路加 4
4
耶穌受試探
(馬太 4:1-11；馬可 1:12-13)
1耶穌被聖靈充滿，對約旦河轉來。聖靈帶佢到曠野， 2在該位四十日，受魔鬼个試探。該兜日仔，佢麼介也無食，日期一過，佢就肚飢。
3魔鬼對佢講：「你若係上帝个孻仔，命令這石頭變做麵包啊！」
4耶穌應講：「聖經講：『人个生存毋係單淨靠食物。』」
5魔鬼又帶佢到一個盡高个所在，𥍉目之間將天下萬國指給佢看，對佢講： 6-7「若係你拜𠊎，𠊎就將這一切權柄㧯榮華全部給你；因為這一切攏總已經交給𠊎，𠊎愛給麼人就給麼人。」
8耶穌應講：「聖經講：『愛拜主 — 你个上帝，單單事奉佢。』」
9魔鬼又帶耶穌去耶路撒冷，喊佢企在聖殿最高个所在，對佢講：「你若係上帝个孻仔，對這位跳下去； 10因為聖經有講：
『上帝會吩咐佢个天使保護你』；
11又講：『佢等會用手扶等你，
使你个腳毋會撞到石頭。』」
12耶穌應講：「聖經講：『做毋得試探主 — 你个上帝。』」
13魔鬼用盡各種个試探，就暫時離開耶穌。
耶穌開始在加利利傳道
(馬太 4:12-17；馬可 1:14-15)
14耶穌轉到加利利；聖靈个能力㧯佢同在。佢个名聲傳遍周圍个所在。 15佢在逐個會堂教人，大家攏總稱讚佢。
耶穌在拿撒勒被人拒絕
(馬太 13:53-58；馬可 6:1-6)
16耶穌來到拿撒勒，就係佢長大个地方，在安息日照佢平常个規矩入會堂去。佢企起來，愛讀聖經， 17有人拿先知以賽亞个書給佢。佢打開書卷，尋到一個所在寫等：
18主个靈臨到𠊎，
因為佢用油膏𠊎，來揀選𠊎，
喊𠊎向窮苦个人傳福音。
佢派𠊎來宣佈：
被人捉个，得到釋放；
瞙目个人，得到光明；
愛𠊎使受壓制个得到自由；
19並宣佈講：
主賜福个禧年來了。
20耶穌將書卷捲起來，交還會堂个助理，然後坐下來。全會堂个人注目看等佢， 21佢就對佢等講：「今晡日，你等所聽到个這站經文已經應驗了。」
22大家盡欣賞佢，也奇怪佢恁會講話。佢等講：「這個人敢毋係約瑟个孻仔嗎？」
23耶穌㧯佢等講：「你等一定想愛用這句俗語對𠊎講：『醫生啊，醫你自家哪！』你等還想愛對𠊎講：『𠊎等聽講你在迦百農所做个事，也應該行在你自家个家鄉啊！』」 24耶穌接等講：「𠊎實在㧯你等講，先知在自家个家鄉從來係無受歡迎个。
25「𠊎㧯你等講，事實上，在先知以利亞个時代，以色列中有盡多寡婦。該時，連續三年半久天旱無落雨，逐位大飢荒。 26總係，以利亞並無奉差派去尋姖等當中个任何人，反轉去西頓地區个撒勒法，到一個寡婦屋下。 27在先知以利沙个時代，以色列中有盡多發癩个，總係，除了敘利亞个乃縵，也無一個人得到淨浰。」
28聽了這個話，全會堂个人就大發譴。 29佢等䟘起來，拉佢去城外，帶佢到崩岡堘 (佢等个城起在山頂)，愛㩳佢下去。 30總係耶穌對佢等當中穿過去，做佢走了。
一個邪靈附身个人
(馬可 1:21-28)
31耶穌去到加利利省个迦百農城。在安息日，佢在該位教人。 32聽到佢教訓个人攏總感覺非常奇怪，因為佢个話盡有權柄。 33在會堂肚，有一個邪靈附身个人，大聲喊講： 34「拿撒勒个耶穌啊，你樣般來干涉𠊎等？你來消滅𠊎等係麼？𠊎知你係麼人；你係上帝个聖者！」
35耶穌命令該隻邪靈講：「恬恬，對這人身上出來！」鬼使該人在眾人面前抨下去，就對佢个身上出來，一些仔也無傷到佢。
36眾人非常著驚，彼此議論講：「這到底係麼介話呢！佢竟然有權柄㧯能力指揮邪靈，邪靈也正經出來！」 37恁樣，耶穌个名聲就傳遍周圍个所在。
耶穌醫好盡多病人
(馬太 8:14-17；馬可 1:29-34)
38耶穌離開會堂，去到西門屋下。西門个丈人𡟓著到熱病，發燒盡厲害；佢等求耶穌醫姖。 39耶穌去看姖，企在姖个塍頭，責備熱病，燒就退掉。姖黏時䟘起來，招待佢等。
40日頭落山个時，盡多發各種病个人被親友帶來見耶穌；耶穌一一為佢等按手，醫好佢等。 41也有鬼對好多人身上出來，喊講：「你係上帝个孻仔！」
耶穌責備該兜鬼，不准佢等講話，因為佢等知佢就係基督。
耶穌在會堂傳道
(馬可 1:35-39)
42天光个時，耶穌出城去偏僻个所在。眾人四處尋佢，尋到後，想愛留佢，無愛俾佢離開。 43總係耶穌對佢等講：「𠊎也應當去別个城傳上帝國个福音，因為這係𠊎受差派个目的。」
44所以，耶穌繼續在猶太#4:44 「猶太」：有兜古卷係「加利利」。逐個會堂傳道。
اکنون انتخاب شده:
路加 4: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012
