ᓭᐣᐟ ᓬᐅᐠ 13
13
1ᐁᑯᐢᐱ ᐋᑎᐦᐟ ᐁᑯᑕ ᑭ ᐊᔭᐊᐧᐠ, ᐁ ᑭ ᐋᒋᒧᐢᑖᑯᐟ ᐊᓂᐦᐃ ᑳᓬᐊᓬᐃᐊᓇ ᐅ ᒥᑯᔨᐤ ᐸᐃᓬᐊᐟ ᑳ ᑭ ᑭᑭᐸᔨᑖᐟ ᐅ ᒪᒍᐢᑌᐊᒫᑫᐃᐧᓂᔨᕽ. 2ᐁᑯᓯ ᒋᓴᐢ ᐁ ᓇᐢᑫᐧᐊᐧᓯᒫᐟ, ᑭ ᐃᑌᐤ, ᑭᐟ ᐃᑌᔨᑌᓈᐋᐧᐤ ᒋ ᐅᑭ ᑲᓬᐊᓬᐃᐊᓇᐠ ᐊᐊᐧᓯᒣ ᐁ ᑭ ᒪᒑᔨᐃᐧᒋᐠ ᐃᐢᐱᐨ ᑲᐦᑭᔭᐤ ᑳᓬᐊᓬᐃᐊᓇᐠ, ᑳ ᐅᐦᒋ ᐅᒪ ᑭ ᐃᓯ ᑲᑳᐧᑕᑭᐦᐃᐦᒋᐠ? 3ᑭ ᐃᐧᐦᑕᒫᑎᓈᐋᐧᐤ, ᓇᒪᐃᐧᔭ; ᒫᑲ ᑭᐢᐱᐣ ᐁᑳ ᑫᐧᐢᑳᑎᓯᔦᑯ, ᐁᑯᓯ ᒣᐧᐦᒋ ᑲᐦᑭᔭᐤ ᑫ ᐃᓯ ᓂᓯᐊᐧᓈᑎᓯᔦᐠ. 4ᐊᐦᐳ ᒥᓇ ᐊᓂᑭ ᐊᔨᓇᓀᐅᓵᑊ, ᑳ ᑭ ᑕᓱᐃᑯᒋᐠ ᐊᓴᐋᐧᐱᐃᐧᑲᒥᐠ ᓴᐃᓬᐅᐊᒥᕽ ᐁᑯᓯ ᑳ ᑭ ᓂᐸᐃᑯᒋᐠ, ᐊᐊᐧᓯᒣ ᒋ ᑭ ᒪᒑᑎᓯᐊᐧᐠ ᑭᐟ ᐃᑌᔨᑌᓈᐋᐧᐤ ᐃᐢᐱᐨ ᑲᐦᑭᔭᐤ ᐊᔨᓯᔨᓂᐊᐧᐠ ᒉᕒᐅᓴᓬᐊᒥᕽ ᑳ ᐊᔮᒋᐠ? 5ᑭ ᐃᐧᐦᑕᒫᑎᓈᐋᐧᐤ, ᓇᒪᐃᐧᔭ, ᒫᑲ ᑭᐢᐱᐣ ᐁᑳ ᑫᐧᐢᑳᑎᓯᔦᑯ, ᐁᑯᓯ ᑲᐦᑭᔭᐤ ᑭᐢᑕᐋᐧᐤ ᑫ ᐃᓯ ᓂᓯᐊᐧᓈᑎᓯᔦᐠ.
