Genesis 13
13
Nakapagbelag nat tiyaꞌidan nga rugar na Abram duwa ni Lot
1Liminꞌid na duꞌun it Egipto na Abram, duwa magꞌasawa. Taban niray muꞌsang kusas nira baw kaꞌibaan nira naga si Lot ngayti. Namagꞌuliꞌ na duꞌut Negeb, nga esang rugar duꞌut Canaan. 2Talagang si Abram ngayti, kiminseg na nga taw, ka maꞌayepen na nga banar, mabulawanen na baw mapiraken na.
3Garing sikayti nga rugar, magpaꞌugad-paꞌugad naga na Abram seked it nakaꞌbut siꞌ duꞌut Betel. Duꞌun nagay piyaꞌabutan yat tagnaꞌ nga tiyaꞌidan yang rugar nga piyagtengaꞌan it Betel baw Hai. 4Duꞌun naga gasiꞌ kayti i piyatindegan yat tagnaꞌ it papangantengan it ipagsamba. Ta egay beken, siyamba ya siꞌ duꞌun i AMPUꞌANG DIYUS.
5Ta, si Lot ngayti nga magbaya-bayat ki Abram, may kanya gasing mga ayep, mga tupa, kambing baw bakaꞌ, baw dakel gasing taawan. 6Ta it nagsubung sirang maꞌayepen, daꞌsira na sumadang in sang karuga-rugaran lamang i taꞌidan nirang duwa. Ka yanayti, dakel nang banar i mga ayep nira baw dakel nang mga kaꞌuripnan, aypaꞌ ega na mapakay nga magsagpun sira it sang karuga-rugaran lamang. 7Beken it namagbanta-bantaen nay mga manigꞌeper it mga ayep ni Abram baw manigꞌeper it mga ayep ni Lot. Baw beken paꞌ, kat iting timpu, may magtataꞌid paꞌ duꞌun nga mga Cananeo baw mga Perezeo.
8Aypaꞌ iyan atnakayti, inupakat ni Abram si Lot. Maat ya, “Esa-esa ga, in mapakay it imu, ega magayen kuy kapagraraꞌet ta nga duwa. Subung naga i mga manigꞌeper it ayep ta, ega gasiꞌ ireg ku nga magraꞌe-raꞌeten sira, ka daꞌta nagꞌugaling taw. 9Kayti it malayaw i itung banwa, magꞌuꞌunu ka in daꞌta na magsagpun? Mamiliꞌ ka. In paꞌasini kay imung ayun, ayun kat gibang, paꞌaduꞌun akuy aken it ayun it iwanan. Takaꞌ in paꞌatkayti ka manggid ka paꞌasini kat ayun it iwanan, akuy pagibang manggid.”
10Nanlawag-lawag si Lot, nalawag ya i kalayawat daranasan it Jordan nga garing sikaytiꞌen seked it duꞌun nat Zoar. Paꞌari-aring ayun may danum. Talagang maluꞌgum nga paglawagen, subung nat kalulwakan it AMPUꞌANG DIYUS nga duꞌut Eden, baw banwa ngayting Egipto, sabap kat iting timpu, ega paꞌ riyanggaꞌ it AMPUꞌANG DIYUS i mga siyudad it Sodoma baw Gomorra. 11Aypaꞌ iti i piniliꞌ ni Lot, muꞌsa ngayting daranasan it Jordan. Nagpablag na si Lot it amayan ya ngayti ka naꞌaduꞌun nat napiliꞌ ya ngayti nga ayun kat lebatan. 12Pagbelag nira, ki Abram, duꞌun nay tiyaꞌidan yat Canaan ngayti. Si Lot, duꞌun nat malayaw ngayting daranasan nga napiliꞌ ya. Adeꞌdeng it siyudad it Sodoma i tiyakenaꞌan ya, nga piyakabratan yat mga magkapuru-purun nga balay ya. 13Mga taw ngayti duꞌut Sodoma, mararaꞌe-raꞌet i adat, talagang makasalaꞌan sirang banar kat panleteg it AMPUꞌANG DIYUS.
Siyanggupan siꞌ si Abram it Ampuꞌang Diyus
14Pagkapaꞌugad ni Lot, piyakisugidan sit AMPUꞌANG DIYUS si Abram. Maat ya, “Garing situt pagtataꞌidan mu ngaytu, ipabeyeng-beyeng muy mata mu. Ayun kat lebatan, ayun kat sedpan, ayun duꞌut sur baw ayun duꞌut nurti i pabeyeng-beyengan mut mata mu. 15Sabap kat paꞌari-ari ngaytung ayun nga ipagpalawag kut imu, ibgay kuytung muꞌsa it imu, subliyen it anak-inapuꞌ mu seked it maꞌlay. 16Talagang buwaten ku nga subuk kapu-kaput lugtaꞌ i kadakel it mga tungtung-inapuꞌ mu. In beteꞌ may magkabilang it kapu-kapu, ta mabilang nagay mga anak-inapuꞌ mu. 17Ta, panaw-panawan mu, letganan muy kalayaw baw kaꞌalaid, ka talagang ibgay ku it imu.”
18Ega naꞌlay piyurun siꞌ ni Abram i balay ya ngayti ka napanaw siꞌ. Duꞌun i piyaꞌabutan yat kakakayuwan ni Mamre nga duꞌut Hebron. Pagꞌabut ya duꞌun, nagbuwat siꞌ it papangantengan it ipagsamba duꞌun it AMPUꞌANG DIYUS.
اکنون انتخاب شده:
Genesis 13: TBWONT
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 1992, Wycliffe Bible Translators, Inc. All rights reserved.