Yʉanes 9
9
Mʉr a byɛl ntim ɨ
1Yesʉs lé eka laa yʉʉ gumo nɛʼɛ, nyi ze bee nuu mʉr a byɛl ntim ɨ. 2Ompʉn be ze dî e nye ó: «Yeʼle! Ebe yé mʉr nwaʼ a byɛl ntim ɨ? Zê yé a be ó ebe syem nye mʉr tɨʼ a sa ɛ? Zê yé a be ó ebe syem waa obyɛl be, bé a sa ɛ?» 3Yesʉs, nye e be ó: «Yé abe ebe syem we, nkʉ waa obyɛl be. Nye a byɛl ntim é l'efu ó, bɨsyɛɛla mo Zyɛm, byé nkʉʼ nyin é nye. 4Cye yiyɛh moho dina ɛ, bɨna saʼ ga syɛɛla mo Mʉr a ntɨh me e, ebe, pum, wé mu ó lé eze dwine, jɔʼ mʉr ndɨ, abe e nkul eka sea ɛ. 5Cye me dina é si nwaʼ ɛ, me ó sa lé epɛn myɛn é bʉr bɨbɛh ɛ.»
6É jɔʼ Yesʉs a sil lɛɛ no e, nye ntɔʼ ze syɛɛ mocyeele si, ze pulo bwa bɨbwah e mocyeele me, ntɔʼ lœm ntim bya é mih. 7Nye e nye ó: «Toʼ, to jwɨ̀ɨ mih é bœh Siloe» —no, yé edwirɔ ó Lʉmlʉ. Ntim ze to jwɨ̀ɨ mpom. Nye a ka bula ó, nye mu lé ebee!
8Bʉr o nduo ye ndwe e baa b'a bee-bee nye lé esa mɨnjɔʼ ɛ, bé a dîila ó: «Ɔ! Ntʉʼ mʉr a di-di wâʼ ndindil lé ejaʼ bɨsa nwaʼ ɛ?» 9Baʼ bʉr, bé a bɨha ó: «Nye ó nɨ!» Bʉʉ, bé ó: «Yaaa. Yé abe nye. Bé e nɔɔ, bé enwɨɨla ó nwɨɨla.»
Mʉr a be ntim nɨ, nye a be lé elɛɛ-lɛɛ e be ó: «Yé ó me mʉr tɨ!» 10Bé ze taare lé edîŋɔ nye motia. Bé ntɔʼ dî e nye ó: «A mih mo, me bɔa nyá ɛ?» 11Mʉr nɨ, nye e be ó: «Mʉr ndɨ e die ó, Yesʉs ɨ, nye be ó si pulo bwa bɨbwah, lœm me bya é mih. Nye e me ó, me toʼ é bœh Siloe, to jwɨ̀ɨ mpom. Me ntɔʼ to. Jɨh tɨʼ me kʉ sil jwɨ̀ɨ mpom, yé ó me ka taare lé ebee e.» 12Bé ze dî e nye ó: «Mʉr waa, nye nko?» Nye ó: «Me agʉa nko nye mu ɨ.»
OFarizyɛŋ, bé edî ntim motia
13Bʉr baa ze nʉa mʉr a be ntim ɨ, to e nye gumo oFarizyɛŋ, bé a be e. 14Tina, yé ó, Yesʉs a pulo bɨbwah, jomo mʉr nɨ mih ó, é moho saba! 15Pie tɨ, oFarizyɛŋ, bé ze dî e mʉr nɨ, sa yé a sa ó, nye beŋɨ ɨ. Nye ze bɨha e be ó: «Nye be ó si lœm me bwa bɨbwah é mih. Me ze to jwɨ̀ɨ mpom. No ó, banana, me mu ó lé ebee.» 16Baʼ oFarizyɛŋ, bé ó: «Mʉr sa mbi syɛɛla wiʼ ɨ, nye abe e nkul eduho boo Zyɛm, ebe, nye adu mompene mo moho saba.» Bʉʉ, bé ó: «Nyá? Syɛl mɨsyem, nye abe e nkul esa bɨdweʼle bɨ nkul mbi wi.»
Bʉr ntɔʼ bɔʼa monkɔb moba.
17Pie tɨʼ ó oFarizyɛŋ, bé a ka dî mʉr a tiʼɔ ó: «Gwɔɔ lɛɛ é yé, tiibe e mʉr bɛɛ go mih ɨ?» Nye ó: «Ngwiha mɨlɔb ó nɨ ʉʉ!»
18Tina, yé ó, oYʉden, bé a be é jɔʼ yaa ó, akpɛl buʼla ó, nye a taare be ó ntim, nye ntɔʼ ka bee. Bé ze baŋle obyɛl be, 19ze dîŋɔ be motia. Bé a dî e be ó: «Zê yé cyecye ó, mʉr nwa, nye ó mwan win ɛ? Zê bɨn bé lé ekʉ bana lɛɛ ó, nye a byɛl ó, ntim ɛ? No ó, yé ka sa ó, nye beŋɨ é bananaʼ mpʉʼ ɨ?» 20Obyɛl be ze bɨha e be ó: «Bɨh bé ekʉ gʉa ó, yé ó mwan wih. Bɨh bé egʉa nteme ó, nye a byɛl ó, ntim. 21Sa gwar, bɨh bé agʉa sa sa ó, nye beŋɨ ɨ. Bɨh bɛɛ, bé apa kʉ gʉa mʉr bɛɛ nye mih ɨ. Dîʼe ga nye mʉr tɨ. Nye mu ó soho. Nye ejala le ebɨha mɨlɔb lé edwɛʼ nye e.» 22Tina, yé ó, obyɛl be, bé a lwib no ó, ebe, bé a be ó lé ekpɛɛ oYʉden, ebe, oYʉden baa, bé a be ó si di twii paʼra wɔɔ ó, ǃɨ mʉr si kʉ lɛɛ ó, Yesʉs, nye ó Lœma mulo mo Zyɛm nɛʼɛ, nye ócyelɔ é pɨŋ, aka to é mpah mɨnjwɨʼla wɔɔ. 23Ebe no ó obyɛl be, bé a lɛɛ ó: «Nye mu ó soho. Dîʼe ga nye mʉr tɨʼ» ɨ.
