Lʉkas 17
17
Mobɔʼ mé óbɨm bʉr é mɨleme e
1No ó Yesʉs a lɛɛ e l'ompʉn be ó: «Yé óbe é jɔʼ yiyɛh ó e mozi bʉr, bé ódɨ jyɛl tɨʼ, ó bé saʼ mɨsyem ɨ. Sa gwar, a vwaʼ e mʉr ógomlo bʉʉ bʉr é zi waa ɛ! 2Laa ó, mʉr gomla mʉr twaʼa é baa bam é zi mɨsyem, yé a ngbaa mbɨa é paʼ mo zizii wam waa ó, bé tiila we bwaʼbwaʼ ekoʼ#17.2 Ekoʼ laa, lé a be ó mpʉ nkoʼ bé a dɨ bɨlan e nye lé esie ble e. é twii, wé guhɔ é maŋ, dwè, abe ó, wé gomla mʉr twaʼa ngwar wam é zi mɨsyem waa. 3Gʉa di ga ncye! ǃƗ mɨɔ go si sa syem nɛʼɛ, láŋa nye baa ebebe é lɔb syɛɛla ebebe ye yaa. ǃNye si gwɨma ye, ndwe le edwir leme nɛʼɛ, pɛʼɛ baa ebebe go láa nye e. 4ǃNye si sa syem é paʼ go zɔʼ tambɛl é moho ngwar nɛʼɛ, é jɔʼ yiyɛh nye óbâʼle lɛɛ e go ó: “Mɨ gwɨma ebebe laa” ɛ, yé ekʉ jala ó, go pɛʼɛ baa ebebe go láa nye tɨʼ ɨ.»
Buʼo
5Mɨlʉmlʉ mo Da, myé a lɛɛ e nye ó: «Bulɨ bɨh buʼo yih.» 6Da ntɔʼ bɨha ó: «ǃBɨn si be e ma peh buʼo titia, dam be bim boho nʉo nɛʼɛ, bɨn bé óbɛm kʉ lɛɛ e lɨ sikomɔr yiʼ ó: “Muna wâʼ e mɨkaale myo mimyɛh. Go à to cyɛb é maŋ!” Yé nteme ntɔʼ sa bɨn mojoʼo.»
Osyɛl o mosa ndɨ ajala ɛ
7«Bɨna paʼ jwɨʼ ga ó, mʉr sama yin, nye e syɛl mosa we lé eli nye bɨpeme, nkʉ koblo daa e bɨntœme le e. É jɔʼ nye lé ebee syɛl mosa waa lé eduho é bɨsyɛɛ ɛ, zê nye e nkul elɛɛ e nye ó: “Kpahba di si é teble, go deʼ” ɛ? 8Tɨtoʼo! Nye ólɛɛ e nye ó: “Jama me mode, go òsiila mɨkan, go òsea e me jyɛm me dina lé ede mode le monwoʼ e. Go òbono ó, me paʼ taare sil. Pie tɨʼ ó go òka de e.” 9Zê nye si dwe syɛl mosa we ekiba é lɔb bɨsa bibyɛh nye a lomo nye ó, nye saʼ ɛ? Tɨtoʼo!
10«Jwɨʼ gwar e bɨn nteme: é jɔʼ bɨn bé ósil sa mɨlʉmlʉ mimyɛh ɛ, lɛŋɨ ga paʼra win ó: “Bɨna ga bé ó osyɛl o mosa o ndɨ ajala ɛ. Bɨna bé a kʉ ka sea ga ó njɨ bim syɛɛ nye a lomo bɨna ó, bɨna sea ga ɛ.”»
Mɨzɨzam ewʉm lé epɛʼɔ zam é monyʉl, sa yé a lœʼ be é mih mo Zyɛm ɨ
11É cyen Yesʉs a be lé eto Yerʉsalɛm ɨ, nye a be ó lé edu mpaʼa wé a be paʼra lal Samari le Galɨle e. 12É jɔʼ nye a pyal é nuu kwar ɨ, bʉrʉm ewʉm ze bɔma e nye, mɨzɨzam e mɨzɨzam. Myé a cyɛb ó, ba pɨnʉ, 13ntɔʼ yɨmɔ motwii, le elɛɔ ó: «Yesʉs ɔɔ! Da ɔɔ! Jwɨʼɨ bɨh nkoo ɔɔ!» 14Yesʉs ze bee be. Nye ó: «Toʼ, to lɛʼle ga opara mo Zyɛm monyʉl mɨn ɔɔ.»
Bé dina lé eto no nɛʼɛ, zam ntɔʼ pʉʼa be é monyʉl, sa yé a lœʼ be é mih mo Zyɛm ɨ. 15Nuu mʉr é sama yɔɔ, é jɔʼ nye a bee ó, nyi tiʼe e, nye ntɔʼ buulo ntuʼo, lé edwiibɨ Zyɛm e twii kʉ. 16No ó nye a ze bɨʼ mpom we si é mih mo Yesʉs, lé edwe nye ekiba. To kœb ó, mʉr waa a be ó mʉr Samari! 17Yesʉs ntɔʼ lɛɛ ó: «Bʉr ewʉm bɨbɛh, bé be ó si pɛʼɔ sa yé a lœʼ be é mih mo Zyɛm ɨ. A bʉʉ bʉr bu bɛɛ, bé mu nko ɛ? 18Zê nuu mʉr é sama yɔɔ, nye atoŋlo ba ebula, ó nye ntaʼ, ze dwe Zyɛm kum ɛ? Mʉr sa no e, yé be ó ndìndìl wiʼ wé ome!» 19No ó Yesʉs a lɛɛ e nye ó: «Mʉŋa si, laŋa. Buʼo yo, yi tiʼ go!»
