JOHAN 14
14
Isu ly Ampo teng y tym nai lam lawn nai
1“Nangchi i paleungbi u moh. Tameuh ai ym i kai ai py ym. 2Ngaai i yhm y awmra neangneang awm; by y nai khyly kaimy kang thui pi ai bo; nangchi i vui meingtym sa rym ai nai kai chei ai bo he. 3Naibaly kai chei iy nangchi i vui meingtym sa rym baly, nangchi py kai i awmra y awm thai ai nai, kai kang jeu bi ai i nangchi ai py kai teng y kang la ai. 4Naibaly kai i tako ai naira lam nangchi pany,” napi. 5Thoma my ni teng y, “Areng, nang i tako ai naira kaichi pany y; lam mana pany ai mo?” napi. 6Isu my ni teng y, “Kai ly lam py, leu meitang py, hengra py ne. 7Kaimy ny y baly ami py Ngaai teng y tym vai y, Nangchi ly kai ai pany i khyly Ngaai ai py pany ai bo; vai dengdairei nangchi ly ni ai pany, niu py niu bo,” napi.
8Philipa my ni teng y, “Areng, Ampo ai ly kaichi ai patei kyh ba, hunaibaly kaichi i vui hawi khyp ai,” napi. 9Isu my ni teng y, “Philipa, hina tanrei kai nangchi teng y awm i py nang ly kai ai pany y jo rai a? Ami py kai ai niu baly Ampo ai niu nai bo; ‘Ampo ai kaichi ai patei kyh ba,’ nanai ly ati mana nai thui nai mo? 10Kai ly Ampo teng y awm, Ampo py kai teng y awm, nanai ym y nai sai a? Kai i nangchi teng y leu thui nai ly kaimy paseang amang nai thui nai ny y leang; kai teng y awm jo nai Ampo my ly mymy i kalop sa nai teu. 11Kai ly Ampo teng y awm, Ampo py kai teng y awm, nanai ym u; ti y baly kai i atiti sa naichi deaungkho y ym u tanga. 12Meitang khypkhyp kang thui pi, ami py kai ai ym baly kai i atiti sa naichi ly ni py sa teang ai; ne, kai ly Ampo teng y chei ai nai deaungkho y mymy ly hini tleaung y atiti len keh naichi sa ai rai. 13Naibaly Ampo ai ly Chapo deaungkho y palo thai ai nai, kaimy i amyn y nangchi i ati py hnei nai ngierei ly kang sa pi jojo ai. 14Nangchi ly kaimy i amyn y ati py hnei baly kaimy kang sa pi jojo ai.
Phailo Kachai i adeu nai
15“Nangchi ly kai ai tamen baly kai i leu pei naichi tangai u ai. 16Naibaly kaimy Ampo teng y hnei ai i, deungtasa khrairei nangchi teng y awm jo ai nai Awm Hai Nem nai keung takhra ang pei ai. 17Huni ly Leu Meitang Phailo ne: khaileaung prichi ly mymy ai niu y nai hawi pany y nai deeaungkho y ngothai y; nangchi ly ni ai pany, ni ly nangchi teng y awm jo i, nangchi i paleung theung y py awm ai.
18“Nangchi ai nuro kang khai jo y leang mang; nangchi teng y kang jeu teang ai. 19Kra y nai sala y ly khaileaung prichi my kai ai niu ai ny y; na i py nangchi ly niu ai: kai ly heng nai deaungkho y nangchi py heng ai. 20Huni kani y kai ly Ngaai teng y awm, nanai hawi, nangchi ly kai teng y awm, nanai hawi, kaimy nangmychi teng y awm nanai py nangmychi my pany ai. 21Ami py kai i leu pei naichi tangai iy patawm nai ly kai ai tamen nai keung ne; ami py kai ai tamen nai ly Ngaai my tamen ai, kai py ni ai tamen ai i ni teng y kamteang ai,” napi. 22Naibaly Iskariota ny y nai Juda my ly ni teng y, “Areng, nang ly kaichi teng y amteng iy, khaileaung prichi teng y amteng y ai nai ly ati mana nai mo?” napi. 23Isu my ni teng y, “Ami py kai ai tamen baly kai i leu pei nai tangai ai; Ngaai my ni ai tamen ai i kaini my ni teng y jeu ai, ni teng y py awm jo ai. 24Ami py kai ai tamen y nai ly kai i leu py tangai y; nangchi i leu thai nai ly kai i ny y leang, Ampo, kai ai pato nai keung i teu.
25“Kai ly nangchi teng y awm nai sala ryrei ly huni leu kang thui pi bo. 26Na i py Awm Hai Nem nai Keung Phailo Kachai, Ampo my kai i amyn y ang pato ai nai ly nangchi ai ati cheaungkhang ang patiu ai; kai i nangchi teng y kang thui pi nai ngierei py ang pany hai vau bi ai. 27Awmnem naira kang daw pi mang; kaimy i awmnem naira kang pei: khaileaung prichi my pei nai kamta kang pei y leang mang: nangchi i paleung bi u moh, jei py jei u moh. 28‘Kai ly tako veng ai i, nangchi teng y kang jeu teang ai,’ kang napi nai ly nangchi pany bo. Nangchi ly kai ai tamen baly, kai ly Ampo teng y kachei ai nai deaungkho y nangchi kawn ai bo; ati mana nai mo nabaly Ampo ly kai tleaung y len keh nai ne. 29Huni satang tym khala y nangchi ym ai nai, tym y rai khala y my vai kang thui pi bo. 30Kai ly nangchi hawi leu neangneang arum ali y leang bo, khaileaung pri i areng ang jeu ai bo, ni ly kai teng y ati sai py ngo y ai; 31na i py khaileaung prichi ly kaimy Ampo ai tamen, nanai pany ai nai, Ampo my leu ang pei nai kamta ly kai sa. Angthau u, hi i nai theu sina,” nanai pathang.
اکنون انتخاب شده:
JOHAN 14: KCL02
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Khumi Common Language Bible © Bible Society of Myanmar, 2005.