Karikani B'aai 1
1
Karikan te aomata ma te aonnaba iroun te Atua
1Ngke E moana te karikib'ai te Atua, ao E karika moa karawa ma aonnaba,#1.1 karawa ma aonnaba: “karawa ma aonnaba” E tei i bukin te aonnaba ma kanoana ni kabane. 2ao e tuai karaoaki aon te aonnaba, ao akea te maiu iai. E rabunaki aonnaba n te marawa ae rotongitong ma ni kakamaaku, ao E m'am'akuri Tamnein te Atua i aoni marawa. 3Ao E taku te Atua, “Ke e riki te oota!” Ao e kaoti te oota. 4Ao E noora te oota arei te Atua b'a e raoiroi, ao E karaurea te oota ma te roo. 5Ao E arana te oota b'a te “Ngaina,” ao te roo b'a te “Tairiki.” E tairiki, ao e ngaina, bon te moa ni bong. #1.5 te moa ni bong: E baireaki te bong man te tairiki nakon te tairiki. 6Ao E a manga taku te Atua, “Ke e riki te raure i marenan taian ran.” 7Ao e koro bukin are E taekinna. Ma ngaia are, a raure nako raan ake i annang ma taari. 8Ao E arana annang b'a “Karawa.” E tairiki, ao e ngaina, bon te kauoua ni bong. 9Ao E taku te Atua, “Ke a bootaki n te tabo ae ti teuana raan ake i aani karawa b'a e aonga n otirake te aba mai iai,” ao e koro bukin are E taekinna. 10Ao E arana te tabo ae m'au b'a te “Aba,” ao taari b'a “Marawa.” Ao E nooria te Atua b'a e raoiroi. 11Ao E a manga taku te Atua, “Ke a bwebwerake taian aroka n aekaia nako i aon te aba, taian aroka aika manguroroo baaia, ma aroka aika uaanikai aika uangingi uaaia, ao aroka naba aika bon taian uaanikai uaaia (aika iai atiia i nanon uaaia).” Ao e kororaoi bukin are E taekinna. 12Ma ngaia are, e karikii aekakin aroka nako te aonnaba, ao E nooria te Atua b'a a raoiroi. 13E tairiki ao e ngaina, ao bon te katenua ni bong. 14Ao i mwiina, E a manga taku te Atua, “Ke e riki te oota i karawa, ao e na kaokoroa te ngaina ma te tairiki, ao ni kaotii boong, ririki, ao aeka ni bobotaki nako ni moanaki aroia. 15A na oota i karawa ni kaota te aonnaba,” ao e koro bukin are E taekinna. 16Ao te Atua, E karaoi oota aika uoua aika buubura ake taai ma nam'akaina. E angan taai te taua taekan te ngaina, ao nam'akaina te taua taekan te tairiki, ao E karaoi naba taian itoi. #1.16 taai... taian itoi: Taai ma nam'akaina a taromauriaki kaanga te atua n tain te O Tetemanti irouia tabeman. A koreaki araia ni kaotaki b'a a karikaki. 17E katikui i karawa taian oota b'a a na kaotaa te aonnaba, 18b'a a na taua taekan te ngaina ma te tairiki, b'a a na kaokoroa te oota ma te roo. Ao E nooria te Atua b'a e raoiroi. 19Ao e tairiki, ao e ngaina, ao bon te kaaua ni bong. 20Ao E a manga taku te Atua, “Ke e kaonaki taari ni maan aika maiu n aekaia nako, ao ke e kaonaki annang n taiani mannikiba.” 21Ao E kariki manin marawa aika kakamaaku te Atua, ma aekaki ni man nako aika maiu i taari, ao aekaki ni mannikiba nako. Ao E nooria te Atua b'a a raoiroi. 22E kakab'aiaia, ao E tuangiia maan ake a maiu i taari b'a a na kaona marawa, ao E tuangiia naba mannikiba b'a a na kam'aitiia. 23E tairiki, ao e ngaina ao bon te kanimaua ni bong. 24Ao i mwiin tabeua te tai, E a manga taku te Atua, “Ke e kariki aekaki ni maan aika kawakawa nako aika ikeike i aonnaba, maan ni kawakawa aika manana, ma aika aki manana aika buubura, ma aika uarereke.” Ao e koro bukin are E taekinna. 25Ma ngaia are, E karaoia ni kabane te Atua, ao E nooria b'a e raoiroi. 26Ao i mwiin arei, ao E a manga taku te Atua, “Ao ngkai ti nang karaoia aomata; a na riki b'a aekakira. A na tautaekaniia ika, mannikiba ma maan ni kabane aika manana ma aika aki manana aika buubura ma aika uarereke. 27Ao E karaoia aomata te Atua. E karaoia b'a katotongana, E karikia b'a te mm'aane ao te aine, 28ao E kakab'aiaia, ao E taku, “Karikiia natimi aika m'aiti, b'a a aonga ni kaona te aonnaba kanoami ma n taua taekan te aonnaba. I anganingkami te tautaeka i aoia ika, mannikiba, ma maan ni kabane aika aki manana.” 29Ao E taku te Atua, “Nooria, I a tia n anganingkami kaai n am'arake n aekaia nako i aon te aba aika kaai aika uangingi uaaia n aroia nako, ao kaai aika taiani uaanikai. 30Ao I a tia naba n anga taian aroka aika mawaawa b'a kanaia maan aika kawakawa aika korakora i aon te aba ma mannikiba ni kabane i aan nang, ma maan ni kabane ake iai te ikeike ni maiu i rouia.” Ao e koro bukin are E taekinna. 31Ao E noori b'aai ni kabane te Atua ake E a tia ni kariki, b'a a raoiroi. E tairiki, ao e ngaina ao bon te kaonoua ni bong.
اکنون انتخاب شده:
Karikani B'aai 1: KNVB
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید