JOHN 2
2
Kana khua a kiteenna
1Huleh ni thum ni’n Galili gam a Kana khua ah kiteenna khat a um a; huah chu Jesu nu a um a. 2Jesu leh a nungjuite zong kiteenna ah kouh ahi uh. 3Huleh uain ahung kitaahsap tahun Jesu nuin a kawmah, Uain a nei nawn sih uh, a chi a. 4Jesu’n a kawmah, Numei, nang hung heetsah diing bang a um ei? ka hun a tung nai sih hi, a chi a. 5A nuin suaahte kawmah, Ama’n na kawmva a soi photmah bawl un, a chi a. 6Huleh Judate tawndan dungjuia kisuhsiangthouna suang tuibeel buuh sawmli mun nih aha, mun thum aha dawl, guup hu munah a tungva. 7Jesu’n a kawmvah, Tuibeelte ah tui sungdim un, a chi a. Huin ageitan chiatin a sungdim va. 8Huleh ama’n a kawmvah, Tuin thaal unla, gual vaah vaihawmtu kawmah tawi un, a chi a. Amahun a tawi va. 9Gual vaah vaihawmtuin tui uain hung suaah chu a chepin khoia kipana hung um ahih a he sih a, (ahihvangin suaah tui thaalte’n chu a he va), gual vaah vaihawmtuin mouneipa chu a kou a, 10A kawmah, Michinin a chiilin uain hoih a tungkhia va, huleh tam deuh ahung dawn nung chiangun a hoihlou zaw a tungkhia uh; nangin chu tutan phain uain hoih na koih nalai hi, a chi a. 11Hi silmah kipatna chu Jesu’n Galili gam a Kana khua a, a bawl ahi a; a loupi daan a sulang hi, huleh a nungjuite’n amah a gingta uhi. 12Huzohin Kapernaum ah a chiahsuh a, amah toh, a nu toh, a unaute toh, huleh a nungjuite toh; hutah ah ni tamlou khat a um uhi.
Pathian biahinn suhsiangthouna
13Huleh Judate chiahkaan kuut ahung naita a, Jesu chu Jerusalem ah a chiahtou a. 14Huleh Pathian biahinna bawng leh, belaam leh, vakhu zuahte leh, sumhengtute tou chu a mu a. 15Huin jepna khauhual a bawl zohin biahinn a kipanin belaamte leh bawngte a nohdoh veh a, huleh sumhengtute dangka a sunbuahsah a, a dohkaan uh a sawn puuhsah hi. 16Huleh ama’n vakhu zuahte kawmah, Hi silte hitah apatin la mang un; ka Pa inn sumdawnna inn in bawl sih un, a chi a. 17Huin a nungjuite’n, Na inn a ka phatuamngaihna in ahung ne zouta, chih gelh ahih ahung hedoh uhi. 18Huin Judate’n a dawng va, a kawmah, hi silte na bawl, chiamchihna bang ahiai na hung muhsah theih? a chi va. 19Jesu’n a dawng a, a kawmvah, Hi biahinn susia un, ni thum sungin ka tungding diing, a chi a. 20Huin Judate’n, kum sawmli leh guup hi biahinn bawlna’n a luuta, nangin ni thum sungin na tungding diing maw? a chi va. 21Ahihvangin ama’n huchu a tahsa biahinn a soi ahi. 22Hujiahin misi laha kipana a thoh kiit nungin a nungjuite’n, a kawmvah hi thute a soi ahi chih ahung hedohta va; Pathian lehkhathu leh Jesu thusoi a gingta ta uhi. 23Huchi'n chiahkaan ankuang luina a Jerusalem a, a um laiin a silmah bawlte a muhun mi tampite’n a min a gingta uh. 24Hizongleh Jesu chu a kawmvah a kituluut nuam sih, ajiahchu ama’n mi zousiah a he a; 25Huleh mihing sunga um a heet jiahin mihing thu koimah hilhchet a kiphamoh sih hi.
انتخاب شده:
JOHN 2: SIMTBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.