LUK 11
11
Jisu na Kekhie pi Kesansi
(Mat 6.9-13; 7.7-11)
1Ghanan kesü wi Jisu na apen kesü wi kekhie saben. Ma kekhie kesa cen seng wi ma sansikeyathu meshu kesü na ma wi gho nu khi, “Apvüwa, Johan na ma sansikeyathu sansi kecü ti no la ikhang sansi pi kekhie sa thsülo.” 2Jisu na mathu wi kiza, “Nthu kekhie kesa wi hati khilo:
‘Ithu Ba: N-nyan ya kemethawa sayalo;
no Kadiyyi keghowa sayalo.
3Atsathangla nsenthu keyishü kedsakejjü pi ithu cülo.
4Ithu kesami teshi cülo,
kepaghenanye ithu la nyu ithu tuwi kesazzi
tsüdi teshi pi cüden.
Ithu pi kemechu wi ndu thsüla.’ ”
5Jisu na ma sansikeyathu wi kiza, “Keujüla nthu meshu kesü na aghaja non wi npvüshang kesü jjen wi wa nu ma kiza, ‘Ipvüshangwa, amesa be kecheng pi hi nna thsü benlalo. 6Ipvüshang kesü na kijünyi wa keten ijjen wi ghoben, nu hi kedsakejjü mangla pi ma kecü nmi le!’ 7Nu keujüla npvüshangwa na nduku wi ben nu no luneng, ‘Ilikesaghang nsa la yilo! Ajjen khendha, itsangathu nu hi la awe wi dudha. Hi shaghala mangla pi no cüya nbendha le!’ 8Isathu khati saben nu? Hi nthu kizaden, no ma pvüshang ghena ma shagha nu amesa pi no cüle nben lela no njüghela khieki kesa ghena ma shagha nu no nsenthu yishü keben tsüdila pi no cüaben. 9Tsalina hi nthu kizaben: khielo, pi nthu cüben; bhalo, nthu muyaben; ajenka kekhalo, sha pi nthu cüben. 10Kepaghenanye khie keten nyi tsüdila pi cüben; bha keten nyi na muyaben, nu sha pi ajenka kekha keten nyi tsüdila cüben. 11Nthu nyu ba kesathu thowa na ma tsawa na anga khiethu amaghang pi cüten nu? 12Nyelela, ma awegüghatsü khiethu ajjüssi pi cüten kwe? 13Nthu nkemehaithu lela pala kemehai pi nthu tsangathu kecü yen chü lethu, tang wi kebenwa Abawa tsü khaju khatila Kemetha Ghamu pi ma wi khie ketenthu cüben nu!”
Jisu nu Beelzebul
(Mat 12.22-30; Mrk 3.20-27)
14Jisu na ajühkhi meyala kebenwa wi atsaghang jügüshi; nu atsaghang na kebvü seng wi anyi tsüna ajühkhi shagha, nu anyitenti na amansa. 15#Mat 9.34; 10.25 Isala anyithu pahan na khi, “Hawa ha Beelzebul atsaghangthu kediwa na kekhang pi ma cü nu ma atsaghangthu jügüshiya thsü ben le!” 16#Mat 12.38; 16.1; Mrk 8.11 Kepathu na Jisu ghan-nan mvu kesalina ma Anyiza wina amankesa kulichilo khie. 17Isala Jisu na mathu kemeshen tsü chüya nu mathu wi kiza, “Diyyi kesü le kesü lela gishü zighe pi aghisaben lethu, kesie ben nten, nu atheghi kesü le kesü lela gishü zighe lethu, qancaden. 18Tsalina keujüla Satan kadiyyi tsüna gishü zighe pi aghisaben lethu, tsü khatinu nganya nu? Kepaghenanye nthu na Beelzebul na kekhang pi hi cü nu hi atsaghangthu jügüya benle khiben. 19Keujüla hi Beelzebul kekhang sen nu atsaghangthu jügü lethu, thowa na kekhang pi nthu nyithu cü nu tsüthu jügüshiya thsü nu? Tsalina nthu nyithu wina nthu na sazzi benle kesa chüshiya ben le! 20Isala keujüla hi Anyiza kekhang sen nu atsaghangthu jügüshiya ben lethu, tsüna Anyiza Kadiyyi na nthu miwi ghodha.
