Matayo 4
4
Okukema oYesu
(Mak 1:12-13; Luk 4:1-13)
1Ebyo owebyawoire, oMwoyo oMutukulye nʼatwala oYesu omwidungu oSitaani okumukema.#Beb 2:18; 4:15 2OYesu oluzwanyuma lwʼokumala enaku 40 nga talya omusana nʼobwire, awo enzala nʼemuluma. 3Kale oSitaani iye omukemi nʼayaba eeri oYesu era nʼamukoba ati, “Ngʼoli Mwana wa Kibbumba, aale olagire amabbaale ganu gasuuke kyokulya.”
4OYesu nʼamwiramu ati, “Bakiwandiikire bati: ‘Omuntu tabba mwomi omu bwizulye ngʼalya kyokulya kyonkani, neye yeetaaga nabuli kibono oKibbumba ekyatumula.’ ”#Ama 8:3
5Awo oSitaani nʼalungamya oYesu okwaba omu kibuga ekitukulye,#4:5 Ekibuga ekitukulye, niikyo oYerusaalemi. kaisi nʼamuniinisya oku kisooto kyʼeYeekaalu. 6Awo nʼakoba oYesu ati, “Ngʼoli Mwana wa Kibbumba, ojuuke ogwe ansi olwʼokubba bakiwandiikire bati:
‘OKibbumba yalagiranga abamalaikabe okukukuuma,
era balikubbaka omu ngalo gyabwe,
kaisi nandi ni weekontola ekigerekyo okwibbaale.’ ”#Zab 91:11-12
7OYesu nʼairamu ati, “Era bakiwandiikire bati: ‘Tokemanga oMusengwa iye oKibbumbawo.’ ”#Ama 6:16
8Tete oSitaani nʼalungamya oYesu okuniina angulu oku lusozi oluwanvu eino, nʼamulagisya obwakabaka obwʼamawanga gonagona obwʼoku kyalo nʼebintu ebyʼamaani byonabyona ebirimu. 9Kaisi awo oSitaani nʼamukoba ati, “Atyanu ebyo byonabyona njaba okubikuwa singa oikirirya okunkomera amazwi nʼonsinza.”
10Awo oYesu nʼamukoba ati, “Sitaani! Onzwe omumaiso, bakiwandiikire bati: ‘Osinzenge Musengwa iye oKibbumbawo, era guwaweereryanga yenkani.’ ”#Ama 6:13
11Kale oSitaani nʼazwawo nʼaleka oYesu, era abamalaika ni baiza ni bamulabirira.
OYesu atandiika okwegesya omu Galiraaya
(Mak 1:14-15; Luk 4:14-15)
12Awo oYesu oweyawuliire ati oYokaana omubatizi bamwigaliire omu mabbuusu, nʼazwa e Yerusaalemi nʼakanga omwitwale lyʼe Galiraaya.#Mat 14:3; Mak 6:17; Luk 3:19-20 13Awo nʼazwa omu kabuga kʼe Naazaleesi nʼayaba nʼabba mutyami omu kibuga e Kaperenawumu ekiri oku nyanza omu bitundu byʼeigwanga lya Zabbulooni nʼebya Nafutaali.#Yok 2:12 14Ekyo kyabbairewo kaisi olwo oKibbumba ekiyatumwire ngʼabitira omu naabbi oIsaaya kituukirire, ekikoba kiti:
15“Inywe abantu bʼomu bitundu byʼe Zabbulooni, nʼoNafutaali,
ebiri okumpi nʼenyanza oGaliraaya oku lubba lwʼomwiga oYoludaani,
abantu ababba omwitwale lyʼe Galiraaya eeyo aBatali Bayudaaya e gibabba.
16Abantu abali omu ndikiirya
baboine ekitangaala ekyʼamaani.
Era nʼabafu omu myoyo,
ekitangaala kibaakiire.”#Isa 9:1-2
17Okuzwa omu kiseera ekyo, oYesu nʼatandiika okulaabba eeri abantu ati, “Mwenenye olwʼokubba obwakabaka bwʼomwigulu bwigereire.”#Mat 3:2
OYesu ayeta abazibuli abana
(Mak 1:16-20; Luk 5:1-11)
18Lumo, oYesu oweyabbaire ngʼabita oku mbale kwʼenyanza oGaliraaya, nʼabona abaganda babiri, oSimooni ogubeeta oPeetero nʼomugandawe Andereya. Babbaire batega akatimba omu nyanza olwʼokubba babbaire bazibuli. 19Awo oYesu nʼabeeta ati, “Mwize mubbe beegi bange! Nalibasuuca bazibuli bʼabantu omu kifo kya bazibuli bʼenyanyi.” 20Amangu ago ni baleka aawo obutimba bwabwe, ni baaba naye.
21Oweyazwire awo ni yeeyongeraku omumaiso, oYesu nʼabona abantu abandi babiri abaganda, oYaakobbo nʼoYokaana abataane ba Zebedaayo. Babbaire bali omu lyato nʼoitewaabwe oZebedaayo nga bakwania obutimba bwabwe, awo oYesu nʼabeeta babbe beegibe. 22Era amangu ago ni baleka aawo eryato nʼoitewaabwe, ni baaba nʼoYesu.
Okwegesya nʼokulamya abalwaire
(Luk 6:17-19)
23Awo oYesu nʼatambula omwitwale lyʼe Galiraaya lyonalyona ngʼayegesya omu makumbaaniro gaabwe, ngʼalaabba eeri abantu aMawuliro aMasa agʼobwakabaka bwʼomwigulu, era ngʼalamya abantu nabuli ndwaire nʼobunafu omu mubiri.#Mat 9:35; Mak 1:39 24Kale amawuliro agamukwataku ni gasalaanira omu kyalo kyʼe Siiriya mwonamwona. Era ni bamuleeteranga abalwaire abʼendwaire egitali gimo, nʼababbaire bakaanya obulumi obubitiriri, nʼabaliku emizimu, nʼabʼempimbu, nʼabasanyalaire, bonabona nʼabalamyanga. 25Awo ebiyindi byʼabantu bingi ino okuzwa omu Galiraaya nʼomwitwale lyʼe Dekapooli, nʼomu kibuga e Yerusaalemi, nʼomu Buyudaaya, era nʼoku lubba lwʼe buzwaisana lwʼomwiga oYoludaani ni bamusengererya.
اکنون انتخاب شده:
Matayo 4: GWR
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2017, Wycliffe BibLe Translators, Inc., All rights reserved.