Jwɨ̀ʼa mo Zyɛm
20É yʉʉ jɔʼ, oFarizyɛŋ, bé a ze dî e Yesʉs ó: «É yáa jɔʼ Zyɛm ópa kʉ cyel jwɨ̀ʼa ye cyecye ɛ?» Nye e be ó: «Zyɛm, nye aŋa cyel jwɨ̀ʼa ye é mpʉ mih mo bʉr, mé óbe lé ebono bee e. 21Bé aŋa lɛɛ bɨn ó: “Yé ó yi”, “Beŋɨ ga ye” nkʉ nteme ó: “Nye ó ndɨ kaʼ nwa!” Bɨn bé ejala le egʉa ó, jwɨ̀ʼa mo Zyɛm, yé mu ó cyela é mɨleme min tʉŋlʉ.»
Mpʉ Mwan mo Mʉr óbula ze e
(Mataos 24.26; Markus 13.24; Lʉkas 21.25)
22No ó nye a lɛɛ e l'ompʉn be ó: «Yé ópyal jɔʼ bɨn bé ógwɨm di e Mwan mo Mʉr sama ɛ, dam be moho ngwar. Sa gwar, yé aŋa ka bana. 23ǃƗ bʉr si lɛɛ e bɨn ó: “Dwɛʼa ga ka”, nkʉ nteme ó: “Dwɛʼa ga wâʼ” nɛʼɛ, mʉr ayi to gʉ, nkʉ du be, 24ebe, mpʉ ndweh mpie lé edweh é jobo, bʉr bɨbɛh lé ebee we é keb-keb ɨ, no nteme ó Mwan mo Mʉr ósa é dobo nye óbula ze e. Nye óbeɔ ó, é mɨpaʼ mɨ si mimyɛh! 25Yé ejala yɛɛ ó, nye taara sia e mɨtuu é buobuo. Bʉr o mya wi, bé ópyeh nye nteme.»
Zé óbe lé ebono nye é l'esie e mbi jɔʼ yi?
(Mataos 24.36; Markus 13.32; Lʉkas 12.34)
26«Mpʉ bɨsɔʼɔ byé a syɛɛlɨ é jɔʼ mo Noe e, jwɨʼ gwar e gwar yaa nteme ó ngo syɛɛ é dobo Mwan mo Mʉr óbula ze e. 27Bʉr o jɔʼ yaa, bé a dɨ sa ó, de mode, le enyʉl monwoʼ. Bé a dɨ sa nteme ó, baʼ lé eba bʉba; bʉʉ lé ecenɔ mɨsile myɔɔ é moba, to pyal é dobo Noe a ni é byɛl tʉŋlʉ ɨ. Mpɨɨ nɨnɨ ntɔʼ ni ndwe le ejʉ bɨbɛh. 28Jwɨʼ gwar yaa, é jɔʼ mo Lot, baʼ bʉr, bé a be ó lé ede-de mode le monwoʼ, bʉʉ, lé ebwam bɨsɔʼɔ le ebâʼle bɛma. Bé a be nteme ó lé eli bɨpeme le efumo mɨmbɛr. 29É moho Lot a mʉa ɨ Sodɔm ɨ, siʼe ndwe e pir, byé a si duho é jobo kʉ, swɨɨ bɨbɛh é monyʉl mpʉ moto mo mpie, dimle bɨbɛh. 30Yé óbe nteme ó, jwɨʼ gwar e gwar yaa é dobo Mwan mo Mʉr óbâʼle nyin ɨ.
31«É dobo laa, mʉr óbe é mie kʉ ɨ, nye l'aka to mbɛr, to kaale mobi me ndɨ é mbɛr tʉŋlʉ ɨ. Jwɨʼ gwar e gwar yaa, waa óbe é peme e, nye l'aka nyamle bula kwar, to nʉa yʉʉ sɔʼɔ. 32Paʼ toŋlo ga myaa mo Lot! 33Mʉr lé ejwɨʼla saa ekamle e tiʼ ye e, nye ódimle ye. Waa lé emɛʼle ó, nye fuo dimle tiʼ ye e, nyiha óbaʼle ye. 34Me elɛɛ bɨn ó: é pum waa, bʉr oba, bé óbe ó é duo gwar: nwaʼ ónʉŋɔ; nuu liʼ. 35É bʉba oba bé óbe lé esie mpumo bler ɨ, nwaʼ ónʉŋɔ; nuu liʼ. [36É jɔʼ yaa, é bʉrʉm oba bé óbe é peme e, nwaʼ ónʉŋɔ; nuu liʼ.]» 37No ó ompʉn be, bé a dî e nye ó: «Da, sa yaa, yé ósyɛɛ nko?»
Nye ntɔʼ bɨha ó: «Gumo muu tir ndɨ ɨ, tɨʼ ó mɨngbaŋ lé efwal ndwe le elie e.»
انتخاب شده:
Lʉkas 17: ozmBad
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2002, Wycliffe Bible Translators, Inc. All rights reserved.