Genesis 5
5
Palangbus pang ipagpaꞌyag i pasar it ki Adan baw mga kaꞌanak-anakan ya
1Itu na ngaytu i paꞌyag pasar it mga kaꞌanak-anakan ni Adan.
Iyan giyuna it Ampuꞌang Diyus na Adan, pamwat ya, magꞌagen-agen it kaladawan ya. 2Lalaki baw babay i giyuna ya, baw piyatdekan ya sira it ampang nga ikagayen it bilug nira. Yay ipiyangaran yat kanira, taw. 3Magꞌidad si Adan ngaytit sang gatus baw tulu nga pulung taꞌun, nakaꞌanak sit lalaki nga subung it pagtaw-taw ya naga. Piyangaranan na ngaytit ki Set.#5:3 Ega naga panganay nira si Set ngaytu (kapitulu 4:1). Kanyay siyangpit situ sabap kanya i giyaringan it mga mamagsamba it Ampuꞌang Diyus (kapitulu 4:26). 4Garing it nakaꞌanak ngaytit ki Set, nakaꞌanak naga kanyat beken, babay baw lalaki, ka may walu pang gatus nga taꞌun seked it natay na kanya. 5Pagpatay ya, siyam nga gatus baw tulung puluꞌ nga taꞌun i idad ya.
6Magꞌidad si Set it sang gatus baw limang taꞌun, nakaꞌanak it ki Enos. 7May sunud nagang mga anak ya ka piyaꞌlay kanyat walung gatus baw pitu pang taꞌun. 8Tanan-tanan it idad ni Set, siyam nga gatus baw sang puluꞌ may duwang taꞌun bawnga natay kanya.
9Magꞌidad si Enos it siyam nga pulung taꞌun, nanganak sirat ki Cainan. 10May sunud nagang mga anak ya ka piyaꞌlay kanyat walung gatus baw sang puluꞌ may lima pang taꞌun. 11Tanan-tanan nga idad ni Enos, siyam nga gatus baw limang taꞌun bawnga natay kanya.
12Magꞌidad si Cainan it pitung puluꞌ nga taꞌun, nanganak sirat ki Mahalalel. 13May sunud nagang mga anak ya ka piyaꞌlay it walung gatus baw epat nga puluꞌ pang taꞌun. 14Tanan-tanan nga idad ni Cainan bawnga natay kanya, siyam nga gatus baw sang puluꞌ nga taꞌun.
15Magꞌidad si Mahalalel it enem nga puluꞌ baw limang taꞌun, nanganak na sirat ki Jared. 16May sunud nagang mga anak ya ka piyaꞌlay it walung gatus baw tulung puluꞌ pang taꞌun. 17Tanan-tanan nga idad ni Mahalalel bawnga natay kanya, walung gatus baw siyam nga puluꞌ baw limang taꞌun.
18Magꞌidad si Jared it sang gatus baw enem nga puluꞌ may duwang taꞌun, nanganak sirat ki Enoc. 19May sunud nagang mga anak ya ka piyaꞌlay kanyat walung gatus pang taꞌun. 20Tanan-tanan nga idad ni Jared, siyam nga gatus baw enem nga puluꞌ may duwang taꞌun bawnga natay kanya.
21Magꞌidad si Enoc it enem nga puluꞌ may limang taꞌun, nanganak sirat ki Matusalem. 22Garing it pagpanganak it ki Matusalem, may tulu pang gatus nga taꞌun nga magsisiging magpangaꞌgenan si Enoc uyun kat kaꞌirgan it Ampuꞌang Diyus nga bilang kaꞌiba-iba yang pirmi. May beken naga nga anak na Enoc nga babay, lalaki, nga simnunud it ki Matusalem. 23Tanan-tanan nga idad ni Enoc, tulung gatus baw enem nga puluꞌ may limang taꞌun. 24Pagkaꞌbut yat iting idad, paribasay bilang kaꞌiba-iba it Ampuꞌang Diyus si Enoc ngayti, nagsipat na lamang kanya. Daꞌna magkaparagan ka pinsiꞌ na kanya it Ampuꞌang Diyus.
25Magꞌidad si Matusalem it sang gatus baw walung puluꞌ may pitung taꞌun, nanganak sira magꞌasawa it ki Lamec. 26May sunud nagang mga anak nira ka piyaꞌlay kanyat pitung gatus baw walung puluꞌ may duwa pang taꞌun. 27Tanan-tanan nga idad ni Matusalem, siyam nga gatus baw enem nga puluꞌ may siyam nga taꞌun bawnga natay kanya.
28Magꞌidad si Lamec it sang gatus baw walung puluꞌ may duwa nga taꞌun, nanganak sira it esang lalaki. 29Piyangaranan yat ki Noe, ka maat ya, “Ituy inu-inu it aten kat makuriꞌ ngaytu nga buwat ta, nga magpakariga kat pangarigrat lugtaꞌ nga siyumpaan it AMPUꞌANG DIYUS.” 30May sunud nagang mga anak ni Lamec ka piyaꞌlay it limang gatus baw siyam nga puluꞌ may lima pang taꞌun. 31Nakaꞌbut i idad ni Lamec it pitung gatus baw pitung puluꞌ may pitung taꞌun, bawnga natay na kanya.
32Magꞌidad si Noe it limang gatus nga taꞌun, nakaꞌanak kanyat sunud-sunud, si Sem, si Cam, bawnga ikatlu si Jafet.
اکنون انتخاب شده:
Genesis 5: TBWONT
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 1992, Wycliffe Bible Translators, Inc. All rights reserved.