6ᑭ ᐃᐧᐦᑕᒼ ᒫᑲ ᒥᓇ ᐅᒪ ᐋᐁᐧᒋᑲᐣ, ᐯᔭᐠ ᐊᔨᓯᔨᓂᐤ ᑭ ᐊᔮᐁᐧᐤ ᒥᓂᓵᑎᑲᐧ ᐁ ᑭ ᑭᐢᑎᑳᑎᒥᐦᐟ ᐅ ᓱᒥᓂᑭᐢᑎᑲᓂᕽ, ᐁᑯᓯ ᑭ ᐯ ᓇᑕᐋᐧᐯᓂᑫᐤ ᑭᑕ ᒥᓂᓯᐃᐧᔨᐟ; ᒫᑲ ᓇᒪ ᑫᑲᐧᐩ ᑭ ᒥᐢᑲᒼ. 7ᐁᑯᓯ ᑭ ᐃᑌᐤ ᐊᓂᐦᐃ ᑳ ᑲᓇᐁᐧᔨᑕᒥᔨᐟ ᐅ ᓱᒥᓂᑭᐢᑎᑳᐣ, ᒋᐢᐟ, ᐁᑲᐧ ᓂᐢᑐ ᐊᐢᑭ ᐁ ᐯ ᓇᑕᐋᐧᐯᓂᑫᔮᐣ ᑭᑕ ᒥᓂᓯᐃᐧᐟ ᐊᐊᐧ ᒥᓂᓵᑎᐠ, ᐁᑯᓯ ᓇᒪ ᑫᑲᐧᐩ ᓂ ᒥᐢᑫᐣ: ᑭᐢᑲᑕᐦ; ᑖᓀᑭ ᐁᐧᒋ ᐅᑕᒥᐢᑲᕽ ᐊᐢᑭ? 8ᐁᑯᓯ ᐁ ᓇᐢᑫᐧᐊᐧᓯᒥᑯᐟ ᑭ ᐃᑎᐠ, ᑳ ᑎᐯᔨᐦᒋᑫᔭᐣ, ᑭᔮᒼ ᑫᔮᐱᐨ ᐯᔭᐠ ᐊᐢᑭ ᓴᓯᐯᔨᑕᒧᑲᑕᐤ, ᐱᑕ ᓂ ᑲ ᐋᐧᐢᑲ ᐋᐧᑎᑳᑕᐤ ᒥᓇ ᒧᐢᑐᓵᐧᔭ ᓂ ᑲ ᐊᐢᑖᐣ: 9ᑭᐢᐱᐣ ᒫᑲ ᒥᓂᓯᐃᐧᒋ, ᑭᑕ ᒥᔮᐧᓯᐣ; ᒫᑲ ᑭᐢᐱᐣ ᐁᑳ ᒥᓂᓯᐃᐧᒋ, ᑭᔮᒼ ᑭᐢᑲᑕᐋᐧᑲᐣ.
10ᑭ ᑭᐢᑭᓄᐦᐊᒫᑫᐤ ᒫᑲ ᐯᔭᐠ ᐊᔭᒥᐦᐁᐃᐧᑲᒥᑯᕽ ᐁ ᐊᔭᒥᐦᐁᑭᓯᑳᔨᐠ. 11ᐁᑯᓯ ᐳᑎ ᐯᔭᐠ ᐃᐢᑫᐧᐤ ᐁᑯᑕ ᑭ ᐊᔮᐤ, ᐁ ᑭ ᑭᑭᐢᑳᑯᐟ ᓀᓱᐃᐧ ᐊᐦᒑᐦᑲᐧ ᐊᔨᓈᓀᐅᓵᑊ ᑕᐦᑐ ᐊᐢᑭ; ᒥᑐᓂ ᐁ ᑭ ᐊᐧᑭᓯᐟ ᒥᓇ ᐁᑳ ᐁ ᑭ ᑲᐢᑭᑕᐟ ᑭᑕ ᑕᓱᑳᐸᐃᐧᐟ. 