21Anyi kezü kesü na aghitsanqai mehaitsü kiden pvü nu ma jjen hieben lethu, ma tsanqaithu tsüdila mehaitsü benden. 22Isala anyi ma miwi kezüki kesü na gho ma chaya nu ma nondi keten aghitsanqaithu nu keben nyu wi ghanfü keyathu tsüdi gishü sen bvüden.
23 #
Mrk 9.40
“Anyi thowa na hi wiwa nye khe hi shunben, nu thowa na hi gweghe saghu nten khe ma tsü sa pi bvü zighe thsüaben.
Nkemehai Ghamuwa Na Keghoneng
(Mat 12.43-45)
24“Khathansha wi anyi kesü gwo wi nkemehai ghamu tsü jügüshi chi khe ma wala ayyikeshü tsüdi wi kemnanpen bhaden. Keujüla ma pen tsü nmula lethu, ma ketanla ma wi khiden. ‘Hi kheni ijjen wi tsü wha nengden.’ 25Isanu ma wha neng nan ajjen tsü sametha nu kiden pi mehaitsü ketheng muya. 26Tsaseng wi ma wala ma miwi nkemehaiki ghamu kepathu tagü ssi ghola ciwi hang wa. Tsüti kesa seng wi anyi tsüwa kahang na kheni miwi nmehaikila.”
Atsentsa Kemihhi
27Jisu na ajüh ha kekhi seng wi anyitenti jawi nza kesü na magha nu ma wi khi, “Nza, no pvügha nu noncca keshaghawa tsüna khatila mihhidha nu!”
28Isala Jisu na tsü luneng, “Tsü miwi la Anyiza jüh zaya nu nie ketenthu na khatila mihhidha nu!”
Amankesa Kekhie
(Mat 12.38-42)
29 #
Mat 16.4; Mrk 8.12 Anyitenti na Jisu vüsen keben wi ma khi, “Nansü nyithu ha khatila nmehaidha nu! Mathu na amankesa khie tenle, isala Jonah amankesa sa kechi miwi kepa pi mathu nccücadha. 30#Jon 3.4 Kheni Jonah pi Nineve nyi ghena azensu kesü kesa tsüti Anyi Tsawa ha pi nansü nyithu ghena azensu kesü saden. 31#1 Kad 10.1-10; 2 Kc 9.1-12 Ajühkekaghaten tsathang wi Sheba wi Kadijja na shagha nansü nyithu ha kimenniben, kepaghenanye ma diyyi wina Kadimi Solomon kemetsa kesansijüh tsü kinale bha gho. Ghangchilo! Hi nthu kizaden, he wi Solomon miwi kediki na ben le! 32#Jon 3.5 Ajühkekaghaten tsathang wi Nineve nyithu na shagha nthu kimenniben, kepaghenanye mathu na Jonah kesansi jüh zakeya wi mathu kesamithu wina leben khapegheya. Ghangchilo! Hi nthu kizaden, he wi Jonah miwi kediki na ben le!
Agwo wi Kewegüwa
(Mat 5.15; 6.22-23)
33 #
Mat 5.15; Mrk 4.21; Luk 8.16 “Anyi thola ahula kesü canki pi kuthi nyelela pi palakhang cakhu wi chi nten. Isala anyi ciwi kedughothu ya kewegü muya thsüle kesalina ma tsü pi ahula kedonpen wi chiden. 34N-nyon keni tsüna ngwo nnikecanki ti kesa. N-nyon keni tsüna mehaitsü ben lethu, ngwo maben la wegüben, isala n-nyon keni tsüna nmehaila lethu, ngwo la kejang ketan saden. 35Tsalina no wi kewegüwa tsü yala kejang nsa thsüle kesalina kiden-keshayalo. 36Keujüla ngwo maben wi kejang nmila kewegü na pong ben lethu, ahula kesü na kewegü pi no wegü cü keten ti tsü maben la wegüchang benden.”
