Joyn 8
8
1Andiʼ to ando viʼi mpfwo li, Yesò ə lù kuʼ a pfèn və olìf 2Ətʉʼ ə be ne sə laynə mu ghə̀ sə be diʼ a kəbəŋ kə ngə̀ŋ Nyìngòŋ, viʼi vì ŋwʉʼtə ə kaʼsə a wen a ben, ghə̀ shiʼi nyʉ̀ʼmə ə sə ziʼi vəwenə. 3Ndìʼsə̀sə tə əsoʼ nə̀ viʼi Falàsi vətsevə kwen ə vì nə̀ wùwì mu və ghaʼa wen, ghə̀ tsi wenə ə wùlɨm ə tsen. Vəwenə vì ə tom wùwì ayi ashɨ ə viʼi, 4ə mu gàʼ a Yesò la, “Ndìʼsə̀, və ghaʼ wùwì ghèn, ghə̀ tsi wenə wùlɨm, ko lu ndiʼ lɨmə wen. 5Əsoʼ a Mosìs ə nyòʼ ə gaʼa la ə nki wùwì a ghèn diʼ və temlə wen nə̀ nguʼsə əzhwi. Wù gàʼ la gho fa tsu a?” 6Vəwenə ə mbèmə ali, mwòmsə la Yesò gaʼa ə shwè, vəwenə kiʼi kənyʉ̀ ə ghamə wen fa tsu. Alì, Yesò ə laŋtə a nse ə sə nyòʼtə fo ə wen a kəbyìʼ nə̀ nyì kəvu. 7Vəwenə sə be bèmə kənyʉ̀ a ken to bèmə a wen, ghə̀ bwensə lu ə gàʼ a vəwenə la, “Wìʼ ndiʼ fa ghə̀ŋ a ntìntìn a ghə̀ ko ntɨmə nè mbyɨ, ghə̀ chò mbì, ə temə wen nə̀ ngùʼ.” 8Ando ghə̀ ngàʼa li, ə bwensə be laŋtə a nse ə sə be nyoʼtə əfo ə wen. 9Vəwenə zhʉ ali ə sə lu kə to fəmùʼ fəmùʼ, zìtə̀ fa viʼi vətokəvə, ə na lù to li a faŋ to Yesò, wenə wùwì ayi ghə̀ ə bo ti to tsu. 10Yesò ə be bwensə lu ə bèm a wùwì a ghèn la, “Viʼi vyi dyʉ̀ fè? Nò tèbe wù ə mùʼ ə ko fàŋ ə gàʼ la wù fəŋ li nsòʼ a?”
11Wùwì ghèn bwensə ə gàʼ la, “Nò wìʼ ə mùʼ ə ko faŋ a Tikəbəŋ.”
Yesò ə gàʼ a wen la, “Nò tèbe nkàyntə̀ mo ko gaʼà la wù fəŋ li nsòʼ. Bwenə pfwo. Wù pfwo kə wù be a nè mbyɨ.”
Yesò ə gàʼ la ghə̀ diʼ əbayn a viʼi mbyi
12Yesò ə ne be sə ngaʼa a viʼi Falàsi ə gàʼ la, “Ma diʼ əbayn mbyi. No ndo a ghə̀ dzɨ̀mtə̀ mo, mu ghə̀ a kiʼi əbayn a wen a ntsìnə̀, ko ghə̀ ə be a njèʼ fa kəbəŋ kəfenəkə”.
13Viʼi Falàsi na venə ə gàʼ a wen la, “wu gaʼa to byìʼì ngə̀ŋ kətʉ wù, kə le diʼ la kənyʉ̀ a wu gàʼ ko tɨmə no fa mpfen.”
14Yesò ə gàʼ a vəwenə la, “no tebe ando ma gaʼa byìʼì ngeŋ ə ghom, kənyʉ̀ ki a ma gaʼa diʼ to no nəmwèʼè, byìʼàndo ma kɨli kəshi kì a mà lu fa tsu, ə be kɨ kəshi kì a ma dyʉ̀ tsu. Alì, wìʼ fa ghə̀ŋ ə ko kɨ la, mà lu fa fe lò, sə dyʉ̀ fe lo. 15Ghə̀ŋ soʼo nə̀ ətof ə mbi, ma ko soʼo tebè wìʼ. 16Alì, mu ma diʼ ə soʼo wìʼ, mà ne soʼo to nəmwèʼè byìʼàndo ma ko diʼ mo nyɨŋ. Ma diʼ yo Tìʼ ghom, yi a ghə̀ tɨmə mo. 17Əsoʼ ə ghəŋə ə gàʼa la, viʼi sətsen tɨmə və bò ə byɨmə kənyʉ̀, mu kə diʼ to nəmwèʼè. 18Ma diʼ tò no nchwò nsòʼ a ngeŋ ghom, Tìʼ yì a ghə̀ tɨmə mo ə be diʼ nchwò nsòʼ ə ghom.”
