JUAN 11
11
Lásarupa waniynin
1Tseynam Lásaru jutiyoq Betaniachow qeshyekarqan, Maryapa i nanan Martapa markanchow. 2(Qeshyeykaq Lásarupa paninmi Marya karqan, Señorta pukutaqwan llusheqnin, chakinkunata aqtsankunawan shupitseqnin). 3Paninkunanam kachayarqan Jesusta niyanampaq: “Señor, kaq key kuyashqeykim qeshyeykan.” 4Wiyarirnam Jesús, nerqan: —Key qeshyaqa manam wanipaqtsu, sinowqa Dyospa gloryampaqmi, Dyospa Tsurin peychow glorifikashqa kanampaq.
5Jesús kuyarqan Martata, nananta i Lásaruta. 6Qeshyanqanta, wiyarirnam, keydakurqan ishkey junaqraq tsey keykanqanchow. 7Tseypitanam, nerqan disípulunkunata: —Aku Judeyata yapey.
8Disípulunkunanam niyarqan: —Rabí, judyukuna kanan qompayashiynikita munayarqon; i ¿yapeyku eywanki washata?
9Jesusnam, yaskerqan: —¿Manaku junaq chunka ishkey órayoq? Junaqpa pureqqa, manam trompisantsu, key mundupa aktsinta rikar; 10peru ampipa pureqqa trompisanmi, mana peychow aktsi kaptin.
11Keyta nirirnam, tseypita peykunata nerqan: —Amíguntsik Lásaruqa pununmi; eywá riyaratsimushaq.
12Tseynam disípulunkuna niyarqan: —Señor, punorqa, kachakárenqachi.
13Peru Jesusqa nerqan keyta Lásaru wanushqanpaqmi; i peykunaqa pensayarqan punukiypaq parlashqantam. 14Tseynam Jesús peykunata kayitsirnin nerqan: —Lásaruqa wanushqam; 15kushikúmi qamkunapeq, mana tseychow kanqáta, kreyiyaneykipaq; kanan aku peyman.
16Tseynam Tomás nerqan; Dídimo jutiyoq, disípulu mayinkunata: —Aku noqantsikpis, peywan wanunapaq.
Jesús: Kawarimiy i kawey
17Jesús, shamurnam tarerqan, Lásaru chusku junaqna sepultúraman churashqata. 18Betanianam karqan Jerusalen serkanchow, chunka pitsqa estadyunow; 19atska Judyukunanam shayámushqa karqan Marta i Maryata, shoqaqnin turimpaq. 20Tseynam Marta, Jesús shamiykaqta wiyarir, yarqorqan taripaqnin; Maryanam keydakorqan wayichow.
21Martanam nerqan Jesusta: —Señor, keychow kaptikiqa, turí manam wanunmantsu karqan. 22Peru kananqa musyámi Dyosta llapan mañakushqeykita, Dyosqa qoshunkim.
23Jesusnam nerqan: —Turiki kawarimonqam.
24Martanam nerqan: —Noqa musyami kawarikamiychow kawarimunanta, shamoq junaqchow.
25Jesusnam nerqan: —Noqam ká kawarimiy i kawey; noqaman kreyeqqa, wanushqa keykarpis kawanqam, 26i llapan kawaq i noqaman kreyeq, manam wanonqatsu wiñeypa. ¿Keyta kreyinkiku?
27Nerqan: —Awmi Señor; noqa kreyerqómi qam Kristu kanqeykita, Dyospa Tsurin key munduman shamushqeykita.
28Keyta nirirnam, eywar qayaramorqan nanan Maryata pakeyllapa nirirnin: —Mayestrum keychow keykan i qayashunkim.
29Pey wiyarir, sharkurnin eyqipa eywarqan Jesusman. 30Jesús manaran yeykorqanraqtsu tunaman, sinowqa keykarqan Marta tarenqanllachow. 31Tseynam wayichow peyta shoqarnin keykaq judyukuna, Marta juklla sharkur yarquriptin rikarnin qatiyarqan nishpa: Sepultúramanmi eywan tseychow waqaq.
32Marya, Jesús keykanqanman chárir, rikeykur, qonquríkorqan chakinman, nishpa: —Señor, keychowtsun kankiman karqan, turí manam wanunmantsu karqan.
