Lʉkas 18
18
Kɨkɛna mo kuho mʉma bé e tiʼà mɨlɔb
1Yesʉs ze sa be kɨkɛna fih, kɨkɛna yaa lé elɛʼle ompʉn be ó, bé ekʉ jala le ejwɨʼla e Zyɛm é jɔʼ yiyɛh, akar tuu. 2Nye a lɛɛ e be ó: «Yé a ze be ó, nuu tiʼà mɨlɔb é yʉʉ nkana, nyɛɛ adwaabe Zyɛm, abe e buʼ e mʉr. 3Tɨʼ é nkana yaa nteme, yé a be ó e guu kuho mʉma. Wé a be ó lé eze-ze jɔʼ yiyɛh nye ye, lé elɛɛ ó: “Sam me ɛ! Lwibɨ me lɔb paʼra wih e mʉr dɔm wam!” 4No ó nye a ngbaa taare peere. Sa gwar, nye a ka lɛɛ é leme we ó: “Dam be mpʉ me ndɨ adwaabe Zyɛm nkʉ dwiibɨ ba nuu mʉr ɨ, 5me ófuo tiʼe kuho mʉma wiʼ lɔb we é l'ocɨcyel, ebe, wé ó njɨ lé eze dɨ ntɨʼ me é jɔʼ yiyɛh. Lɔb we, wé mu ó lé ebʉ me lʉ, ebe, nye é buo tire.”»
6No ó Da a lɛɛ ó: «Gʉa pahle ga sa bɨbla tiʼà mɨlɔb lé elɛɛ é leme we e. 7Zê Zyɛm ódeʼ lé etiʼe mɨpɛha mɨ bʉr mye mɨlɔb myɔɔ é l'ocɨcyel ɛ? Tɨtoʼo! Bɛɛ nteme lé esa zyee lé ejwɨʼla e nye moho e pum! 8Me elɛɛ bɨn ó, nye ókpahbe tiʼe mɨlɔb myɔɔ é l'ocɨcyel. Sa gwar, é dobo Mwan mo Mʉr óbula ze é si nwaʼ ɛ, zê nye ópyal#18.8 Yesʉs, nye elwib wâʼ ó, tiibe e moho efehle e si nwa. Nye óze é moho waa ó, lé eze tiʼe mɨkubla ndwe e l'odwè mɨlɔb é jɔʼ gwar., kœb mʉr ngwar dina lé ejyɛʼ taa buʼo ye boo nye e?»
Kɨkɛna Farizyɛŋ bé e nwɨa tœa
9Yesʉs ntɔʼ sa kɨkɛna yi, lé edweʼle bʉʉ bʉr. Bʉr baa, bé a buʼla-buʼla ó, bé ó ndɨ ocɨcyel o bʉr é mih mo Zyɛm, bé nteme lé ecyɛl bʉʉ bʉr. 10Nye a lɛɛ ó: «Yé a ze be ó, bʉr oba é jahla bii mo Zyɛm lé esa mɨnjwɨʼla. Nwaʼ mʉr é nkɔm oFarizyɛŋ; nuu, nwɨa tœa. 11Farizyɛŋ waa ntɔʼ cyɛb, ze taare lé ejwɨʼla é leme we tʉŋlʉ é mbi wi: “Zyoo e Da Zyɛm, ebe, me abe mpʉ bʉʉ bʉr. Baʼ, bé edɛʼ bɨmɔn byoonkan; bʉʉ, bé ekœʼ é l'ozyɛhozyɛh; bʉʉ nteme, osyɛl o bɨmala. Me edwe go ekiba tɨ, ebe, me abe mpʉ nwɨa tœa nwa. 12Me eti mode é sono ngwar zɔʼ ba. É mobi mam mɨmɛh me lé ebi ɨ, me edwe go nkɔb ewʉm tɨ.” 13Sa gwar, nwɨa tœa a cyɛb ó pɨnʉ. Nye a baakpɛl bɨn ba mih kʉ. Nye a kɛl ó njɨ mobo é lʉ, lé elɛɛ ó: “Da Zyɛm, saʼ ó, empime lo, lé tala é l'efu lam, ebe, me ó syɛl mɨsyem.”» 14Yesʉs ntɔʼ lɛɛ e be ó: «Me elɛɛ bɨn ó, nwɨa tœa waa a ka fiʼ, to mbɛr we ó, nye osi bi mokebe é mih mo Zyɛm, abe mpʉ Farizyɛŋ, ebe, mʉr lé enkɛɛ nyʉl ɨ, nye ófilɔ si; waa lé efil nyʉl si ɨ, nye óbɨnɔ kʉ.»