19Vəwenə bèm a wen la, “Tìʼ wù na ghèn ə diʼ fe?”
Yesò ə bwensə ə gàʼ la, “Ghə̀ŋ ko kɨ mo, kenla ghə̀ŋ kɨli Tìʼ ghom. Ghə̀ŋ tu kɨ mo, mu ghə̀ŋ kɨli Tìʼ ə ghom.”
20Yesò ə nziʼi nyʉ̀ na venə, ashə a ngə̀ŋ Nyìngòŋ yi a və ghʉ kəku tsu. Alì, ko wìʼ nghaʼli wen byìʼàndo əzhʉ̀ yi a Nyìngòŋ ghʉ̀ la və ne ghaʼa wen nko təmə kwʉ̀ʼ.
Yesò ə shə̀ʼtə̀ la ghə̀ lu fa kàŋ
21Yesò ə be gàʼ kwʉ̀ʼsə la, “Ma nè lu, kenla ghə̀ŋ zizi ghə̀ŋ dyʉ̀ a kəshi a ma dyʉ̀ tsu, ghə̀ŋ ne kəŋ mò, ko ghə̀ŋ lu yen, ghə̀ŋ ə ne ə pfʉkə a ghə̀ŋ a mbyɨsə.”
22Viʼi Jus sə bèm la, “Ghə̀ lə gàʼ la vəghəŋ zizi ko və lu dyʉ̀ akəshi ghèn a ghə̀ dyʉ̀, kə diʼi la gho? Ghə̀ kəŋə ə zhwi wen əwen mu?”
23Alì Yesò ə be gàʼ la, “Ghə̀ŋ diʼ viʼi nse ashə̀, ali ma diʼ mù mà lu fa kaŋ. Ghə̀ŋ diʼ viʼi mbyi, ma kodiʼ wu ə mbi. 24Ma gàʼ li a ghə̀ŋ la ghə̀ŋ ne pfʉkə a ghə̀ŋ a mbyɨsə a zhʉ a sətsen ghə̀ŋ faŋ ke byɨmə la ma diʼ mo yi a ma diʼ.”
25Vəwenə bèm a Yesò la, “Wù diʼ no ndò lo?”
Yesò ə bwensə la, “Ma diʼ tò wìʼ ə yi a ma tə gaʼa fa kənzìtə̀ la ma diʼ wen. 26Ənyʉ̀ ə diʼ to kədə̀ŋ a mà zizi mà gàʼ kumə ghə̀ŋ be ku ngəʼ a ghə̀ŋ fa tsu, ali ma ko ne tebè ali byìʼàndo wìʼ yi a ghə̀ tɨmə mo ə gaʼa to nəmwèʼè, ma gàʼa to kənyʉ̀ kì a ghə̀ gàʼa la mà gàʼ a viʼi mbyi.”
27Ghə̀ ə ngàʼa ali, ko ndiʼ la vəwenə kɨli la ghə̀ gàʼa kumə Tì wen. 28Yesò ə gàʼ a vəwenə la, “Ghə̀ŋ lu kuʼsə wàyn Wìʼ a kəntò, no zhʉ̀ko, ghə̀ŋ mu kɨ la ‘Ma diʼ mo yi a ma diʼ,’ ə be kɨ la ma ko nè tebè kənyʉ̀ fa mò ngeŋ, ali gàʼa to kənyʉ̀ kì a Tìʼ ə ziʼi li mo nə̀ kəwenkə kə. 29Wìʼ yì a ghə̀ tɨmə mo diʼ yo wen. Ghə̀ ko ə ghʉ̀sə mò to mò nyɨŋ byìʼàndo mà ne to kənyʉ̀ kì a ghə̀ kòŋ”. 30Viʼi no və ghoʼo ə nzhʉ li gaʼa ə Yesò ə byɨmə a wen to zhʉ̀ a ghèn.
