創世記 24
24
以撒討𡜵娘麗百加
1 亞伯拉罕老了，年紀也大了。佢一生人所做个事全部得到上主賜福。 2佢對管理佢个家產、年紀最大个僕人講：「將你个手放在𠊎兩支大腳髀中間來發誓。 3𠊎愛你對上主 — 天地个上帝向𠊎發誓，你毋好在迦南這地方个細妹仔當中為𠊎尋心舅。 4你一定愛轉去𠊎个故鄉，在𠊎个親族當中為𠊎个孻仔以撒討一個𡜵娘。」
5僕人對佢講：「若係細妹仔毋肯離開故鄉跈𠊎到這地方來，樣般好呢？𠊎敢應該帶你个孻仔轉你个故鄉？」
6 亞伯拉罕應佢講：「你絕對毋好將𠊎个孻仔帶轉該地方！ 7上主 — 天頂个上帝帶𠊎離開故鄉㧯𠊎親族个地方，佢對𠊎宣佈向𠊎發誓講：『𠊎愛將這垤土地賜給你个後代。』佢一定會差派佢个使者先去預備，俾你能在該位為𠊎个孻仔討一個𡜵娘。 8若係該細妹仔毋肯跈你來，你對𠊎个發誓就㧯你無關係；總係你絕對做毋得將𠊎个孻仔帶轉該地方去。」 9該僕人就將手放在主人个兩支大腳髀中間，發誓愛照亞伯拉罕所交帶个去做。
10該僕人又對主人个駱駝中選十隻，帶等厥主人个各種財寶，出發向美索不達米亞北部、拿鶴住个城去。 11佢到該地方，就喊駱駝跪在城外个井堘。該時係臨暗仔，就係婦女出來打水个時節。 12佢祈禱講：「上主 — 吾主人亞伯拉罕个上帝啊！求你今晡日俾𠊎當好運；求你成就你對吾主人亞伯拉罕所答應个。 13𠊎這下企在井堘，城肚个細妹仔攏總會出來這位打水。 14𠊎愛㧯姖等當中个一儕講：『拜託你將水罐仔放下來，給兜水𠊎啉。』若係姖講：『請啉！𠊎也打水給你个駱駝啉。』𠊎希望這細妹仔就係你為你个僕人以撒所選个𡜵娘。恁樣，𠊎就會知你施恩給𠊎个主人。」
15佢祈禱還吂煞，麗百加已經到井堘，肩頭擎等水罐仔。姖係彼土利个妹仔；彼土利係亞伯拉罕个老弟拿鶴㧯厥𡜵娘密迦个孻仔。 16麗百加係一個盡靚个細妹仔，係無人親近過个人家女。姖下到井堘，將水罐仔裝滿水就上來。 17該僕人走到姖个面前，對姖講：「拜託你給兜水𠊎啉。」
18姖講：「先生，請啉！」姖趕緊放下肩頭頂个水罐仔，用手托等俾該僕人啉。 19該僕人啉罅了，麗百加就講：「𠊎也打水給你个駱駝啉到罅。」 20姖遽遽將罐肚个水倒到水槽，再走到井堘打水，給所有个駱駝啉。 21該人愛知上主係毋係俾佢完成任務，就恬恬緊看麗百加。
22等到駱駝啉罅擺，該人就拿出一隻半兩重个金鼻環，㧯一對十兩重个金手鈪，給麗百加戴。 23該人問：「請㧯𠊎講，若爸係麼人？若爸个屋下有地方好借歇麼？」
24 麗百加講：「吾爸係拿鶴㧯密迦个孻仔彼土利。 25吾屋下有當多草料，也有俾你等歇个地方。」
26該人就跪下來敬拜上主。 27佢講：「讚美上主 — 𠊎主人亞伯拉罕个上帝！佢一直用慈愛㧯誠實對待𠊎个主人；佢將𠊎直接帶到吾主人親族个屋下來。」
28該細妹仔走轉屋下去，將所發生个事㧯厥姆並屋下人講。 29麗百加有一個阿哥喊做拉班，佢走出去，到井堘亞伯拉罕个僕人該位。 30佢看到老妹戴等金鼻環㧯金手鈪，也聽到老妹所講該人㧯姖講个話。該時亞伯拉罕个僕人在井堘，企在駱駝旁邊。拉班行前去， 31對該人講：「請跈𠊎到屋肚來坐。你係上主賜福个人，做麼介企在外背？𠊎已經為你等準備好間房，也為駱駝準備好地方。」
32該人就入去屋肚。拉班放下駱駝背頂个東西，給它兜草料食。接等，佢㨮水給亞伯拉罕个僕人㧯共下來个人洗腳。 33飯菜擺好个時，該人講：「等一下，𠊎愛將𠊎个事講清楚，正來食。」
拉班講：「請你講！」
