Yʉanes 1
1
Mɨlɔb mɨ efoʼ
1É l'etɔɔrʉ, mʉr a be die «Lwib» ɨ, a bɛa ó be. Lwib bé e Zyɛm ó b'a be. Lwib a be ó Zyɛm. 2No ó Lwib bé e Zyɛm, bé a bɛa be ó é l'etɔɔrʉ. 3Zyɛm a cye sa yiyɛh ó, é zi mo Lwib. Abe e yʉʉ sɔʼɔ yé a syɛɛ, Lwib abe. 4Tiʼ, yé a be ó é Lwib. Tiʼ yaa, yé ó b'a pɛn myɛn é bʉr. 5Myɛn, wé epan é l'edurʉ; edurʉ l'ákwoʼ mara we#1.5 Guu mbi njoʼa, wé ó: «edurʉ l'adime we»..
6Zyɛm ze ntɨh mʉr, die le Yʉanes. 7Nye a be ó mboʼla, lé eze boʼlo é lɔb myɛn waa. Nye a ze ó, bʉr bɨbɛh, bé jyɛʼɛ taa buʼo yɔɔ boo Zyɛm ebe lɔɔ we waa. 8Ntʉʼ nye mʉr tɨʼ a be myɛn. Nye a kʉ ka ze ó njɨ lé eze boʼlo é lɔb myɛn waa. 9Myɛn waa wé ome ó b'a kʉ be mpaŋ myɛn. Wé epan é si nwa, lé eze kʉn mʉr nyiwɛh. 10Lwib a be ó é si nwa. Zyɛm a cye si waa ó, é zi we. To kœb ó, bʉr o ndɨ egumo e si nwaʼ bɛɛ, bé a baadweʼe nye. 11Nye a ze ó, é lal we. Sa gwar, jyɛɛ ye, anʉa nye. 12Dam be no, bʉr o b'a nʉa nye e duu, jyɛʼɔ taa buʼo yɔɔ boo nye e#1.12 Nkʉ ntɔʼ, «bʉr o b'a nʉa nye, jyɛʼɔ taa buʼo yɔɔ é die le e», bé ó nye a dwe nkul ó, bé diʼe bwan mo Zyɛm ɨ. 13Bé a baabyɛl bwan mo Zyɛm é zi bɨpuno, nkʉ é gwɨma bɨpuno byɔɔ, nkʉ ebe gwɨma mo mʉrʉm. Bé a byɛl ó byɛlɨ no, ebe gwɨma mo Zyɛm.
14Lwib a be ó si byɛl mʉr. Nye a si tiʼe paʼra ga wina. Bɨh bɨ bee moncɛnba me, moncɛnba mo Etiʼe e Mwan mo Zyɛm. Nye a duho boo Sɔŋ we ó, nye mu bɛa be lwɨŋla e ncwɨncwɨa e l'ocyecye mo Zyɛm. 15Yʉanes a si boʼlo é lɔb we, le etuno ó: «Nye ó mʉr me a lwib e bɨn, tiibe e nye e. Me a lɛɛ bɨn ó: “Waa lé eze me pihe ó ndɨ elaa me, ebe, mɛm l'apa byɛl, nyɛɛ a bɛa ó be.”» 16Bɨh bɨbɛh, bé a be ó si bi embɨa le, ndwe e mpwaʼ ncwɨncwɨa we ndɨ elaa ncwɨncwɨa a taare lɛʼlɔ ɛ. 17Zyɛm a si tiile bɨna ga motie, cwɨɨ é Moyiz. No ó, ncwɨncwɨa we e l'ocyecye byɛɛ, byé a ze é bɨna ga ó, dumo e Yesʉs-Krɨst. 18Abe e mʉr ngwar ndɨ si pa bee Zyɛm Sɔŋ. Etiʼe e Mwan e kpɛl le, lé ome, waa ndɨ nteme Zyɛm ɨ, ó b'a lɛʼle bɨna ga Zyɛm.