Yesʉs lé esʉ bwɔɔncyom mocyɛʼ mo mpom
(Mataos 19.13; Markus 10.13)
15Bʉr, bé a si ze pyal boo Yesʉs dam be e bɨcyee, ó nye kɛlɨ bye mobo. É jɔʼ ompʉn be, bé a bee no e, bé ze bâm e be. 16No ó Yesʉs a ze jebe be, ze lɛɛ ó: «Birɨ ga bwɔɔncyom, bé ntaʼ boo me. Afu fo ga be, ebe, jwɨ̀ʼa mo Zyɛm, yé cyela ó, é l'efu e bʉr o ndɨ mpʉ be e! 17Me elɛɛ bɨn cyecye ó nɛɛ: mʉr nyiwɛh ndɨ afil nyʉl si e jwɨ̀ʼa mo Zyɛm mpʉ mancyom ɨ, nye ákwoʼ ni é jwɨ̀ʼa ye.»
Njwɨɨ oYʉden a be é buo bɨsa ɛ
(Mataos 19.16-30; Markus 10.17-31)
18Nuu tamamʉr é kul oYʉden a be ó si dî e Yesʉs ó: «Mbɨambɨa yeʼle, me saʼ wáa mbi sɔʼɔ é l'efu ó, me biʼe tiʼ molu mo mpoʼ mɨmɛh?» 19Yesʉs ze bɨha e nye ó: «Ebe yé go lé ejebe me ó, mbɨambɨa mʉr ɨ? Abe e mʉr ndɨ é mbɨa, njɨ Zyɛm nye ome. 20Gɨ gʉa motie mo Zyɛm. Me elɛɛ ó: “Asa mɨfyɛba. Ajʉ mʉr. Adíbe. Abuʼo mɨɔ go mʉr lɔb. Dwaaba sɔŋ e nyɔŋ go.”»
21Mʉr nɨ ze lɛɛ e nye ó: «Mɨ du motie monɨ mɨmɛh, taare é l'oncyom wam, ze pyal é muh é dobo lɨ.» 22É jɔʼ Yesʉs a joʼo no e, nye ze lɛɛ e nye ó: «Yé eka saa go sa gwar. Toʼ, to bɛma bɨsa bibyɛh go ndɨ e bye e. Go à dwe baanteʼenteʼe mɔn tɨ. É jɔʼ yaa ó go óbi okum e l'ogbaa é lal mo Zyɛm ɨ. Pie tɨ, go òze du me.» 23Njoʼa mʉr waa a joʼo mpɨha waa ɛ, nyʉl kʉ ze cyɛʼ nye, ebe, nye a be ó é twiha bɨsa.
24É jɔʼ Yesʉs a bee no e, nye#18.24 Myʉʉ mɨnjʉ̌m mɨ okalara o grɛk, myé elɛɛ ó: «nyʉl kʉ ze cyɛʼ nye». ntɔʼ lɛɛ ó: «A kɔbla lé eni é jwɨ̀ʼa mo Zyɛm é jɔʼ mʉr ndɨ e l'okum e l'ogbaa twiha ɛ! 25É mpʉ yé ndɨ é kɔbla ó, kamtʉl laŋa é l'egʉa e ndondo e, jwɨʼ gwar e gwar yaa nteme ó ndɨ é bul kɔbla ó, mbil bɨsa niʼe é jwɨ̀ʼa mo Zyɛm ɨ.» 26No ó bʉr o b'a joʼo-joʼo nye e, bé a ze dîila paʼra wɔɔ ó: «Yé be no nɛʼɛ, zé nyɛɛ ókoʼo lé ebi tiʼ molu mo mpoʼ mɨmɛh ɛ?» 27Yesʉs ntɔʼ bɨha e be ó: «Bɨsa bʉr ndɨ akoʼo e, Zyɛm ó ndɨ e nkul esa bye.»