24OFarizyɛŋ, bé ze bâʼle baŋle mʉr a tiʼɔ ɛ. Bé e nye ó: «Lɛŋɨ ocyecye é mih mo Zyɛm. Bɨh bé egʉa ó, mʉr nɨ, nye ó syɛl mɨsyem.» 25Nye ó: «Me agʉa nkʉ nye ó syɛl mɨsyem, nkʉ nye abe nye. Sa me lé egʉa ɛ, yé ó njɨ ó, me a be ó ntim. No ó, banana, me mu ó lé ebee é sʉlʉlʉ.» 26Bé ze bâʼle dî e nye ó: «Nye sa go nyá ɛ? Nye bɛɛ go mih nyá ɛ?» 27Nye ó: «Me be ó si bɛa lɛɛ; bɨn bɛɛ akpɛl joʼo. Ebe yé bɨn lé eka kpɛl ó, me bâʼla lɛɛ bɨn sa yaa ɛ? Zê bɨn nteme mu lé egwɨm di ompʉn be ɛ?»
28Bé ze taare lé elwɨɨ nye. Bé e nye ó: «Gwɔɔ, go óbɛm di mpʉn we. Sa gwar, bɨh bɛɛ, bé ó ompʉn mo Moyiz. 29Bɨh bé egʉa ó, Zyɛm a be ó si lwib e Moyiz. Sa gwar, waa nɨ, bɨh bé agʉa nko nye a duho e.» 30Mʉr nɨ, nye e be ó: «Sa jehe, yé ó, bɨn bé agʉa nko nye a duho e, nyɛɛ yɛɛ si bɛɛ me mih. 31Bɨna bé egʉa ga ó, Zyɛm, nye abe lé ejoʼo é jɔʼ osyɛl o mɨsyem lé ejwɨʼla e nye e. Nye egʉa joʼlo ó, njɨ mʉr lé edwiibɨ nye, waa lé esa gwɨma ye e. 32Bɨna bé apa joʼo ga bé lé elɛɛ é mbi jɔʼ yiʼ ó, mʉr fih mʉr kɛ̀l, nyi tiʼ nuu mʉr a byɛl ntim ɨ. 33Nkʉ mʉr waa a be ó be, aduho boo Zyɛm nɛʼɛ, mpa nye baabe e nkul esa sɔʼɔ no.» 34Bé e nye ó: «Ngbàa go a byɛl, go ó njɨ syɛl ebebe. Go ebuʼla ó, go e nkul eyeʼle bɨh yʉʉ sɔʼɔ ɛ?» Ntɔʼ cyelɔ nye é pɨŋ.
Mʉr nyiwɛh lé edi é l'ebebe e, nye ó ndɨ ntim
35Yesʉs ntɔʼ joʼo ó, bé a be ó si cyel mʉr nye a tiʼ ɨ, é pɨŋ. Nye ze bɔma e nye. Nye ze dî e nye ó: «Zê go lé ejyɛʼ taa buʼo yo boo Mwan mo Mʉr ɛ?» 36Nye e nye ó: «Da, lɛŋɨ me: zé ndɨ “Mwan mo Mʉr” ɨ? Paʼ kʉ lɛʼle me nya, ó me jyɛʼɛ taa buʼo yam boo nye.» 37Yesʉs, nye e nye ó: «Gɨ bee nye. Nye nteme ó lé elwib e go é bananaʼ nwa.» 38Mʉr nɨ, nye e nye ó: «Da, mɨ jyɛʼ taa buʼo yam boo go!» Nye ntɔʼ bɨʼ mpom we si é mih me lé edwiibɨ nye.
39Yesʉs, nye ó: «Me a ze kaʼ é si nwaʼ ó, lé eze dwe bʉr o ndɨ egumo e si waa ɛ, mobe. Me a ze sa ó, ontim, bé beŋɨ; baa lé ebee e, bɛɛ lihba ontim.» 40Bʉʉ oFarizyɛŋ bé e boo nɔɔ, bé a be e, ze joʼɔ lwib nɨ. Bé ntɔʼ dî e nye ó: «Zê bɨh bɛɛ nteme bé ó ontim ɛ?» 41Yesʉs, nye e be ó: «Nkʉ bɨn bé a be ó be, be ontim nɛʼɛ, mpa bɨn bé ó, abe e syem. No ó, mpʉ bɨn lé elɛɛ ó, bɨn bé ebee e, ebe no ó bɨn ndɨ bʉr o mɨsyem ɨ.»
انتخاب شده:
Yʉanes 9: ozmBad
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2002, Wycliffe Bible Translators, Inc. All rights reserved.