34該人就講：「𠊎係亞伯拉罕个僕人。 35上主大大賜福給𠊎个主人，俾佢非常好額。上主賜給佢羊群、牛群、金銀、奴僕、奴婢、駱駝㧯驢仔。 36吾主人个𡜵娘莎拉年老个時正為佢𫱔一個孻仔；𠊎个主人也將所有个財產給這個孻仔。 37主人喊𠊎發誓，愛𠊎照佢个吩咐；佢講：『你毋好在迦南个細妹仔當中代𠊎尋心舅； 38你愛到𠊎个故鄉、𠊎親族該位去，為吾孻仔尋一個𡜵娘。』 39𠊎對𠊎个主人講：『驚怕細妹仔毋肯跈𠊎來，樣般好呢？』 40佢應𠊎講：『𠊎所敬拜个上主會差派天使㧯你共下去，俾你完成任務。你會在𠊎个故鄉、𠊎个親族家中為吾孻仔討一個𡜵娘。 41你去到𠊎親族个屋下，你就算係完成你个責任。𠊎个親族若係無將細妹仔交給你，你个發誓也㧯你無關係。』
42「今晡日，𠊎到井堘个時，𠊎恁樣祈禱：『上主 — 吾主人亞伯拉罕个上帝啊！求你俾𠊎完成𠊎个任務。 43𠊎企在井堘，有細妹仔出來打水个時，𠊎愛求姖俾𠊎啉姖水罐仔个水。 44若係姖講：『請你啉，𠊎還愛打水給你个駱駝啉』，𠊎希望姖就係上主為吾主人个孻仔所選个𡜵娘。』 45𠊎默禱還吂煞，麗百加就出來，肩頭頂擎等水罐仔，到井堘打水。𠊎對姖講：『拜託給兜水𠊎啉。』 46姖黏時放下肩頭頂个水罐仔，講：『請啉！𠊎也打兜水給你个駱駝啉！』𠊎就啉，姖也打水給駱駝啉。 47𠊎問姖：『你个阿爸係麼人？』姖應講：『𠊎个阿爸係拿鶴㧯密迦个孻仔彼土利。』𠊎就㧯姖戴鼻環㧯手鈪。 48𠊎就跪下來敬拜上主，讚美上主 — 吾主人亞伯拉罕个上帝；因為佢帶𠊎行正確个路，俾𠊎尋到主人个侄孫女來做厥心舅。 49這下，若係你等願意用慈愛㧯誠實對待𠊎个主人，就㧯𠊎講。若毋肯，也㧯𠊎講，𠊎好決定樣般做。」
50 拉班㧯彼土利應講：「既然這事係出於上主，𠊎等還有麼介好講呢？ 51麗百加在這位，你做得帶走，照上主所講个，俾姖做你主人个心舅。」 52亞伯拉罕个僕人聽到這話，就伏在地上敬拜上主。 53接等，佢拿金器、銀器㧯衫褲送給麗百加，也送貴重个禮物給厥哥㧯厥姆。
54然後，亞伯拉罕个僕人㧯跈佢个人正食夜，並歇一暗晡。第二日朝晨䟘起來，僕人就講：「俾𠊎轉去𠊎主人該位。」
55 麗百加个阿哥並姖个阿姆講：「俾細妹仔㧯𠊎等住加幾日，至少住十日正去。」
56僕人講：「請毋好誤到𠊎个時間。上主既然俾𠊎完成𠊎个任務，請你等俾𠊎轉主人該位去。」
57佢等講：「𠊎等喊細妹仔來，看姖樣般講。」 58佢等就喊麗百加來，問姖：「你愛㧯這個人共下去麼？」姖應講：「𠊎願意去。」
59恁樣，佢等俾麗百加㧯姖个乳𡟓，跈亞伯拉罕个僕人㧯同佢來个人共下去。 60佢等祝福麗百加講：
「𠊎等个老妹啊！
願你成做千萬人个阿姆！
願你个後代得到敵人个城門！」
61 麗百加㧯陪嫁个使女準備好，騎上駱駝。亞伯拉罕个僕人就帶等麗百加出發。
62該時，以撒已經徙到庇珥‧拉海‧萊个曠野，住在迦南南部。 63臨暗仔，佢在田項散步，昂頭看到駱駝隊行前來。 64麗百加一看到以撒，就對駱駝背頂下來， 65問亞伯拉罕个僕人：「對田項行過來𠊎等這片个係麼人？」
僕人應姖講：「係𠊎个細主人。」麗百加就用面帕遮等自家个面。
66該僕人將自家所做个一切全部㧯以撒講。 67以撒就帶麗百加入去厥姆莎拉住過个帳篷，討姖做𡜵娘。以撒盡惜麗百加，對厥姆死掉以後，到這時佢正得到安慰。
اکنون انتخاب شده:
創世記 24: THV12Hdb
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012