Wàyn Wìʼ na shisə əkòs fa ngəʼ
31Yesò ə ngaʼa li a viʼi Jus vyi a və byɨmə a wen la, “Ghə̀ŋ sətsen ghaʼ ziʼi ə ghomə mu ghə̀ŋ lutə diʼ to no ndzɨ̀mtə̀sə bàm ə mo. 32Ghə̀ŋ na kɨ kənyʉ̀ ki a kə diʼ nəmwèʼè, nəmwèʼè a yi ne ghə̀ŋ la kə ghə̀ŋ be diʼ əkòs.”
33Ghə̀ ə ngaʼa ali, vəwenə bèm a wen la, “Wù gaʼa la wù zizi wù gyamtə yès fa ngəʼ ko? Yes diʼ viʼi ngwaʼ ngə̀ŋ Ablaham ko ndiʼ la yès ətɨmə diʼ əkòs a wìʼ.”
34Yesò ə gàʼ a vəwenə la, “Ma gaʼa a ghə̀ŋ to no nəmwèʼè la, no ndò yì a ghə̀ ne mbyɨ diʼ kəkòs a mbyɨ. 35Kəkòs kə ko ə se a diʼ nə̀ wù ngwaʼ ə ngə̀ŋ, ali wàyn ə se a nə̀ wù ngwaʼ a ngə̀ŋ əzaʼa no fa ze. 36Sətsen Wàyn Wìʼ shisə wù fa kəkòs, mù wù li mù bwòŋ. 37Ma kɨli la ghə̀ŋ fʉ̀ fa ngwaʼ ə ngə̀ŋ ə Ablaham, ali sə kəŋ ə zhwi mo byìʼàndo ghə̀ŋ ko kòŋ ə zhʉ ziʼi ə ghomə. 38Ma shə̀ʼtə̀ to kənyʉ̀ ki a Tìʼ ghom diʼi li a mò, ghə̀ŋ nè kì a ghə̀ŋ zhʉ̀ fa tiʼi ghə̀ŋ.”
39Vəwenə bwensə la, “yès ə diʼ vunə Ablaham.”
Yesò ə bwensə gàʼ a vəwenə la, “Ghə̀ŋ tu ndiʼ vunə Ablaham mu ghə̀ŋ nè to nyʉ̀ vyi a Ablaham ə nè. 40Ghə̀ŋ diʼ alə̀ mu ghə̀ŋ ghʉ̀ li la ghə̀ŋ a zhwi mò, ali mà shə̀ʼtə̀ to nyʉ̀ a ghə̀ŋ, a və diʼ nəmwèʼè mu mà zhʉ̀ fa Nyìngòŋ. Ablaham nko ə ne tə nki tə nyʉ̀ alə̀. 41Ghə̀ŋ nè to nyʉ̀ vyi a tìʼ ə ghə̀ŋ ə nè.”
Vəwenə bwensə la, “Nyìngòŋ ə diʼ to Tìʼ ə mùʼ yi a yès ə kiʼi, yès diʼ to no nkàyntə̀ vunə Nyìngòŋ.”
42Yesò ə gàʼ a vəwenə la, “Nyìngòŋ ə tu ndiʼ to no Tìʼ ghə̀ŋ, mu ghə̀ŋ kòŋ mò byìʼàndo mà lu fa ben nə̀ Nyìngòŋ. Ma ko tə vì fa mo ngeŋ. A ntɨmə Nyìngòŋ ətɨmə mò. 43Byìʼì ghò a ghə̀ŋ ko zhʉ kɨ kənyʉ̀ kì a ma gaʼa a? A diʼ byìʼàndo ghə̀ŋ ko kòŋ ə zhʉ. 44Ghə̀ŋ diʼ vunə tìʼ ghə̀ŋ, ə Deblə̀, kəŋ ə nè to kənyʉ̀ ki a tìʼ ghèn ə kòŋ la ghə̀ŋ ə nè. Ghə̀ ə nzhwi viʼi no fa kənzìtə̀ kə mbi, ko andiʼ la ghə̀ kòŋ nəmwèʼè byìʼàndo ghə̀ diʼ wu ndzɨŋ. A diʼ a zhʉ a ghə̀ zhò ndzɨŋ ghə̀ diʼi ntsìnə̀ wen byìʼàndo ghə̀ diʼ wù ndzɨŋ, be diʼ to no tìʼ ndzɨŋ. 45Ma sə gaʼa to no nəmwèʼè a ghə̀ŋ, ko ghə̀ŋ byɨmə kənyʉ̀ kì a ma gaʼa. 46A diʼ ndo fa ghə̀ŋ a ntìntìn a ghə̀ zizi ghə̀ diʼi la ma ne li mbyɨ a? A zhʉ a ma gaʼa no nəmwèʼè byìʼì ghò a ghə̀ŋ ko byɨmə mo a? 47No ndò a ghə̀ diʼ wàyn Nyìngòŋ, ə zhʉ kənyʉ̀ kì a Nyìngòŋ ə gàʼa. Ghə̀ŋ ko zhʉ̀ byìʼàndo ghə̀ŋ ko diʼ vunə Nyìngòŋ.”