12ᐃᐢᐱ ᒫᑲ ᒋᓴᐢ ᐃᐧᔮᐸᒫᐟ, ᑭ ᓇᑐᒣᐤ, ᒥᓇ ᑭ ᐃᑌᐤ, ᐃᐢᑫᐧᐤ, ᑭᐟ ᐋᐸᐅᑲᐃᐧᐣ ᑭ ᓀᓱᐃᐧᓯᐃᐧᓂᕽ ᐅᐦᒋ. 13ᐁᑯᓯ ᑭ ᓵᒥᓀᐤ; ᓭᒫᐠ ᒫᑲ ᑭ ᑕᓱᐊᔮᐤ, ᑭ ᒪᒥᒋᒣᐤ ᒫᑲ ᑭᓭᒪᓂᑐᐊᐧ. 14#ᐁᐠᓴᑕᐢ 20:9,10; ᑎᔪᑕᕒᐊᓇᒥ 5:13,14ᐁᑯᓯ ᑌᐯᔨᑕᕽ ᐊᔭᒥᐦᐁᐃᐧᑲᒥᐠ, ᐁ ᓇᔦᑖᐁᐧᔨᑕᕽ ᒋᓴᓴ ᐁ ᑭ ᐃᔨᓂᑲᐃᐁᐧᔨᐟ ᐁ ᐊᔭᒥᐦᐁᑭᓯᑳᔨᐠ, ᑭ ᐃᑌᐤ ᐊᔨᓯᔨᓂᐊᐧ, ᐊᔮᐊᐧ ᓂᑯᑕᐧᓯᐠ ᑭᓯᑳᐊᐧ ᐃᑕ ᐊᔨᓯᔨᓂᐊᐧᐠ ᑭᑕ ᐊᑐᐢᑫᒋᐠ, ᐁᑯᑕ ᐯ ᐃᑐᐦᑌᐠ ᑭᑕ ᐃᔨᓂᑲᐃᑲᐃᐧᔦᐠ, ᒫᑲ ᓇᒪᐃᐧᔭ ᐁ ᐊᔭᒥᐦᐁᑭᓯᑲᐠ. 15ᑳ ᑎᐯᔨᐦᒋᑫᐟ ᒫᑲ ᑭ ᓇᐢᑫᐧᐊᐧᓯᒣᐤ, ᒥᓇ ᑭ ᐃᑌᐤ, ᑭᔭ ᐅᑕᔭᒥᐦᐁᑳᓱ, ᓇᒪ ᒋ ᑲᐦᑭᔭᐤ ᐊᐃᐧᔭᐠ ᐁᑕᓯᔦᐠ ᐊᐸᐁᐧᐤ ᐅᐟ ᐊᔭᐯᒪ ᐊᐦᐳ ᐅᑌᒪ ᐃᑕ ᐊᓂᒪ ᐁ ᓴᑲᐱᓱᔨᐟ, ᒥᓇ ᐃᑖᐯᑭᓀᐤ ᑭᑕ ᒥᓂᑫᐧᔨᐟ? 16ᓇᒪ ᒋ ᒫᑲ ᐊᐊᐧ ᐃᐢᑫᐧᐤ ᐁ ᐅᑕᓂᓯᐟ ᐁᑊᕒᐁᐊᒼ. ᐁ ᑭ ᒪᒫᒋᑳᐧᐱᑎᑯᐟ ᓭᑕᓇ ᐊᔨᓈᓀᐅᓴᑊ ᐊᐢᑭ, ᐃᑕᐢᑌᐤ ᑭᑕ ᐋᐸᐅᐦᐟ ᐅ ᒪᒫᒋᑲᐧᐱᑎᑯᐃᐧᓂᕽ ᐅᐦᒋ, ᐋᑕ ᐁ ᐊᔭᒥᐦᐁᑭᓯᑳᔨᐠ? 17ᐁᑯᓯ ᐃᐢᐱ ᐅᒪ ᑳ ᐃᑌᐧᐟ, ᑲᐦᑭᔭᐤ ᐊᓂᐦᐃ ᑳ ᐊᓀᐧᔨᒥᑯᐟ ᑭ ᓀᐯᐃᐧᓯᔨᐊᐧ; ᒥᓇ ᑲᐦᑭᔭᐤ ᐊᔨᓯᔨᓂᐊᐧᐠ ᑭ ᒥᔭᐋᐧᑕᒪᐧᐠ ᐊᓂᐦᐃ ᐅᐦᒋ ᑲᐦᑭᔭᐤ ᑫᑲᐧᔭ ᐁ ᑭᐢᑌᔨᑖᑲᐧᓂᔨᑭ ᑳ ᑭ ᑐᑕᒥᔨᐟ.