Jisu na Farisithu nu Ayenkesansithu Kekimenni
(Mat 23.1-36; Mrk 12.38-40)
37Jisu na ajüh kekhisha seng wi Farisi kesü na gho ma gweghe dsajjülo kesa ma cichi; tsalina ma wala dsajjüle donkiben. 38Farisiwa na Jisu na akwen nmetsila dsajjü keben tsü mu pi ma mansa. 39Tsalina Apvüwa na ma wi khi, “Nthu Farisithu na ahyi nu akhu ma mei wi qhu pi methasi saden, isala nthu non wi tsü achoghe nu nkemehai pi pong pvüden. 40Kejüphonthu! Anyiza amei wi kesachiwa tsüna anon wi la nsachi kwe? 41Isala nthu hyikhu wi keben tsü pi ketha-u cülo, isathu nthu ghena pala tsüdila metha ben.
42 #
Lev 27.30 “Farisithu, nthu ghena khatila qhethiketen saten nu! Nthu na aghang wwenja, ccügüshi, aghantsa, nu kepathu lela gishü tagha wi kesü pi Anyiza cüden, isala nthu na hang kemeshon nu Anyiza ketizenwa tsü teshiden. Nthu na hathu ha nu kepathu la nteshila nsathu yishü.”
43“Farisithu, nthu ghena khatila qhethiketen saten nu! Nthu na Sinagogthu wi apen kemehai ntsa pen wi ben nu asenkesapenthu wi nyu nthu nyuwaküla shalom kesa tsü nenden. 44Nthu ghena khatila qhethiketen saten nu! Nthu na ashüjjenthu anyithu na nchüla ma mei wi kegoe keten tsüti kesa.”
45Ayenkesansithu kesü na ma wi khi, “Kesansiwa, no hati kekhi ha ikhang la kimenni ben le!”
46Jisu na luneng, “Ayenkesansithu, nthu ghena la khatila qhethiketen saten nu! Nthu na akhhi kiyan ntsa pvüya nkesa tsü pi anyithu ghatsü wi chiden, isala nthu tsü akwenzza kesü la chang pi mathu khhi pvü keten tsü kiqa cü nten. 47Nthu ghena khatila qhethiketen saten nu! Nthu na nthu bamyithu na pathi kesa atusenjüh-kechüthu shüjjen tsisaden. 48Nthu na nthu bamyithu na kekuli tsü mehaile saden, kepaghenanye nthu na mathu atusenjüh-kechüthu kepathi shüjjenthu tsisaden. 49Ha jjügi ghena Anyiza Kemetsa na khi, ‘Hi atusenjüh- kechüthu nu nyilothu kesun pi mathu wi chiden; mathu na pahan pathi nu pahan meten-meshaben.’ 50Tsalina adechhü ayyi sahangkechi wina atusenjüh-kechüthu tsüdi kepathi ghena nansü nyithu ha meten cüben, 51tsüna Abel kepathi na wala kekinyipen nu Kemetha pen manyi jüwi pathi kesawa Zekhariya kecu ajukhi tsüna nansü nyithu miwi yaden. Anle, hi nthu kizaden, tsüthu jukhi tsü nansü nyithu miwi yaden!” 52“Ayenkesansithu, nthu ghena khatila qhethiketen saten nu! Nthu na palakechü shakhen tsü pi thengya; nthu na ciwi ndu, nu nyu na ciwi du mvu kebenthu lela khenden.” 53Jisu na apen keteshi seng wi Farisithu nu Ayenkesansithu na sashüna ma then nu ma wi pala kejon pi keü, 54tsü pi ma tie nu ma kekhizzi tsü ghanyale kesalina.
انتخاب شده:
LUK 11: RENGNBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Rengma (N) (Re-editing) Bible - Kemethajüh (N)
Copyright © 2016 by The Bible Society of India
Used by permission. All rights reserved worldwide.