Viʼi Jus vətsenvə ə mo Yesò
48Viʼi Jus vətsenvə ə mu gàʼ a Yesò la, “Wu a gaʼa yès ko tə ə gàʼ to nəmwèʼè la wù diʼ wù ə Sàmalìyà, be kiʼi kəzhwì kə kəbyɨkə.”
49Yesò ə gàʼ a vəwenə la, “Ma ko kiʼi kəzhwì kə kəbyɨkə. Ma gumlə Tìʼ ghom, ali ghə̀ŋ chasə mò. 50Ma ko kəŋ tebè la və kuʼsə mò, ali wìʼ diʼ a ghə̀ kəŋ la və nə̀ kuʼsə mò, ghə̀ diʼ wìʼ a ghə̀ soʼo to no nəmwèʼè. 51Ma gaʼa a ghə̀ŋ tò no nəmwèʼè la, no ndò yi a ghə̀ zhʉ ziʼi ə ghomə ə ghʉ, mu ghə̀ lu tsi faŋ.”
52Vəwenə ə gàʼ a wen la, “Yès ə mu sùtə̀ nkɨ luwen la wu kiʼi kəzhwì kə kəbyɨkə! Ablaham nə̀ nshə̀ʼtə̀sə ghoʼkəsə ə mpfʉ̀kəli, ali wù sə gàʼa la, no ndo yi a ghə̀ ghʉ kənyʉ̀ a wù ziʼi mu ghə̀ ko be lu pfʉ. 53A wù lə gaʼa ə diʼ la wù chò Ablaham ə tiʼi yès mu? Ablaham wenə nshə̀ʼtə̀sə ghoʼkəsə sətsen diʼ mu və pfʉkə li, wù sədiʼ no ndò?”
54Yesò ə bwensə gàʼ la, “a zhʉ a ma yi ndiʼ ə kuʼsə wenə ghomə mu a ko diʼ to kənyʉ̀ kətsenkə. Wìʼ yi a ghə̀ kuʼsə mo a diʼ Tìʼ ə ghom, to ndə̀ŋndəŋ ə wìʼ yi a ghə̀ŋ ə gaʼa la a diʼ Nyìngòŋ ghə̀ŋ. 55Ghə̀ŋ ko kɨ wen, ali ma kɨ. Mà sətsen gàʼ la ma ko kɨ wen, kə a diʼi la ma zhò ndzɨŋ to nə̀ ghə̀ŋ. Ma kɨli wen, zhʉ wen. 56Tìʼ ghə̀ŋ Ablaham ə yèn li ə kɨ la mà lu vi, kənyʉ̀ na kì kə nè, ghə̀ sə saŋlə no nànto.”
57Viʼi na vyi ə bèm la, “wù ko tɨmə ə zàʼa ngʉ̀ʼsə məwumə ə tàyn, sə kɨ Ablaham mu wù ə yen wen fe?”
58Yesò ə bwensə gàʼ a vəwenə la, “Ma gaʼa a ghə̀ŋ tò no nəmwèʼè la, və sə bwi Ablaham mu ma sə diʼ.”
59Nò zhʉ̀ko vəwenə boŋtə nguʼsə ə sə kəŋ ə temlə Yesò nə̀ səwensə, ali Yesò ə lyen ə fʉ̀ fa kəbəŋ kə ngə̀ŋ Nyìngòŋ.
اکنون انتخاب شده:
Joyn 8: bbkDBLnt
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید