພ
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
@ 2012 United Bible Societies. All Rights Reserved.