28Pyɛr ntɔʼ lɛɛ ó: «Paʼ bee: bɨh bɨ liʼe bɨsa bih bibyɛh#18.28 Nkʉ: «mɨmbɛr mih mimyɛh», njɨ lé edu go!» 29No ó Yesʉs a lɛɛ e be ó: «Me elɛɛ bɨn cyecye ó nɛɛ: yé abe e mʉr lé eliʼe mbɛr we, myɛl we, obɨɔ be, obyɛl be, le bwan be, ebe jwɨ̀ʼa mo Zyɛm, 30ndɨ abula bi bye zɔʼ é buobuo é jɔʼ yi. Ndwe nteme, pie e l'esie e mbi jɔʼ yi, mʉr waa óbi tiʼ molu mo mpoʼ mɨmɛh.»
Yesʉs lé ebal ompʉn be é lɔb efie le é jɔʼ lɛl
(Mataos 20.17; Markus 10.32)
31Yesʉs ze nʉa Esama le ompʉn ewʉm e l'oba é bʉm. Nye e be ó: «Mbe ga: bɨna mu ó lé eto ga Yerʉsalɛm ó yi. Bɨsa bibyɛh ogwiha o mɨlɔb bé a tile é Kalara Zyɛm, tiibe e Mwan mo Mʉr ɨ, byé ódira. 32Bé òkɛha nteme nye boo bʉr o bɨkul#18.32 «Bʉr o bɨkul», bé ó bʉr o ndɨ abe oYʉden ɨ.. Bé ókpeʼle nye, saŋɔ nye cere, syɛɔ nye mocyeele é mih, 33fuura nye mɨmbihe, jʉ nye. Nye òbula pàh é l'elu elɛl.» 34No ó, ompʉn be, bé a baajoʼo sa gwar é mɨlɔb myaa. Ekan laa, lé a be be ó, fela. Bé a baajoʼo sɔʼɔ é lɔɔ waa wiwɛh.
Yesʉs lé etiʼ ntim
(Mataos 20.29; Markus 10.46)
35É jɔʼ Yesʉs a be, nye mu kunokuno e nkana Yeriko e, nye ntɔʼ pyal ɨ gumo nuu ntim a be e, nyɛɛ é nkpah mpaʼa, lé epyɛh-pyɛh bʉr mobo. 36É jɔʼ nye a joʼo mpampaʼ bʉr lé elaa ɛ, no ó nye a dî sa yé a be lé elaa ɛ. 37No bé a lɛɛ e nye ó: «Yesʉs, mʉr Nazarɛt, ó ma laa nɨ.» 38Nye ze behe Yesʉs. Nye ó: «Yesʉs, Mwan mo David ɔɔ! Jwɨʼɨ me nkoo ɔɔ!» 39É mpampaʼ bʉr, baa b'a be zi dolo e, ze bâm e nye, ó nye diʼe titil. Nyɛɛ kʉ ze lwib lé eyɨm twii ó: «Mwan mo David ɔɔ! Paʼ kʉ jwɨʼ me nkoo ɔɔ!» 40Yesʉs ze cyɛb, ntɔʼ lɛɛ ó, bé ntaʼ nye e nya. É jɔʼ bé a ze e nye kunokuno e Yesʉs ɨ, nye ntɔʼ dî e nye ó: 41«Go egwɨm ó, me saʼ go yé?» Nye ntɔʼ bɨha ó: «Da, paʼ kʉ sa ó, me bâʼla bee ʉʉ!» 42Yesʉs ntɔʼ lɛɛ e nye ó: «Go à bee! Buʼo yo, yi tiʼ go!» 43Cye e cye yaa, nye ntɔʼ bana bee, ze du Yesʉs é koo pihe, lé edwe Zyɛm kum. Bʉr baa bɨbɛh, é jɔʼ bé a bee syɛɛla yaa ɛ, bé ntɔʼ dwe nteme nye kum.
انتخاب شده:
Lʉkas 18: ozmBad
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2002, Wycliffe Bible Translators, Inc. All rights reserved.