18ᐁᑯᓯ ᒫᑲ ᑭ ᐃᑌᐧᐤ, ᑖᓂᓯ ᒫᑲ ᐁᑖᐸᒥᓇᑲᐧᕽ ᑭᓭᒪᓂᑐ ᐅᐟ ᐅᑌᓇᐃᐧᐃᐧᐣ? ᒥᓇ ᑖᓂᓯ ᑫ ᐃᓯ ᐋᐁᐧᑖᔮᐣ? 19ᐃᑌᔨᑖᑲᐧᐣ ᑖᐱᐢᑯᐨ ᐯᔭᑯᒥᐣ ᐊᐢᐸᒋᑲᓂ ᑭᐢᑎᑳᓂᐢ, ᓈᐯᐤ ᑳ ᑭ ᐅᑎᓇᕽ, ᐁᑯᓯ ᐁ ᑭ ᐃᓯ ᐁᐧᐱᓇᕽ ᐅ ᑭᐢᑎᑳᓂᕽ; ᐁ ᑭ ᐅᐱᑭᕽ ᒫᑲ, ᐁᑯᓯ ᐁ ᑭ ᑭᐦᒋ ᒥᐢᑎᑯᐊᐧᕽ; ᐱᔦᓯᓴᐠ ᒫᑲ ᐃᐢᐱᒥᕽ ᑳ ᐸᐹᒥᔮᒋᐠ ᐁ ᑭ ᑌᐧᐦᐅᒋᐠ ᐁ ᓯᓭᐧᐸᑭᐠ. 20ᐁᑲᐧ ᒥᓇ ᑭ ᐃᑌᐧᐤ, ᑖᓂᓯ ᑫ ᐃᓯ ᐋᐁᐧᑖᔮᐣ ᑭᓭᒪᓂᑐ ᐅᐟ ᐅᑌᓇᐃᐧᐃᐧᐣ? 21ᐃᑌᔨᑖᑲᐧᐣ ᑖᐱᐢᑯᐨ ᐅᐦᐱᐦᒋᒋᑲᐣ, ᐃᐢᑫᐧᐤ ᑳ ᑭ ᐅᑎᓇᕽ, ᐁᑯᓯ ᑳ ᑭ ᐊᐢᑖᐟ ᓂᐢᑐ ᑳᐧᐸᐃᑳᐣ ᐸᑫᐧᓯᑲᓂᕽ, ᐱᔨᐢ ᒥᓯᐁᐧ ᐁ ᐱᐢᐁᐧᐸᔨᔨᐟ. 22ᐁᑯᓯ ᑭ ᐊᑎ ᓵᐳᐱᒧᑌᐤ ᐅᑌᓈᕽ ᒥᓇ ᑭᐢᑕᐱᐃᐧᓂᕽ, ᐁ ᑭᐢᑭᓄᐦᐊᒫᑫᐟ ᒉᕒᐅᓴᓬᐊᒥᕽ ᐁ ᐊᑎ ᐃᑐᐦᑌᐟ.
23ᐯᔭᐠ ᒫᑲ ᑭ ᐃᑎᐠ, ᑌᐯᔨᐦᒋᑫᔭᐣ, ᒐᑲᐋᐧᓯᓯᐊᐧᐠ ᒋ ᑫ ᐱᒫᒋᐃᒋᐠ? ᐁᑯᓯ ᑭ ᐃᑌᐤ, 24ᐋᐦᑲᒣᔨᒧᐠ ᑭᑕ ᐱᐦᑐᑫᔦᐠ ᑳ ᐊᐱᐢᒋᑕᐋᐧᐠ ᐃᐢᑳᐧᑌᒼ: ᒋᑫᒫ ᒥᐦᒉᑎᐊᐧᐠ, ᑭᐟ ᐃᑎᓈᐃᐧᐤ ᑫ ᑲᑫᐧ ᐱᐦᑐᑫᒋᐠ, ᒫᑲ ᓇᒪᐃᐧᔭ ᑭᑕ ᑲᐢᑭᑖᐊᐧᐠ. 