路加 5
5
耶穌呼召學生
(馬太 4:18-22；馬可 1:16-20)
1有一擺，耶穌企在革尼撒勒湖滣頭，人群尖等來，愛聽佢講上帝个話。 2佢看到兩隻船停在湖滣，打魚个人離開船，在該位洗魚網仔。 3其中一隻船係西門个；耶穌就上去，喊佢將船撐開，離岸較遠兜。耶穌坐下來，對船頂教導眾人。
4講了後，佢對西門講：「將船駛到水深个所在去，然後你㧯你个同伴放網仔打魚。」
5 西門講：「先生，𠊎等歸夜辛苦，無打到半尾；既然你恁樣講，𠊎就放網仔落去！」 6佢等放落去後，網到一大群个魚，網仔險險裂掉。 7佢等就擛手喊別隻船个同伴來𢯭手。佢等來到，將兩隻船裝到滿滿，差毋多會沈下去。 8西門‧彼得看到這個情形，就跪在耶穌面前，講：「主啊，請你離開𠊎，𠊎係罪人！」
9 西門同該兜共下个人，因為打到恁多个魚，非常著驚。 10佢个同伴西庇太个孻仔雅各㧯約翰也盡著驚。耶穌對西門講：「毋使驚，從今以後，你會得到人像打到魚一樣。」
11佢等將船駛轉岸邊，就放掉所有个，跈耶穌去。
耶穌醫好發癩个人
(馬太 8:1-4；馬可 1:40-45)
12有一擺，耶穌在一個城肚，在該位有一個人全身發癩。佢一看到耶穌，就伏在佢面前，求佢講：「主啊，你若係肯，就會使𠊎淨浰。」
13耶穌伸手摸佢，講：「𠊎肯，你淨浰了！」佢身上个癩即時就無掉去。 14耶穌吩咐佢講：「毋好㧯別人講；直接去見祭司，俾佢檢查，然後照摩西所定个規矩獻祭物，來對人證明你已經淨浰了。」 15總係，耶穌个名聲緊傳緊遠。有盡大群个人常常聚集，愛聽佢講道，也希望佢醫好佢等當中个病人。 16耶穌卻照常退到偏僻个地方去祈禱。
耶穌醫好癱風病人
(馬太 9:1-8；馬可 2:1-12)
17有一日，耶穌在教導人个時，有兜對加利利个各鄉鎮㧯猶太、耶路撒冷來个法利賽人同經學教師也坐在塍頭。主个能力同耶穌共下，使佢會醫好病人。 18有幾個人，扛一個睡在門枋頂个癱風病人來，想愛將佢扛到屋肚去，放在耶穌个面前。 19總係，因為人當多，佢等無法度扛佢入去，就將佢扛到屋頂去，拆開瓦仔，將佢連門枋縋到人群中，放在耶穌个面前。 20耶穌看到佢等个信心，就對癱風病人講：「朋友，你个罪得到赦免了。」
21該兜經學教師㧯法利賽人議論講：「這個人係麼人？樣般敢講侮辱上帝个話！除了上帝以外，麼人有赦罪个權柄呢？」
22耶穌知佢等想麼介，就對佢等講：「你等樣般恁樣想呢？ 23對這個人講：『你个罪得到赦免』容易呢？抑係講：『䟘起來行』較容易呢？ 24這下𠊎愛對你等證明，人子在地上有赦罪个權柄。」就對癱風病人講：「𠊎吩咐你䟘起來，擎你个門枋轉去屋下！」
25該人即時在大家面前䟘起來，擎自家所睡个門枋轉去，歸路頌讚上帝。 26大家非常著驚，滿心敬畏，頌讚上帝講：「今晡日𠊎等看到真奇妙个事了！」
耶穌呼召利未
(馬太 9:9-13；馬可 2:13-17)
27這個事以後，耶穌出去，看到一個稅務員，名安到利未，坐在稅關。耶穌對佢講：「來跈𠊎！」 28利未就䟘起來，放掉一切，去跈耶穌。
29 利未在自家屋下為耶穌大擺筵席；盡多稅務員㧯其他个人也來共下食飯。 30有兜法利賽人㧯佢等共派个經學教師對耶穌个學生發怨言講：「你等樣般同稅棍㧯壞人共下飲食呢？」
31耶穌對佢等講：「健康个人毋使醫生，有病个人正愛。 32𠊎來个目的毋係愛呼召義人，係愛呼召罪人悔改。」
禁食个問題
(馬太 9:14-17；馬可 2:18-22)
33有人對耶穌講：「施洗約翰个學生常常禁食祈禱，法利賽人个學生也係恁樣，只有你个學生又食又啉。」
34耶穌應講：「新郎還在婚姻个筵席中，你等敢做得喊人客禁食？當然做毋得！ 35總係時間會到，新郎會被人對佢等當中帶走，該時佢等就愛禁食。」
36耶穌又設比喻對佢等講：「無人將新衫扯一垤下來，拿去補舊衫；若係恁樣，新衫扯爛掉，扯下來个新布同舊衫也合毋到。 37也無人將新酒裝在舊皮袋肚；若係恁樣，新酒會脹裂皮袋，酒會漏出來，連皮袋也壞掉去。 38新酒愛裝在新皮袋肚正著。 39你等啉老酒以後，無想愛啉新酒；你等 #5:39 「你等…你等…」原文直譯係「人…佢…」總講：『還係老酒較好。』」
اکنون انتخاب شده:
路加 5: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012
