Yʉanes 10
10
Kɨkɛna mpaŋ kobla bɨntœme
1«Me elɛɛ bɨn cyecye ó nɛɛ: waa nyiwɛh ndɨ acwɨɨ é l'ebe e nkal bɨntœme lé eni tɨʼ, waa ndɨ ebula to ntaa ekɔʼ é nko paʼ fih ɨ, nye ó ndɨ ndiblʉ, nkʉ zilngan. 2Waa lé eni é l'ebe e, nye ó ndɨ kobla bɨntœme. 3Mʉr lé ecyɛb é vaa ɛ, nye edib ebe ó kobla bɨntœme. Bɨntœme, byé edweʼe ecel le. Nye ejebe bɨntœme bye ó, behe ntœme yiyɛh e mpaŋ die le, bé e boo nɔɔ ntɔʼ pyal kʉl. 4É jɔʼ nye óbe si pyɛl byaa bye bibyɛh kʉl ɨ, nye mʉr tɨʼ ó lé ecyɛb bye zi dolo, bɨntœme byɛɛ lé edu nye, ebe, byé egʉa ecel le. 5Byé abe e nkul edu mʉr byé ndɨ adweʼe ecel ɨ. Byé ókpɛɛ nye ó, kpɛɛ kpɛŋɨ, ebe, byé adweʼe ecel mo nyiha mʉr.»
6Yesʉs a lɛɛ be mokan monɨ ó, bɨntuntu, bɛɛ l'ajoʼo sa nye a lɛɛ be tɨʼ ɨ.
7Yesʉs a ze bâʼle lɛɛ e be ó: «Me elɛɛ bɨn cyecye ó nɛɛ: me ó ebe e nkal bɨntœme. 8Baa bɨbɛh bé a ze efoʼ e me e, bé ó mɨndiblʉ ndwe e bɨzilngan. Sa gwar, bɨntœme, byé a baajoʼo be. 9Me ó ebe. Mʉr nyiwɛh lé eni é me e, nye óbi tiʼ molu mo mpoʼ mɨmɛh. Nye óni-ni lé ecwɨɨ é l'ebe, bâʼle pyal-pyal kʉl. Nye ókœb mode me. 10Ndiblʉ, wé eze ó, lé eze díbe, le ejʉ, le egbah. Mɛm a ze ó, bʉr biʼe tiʼ molu mo mpoʼ mɨmɛh, ndwe nteme ó, bé buʼba é bɨtiʼ byɔɔ é me.
11«Me ó mpaŋ kobla bɨntœme. Mpaŋ kobla bɨntœme, nye edwe tiʼ ye é ziila e bɨntœme bye. 12Mʉr lé esea é l'efu e mɔn ɨ, nye abe mbi kobla bɨntœme waa. Bɨntœme nye ndɨ ebaʼle e, byé abe byaa bye. ǃNye si bee tir monyan nɛʼɛ, nye ókpɛɛ, liʼe bɨntœme, é mbi ndɨ ó, tir waa, nye e nkul emɛr biʼ bɨntœme, gbah byʉʉ! 13Nye ekpɛɛ ó, ebe, nye esea ó njɨ mɔn. ǃƗ ebebe si pyal é bɨntœme nɛʼɛ, yé alɛɛ nye sɔʼɔ. 14-15Me ó mpaŋ kobla bɨntœme. Mpʉ Sɔŋ wam lé egʉa me e, me egʉa nye. Ebe no ó me lé egʉa bɨntœme byam, bɨntœme byam gʉa me e. Me edwè, jala e bɨntœme byam byaa. 16Me e byʉʉ bɨntœme l'apa ni é nkal bɨntœme nwaʼ ɛ. Yé ekʉ jala ó, me toʼ, to nʉa bye, niŋle bye é nkal. Byé ójoʼo ecel lam. Bɨn e boo nɔɔ, bé óbe ó daa egwar, kobla bɨntœme ngwar.
17«Me edwè, jala e bye. Ebe no ó Sɔŋ wam ndɨ ekpɛl me e. Me ótaare dwè; me òka nʉa tiʼ yam. 18Mʉr, nye aŋa nʉa me tiʼ yam. Me edwe ye ó dweʼ, e nkul wam me mʉr tɨ. Me e nkul edwe ye, bula nʉa. Yé ó syɛɛla Sɔŋ wam a dwe me nkul ó, me saʼ ɛ.»
19OYʉden ze bâʼle bɔʼa motwii é jɔʼ bé a joʼo lwib nɨ ɨ. 20Buobuo bʉr o sama yɔɔ, bé a lɛɛ ó: «Nye e l'eleme! Nye ó gʉ! Ebe yé bɨn lé ejoʼlo nye e?» 21Bʉʉ, bé ó: «Mʉr ndɨ esia e moleme e, nye abe e nkul elwib mpʉnʉ. Zê mʉr ndɨ esia e moleme e, nye e nkul ebɛɛ ontim mih ɛ?»
