JUAN 21
21
Jesús yuripun Galileyachow kikinpakaqkunata
1Tseypitanam, Jesús disípulunkunata yapey yuriporqan Tiberyas qocha ládunchow; i keynowmi yuriporqan: 2Juntum keykáyarqan Simon Pedru, Tomás Dídimukaq nishqan, Natanael Kaná Galileya nishqanpita, Sebedeopa tsurinkuna, ishkey kaq wakin disípulunkunapita. 3Simon Pedrunam nerqan: —Eywá peskaqmi.
Peykunanam niyarqan: —Noqakunapis qamwan eywashun.
Eywar, yeykuyarqan barkaman; tsey ampi manam ni jukta tsariyarqantsu. 4Warareykamuptinnam, Jesús yurimorqan qocha kuchunchow; peru disípulunkunaqa manam reqiyarqantsu Jesús kanqanta. 5I nerqan: —Tsuríkuna, ¿kayápushunkiku imallapis mikunapaq?
Yaskiyarqannam: —Manam.
6Peynam nerqan: —Malleykikunata jitayey barkapa deréchan kaq ládunman i tariyankim.
Tseynam jitayarqan i manam jorqamita pwediyarqantsu allápa atska peskadukuna kaptin. 7Tseynam Jesuspa kuyashqan disípulun nerqan Pedruta: —¡Señormi!
Simon Pedrunam, Señor kashqanta wiyarir, ropanta yakakurkorqan (qotushqam karqan ropanta), i qochaman pintirporqan. 8I wakinkaq disípulukunanam barkawan shayámorqan, málla junta peskaduta sutar, ishkey pachak kukuchinowmi karqan patsaman. 9Patsaman yarqaramurnam rikáriyarqan nina shansheykar churashqata i jananchow peskaduta i tantata.
10Jesusnam nerqan: —Apayámi peskadukunata tsariyanqeykipita.
11Simon Pedru lloqarkurnam, jorqaramorqan mállata patsaman, jatusaq peskadukuna juntata, juk pachak pitsqa chunka kimata; tseytsika keykaptin, málla rachirerqantsu. 12Jesusnam nerqan: —Shayámi, mikuyey.
Ni meyqan disípulunkuna tapíta almitiyarqantsu: ¿Qam, pitaq kanki? Señor kanqanta musyar. 13Jesús, shamurnam, tantata tsarirkur qorqan, i tseynow peskadutapis. 14Keywanqa kima kutinam karqan Jesús disípulunkunata yuriponqan, wanushqakunapita kawariramur.
Jesús Pedruwan
15Mikuriyaptinnam, Simon Pedruta nerqan: —Simon, Jonaspa tsurin, ¿keykunapita masku kuyamanki?
Yaskerqannam: —Awmi, Señor; qam musyankim kuyanqaqta.
Peynam nerqan: —Achkasníkunata mitsi.
16Ishkey kutinam nerqan: —Simon, Jonaspa tsurin, ¿kuyamankiku?
Pedrunam yaskerqan: —Awmi, Señor, qam musyankim kuyanqaqta.
Peynam nerqan: —Úshákunata mitsi.
17Kima kutinam nerqan: —Simon, Jonaspa tsurin, ¿kuyamankiku?
Pedrunam llakikurkorqan kima kutina niptin: “¿Kuyamankiku?” I peynam yaskerqan: —Señor, qam llapantam musyanki; qam musyankim kuyanqaqta.
Jesusnam nerqan: —Ushákunata mitsi. 18Tseqeypa, tseqeypam neq: Jobinllaraq karqa, kikikim wachakákorqeyki, i munashqeykipam eywaq kanki; awkinna karqa, makikikunatam makyanki, i wachakatsishunki jukmi, i apashunki mana munashqeykipam.
19Keyta nerqan, imanow waniywan Dyosta glorifikánampaq kashqanta káyitsir. Keyta nirirnam, yapey nerqan: —Qatimey.
Jesús i kuyashqa disípulun
20Pedru tumaramurnam, rikárerqan Jesuspa kuyashqan disípulu qateqta, kaq keymi kikitararqan peypa ládunchow seynachow, i nerqan: “Señor, ¿pitaq tsey entregashoqniki?” 21Pedru rikárirnam, Jesusta nerqan: —Señor, ¿i keyqa?
22Jesusnam nerqan: —Munapteyqa pey keydatsun noqa shamonqáyaq, ¿imataq qamta? Qamqa qatimey.
23Tseymi key nishqan witsikarqan wawqikunaman, taqey disípulu mana wanunampaq kashqan. Peru Jesusqa nerqan manam wanunampaqtsu, sinowqa: “Pey keydatsun noqa shamunqáyaq, ¿imataq qamta?”
24Keymi key disípulu key kosaskunapaq willakoq, i keykunata qellqaq; i musyantsikmi willakiynin rasonpa kanqanta.
25Kanmi wakin kaq atskaq kosaskunapis Jesús rurashqan, sitsun juklleyllapayan qellqashqa kanman, ními munduchowpis manachi tinkunmantsu librukuna qellqashqa kanampaq. Amen.
انتخاب شده:
JUAN 21: QUEAN
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Quechua Ancash New Testament © Peruvian Bible Society, 1992.