JUAN 19
19
1Tseynam, Pilátu, Jesusta astatserqan. 2Soldadukunanam awayarqan koronata kashakunapita, i peqanman churayaporqan, i purpurapeq juk mantuta yakatsiyarqan; 3i niyarqan: —¡Salbe judyukunapa Reynin!
I laqyar usheykuyarqan. 4Tseynam Pilátu yapey yarqamorqan, i nerqan: —Rikáyey, waqtamanmi apamú káyiyaneykipaq manam ni ima jutsata peychow tariytsu.
5Jesusnam yarqaramorqan, kasha koronashqa i purpura mantushqa. I Pilátunam nerqan: —¡Kaq keymi key nuna!
6Apun saserdotikuna i wardyakuna rikárirnam, qaparipa, niyarqan: —¡Krusifikey! ¡Krusifikey!
Pilátunam nerqan: —Qamkuna tsariyey, i krusifikáyey; noqaqa manam peychow jutsata taritsu.
7Judyukunanam yaskiyarqan: —Noqakunapa juk leyníkuna kanmi, i leyníkunamannowmi wanonqa, kikinmi Dyospa Tsurin tukun.
8Pilátu keyta wiyarirnam, allápa mantsakarqan. 9I yapey yeykurerqan despáchuman, i Jesusta nerqan: —¿Meypitataq qam kanki?
Jesusnam yaskirqantsu. 10Tseynam Pilátu nerqan: —¿Noqata manaku parlapámanki? ¿Manaku musyanki pwedeq kanqáta krusifikánaqpaq, ó kacharinaqpaq?
11Jesusnam yaskerqan: —Manam ni ima pwedeq keyniki kanmantsu noqapa kontrá, mana rarapita qoshqa kashuptikiqa, tseyreykurmi, qamman entregamaqniy, jatun jutsayoq.
12Tseypitanam Pilátu kacharita munarqan; peru judyukunanam qapariyarqan, nishpa: —Keyta kacharerqa, manam Sésarpa amíguntsu kanki; llapan reytukoqqa, Sésarpa kontranmi.
13Tseynam Pilátu keyta wiyarir, Jesusta waqtaman aparqan, i teykurqan tribunal Enlosadu nishqanman, i ebrewchowqa Gábatam. 14Paskwapaq alistakiymi karqan, i joqta óranow. Tseynam judyukunata nerqan: —¡Kaq keymi Reynikikuna!
15Peykunanam qapariyarqan: —¡Jorqiy! ¡Jorqiy! ¡Krusifikey!
Pilátunam nerqan: —¿Reynikikunataku krusifikáshaq?
Apun saserdotikunanam yaskiyarqan: —¡Sésarpita masqa manam kantsu reyníkuna!
16Tseynam peykunata qoykorqan krusifikashqa kanampaq.
Jesusta krusifikáyan
Tseynam Jesusta apakuyarqan. 17I peynam, krusninta katarkur, yarqurerqan Kalabera nishqan sityuman, i ebrewchow Golgota; 18i tseychowmi krusifikayarqan, peyta ishkaqtawan, Jesusta chowpichow, jukninkunatanam ládunkunachow. 19Pilátunam qellqarqan key jutita i churarqan kruspa peqanman, keynowmi nerqan: JESUS NASARENU, JUDYUKUNAPA REYNIN. 20Atskaq judyukunanam leyiyarqan keyta; tsey sityu Jesusta krusifikayanqan amánullam karqan markaman, key jutinam qellqashqa karqan, ebrewchow, grieguchow i latinchow. 21Pilátutanam judyukunapa apun saserdotinkuna niyarqan: —Ama qellqeytsu: “Judyukunapa Reynin”, sinowqa: “Peymi nerqan: ‘Judyukunapa Reyninmi ká.’ ”
22Pilátunam yaskerqan: —Qellqashqáqa, qellqashqam.
23Soldadukuna Jesusta krusifikárirnam, bestidunkunata rurariyarqan chuskuman, jukta kada soldadupaq. Túnikantapis tsarirkuyarqan, keynam karqan kosturannaq, awashqa umapita urayaq. 24Tseynam ninakuyarqan kikinkunapura: —Ama rachishuntsu, sinowqa sortyarishun, má pipaqshi kanqa.
Keyqa Eskritúra kumplikánampaqmi karqan, keynow nir: Kikinkuna puram bestiydúta rakinakuyarqan i rópa jananchowmi swertita qatiyanqa. I tseynowmi rurayarqan soldadukuna.
25Jesuspa krusnin nowpanchowmi keykarqan maman, mamampa nanan, Kleofaspa warmin Marya i Marya Magdalena. 26Jesús mamanta rikeykur, i kuyanqan disípulu tseychow keykaqta, mamanta nerqan: —Warmi, tsaq tseymi waweyki.
27Tseypitanam nerqan disípulunta: —Tsaq tseymi mameyki.
I tsey órapitanam disípulu chaskerqan wayinchow.
Jesuspa waniynin
28Keypitanam, Jesús llapan tinkurishqanta musyarir, nerqan, Eskritúra kumplikánanpaq: —Yakunámi.
29I tseychowmi karqan juk chaqa binagriwan junta winashqa, tseynam esponjata binagriman tullpuyarqan; isópuman churarkur shiminman chátsiyarqan. 30Jesús, binagrita shoqurkurnam, nerqan: —¡Usharishqanam!
I peqanta puktirkur espiritunta qorqan.
31I tseynam Judyukuna, paskwapaq alistapakiy kaptin, kwerpunkuna jamakiy junaqchow kruschow mana keydanampaq (tsey jamakiy junaqqa allápa jatunmi karqan), rowayarqan Pilátuta chankankunata pakikacharkunampaq, i tseypita jorqashqa kayánanpaq. 32Shayámorqan, soldadukuna, pakiriyarqan punta kaqpa chankankunata i juknin kaqpatapis, peywan krusifikashqata. 33Jesusman chárirnam, wanushqatana rikárir, pakiyarqannatsu chankankunata; 34peru jukninkaq soldadunam lansawan qasqunta tuksir kicharerqan, tsey óram yarqaramorqan yawar i yaku.
35Rikashqa kaqmi willakun i willakiynenqa, rasonpam; pey musyanmi rasonpa nenqanta, qamkunapis kreyiyaneykipaq. 36Key kosaskunam pasarqan Eskritúra kumplikánampaq: Manam tullun pakishqatsu kanqa. 37Juk Eskritúrapis ninmi: Rikáyanqam tuksiyashqanta.
Jesusta panpayan
38Keykuna usheynam, Arimateyapita José, Jesuspa disípulunkaq, judyukunata mantsar, pakeyllapa Pilátuta rowarqan áninanpaq Jesuspa kwerpunta apakunampaq; Pilátunam ánerqan. Tseynam shamur, apakorqan Jesuspa kwerpunta. 39Tseynowmi Nikodemupis, ampipa Jesusta uney bisitaq, shamorqan apamur mírrantin álowes takushqata, pachak libratanow. 40Jesuspa kwerpunta aparkur, wankuyarqan sabanaskunawan pukutaqnin jicheykur, judyukuna panpakur rurayanqanmannow.
41Krusifikayanqan sityuchownam, karqan juk werta, i wertachownam juk mushoq sepultúra, tseyman manam pí churashqaraqtsu karqan. 42Tseynam, judyukunapa paskwampaq alistakiy kaptin, tsey sepultúra amánulla kaptin Jesusta churayarqan.
انتخاب شده:
JUAN 19: QUEAN
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Quechua Ancash New Testament © Peruvian Bible Society, 1992.