路加 7
7
耶穌醫好羅馬軍官个僕人
(馬太 8:5-13)
1耶穌對眾人講這兜話後，就去到迦百農。 2在該位，有一個羅馬軍官，佢有一個所看重个僕人發大病，差毋多會死了。 3軍官聽講耶穌个事，就託幾個猶太人个長老去請耶穌來醫佢个僕人。 4佢等去到耶穌該位，迫切求佢講：「這個人確實堪得你个幫助； 5佢惜𠊎等猶太人，識代𠊎等起會堂。」
6耶穌就跈佢等去。會到个時，軍官託幾個朋友去㧯耶穌講：「主啊，毋使恁勞煩你！你來吾屋下，𠊎當毋起； 7𠊎就係親身去見你也無資格。你講一句話，𠊎个僕人就會好。 8就像𠊎頂高有指揮官，下背也有受𠊎指揮个兵仔。𠊎命令這個兵仔去，佢就去；命令該個來，佢就來；對𠊎个奴僕講『做這個事』，佢就去做。」
9耶穌聽到這個話，非常希奇，轉身對跈佢个大眾講：「𠊎㧯你等講，像恁樣个信心，就係在以色列人當中，𠊎也從來吂識看過！」
10該兜受託个人倒轉去軍官屋下，看到佢个僕人已經好了。
使寡婦个孻仔復活
11過無幾久 #7:11 「過無幾久」另外有古卷係「第二日」。，耶穌去拿因城；厥學生㧯歸大陣个人也跈等佢去。 12佢去到城門口，看到一隊送葬个人群。死掉个係一個寡婦个單丁子；城內盡多人同該寡婦共下出來送葬。 13主看到該寡婦，就憐憫姖，對姖講：「毋好噭！」 14接等，耶穌進前捍等棺木，抬重个人就停下來。耶穌講：「後生人，𠊎吩咐你，䟘起來！」 15該死人就坐起來，也開嘴講話。耶穌將佢交還厥姆。
16大家非常著驚；佢等頌讚上帝講：「有偉大个先知出現在𠊎等中間囉！」又講：「上帝來拯救佢个子民囉！」
17耶穌這件事个風聲就傳遍猶太㧯附近个地區。
施洗約翰派學生來見耶穌
(馬太 11:2-19)
18施洗約翰个學生將這一切个事攏總㧯約翰講。約翰就喊兩個學生來， 19派佢等去見主，喊佢等問佢，講：「你就係約翰所講，該無幾久愛來个，抑係𠊎等還愛等別人啊？」
20佢等去到耶穌該位，就講：「施洗約翰派𠊎等來問你：『你就係佢所講，該無幾久愛來个，抑係𠊎等還愛等別人啊？』」
21該時，耶穌堵堵醫好盡多發病、殘障，㧯被邪靈附身个人，也使盡多瞙目个看得到。 22所以，佢應佢等講：「你等轉去，將你等所看到、所聽到个，報告約翰，就係：瞙目个看到，跛腳个行路，發癩个得到淨浰，耳聾个聽到，死人返生，窮苦人聽到福音。 23無疑狐𠊎个人就有福氣！」
24 約翰派來个人離開後，耶穌對眾人講起約翰，佢講：「你等頭擺去曠野尋約翰个時，想愛看麼介？看被風吹挺動个蘆竹係麼？ 25你等到底出去做麼介哪？去看著靚衫个人係麼？總係衣裳講究，奢華宴樂个人係住在王宮啊！ 26恁樣，你等出去看麼介哪？係看先知麼？𠊎㧯你等講，無毋著，總係佢比先知還較大。 27佢就係聖經所講个人。
上帝講：
『看啊，𠊎愛差派𠊎个使者做你个先鋒；
佢愛為你開路。』」
28耶穌又講：「𠊎㧯你等講，世間無人比約翰較偉大；總係在上帝國，最微細个也比佢較大！」
29一般人民，包含稅務員，聽到耶穌所講个話，就講上帝盡公義，因為佢等識領約翰个洗禮。 30總係法利賽人㧯法律教師就拒絕上帝為佢等安排个計劃，因為佢等無領過約翰个洗禮。
31耶穌又講：「恁樣，𠊎愛用麼介來比喻這世代个人呢？佢等到底像麼介呢？ 32佢等像坐在市場个細人仔，這群對該群喊講：
『𠊎等為你等歕婚禮个歌曲，
你等毋跳舞！
𠊎等唱喪禮个哀歌，
你等也毋噭！』
33施洗約翰來，毋食餅也毋啉酒，你等就講：『佢被鬼附身了！』 34人子來，也食也啉，你等又講：『佢係貪食好酒个人，專門同稅棍㧯壞人做朋友！』 35總係，真實个智慧係對所有接受智慧个人身上來顯明个。」
有罪个婦人家得到赦免
36有一個法利賽人請耶穌同佢共下食飯；耶穌就去厥屋下坐桌。 37城內有一個婦人家，一直過等罪惡个生活。姖聽講耶穌在該法利賽人屋下食飯，就帶一隻裝滿香油个玉罐仔來。 38姖憑等耶穌伸到後背个腳，企等噭。姖个目汁打濕耶穌个腳，就用自家个頭那毛拭燥，又用嘴去唚，然後用香油去膏。 39請耶穌食飯个法利賽人看到，心肝想：「這人若正經係先知，佢應當知摸佢个係樣般个婦人家；姖係有罪个人！」
40耶穌就對佢講：「西門，𠊎有幾句話愛㧯你講。」
西門應講：「先生，請你講。」
41耶穌講：「有兩個人，欠共一個債主个錢，一個欠佢五百隻銀錢 #7:41 一隻「銀錢」係當時工人一日个工錢。，另外一個欠佢五十隻。 42兩個人攏總無辦法好還，債主就免佢兩儕个債。你想，佢兩儕㖠個會較愛佢呢？」
43 西門應講：「𠊎想係得到較多赦免个人。」
耶穌講：「你講个盡著。」 44然後耶穌轉身向該婦人家，對西門講：「你看到這個婦人家麼？𠊎入若屋下，你無拿水給𠊎洗腳；總係姖用目汁洗𠊎个腳，又用姖个頭那毛拭燥。 45你無唚𠊎來歡迎𠊎；總係𠊎一入來，姖就一直唚𠊎个腳。 46你無用油膏𠊎个頭那；總係，姖用香油膏𠊎个腳。 47所以，𠊎㧯你講，姖顯出恁深个愛，證明姖多多个罪已經得到赦免了！得到較少赦免个人，顯出个愛就較淺。」
48接等，耶穌對該婦人家講：「你所有个罪得到赦免了。」
49共桌个人心中議論講：「這個人係麼儕？敢赦免人个罪！」
50耶穌對該婦人家講：「你个信心已經救到你；安心轉去！」
اکنون انتخاب شده:
路加 7: THV12Hdb
هایلایت
کپی
مقایسه
به اشتراک گذاشتن
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© The Bible Society in Taiwan, 2012
All rights reserved
© 台灣聖經公會版權所有 2012