25ᐃᐢᐱ ᑳ ᑎᐯᔨᑕᕽ ᐋᐧᐢᑲᐃᑲᐣ ᐹᑲᒋ ᐸᓯᑯᒋ, ᐁᑯᓯ ᑭᐸᐊᑭ ᐃᐢᑳᐧᑌᒼ, ᑭᔭᐃᐧᐤ ᒫᑲ ᒫᒋ ᓂᐸᐃᐧᔦᑯ ᐊᐧᔭᐃᐧᑎᒥᕽ, ᐸᑲᒪᐊᒣᑯ ᒫᑲ ᐃᐢᑳᐧᑌᒼ, ᐁ ᐃᑌᐧᔦᐠ, ᑌᐯᔨᐦᒋᑫᔭᐣ, ᑌᐯᔨᐦᒋᑫᔭᐣ, ᔪᑌᓇᒪᐃᐧᓈᐣ; ᐁᑯᓯ ᑭ ᑲ ᓇᐢᑫᐧᐊᐧᓯᒥᑯᐋᐧᐤ ᒥᓇ ᑭ ᑲ ᐃᑎᑯᐋᐧᐤ, ᓇᒪᐃᐧᔭ ᑭ ᑭᐢᑫᔨᒥᑎᓈᐋᐧᐤ ᑕᓂᑌ ᐁᐧᒋᔦᐠ; 26ᐁᑯᓯ ᑭ ᑲ ᒫᒋ ᐃᑖᐧᓈᐋᐧᐤ, ᓂ ᑭ ᒥᒋᓱᓈᐣ ᒥᓇ ᓂ ᑭ ᒥᓂᑳᐧᓈᐣ ᐁ ᐋᐧᐸᒥᔮᕽ, ᒥᓇ ᑭ ᑭ ᑭᐢᑭᓄᐦᐊᒫᑳᐣ ᓂ ᐱᒧᐦᑌᐢᑲᓈᓇᕽ; 27#ᓂᑲᒧᓇ 6:8ᒫᑲ ᑭᑕ ᐃᑌᐧᐤ, ᑭᐟ ᐃᑎᓈᐋᐧᐤ, ᓇᒪᐃᐧᔭ ᓂ ᑭᐢᑫᔨᑌᐣ ᑖᓂᑌ ᐁᐧᒋᔦᐠ; ᓇᑲᓯᐠ, ᑲᐦᑭᔭᐤ ᑭᔭᐋᐧᐤ ᑳ ᐊᑐᐢᑳᑕᒣᐠ ᒪᒋᐃᑎᐃᐧᐣ. 28#ᒫᐟᔪ 22:13; 25:30#ᒫᐟᔪ 8:11,12ᑭᑕ ᐃᐦᑕᑲᐧᐣ ᒫᑐᐃᐧᐣ ᒥᓇ ᑭᒋᐢᑳᐱᑌᐃᐧᐣ, ᐃᐢᐱ ᐋᐧᐸᒫᔦᑳᐧᐃᐧ ᐁᑊᕒᐁᐋᒼ; ᒥᓇ ᐋᐃᓴᐠ, ᒥᓇ ᒉᑲᑊ, ᐋᓯᒋ ᑲᐦᑭᔭᐤ ᐅᑭᐢᑭᐁᐧᐦᐃᑫᐊᐧᐠ, ᐅᐟ ᐅᑌᓇᐃᐧᐃᐧᓂᕽ ᑭᓭᒪᓂᑐ, ᐁᑯᓯ ᑭᔭᐋᐧᐤ ᐁ ᐊᐧᔭᐃᐧ ᐁᐧᐱᓂᑲᐃᐧᔭᐠ. 29ᑭᑕ ᐯ ᐃᑐᐦᑌᐊᐧᐠ ᒫᑲ ᐊᐧᐸᓄᑕᕽ ᐅᐦᒋ ᒥᓇ ᓀᑲᐯᐊᓄᕽ ᐅᐦᒋ, ᒥᓇ ᑭᐁᐧᑎᓄᕽ ᒥᓇ ᓵᐊᐧᓄᑖᕽ ᐅᐦᒋ, ᐁᑯᓯ ᑭᑕ ᓇᐦᐊᐱᐊᐧᐠ ᐅᐟ ᐅᑌᓇᐃᐧᐃᐧᓂᕽ ᑭᓭᒪᓂᑐ. 30#ᒫᐟᔪ 19:30; 20:16; ᒫᕒᐠ 10:31ᐁᑯᓯ ᒫᑲ ᒋᐢᐟ, ᐊᔭᐊᐧᐠ ᐅᑖᓇᕽ ᑫ ᓂᑳᓂᒋᐠ, ᒥᓇ ᐊᔭᐊᐧᐠ ᓂᑳᐣ ᐊᓂᑭ ᐅᑖᓇᕽ ᑫ ᐊᔮᒋᐠ.