OYʉden, bɨ bene Yesʉs
22Yé a be ó jɔʼ kolo. Bʉr o Yerʉsalɛm, bé a be ó lé efwal lé eze bwalɔ ebʉʼ le Epub e Mpah Zyɛm#10.22 Mpah Zyɛm Yerʉsalɛm bé lé etwar wâʼ ɛ, a be ó waa mba, waa bé a fumo, sil ɨ. Bʉr o Rom, bé a si ka buʼo nye é mbu 70. Ebʉʼ le Epub, lé a bwalɔ-bwalɔ ó, tɔɔ mɨmoho mwom é ngɔn esie e mbu, lé etoŋlo jɔʼ Makabe, bé e bɨzima bye, byé a bâʼle pub Mpah Zyɛm pie jɔʼ bʉr o Siria, bé a sa mɨndwɛa tɨʼ lé edwiibɨ bɨbaŋabaŋa bɨdweʼle ndɨ mɨkpɛʼa ɛ.. 23Yesʉs ze to le ekœʼ é sikuo yé a be mbɨembɨe é jahla bii mo Zyɛm, yaa yé a jwɨrɔ die ó, Sikuo mo Salomɔŋ ɨ. 24OYʉden ze to kɛb nye. Bé ze dîŋɔ ó: «Go óka fil bɨh mɨleme si é yáa jɔʼ? Yé be ó, go ó ndɨ Lœma mulo mo Zyɛm nɛʼɛ, lɛŋɨ bɨh no, anyam nʉm.» 25Yesʉs, nye e be ó: «Me a si bɛa lɛɛ bɨn ya, bɨn bɛɛ l'abuʼla. Bɨsyɛɛla me lé esa é nkul die mo Sɔŋ wam ɨ, byé ó ndɨ eboʼlo mbi mʉr me ndɨ ɨ. 26Bɨn di, abuʼla me ó, ebe, bɨn bé abe é daa e bɨntœme lam. 27Bɨntœme byam, byé ejoʼo ecel lam. Me egʉa bye. Byé nteme, byé edu me é koo pihe. 28Me edwe bye tiʼ molu mo mpoʼ mɨmɛh. Byé ákwoʼ dim é nkɔb bʉr. Abe e mʉr ópɛʼ me bya é mobo. 29Sɔŋ wam, mʉr a ntɨh me bya ɛ, nye e nkul, laa bʉr bɨbɛh. No ó, mʉr, nye abe e nkul edɛʼ sɔʼɔ é mbo we. 30Bɨh e Sɔŋ wam, bé ó sa gwar.»
31OYʉden ze bâʼle nkɛɛ mokoʼ ó, bé lumo ó nye. 32Yesʉs, nye e be ó: «Me a si lɛʼle bɨn buobuo mɨmpaŋ bɨsyɛɛla Sɔŋ wam a lɛɛ ó, me saʼ ɛ. Lɛŋɨ ga me: bɨn lumo me mokoʼ ebe yaa yáa?» 33OYʉden, bé e nye ó: «Bɨh bé agwɨm lumo go mokoʼ ebe yʉʉ mpaŋ syɛɛla yo. Yé ó, ebe, go epyeh Zyɛm! Gwɔɔ mʉr, go ejwɨʼa e Zyɛm#10.33 Mʉr ndɨ ebee ó, nye ó mpɛh mwan mo Zyɛm ɨ, nyi bee nteme ó, bé e Zyɛm ó ndɨ é cye gwar. Nye ebee ó, bé e Zyɛm ó ndɨ e mbi tiʼ ngwar, lé esiila e cye bʉʉ bʉr ndɨ tɨʼ ɨ..» 34Yesʉs, nye e be ó: «Zê yé abe tila é l'okalara o motie win ó: “Zyɛm a lɛɛ ó, bɨn bé ó ozyɛm” ɛ? 35Bɨn bé egʉa ó, bɨna ga bé abe e nkul edimle sɔʼɔ é bim bɨsa ndɨ tila é Kalara Zyɛm ɨ. Zyɛm a jebe ó, ozyɛm ó, baa nye a ntɨh lɔɔ we e. 36A, ebe yé bɨn lé elɛɛ ó, me epyeh nye e? Zê yé ó, ebe, me si gwih bɨn ó, me ó Mwan we ɛ? Me ó kʉ be waa Zyɛm Sɔŋ a pɛh, ntɨh kaʼ é si nwaʼ ɛ. 37ǃMe baasa bɨsyɛɛla mo Sɔŋ wam#10.37 Sa Yesʉs lé elwib wâʼ ɛ, yé ó bɨsyɛɛla Zyɛm Sɔŋ a lɛɛ ó, nye ntaʼ, ze sa kaʼ é si nwaʼ ɛ. nɛʼɛ, abuʼla ga me. 38Sa gwar, ǃme si sa bɨsyɛɛla bye nɛʼɛ, dam ka be ó, bɨn bé abuʼla me, jyɛʼɛ ga taa buʼo yin boo me ebe bɨsyɛɛla byam byaa. É zi waa ó bɨn bé ófuʼla gʉa ó, Sɔŋ wam, nye etiʼe ó é me e; me ó é zyɛŋa wih boo nɔɔ ɛ.» 39Bé ntɔʼ kʉ bâʼle saa ó, bé naʼ ó nye mobo é nyʉl. Nye ze fɛbra be.
40Yesʉs ze bâʼle to pɨn dibe Yʉrdɛŋ nkɔm-nkɛɛ, nko Yʉanes a dù-dù bʉr ɨ, to di gʉ. 41Buobuo bʉr ze to kœb nye gʉ. Bé ó: «Yʉanes a be ó, asa dweʼle nkul we gwar. Sa gwar, sa yiyɛh nye a lɛɛ-lɛɛ, tiibe e mʉr nwaʼ ɛ, yé ó bana kʉ be cyecye.» 42Buobuo bʉr ntɔʼ kʉ ze jyɛʼ taa buʼo yɔɔ boo Yesʉs.
انتخاب شده:
Yʉanes 10: ozmBad
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2002, Wycliffe Bible Translators, Inc. All rights reserved.