Mɨtuno mo Yʉanes Ndubʉr
(Mataos 3.1-5; Markus 1.2-6; Lʉkas 3.1-6)
19OYʉden o Yerʉsalɛm, bé a be ó si lomo opara, bé e bʉr be eveh mo Levi boo Yʉanes ó, bé toʼ, to dî e nye ó: «Gwɔɔ, go zé?» 20Yʉanes a si bɨha e be é kpɛŋlɛm. Nye a baakɛla. Nye ó: «Me abe Lœma mulo mo Zyɛm.» 21No ó bʉr baa, bé a bâʼle dî e nye ó: «Yé be no nɛʼɛ, gwɔɔ, go zé ɛ? Zê go ó ndɨ Élie ɛ?» Nye ó: «Hɨʼɨ, me abe Élie.» Bé ntɔʼ dî ó: «Zê go ó ngwiha mɨlɔb, waa Moyiz a bɛa tile, tiibe e nye nwa#1.21 Dwɛʼa Motie 18.15. ɛ?» Nye ó: «Hɨʼɨ, me abe nye.» 22No ó bé a ka dî e nye ó: «A gwɔɔ, go zé?... A bɨh toʼ, to lɛɛ bʉr o lomo bɨh ɨ! Yé go ndɨ elɛɛ, tiibe e mbi mʉr go?» 23No ó Yʉanes a ze bɨha e be ó: «Mpʉ ngwiha mɨlɔb Ezayi a tile e:
“Me ó twii lé etuno é feha si, waa lé elɛɛ ó:
‘Cyelɨ ga mozi mo Da é liim ɔɔ!’”»
24Tina, yé ó, oFarizyɛŋ, bé ó b'a cen mɨlʉmlʉ myaa. 25No ó bé a ze dî e nye ó: «No, yé ó, go abe Lœma mulo mo Zyɛm, abe Élie, abe nteme ngwiha mɨlɔb waa. Yé be no nɛʼɛ, ebe yé go lé edù bʉr ɨ?» 26Yʉanes, nye e be ó: «Mɛm, me edù bɨn ó e modibe. Yé e nuu mʉr lé ecyɛb wâʼ é sama yin, waa bɨn ndɨ agʉa ɛ. 27Nye ó lé edu me é koo pihe. Me abe mbi mʉr lé ejala le etii nye mɨkol mɨ osilpah be e.»#1.27 Epɛʼ osilpah é mokʉ, lé ó syɛɛ mo zɨze elʉa. 28Sa nɨ yiyɛh, yé a syɛɛlɨ ó, ɨ Betani, é guu pɨn dibe Yʉrdɛŋ nkɔm-nkɛɛ, gumo Yʉanes a dù-dù bʉr ɨ.
Ndubo mo Yesʉs
(Mataos 3.13-17; Markus 1.9-11; Lʉkas 3.21-22)
29É mɛn tɨ, Yʉanes ka bee ó, Yesʉs lé eze boo nye! Yʉanes ze lɛɛ ó: «Mbe ga: Ma Ntœme mo Zyɛm lé edwih mɨsyem mɨ bʉr bɨbɛh nwa ɛɛ! 30Lɔb we ó me a lɛɛ-lɛɛ bɨn wi ɔɔ! Wé ó: “Nuu mʉr, nye edu me é koo pihe. Mʉr waa ó lé elaa me, ebe, mɛm l'apa byɛl, nyɛɛ a bɛa ó be.” 31Mɛm mʉr tɨʼ a baataare gʉa nye. Me a ze ó, nye nkʉʼ gʉa nyin é bwa b'Ɨzraɛl tʉŋlʉ. Ebe no ó me a ze dù bʉr e modibe e.»
32Yʉanes a boʼlo nteme ó: «Me a si bee Mbɨambɨa Sisim lé eduho é jobo kʉ, nwɨɨla e l'epɨba, ze fulo é baaa, ze di nye é nyʉl. 33Mɛm mʉr tɨʼ a baataare gʉa nye. No ó, Zyɛm, waa a lomo me ó, me ntaʼ, ze dù bʉr e modibe e, a tɨe me ó: “Mʉr go óbee Sisim wam fulo, ze bebre nye é nyʉl ɨ, mʉr waa ó ndɨ edù bʉr é Mbɨambɨa Sisim.” 34Mɨ bana bee no. No ó me lé eboʼlo ó: “Mʉr nwa, nye ó bana kʉ be Mwan mo Zyɛm” ɨ.»
Yesʉs lé ejebe mpʉn be efoʼ be
(Mataos 4.18-22; Markus 1.16-20; Lʉkas 5.1-11)
35É mɛn tɨ, Yʉanes a be ó si bâʼle ze gumo yaa, bé e bʉʉ ompʉn be oba. 36É jɔʼ nye a bee Yesʉs lé elaa ɛ, nye ze bâʼle lɛɛ ó: «Mbe ga: Ma Ntœme mo Zyɛm ó nwa!»