31ᐁᐊᐧᑲᐧᓂᒪ ᒣᐧᐦᒋ ᑎᐸᐃᑲᐣ, ᑭ ᐯ ᐃᑐᐦᑌᔨᐊᐧ ᐋᑎᐦᐟ ᐹᕒᐊᓯᐊᐧ, ᐁ ᐃᑎᑯᐟ, ᐊᐧᔭᐃᐧ ᒥᓇ ᐅᐦᐱᒣ ᐃᑐᐦᑌ; ᒋᑫᒫ ᐁᕒᐊᐟ ᑭ ᓄᐦᑌ ᓂᐸᐦᐃᐠ. 32ᐁᑯᓯ ᑭ ᐃᑌᐤ, ᓂᔭᐠ ᒥᓇ ᐃᑎᕽ ᐊᓇ ᒪᑫᓯᐢ, ᒋᐢᐟ, ᓂ ᐊᐧᔭᐃᐧᐁᐧᐱᓈᐊᐧᐠ ᒪᒋ ᐊᐦᒑᐦᑲᐧᐠ ᒥᓇ ᓂᐟ ᐃᑐᑌᐣ ᐃᔨᓂᑲᐃᐁᐧᐃᐧᓇ ᐊᓄᐦᐨ ᑳ ᑭᓯᑳᐠ ᒥᓇ ᐋᐧᐸᐦᑭ, ᐊᑎ ᓂᐢᑐ ᑭᓯᑳᑭ ᒫᑲ ᓂ ᑲ ᑭᓯᐃᑯᐃᐧᓯᐣ, 33ᐁᔨᐁᐧᕽ ᒫᑲ, ᐃᑕᐢᑌᐤ ᑭᑕ ᐱᒧᐦᑌᔮᐣ ᐊᓄᐦᐨ ᑳ ᑭᓯᑳᐠ ᒥᓇ ᐋᐧᐸᐦᑭ, ᒥᓇ ᐊᐊᐧᓯᐋᐧᐸᑭ; ᐊᔨᐢ ᓇᒪᐃᐧᔭ ᑭᑕ ᑭ ᐃᑭᕽ ᐅᑭᐢᑭᐁᐧᐦᐃᑫᐤ ᑭᑕ ᓂᐱᐟ ᐊᐧᔭᐃᐧᑎᒫᔨᕽ ᒉᕒᐅᓴᓬᐊᒥᕽ.
34ᐋ ᒉᕒᐅᓴᓬᐊᒼ. ᒉᕒᐅᓴᓬᐊᒼ ᑳ ᓂᐸᐊᒋᐠ ᐅᑭᐢᑭᐁᐧᐦᐃᑫᐊᐧᐠ, ᒥᓇ ᑳ ᑭ ᐸᐱᒪᐧᓯᓈᑕᒋᐠ ᐊᓂᑭ ᑳ ᐃᓯᑎᓴᐊᒫᑲᐃᐧᔭᐣ; ᑖᓂᔨᑯᕽ ᒥᐦᒉᑖᐧᐤ ᓂ ᑲ ᑭ ᒫᐊᐧᓴᑯᓈᑕᔭᐠ ᑭᐟ ᐊᐋᐧᓯᒥᓴᐠ, ᑖᐱᐢᑯᐨ ᒥᓯᔦᐤ ᑳ ᐃᓯ ᒫᐊᐧᓴᑯᓈᐟ ᐅᐟ ᐊᔨᓯᓯᒪ ᓯᐹ ᐅᑕᑕᑲᐧᓂᕽ, ᒫᑲ ᓇᒪᐃᐧᔭ ᑭ ᑭ ᐃᑌᔨᑌᐣ? 35#ᓂᑲᒧᓇ 118:26ᒫᑎᑲ, ᑭᑭ ᑭ ᓇᑲᑕᒫᑲᐃᐧᐣ ᐁ ᓂᓯᐊᐧᓈᑕᕽ, ᒥᓇ ᒫᑲ ᑖᐯᐧ ᑭᐟ ᐃᑎᓈᐋᐧᐤ, ᓇᒪᐃᐧᔭ ᑭ ᑲ ᐋᐧᐸᒥᓈᐋᐧᐤ, ᐹᑎᒫ ᐅᑎᐦᒋᐸᔨᑭ ᐊᓂᒪ ᐃᑕ ᑫ ᐃᑌᐧᔦᐠ, ᓴᐁᐧᔨᑖᑯᓯᐤ ᐊᓇ ᑳ ᐯ ᐃᑐᐦᑌᐟ ᐅ ᐃᐧᔪᐃᐧᓂᔨᕽ ᑳ ᑎᐯᔨᐦᒋᑫᔨᐟ.
انتخاب شده:
ᓭᐣᐟ ᓬᐅᐠ 13: KKMs
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
This Bible text is a corrected edition of the 1908 Western Cree Bible; it is in the public domain.