路加 16
16
精明个管家
1耶穌㧯厥學生講：「有一個財主，佢有一個管家；別人對佢報告講，厥管家浪費佢个財產。 2主人就喊管家來，對佢講：『𠊎有聽到關係你个事情，到底係樣般呢？將你所管个點清楚，因為你做毋得再做𠊎个管家了！』 3該管家心肝想：『頭家愛辭𠊎个頭路！𠊎愛做麼介正好呢？擎钁頭，𠊎無力；做乞食，又驚見笑。 4係哪！𠊎知愛樣般做，等到𠊎失業个時，朋友正會接𠊎到佢等个屋下去住。』
5「所以，佢將厥頭家个債主一個一個喊來。佢對頭一個講：『你欠𠊎頭家幾多？』 6該人應講：『一百桶橄欖油。』管家講：『這係你个借條，拿去，坐下來，遽遽寫做五十桶。』 7佢又問另外一個講：『你呢，你欠幾多？』該人應講：『一百石麥仔。』管家講：『這係你个借條，拿去，寫做八十石。』
8「主人就誇獎這不義个管家做事精明。因為處理世間个事，世俗个人比光明个人較精明。」
9接等，耶穌又講：「𠊎㧯你等講，愛用現世个金錢交朋友，恁樣，金錢無用个時，你等就會受接到永遠个家鄉去。
10「一個人對細事忠實，對大事也會忠實；一個人對細事無老實，對大事也毋會老實。 11若係你等處理世間个錢財就無忠實，麼人會將該真實个財寶交託你等呢？ 12若係你等對屬別人个東西無忠實，麼人會將你等自家个東西交給你等呢？
13「無一個僕人能服事兩個主人。毋係惱這個、愛該個，就係看重這個、看輕該個。你等無可能同時做上帝个僕人，又做金錢个奴才。」
其他个教訓
(馬太 5:18，31-32；11:12-13；馬可 10:11-12)
14該兜愛錢个法利賽人聽到這兜話，就笑耶穌。 15耶穌對佢等講：「你等在人个面前自稱係正人君子，總係上帝清楚知你等个內心；因為人看做盡高貴个，在上帝來看反轉係邪惡个。
16「摩西个法律㧯先知个書，它兜个效力係到施洗約翰為止；對該時開始，上帝國个福音就傳出來，逐儕全部爭等入去。 17總係天地無掉去，比法律个一筆一畫失效還較容易呢！
18「無論麼人離掉𡜵娘，重新㧯別个婦人家結婚，就係犯姦淫；討被人離掉个婦人家也係犯姦淫。
財主㧯拉撒路
19「頭擺有一個財主，逐日著等紫色高貴个靚衫，過奢華宴樂个日仔。 20又有一個窮苦人，名安到拉撒路，歸身發瘡，常常被人帶到財主个門口， 21希望拈兜財主桌頂跌下來个東西來止飢；連狗也來舐佢个瘡。
22「後來，這窮苦人死掉，天使帶佢去坐在亞伯拉罕个塍頭，享受天頂个筵席；該財主也死掉，並埋葬。 23財主在陰間非常痛苦；佢昂頭看到亞伯拉罕在盡遠个所在，又看到拉撒路坐在塍頭， 24就喊講：『𠊎个祖公亞伯拉罕啊，可憐𠊎啊！求你喊拉撒路用手指頭蘸兜水來涼𠊎个舌乸，因為𠊎在這火焰中非常痛苦！』
25「總係亞伯拉罕應佢講：『細子啊，你應當還記得，你還生个時節享盡福樂，總係拉撒路過盡艱苦个日仔；這下佢在這位得到安慰，你卻落在痛苦中。 26毋單淨恁樣，在你等㧯𠊎等中間有深淵隔等，人無可能對這片去你等該片；愛對該片來𠊎等這片也無可能。』 27財主講：『𠊎个祖公啊，既然係恁樣，𠊎求你喊拉撒路去吾爸个屋下； 28因為𠊎還有五個兄弟，佢做得警告佢等，免得佢等也來到這恁痛苦个所在。』
29「亞伯拉罕講：『你个兄弟有摩西㧯先知个話好聽，佢等做得聽啊！』 30財主講：『𠊎个祖公亞伯拉罕啊，恁樣毋罅！若係有人對死復活，到佢等該位去，佢等就會悔改。』 31總係亞伯拉罕講：『若係佢等毋聽摩西㧯先知个話，就算有人對死復活，也無法度說服佢等！』」
اکنون انتخاب شده:
路加 16: THV12Hdb
هایلایت
به اشتراک گذاشتن
مقایسه
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012