37Mpʉ ompʉn mo Yʉanes, bé a joʼo sa nye a lɛɛ ɛ, bé ntɔʼ du Yesʉs. 38Yesʉs ze dwibra. ǃNye ka dwɛʼ pihe nɛʼɛ, bee be lé edu nye. Nye ze dî e be ó: «Bɨn bé esaa yé?» Bé e nye ó: «Gumo go lé edi ɨ, Rabbi!» (No yé edwirɔ ó: «Yeʼle».)
39Yesʉs, nye e be ó: «Ntaʼ ga, bɨn bé òbee.» No ó ompʉn baa, bé a to, to bee gumo Yesʉs a di-di ɨ. Bé ntɔʼ lɛŋ moho waa, bé e boo nɔɔ. (Yé a be ó, yé mu lé eto saa mowala monâ mo bii kʉʼ.)
40Nuu mpʉn é sama ompʉn oba bé a joʼlo lɔɔ mo Yʉanes, le edu Yesʉs ɨ, a be ó ncyom mo Simɔn Pyɛr, die le Andreas. 41No ó, mʉr efoʼ Andreas a taare to kœb ɨ, a be ó tʉl we Simɔn. Nye e nye ó: «Bɨh bɨ bee waa ndɨ Messie ɨ!» (No yé edwirɔ ó: «Lœma mulo mo Zyɛm».)
42No ó Andreas a ze to e Simɔn gumo Yesʉs a be e. Yesʉs ze dwɛʼ Simɔn é tʉʉʉŋ. Nye e nye ó: «Go ó Simɔn, mwan mo Yʉanes. Go óka jebɔ ó, Sefas» —no yé ó Pyɛr#1.42 No, yé ó Ekoʼ..
43É mɛn tɨ, Yesʉs ze tiʼe é leme we ó, nye ejala le eto é lal Galɨle. Nye ze bee Filip. Nye e nye ó: «Duʼo me.» 44(Filip a be ó mʉr Betsɛda, mpʉ mo Andreas bé e Pyɛr.) 45Pie tɨ, Filip ze to bee Natanaɛl. Nye e nye ó: «Bɨh bɨ bee mʉr lɔb we ndɨ tila é motie mo Moyiz, waa ogwiha o mɨlɔb, bé a tile, tiibe e nye e! Mʉr waa, nye ó Yesʉs, mwan mo Yoseb, mʉr Nazarɛt!» 46Natanaɛl, nye e Filip ó: «Zê Kalara Zyɛm, nye elɛɛ ó, yʉʉ mpaŋ sɔʼɔ, yé ó e nkul eduho Nazarɛt ɛ?» Filip, nye e nye ó: «Ntaʼ, ze bee.»
47É jɔʼ Yesʉs a bee Natanaɛl lé eze nko nye a be e, nye ó: «Go bana kʉ be cyecye mʉr Ɨzraɛl, abe e bɨkʉʉŋʉ!» 48No ó Natanaɛl a ze dî e Yesʉs ó: «Gwɔɔ, go egʉa me no é wáa paʼ?» Yesʉs, nye e nye ó: «Me be ó si bɛa bee go é jɔʼ go be é bene yʉʉ lɨ figye e. É jɔʼ yaa, Filip l'apa jebe go.» 49Natanaɛl, nye e nye ó: «Yeʼle, go ó bana kʉ be Mwan mo Zyɛm cyecye! Go ó ndɨ njwɨɨbʉr lal Ɨzraɛl!» 50Yesʉs ze dî e nye ó: «Zê go lé ejyɛʼ taa buʼo yo boo me ó, ebe, me be si lɛɛ e go ó, me si bee go é bene yʉʉ lɨ figye ɛ? Go óbâʼle bee bɨsa bɨnɨnɨ, laa yinɨ!»
51Yesʉs ze ko tɨʼ ó: «Me elɛɛ bɨn cyecye ó nɛɛ: bɨn bé óbee jobo lé ebɔa mbɨembɨe e lʉ Mwan mo Mʉr, beengles mo Zyɛm lé ebere le efulo tɨ.»
اکنون انتخاب شده:
Yʉanes 1: ozmBad
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2002, Wycliffe Bible Translators, Inc. All rights reserved.