33Tseynam Jesús, waqaqta rikarnin, i judyukuna yanaqaqninkunapis waqayaqtin; llakikurkorqan espirituchow i ankuparqan, 34i nerqan: —¿Meymantaq churayarqonki?
Niyarqan: —Señor, shamiy i rikey.
35Jesús waqarqan. 36Tseynam judyukuna niyarqan: —Rikáyey imanowmi kuyanaq.
37Peykunapita wakinnam niyarqan: —¿Wiskupa nawin key kichaq manatsuraq pwedinman rureyta karqan Lásaru, mana wanunampaq?
Lásaru kawarimushqa
38Jesús, yapey allápa ankuparnin, shamorqan sepultúraman. Karqan juk uchku jananman juk rumi churashqa. 39Jesusmi nerqan: —Jorquyey rumita.
Wanushqapa panin, Martanam, nerqan: —Señor, chusku junaqnam, asyannam.
40Jesusnam nerqan: —¿Manaku nerqaq kreyerqa rikankim Dyospa gloryanta?
41Tseynam jorqariyarqan rumita wanushqa churaraqpita. Jesusnam raraman rikarkur, nerqan: —Teyta grasyastam qoq wiyamashqeykita. 42Noqa musyámi imeypis wiyamanqeykita; peru nerqá atskaq jiruroqchow nunakunareykurmi, qam kachamashqeykita kreyiyánanpaq.
43Keyta nirirnam, qaparipa nerqan: —¡Lásaru, jaqman yarqamiy!
44Wanushqa kaqnam yarqaramorqan makinkuna i chakinkuna bendakunawan watashqa, qaqllannam sudaryuwan wankushqa. Jesusnam nerqan: —Paskayey, i dejayey ewkunanta.
Yachatsinakuyan Jesusta wanutsiyanampaq
45Tseynam atskaq judyukuna Maryata yanaqaqnin shamushqakunanam, Jesús rurashqanta rikeykur peyman kreyiyarqan. 46Peykunapita wakinkaqkunanam eywayarqan farisewkunaman i willayarqan Jesús rurashqanta.
47Tseynam prinsipal saserdotikuna i farisewkuna konsilyuta eylluyarqan, i niyarqan: —¿Imatataq rurashun? Key nunaqa atska señalkunatam ruran. 48Tseynowlla jaqirishqaqa, llapanmi kreyiyanqa peyman; i románukuna shayámurnam ushakatsiyanqa santu lugarnintsikta i markantsikta.
49Tseynam Kayfas peykunapita juknin, tsey wata apun saserdoti karnin, nerqan: —Qamkuna manam musyayankitsu ni imata. 50Ni yarpáyankitsu, konbyenimantsikmi juk nuna pweblupaq wanunan, llapan nunakuna mana ushakayanampaq.
51Keyta manam kikinllapitatsu nerqan, sinowqa tsey wata apun saserdoti karmi, profetisarqan Jesús pweblupaq wanunan kanqanta; 52manam pweblunllapaqtsu, sinowqa Dyospa llapan witsikashqa tsurinkunata jukllaman eyllunampaq. 53Tseymi, taqey junaqpita yachatsinakuyarqan wanutsiyanampaq. 54Tseynowpam Jesús purerqannatsu llapankuna rikey judyukunachow, sinowqa karupákurerqan tsey sityupita chusyaq Efrain markaman; tseychow keydakorqan disípulunkunawan.
55Judyukunapa paskwan serkanam karqan; tsey lugarpita atskaqmi eywayarqan Jerusalenman manaraq paskwa kaptin, paqakuyanampaq. 56Jesustanam ashiyarqan, peykuna templuchow keykar, tapunakuyarqan juknin juknimpis. —¿Imataq nirápuyashunki? ¿Manatsuraq fyestaman shamonqa?
57I apun saserdotikuna i farisewkunanam ordenayarqan pipis musyanman meychow keykashqanta, willakuyaptin tsariyanampaq.
اکنون انتخاب شده:
JUAN 11: QUEAN
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Quechua Ancash New Testament © Peruvian Bible Society, 1992.